Mga bata sa Primary diha sa klase

Paggamit sa Dali, Sunod Kanako—Alang sa Primary

Pagpangandam sa Pagtudlo sa Primary

Ang personal ug pamilya nga pagtuon sa panimalay kinahanglang mao ang sentro sa pagkat-on sa ebanghelyo. Tinuod kini alang kanimo ug sa mga bata nga imong gitudloan. Samtang mangandam ka sa pagtudlo, sugdi pinaagi sa pagbaton og imong kaugalingon nga mga kasinatian sa mga kasulatan. Ang imong labing importante nga pagpangandam mahitabo samtang mosunod ka sa ebanghelyo, magsiksik sa mga kasulatan, ug magtinguha sa inspirasyon sa Espiritu Santo.

Ang Dali, Sunod Kanako—Alang sa mga Indibidwal ug mga Pamilya usa ka mahinungdanon nga bahin sa imong personal nga pagtuon ug sa imong pagpangandam sa pagtudlo. Makatabang kini kanimo nga makaangkon og mas lawom nga panabot sa doktrinal nga mga baroganan nga makita diha sa mga kasulatan. Ang Dali, Sunod Kanako—Alang sa Primary maghatag og mga kalihokan alang sa kadaghanan sa mga kasulatan ug mga istorya nga ang mga bata gidapit sa pagtuon diha sa panimalay atol sa semana.

Atol sa imong pagpangandam, mga hunahuna ug mga impresyon moabot kanimo mahitungod sa mga bata nga imong gitudloan. Makadawat ka og mga panabot kon sa unsang paagi ang mga baroganan diha sa mga kasulatan mopanalangin sa ilang mga kinabuhi. Magiyahan ka sa pagdasig kanila sa pagdiskobre niadto nga mga baroganan samtang magkat-on sila gikan sa mga kasulatan alang sa ilang mga kaugalingon ug uban sa ilang mga pamilya.

babaye nga nagtuon sa mga kasulatan

Mga Ideya sa Pagtudlo

Samtang mangandam ka sa pagtudlo, mahimong makaangkon ka og dugang nga inspirasyon pinaagi sa pagsuhid sa mga latid sa pagtudlo niini nga kapanguhaan. Ayaw hunahunaa kini nga mga ideya isip nakahan-ay nga mga instruksiyon apan isip mga sugyot aron sa pagdasig sa kaugalingon nimong inspirasyon. Nakaila ka niini nga mga bataa, ug mas mailhan nimo sila samtang makig-uban ka nila diha sa klase. Ang Ginoo nakaila usab kanila, ug Siya modasig kanimo sa labing maayo nga mga paagi sa pagtudlo ug pagpanalangin kanila.

Ikaw adunay daghan pang mga kapanguhaan nga anaa aron magamit nimo samtang mangandam ka, lakip na ang mga ideya diha sa Dali, Sunod Kanako—Alang sa mga Indibidwal ug mga Pamilya ug sa mga magasin sa Simbahan. Alang sa dugang nga impormasyon kabahin niini ug sa ubang mga kapanguhaan, tan-awa sa “Dugang nga mga Kapanguhaan alang sa Pagtudlo sa mga Bata” niini nga kapanguhaan.

Pipila ka Butang nga Angayang Hinumdoman

• Sa matag panahon nga makigkita ka sa mga bata, paghunahuna og mga paagi nga matabangan nimo sila nga mobati sa gugma sa Langitnong Amahan ug ni Jesukristo ug makaila sa impluwensiya sa Espiritu Santo.

• Ang mga ginikanan adunay nag-unang responsibilidad sa pagtudlo sa ilang mga anak. Isip magtutudlo, ikaw adunay importanteng responsibilidad sa pagsuporta, pag-awhag, ug paglig-on sa pagkat-on sa ebanghelyo diha sa panimalay. Magmahimong sensitibo sa mga bata kansang mga ginikanan wala magtudlo sa ebanghelyo diha sa ilang panimalay. Ilakip ang tanang bata sa mga panaghisgotan sa ebanghelyo, bisan unsa pa ang mga kahimtang sa ilang panimalay.

• Ang pagbalik-balik maayo. Ang mga bata makakat-on sa mga kamatuoran sa ebanghelyo sa mas epektibong paagi kon kini nga mga kamatuoran ibalik-balik sa pagtudlo pinaagi sa lainlaing kalihokan. Kon imong makita nga ang usa ka kalihokan sa pagkat-on epektibo ngadto sa mga bata, ikonsiderar ang pagbalik-balik niini, ilabi na kon nagtudlo ka sa mas gagmay nga mga bata. Mahimo usab nimong rebyohon ang usa ka kalihokan gikan sa miaging leksiyon.

• Ang Langitnong Amahan gusto nga molampos ka isip usa ka magtutudlo. Mihatag Siya og daghang kapanguhaan sa pagtabang kanimo, lakip na ang mga miting sa konseho sa magtutudlo. Niini nga mga miting mahimo kang magpakitambag sa ubang mga magtutudlo mahitungod sa mga hagit nga imong giatubang. Mahimo usab nimong hisgotan ug sundon ang mga baroganan sa Kristohanon nga pagtudlo.

• Kon nagtudlo ka sa mas gagmay nga mga bata ug nagkinahanglan og dugang nga tabang, tan-awa ang “Pagtubag sa mga Panginahanglan sa Mas Gagmay nga mga Bata” dinhi niini nga kapanguhaan.

Kini nga kapanguhaan naglakip og mga latid sa pagtudlo alang sa matag semana sa tuig. Sa mga Dominggo nga walay ipahigayon nga Primary tungod sa kinatibuk-ang komperensiya, komperensiya sa stake, o sa bisan unsang rason, ang mga pamilya giawhag nga magpadayon sa pagbasa sa Bag-ong Tugon diha sa panimalay sumala sa gilatid nga eskedyul diha sa Dali, Sunod Kanako—Alang sa mga Indibidwal ug mga Pamilya. Ayaw kabalaka bahin sa mga leksiyon nga wala nimo mahimo; itudlo ang gi-assign nga sinemanang latid.