“Ikaw Usa ka Magtutudlo sa mga Bata,” Dali, Sunod Kanako—Alang sa Primary: Bag-ong Tugon 2023 (2023)
“Ikaw Usa ka Magtutudlo sa mga Bata,” Dali, Sunod Kanako—Alang sa Primary: 2023
Ikaw Usa ka Magtutudlo sa mga Bata
Gitawag ka sa Dios sa pagtudlo sa Iyang mga anak sumala sa pamaagi sa Manluluwas. Gi-set apart ka niini nga calling pinaagi sa awtoridad sa Iyang balaan nga pagkapari. Bisan kon ikaw dili batid nga magtutudlo, samtang magpakabuhi ka nga takos, mag-ampo kada adlaw, ug magtuon sa mga kasulatan, ang Langitnong Amahan mohatag kanimo sa impluwensiya ug gahom sa Espiritu Santo aron motabang kanimo nga magmalamposon (tan-awa sa 2 Nephi 33:1).
Kadtong gisalig sa imong pag-atiman mao ang mga anak sa Langitnong Amahan, ug nasayod Siya kon unsay ilang gikinahanglan ug unsaon sa pagtabang kanila sa labing maayong paagi. Kon ikaw mainampoong magtinguha sa impluwensiya sa Espiritu Santo, Siya mogiya kanimo samtang mangandam ka ug samtang ikaw magtudlo. Ipadayag Niya kanimo kon unsay kinahanglan nimong isulti ug unsay kinahanglan nimong buhaton (tan-awa sa 2 Nephi 32:5).
Ayaw gayod ipakaubos ang abilidad sa usa ka bata nga makasabot sa ebanghelyo. Sa tanang aspeto sa ilang kinabuhi, kining bililhon nga mga bata kanunay nga makadawat og impormasyon, magmugma ug maghashas sa ilang mga opinyon, ug maghimo ug magpaambit sa ilang mga nadiskobrehan. Labing tinuod kini sa ebanghelyo, tungod kay ang mga bata andam ug mahinamon nga makakat-on sa yano nga mga kamatuoran niini. Ang ilang hugot nga pagtuo sa espirituhanon nga mga butang lig-on ug putli, ug ang matag higayon usa ka oportunidad sa pagkat-on. Andam silang mobuhat sa unsay ilang nakat-onan, bisan kon ang ilang panabot dili pa kompleto. Kinahanglan nga ingon niini ang pagdawat natong tanan sa ebanghelyo. Sama sa gitudlo sa Manluluwas: “Bisan kinsa nga dili modawat sa Gingharian sa Dios sama sa usa ka bata dili makasulod niini” (Lucas 18:17).
Ang calling sa pagtudlo sa mga bata usa ka sagradong pagsalig, ug normal ra kini nga mobati nga mabug-atan usahay. Apan hinumdomi nga ang imong Langitnong Amahan mitawag kanimo, ug Siya mopaluyo kanimo. Kini ang buhat sa Ginoo, ug samtang ikaw moserbisyo “sa tibuok [nimo] nga kasingkasing, gah[o]m, hunahuna ug kusog” (Doktrina ug mga Pakigsaad 4:2), Iyang padak-an ang imong mga kapasidad, mga gasa, ug mga talento, ug ang imong pagserbisyo mopanalangin sa kinabuhi sa mga bata nga imong gitudloan.