“Disyembre 4–10. Gipadayag 1–5: ‘Alang sa Nating Karnero, … Himaya ug Gahom, Hangtod sa Kahangtoran,’” Dali, Sunod Kanako—Alang sa Primary: Bag-ong Tugon 2023 (2021)
“Disyembre 4–10. Gipadayag 1–5,” Dali, Sunod Kanako—Alang sa Primary: 2023
Disyembre 4–10
Gipadayag 1–5
“Alang sa Nating Karnero, … Himaya ug Gahom, Hangtod sa Kahangtoran”
Ang basahon sa Gipadayag mahimong lisod sabton sa mga bata, apan naglangkob usab kini og importante nga doktrina nga maanindot ug yano.
Dapita ang Pagpaambit
Dapita ang mga bata sa pagpaambit kon unsa kaha ang ilang bation kon makita nila si Jesukristo sa usa ka panan-awon. Hangyoa sila sa pagpaambit og bisan unsa nga ilang nahibaloan mahitungod sa panan-awon ni Juan bahin kang Jesus diha sa basahon sa Gipadayag.
Itudlo ang Doktrina: Mas Gagmay nga mga Bata
Ako makapadan-ag sa kahayag sa Manluluwas.
Sa Gipadayag 1:20, ang Manluluwas mitandi sa Iyang Simbahan ngadto sa mga kandelero. Tabangi ang mga bata nga makasabot nga sila makapadan-ag sa kahayag sa Manluluwas pinaagi sa pagsunod sa Iyang mga pagtulon-an.
Posible nga mga Kalihokan
-
Ipakita sa mga bata ang mga hulagway sa lainlaing mga tinubdan sa kahayag, sama sa usa ka bombilya, kandila, ug sa adlaw. Samtang imong basahon ang “Ang pito ka butanganag suga mao ang pito ka simbahan” (Gipadayag 1:20), dapita ang mga bata sa pagtudlo ngadto sa hulagway sa kahayag nga gihisgotan niini nga bersikulo. Tabangi ang mga bata sa paghisgot kon sa unsang paagi nga kita, isip mga miyembro sa Simbahan ni Jesus, mahimong sama sa kahayag sa kandila—sama pananglit, kon mobuhat kita og maayo nga mga butang alang sa uban.
-
Kantaha ang usa ka awit mahitungod sa pagkahimong usa ka kahayag ngadto sa uban, sama sa “Si Jesus Buot nga Ako Mahimong Bidlisiw” (Songbook sa mga Bata, 38). Ipaambit ang mga paagi nga nakita nimo ang mga bata nga nagsunod sa ebanghelyo ni Jesukristo ug nahimong kahayag ngadto sa mga nanaglibot kanila. Ipaambit kon sa unsang paagi nga ang pagkahimong usa ka kahayag ngadto sa uban nakatabang kanimo nga mobati nga mas duol ngadto sa Langitnong Amahan ug kang Jesukristo.
Makadapit ako ni Jesukristo nganhi sa akong kinabuhi.
Ang pasumbingay ni Jesus nga nagbarog sa may pultahan ug nanuktok makatabang sa mga bata nga makasabot nga gusto Niya nga mapaduol kanila.
Posible nga mga Kalihokan
-
Samtang imong basahon ang Gipadayag 3:20, ipakita ang hulagway sa Manluluwas diha sa may pultahan gikan sa latid niini nga semana diha sa Dali, Sunod Kanako—Alang sa mga Indibidwal ug mga Pamilya. Dapita ang mga bata sa paghanduraw nga si Jesus nanuktok sa pultahan sa ilang mga panimalay. Pahisgota sila kon unsa ang ilang buhaton.
-
Dapita ang mga bata sa pagsulti kanimo mahitungod sa mga panahon nga naghulat sila sa usa ka tawo nga mobisita sa ilang panimalay nga mahinamon sila nga makakita. Sama sa unsa kaha ang pagbati nga maghulat niana nga tawo nga manuktok sa pultahan? Unsa kaha kon dili gayod nato pasudlon ang maong tawo? Basaha ang Gipadayag 3:20, ug papuli-puliha ang mga bata sa paggunit og hulagway ni Jesus ug magpakaaron-ingnon nga nanuktok sa pultahan. Ang ubang mga sakop sa klase mahimong magpakaaron-ingnon nga moabli sa pultahan. Unsay atong mabuhat aron tugotan nga mapaduol si Jesus kanato, bisan tuod dili kita makakita Kaniya?
Si Jesukristo mao lamang ang takos nga mahimo nakong Manluluwas.
Nakat-onan ni Juan gikan sa iyang panan-awon nga si Jesukristo (girepresentahan sa usa ka nating karnero) lamang ang mahimo natong Manluluwas ug makatuman sa plano sa Amahan (girepresentahan sa sinelyohan nga basahon).
Posible nga mga Kalihokan
-
Sa dili pa ang klase, pusta ang usa ka kopya sa Libro sa mga Hulagway sa Ebanghelyo gamit ang papel o lambo. Gamit ang pipila ka importanteng mga pulong gikan sa Gipadayag 5:1–10, ihulagway ang panan-awon nga nakita ni Juan. Ipakita sa mga bata ang libro, ug sultihi sila nga ang bugtong paagi sa pag-abli sa libro mao ang pagpangita sa hulagway ni Jesus nga imong gitagoan diha sa lawak. Sa dihang makit-an nila ang hulagway, ablihi ang libro ug ipaambit ngadto sa mga bata ang pipila ka hulagway diha sa basahon nga nagrepresentar sa anaa nga mga panalangin tungod sa Pag-ula ni Jesukristo (sama sa usa ka templo, bunyag, ug mga pamilya). Pagpamatuod nga ang Manluluwas lamang ang bugtong makahimong posible niadto nga mga butang.
-
Ilaktod ang panan-awon nga gihulagway diha sa Gipadayag 5:1–10, ug dapita ang mga bata sa pagdrama-drama kon unsay gibati ni Juan ug sa uban atol sa lainlaing bahin sa panan-awon. Pananglitan, mahimo silang magpakaaron-ingnon nga mohilak kon walay makaabli sa basahon, o mahimo silang maglipay sa dihang giablihan kini sa Manluluwas.
Itudlo ang Doktrina: Mas Magulang nga mga Bata
Kon ako mapasaligon sa ebanghelyo sa Manluluwas, makadawat ako og dako nga mga panalangin sa langit.
Unsay gipasabot alang kanimo sa pagkahimong “init-init man lang, dili gayod init ug dili usab bugnaw”? Hunahunaa ang mga paagi sa pagtabang sa mga bata nga mahimong sukwahi sa init-init—ang pagkahimong madasigon sa ilang pasalig ngadto sa Manluluwas ug sa Iyang ebanghelyo.
Posible nga mga Kalihokan
-
Basaha og dungan ang Gipadayag 3:5, 12, 21, ug ipasabot ang bisan unsang pulong nga tingali wala mahibaloi sa mga bata. Unsa ang gipasabot sa “modaog”? Dapita ang mga bata sa pagdrowing sa usa sa mga panalangin nga gisaad niini nga mga bersikulo ug ipaambit kini sa klase.
-
Basaha og dungan ang Gipadayag 3:15–16. Hangyoa ang mga bata sa paghisgot mahitungod sa mga butang nga labing mapuslanon o matagamtam kon kini init (sama sa sabaw) o bugnaw (sama sa ice cream). Sa unsang paagi nga ang pagkahimong init-init [lukewarm] mahitungod sa Manluluwas makapugong kanato gikan sa mga panalangin nga gisaad diha sa mga bersikulo 5, 12, ug 21?
-
Diha sa pisara, isulat ang init-init, uban sa pipila ka pulong nga pareho og kahulogan, sama sa dili sinsero, walay pakabana, o kaswal. Gamita kini nga mga pulong aron sa pagtabang sa mga bata nga makasabot kon nganong dili gusto ang Ginoo nga mahimo kitang init-init. Unsa nga mga pulong ang atong mahunahunaan nga maghulagway sa paagi nga gusto Siya nga kita mamahimo? Ipaambit kon nganong gusto nimo nga mahimong hingpit nga mapasaligon ngadto sa Manluluwas, ug dapita ang mga bata sa pagpaambit sa ilang mga hunahuna usab.
Makapili ako nga himoong parte sa akong kinabuhi si Jesukristo.
Sa unsang paagi nimo matabangan ang mga bata nga imong gitudloan nga ablihan ang ilang kasingkasing ug kinabuhi alang sa gahom ug impluwensiya ni Jesukristo?
Posible nga mga Kalihokan
-
Samtang imong basahon ang Gipadayag 3:20, ipakita ang hulagway sa Manluluwas diha sa may pultahan gikan sa latid niini nga semana diha sa Dali, Sunod Kanako—Alang sa mga Indibidwal ug mga Pamilya. Aron sa pagtabang sa mga bata nga makakuha og kahulogan gikan sa hulagway, dapita sila nga magpares sa pagtubag sa mga pangutana nga sama niini: Ngano kaha nga si Jesus nanuktok sa pultahan? Nganong wala may ablihanan [doorknob] sa gawas sa pultahan? Unsay buot ipasabot nga pasudlon si Jesus sa atong kinabuhi?
-
Hangyoa ang mga bata sa pagsulat diha sa pisara og lainlaing paagi sa “pag-abli sa pultahan” alang kang Jesus. Ang pipila ka ehemplo mahimong maglakip sa pagserbisyo sa uban, pagbasa sa mga kasulatan, pagtuman sa mga pakigsaad nga atong gihimo sa bunyag, ug pag-ambit sa sakramento.
Si Jesukristo mao lamang ang takos nga mahimo nakong Manluluwas.
Ang panan-awon nga gihulagway diha sa Gipadayag 5 mitudlo nga si Jesukristo lamang ang takos ug makahimo sa pagpahigayon sa Pag-ula ug sa pagluwas kanato gikan sa sala.
Posible nga mga Kalihokan
-
Dapita ang mga bata sa pagsulti mahitungod sa usa ka panahon dihang nagkinahanglan sila og tawo nga mobuhat og butang nga dili nila mahimo sa ilang kaugalingon. Hangyoa sila sa pagbasa sa Gipadayag 5:1–10 ug sa pagpangita sa unsay gikinahanglang buhaton nga ang usa ka tawo lamang ang bugtong makahimo (ipasabot nga ang Nating Karnero mao si Jesukristo ug ang basahon nagrepresentar sa plano sa Dios). Unsa ang gibuhat ni Jesus alang kanato nga walay laing tawo ang makahimo?
-
Hangyoa ang mga bata sa pagpangita og usa ka himno o awit sa mga bata nga nagpamatuod kabahin ni Jesukristo. Unsa ang gitudlo sa mga pulong sa awit mahitungod ni Jesukristo? Sa unsang paagi nga kini nga awit sama sa himno sa pagdayeg nga gikanta mahitungod ni Jesukristo diha sa Gipadayag 5:9–10?
Awhaga ang Pagkat-on diha sa Panimalay
Dapita ang mga bata sa pagpaambit sa ilang mga pamilya sa mga paagi nga makadapit sila sa impluwensiya sa Manluluwas diha sa ilang mga panimalay.
Pagpalambo sa Atong Pagtudlo
I-awhag ang balaang pagtahod. Usa ka importante nga aspeto sa balaang pagtahod mao ang paghunahuna mahitungod sa Langitnong Amahan ug ni Jesukristo. Mahimo nimong pahinumdoman ang mga bata nga magbaton og balaang pagtahod pinaagi sa hinay nga pagkanta o paghagonghong og usa ka awit o sa pagpakita og hulagway ni Jesus.