nating karnero naglubog sa sagbot

Disyembre 4–10

Pinadayag 1–5

“Ang Himaya, ug ang Gah[o]m, ngadto … sa Kordero hangtod sa Kahangt[o]uran”

Hunahunaa ang pagsulat sa imong mga pangutana mahitungod sa unsay imong nabasahan sa Pinadayag. Dayon ikaw makapangita alang sa mga tubag sa imong mga pangutana o makahisgot niini uban sa usa ka sakop sa pamilya o sa mga klase sa Simbahan.

I-rekord ang Imong mga Panghunahuna

Nakigbisog ka ba sukad sa pagpahayag ngadto sa uban unsay imong gibati atol sa usa ka gamhanan nga espirituhanong kasinatian? Ang kada adlaw nga pinulongan kulang sa paghulagway sa espirituhanong mga pagbati ug mga panghunahuna. Tingali mao kini kon ngano si Juan migamit sa ingon ka mabulukon nga simbolismo ug larawan sa paghulagway sa iyang halangdong pagpadayag. Makapahayag ra unta siya og yano nga iyang nakita si Jesukristo, apan aron sa pagtabang kanato nga makasabot sa iyang kasinatian, iyang gihulagway ang Manluluwas nga naggamit sa mga pulong sama niini: “Ang iyang mga mata sama sa kalayo nga nagasiga,” “gikan sa iyang ba-ba nagagula ang usa ka mahait nga espada,” ug ang “iyang nawong sama sa adlaw nga magasidlak diha sa labing kakusog” (Pinadayag 1:14–16). Samtang magbasa ka sa basahon sa Pinadayag, sulayi ang pagdiskobre sa mga mensahe nga gusto ni Juan nga imong makat-onan ug mabati, bisan kon wala ka makasabot sa kahulogan luyo sa matag simbolo. Ngano kaha nga iyang gitandi ang mga kongregasyon sa Simbahan ngadto sa mga kandiliro, si Satanas ngadto sa usa ka dragon, ug si Jesukristo ngadto sa usa karnero? Sa kataposan, dili kinahanglan nga imong sabton ang matag simbolo diha sa Pinadayag aron masabtan ang importanting mga tema niini, lakip sa labing mahinungdanong tema niini: Si Jesukristo ug ang Iyang mga sumusunod magmadaugon batok sa mga gingharian sa mga tawo ug ni Satanas.

icon sa personal nga pagtuon

Mga Ideya alang sa Personal nga Pagtuon sa Kasulatan

Ang mga panan-awon ni Juan nagtudlo mahitungod sa plano sa Langitnong Amahan sa pagluwas sa Iyang mga anak.

Ang basahon sa Pinadayag mahimong lisod sabton, apan ayaw pagpakawala og kadasig. Ang saad ni Juan mahimong modasig kanimo sa pagpadayon sa pagpaninguha: “Bulahan sila kinsa nagbasa, ug sila kinsa naminaw ug nakasabot sa mga pulong niini nga panagna, ug naghupot niadto nga mga butang diin nahisulat dinhi, kay ang panahon sa pag-anhi sa Ginoo nagkaduol na” (Hubad ni Joseph Smith, Pinadayag 1:3 [sa Giya ngadto sa mga Kasulatan]).

Usa ka paagi sa pagtuon sa Pinadayag mao ang pagpangita og mga koneksyon ngadto sa plano sa kaluwasan. Kining kinatibuk-ang pagpasabot mahimong motabang kanimo:

• Mga Kapitulo 5 ug 12 naghulagway og mga panghitabo diha sa kinabuhi nga wala pa dinhi sa yuta.

• Mga Kapitulo 6–11, 13–14, 16–19 naghulagway sa mortal nga kinabuhi ug sa mga panghitabo diha sa kasaysayan sa yuta.

• Mga Kapitulo 2–3, 15, 20–22 naghulagway sa Kataposang Paghukom ug sa himaya nga naghulat sa matinud-anon.

Samtang ikaw nagbasa, pangutan-a ang imong kaugalingon, “Unsa ang gitudlo niini kanako mahitungod sa plano sa Dios? Unsa ang nahimo sa Dios sa pagtabang kanako sa pagbuntog sa dautan ug sa pagbalik ngadto Kaniya? Unsa ang Iyang mga saad ngadto sa matinud-anon?”

Kini mahimong makatabang usab nga mahibalo nga ang Doktrina ug mga Pakigsaad 77 nagpasabot og pipila sa mga simbolo nga gigamit sa Pinadayag. Agi og dugang, ang Hubad ni Joseph Smith nagtin-aw og pipila ka mga tudling sa Pinadayag, busa tan-awa ang mga footnote ug ang Giya ngadto sa mga Kasulatan kanunay.

Tan-awa usab sa Giya ngadto sa mga Kasulatan, “Juan, Anak nga Lalaki ni Zebedeo,” “Pinadayag ni Juan.”

Pinadayag 1

Si Jesukristo mao ang Buhi nga Anak sa Buhi nga Dios.

Ang unang kapitulo sa Pinadayag naghulagway sa pagpakita ni Jesukristo ngadto ni Juan sa usa ka panan-awon. Tingali makahimo ka og lista sa tanang butang nga gisulti dinhi niini nga kapitulo mahitungod ni Jesukristo, lakip kon kinsa Siya, unsa ang Iyang gibuhat alang kanato, ug sama Siya sa unsa.

Ang pipila sa mga butang nga imong makat-onan magagikan sa mga simbolo. Palandonga kon unsa kaha ang gitinguha sa Ginoo sa pagtudlo kanimo mahitungod sa iyang Kaugalingon pinaagi niini nga mga simbolo. Sama pananglit, hatagi og pagtagad nga ang Manunubos nagtawag sa Iyang Kaugalingon og “ang sinugdanan ug ang kataposan” ug “ang una ug ang ulahi.” Ngano kaha nga kini nga mga ulohan mga makahuluganon? Unsa ang gitudlo niini nga mga ulohan kanimo mahitungod sa Manluluwas?

Pinadayag 2–3

Si Jesukristo personal nga nakaila kanako ug motabang kanako sa pagbuntog sa akong mga hagit.

Ang mga pulong sa Manluluwas diha sa Pinadayag 2–3 nagpadayag nga Siya nakasabot sa mga kalamposan ug mga pakigbisog nga talagsaon sa matag branch sa Simbahan sa panahon ni Juan. Siya midayeg sa mga paningkamot sa mga Santos ug usab mipahimangno kanila sa mga butang nga ilang gikinahanglan nga usbon. Unsa ang imong nakat-onan gikan sa pagdayeg ug mga pahimangno sa Manluluwas?

Nasabtan usab sa Manluluwas ang imong mga kalamposan ug mga pakigbisog, ug gusto Siya nga motabang kanimo. Timan-i ang kanunay nga mga saad nga Siya nagtanyag ngadto niadto kinsa nakabuntog. Unsa ang nakapadani kanimo mahitungod niini nga mga saad? Unsa kaha ang gusto sa Ginoo kanimo nga buntugon? Unsa ang imong mabuhat sa pagdawat sa Iyang panabang?

Pinadayag 4–5

Si Jesukristo lamang ang makahimo sa plano sa Langitnong Amahan nga posible.

Unsa ang imong nakat-onan mahitungod sa Langitnong Amahan gikan sa Pinadayag 4 ug mahitungod ni Jesukristo gikan sa Pinadayag 5? Hunahunaa kon sama sa unsa kaha kon kitang tanan makaamgo nga si Jesukristo (ang “Kordero”) mohimo sa plano sa Langitnong Amahan nga posible (ang Manluluwas makahimo sa “pag-abli sa basahong linukot, ug … pag-abli sa pito ka mga timri” [Pinadayag 5:5]). Ngano nga si Jesukristo lamang ang makahimo niini? Unsaon nimo sa pagpakita sa imong hugot nga pagtuo diha Kaniya isip imong Manluluwas?

Tan-awa usab sa Job 38:4–7; Doktrina ug mga Pakigsaad 77:1–7.

icon sa pamilya nga pagtuon

Mga Ideya alang sa Pamilya nga Pagtuon sa Kasulatan ug Home Evening

Pinadayag 1:20.Nganong gitandi ni Jesus ang Iyang Simbahan ngadto sa mga tontonganan sa kandila? (tan-awa sa Mateo 5:14–16). Pagkanta og usa ka awit mahitungod kon unsaon nato pagkahisama sa usa ka kahayag diha sa tongtonganan sa kandila, sama sa “Dan-ag” (Songbook sa mga Bata, 96).

Pinadayag 2–3.Pagpakaaron-ingnon nga si Juan gihangyo sa paghatag og mensahe sa imong pamilya sama sa mensahe nga iyang gihatag ngadto sa mga simbahan sa iyang panahon. Unsa ang iyang isulti nga maayo ang dagan? Sa unsang paagi ikaw molambo?

Pinadayag 3:15–16.Human mabasa kini nga mga bersikulo, ang imong pamilya mahimong makainom og dagaang nga ang lami mas maayo nga init o bugnaw. Unsa ang gipasabot sa dagaang sa espirituhanong paagi?

Pinadayag 3:20.Ipakita ang hulagway sa Manluluwas nga nagtuktok sa pultahan (tan-awa ang kataposan niini nga latid) samtang ang imong pamilya nagbasa sa Pinadayag 3:20. Nganong nanuktok si Jesus kay sa mosulod lamang? Ang mga sakop sa pamilya makapuli-puli sa pagtuktok sa pultahan. Dayon lain nga tawo sa pamilya makasugyot og usa ka paagi nga kita makahimo sa “pag-abli sa pultahan” ngadto sa Manluluwas ug sa papasulod sa mga sakop sa pamilya. Unsa ang bation nga ang Manluluwas anaa sa atong panimalay?

Pinadayag 4:10–11.Unsa ang kahulogan sa pagsimba sa Langitnong Amahan? Unsa ang atong nahibaloan mahitungod Kaniya nga naghimo kanato nga buot mosimba Kaniya?

Pinadayag 5:6, 12–13.Ngano nga si Jesukristo gitawag og ang “Kordero”? Unsay gitudlo niini nga ulohan kanato mahitungod Kaniya?

Alang sa dugang nga mga ideya sa pagtudlo sa mga bata, tan-awa sa latid karon nga semana sa Dali, Sunod Kanako—Alang sa Primary.

Gisugyot nga himno: “Jesus, Kanhi Kab[o]s,” Mga Himno, nu. 117.

Pagpalambo sa Atong Pagtudlo

Awhaga ang mga pangutana. Ang mga pangutana mao ang timailhan nga ang mga sakop sa pamilya andam sa pagkat-on ug sa paghatag og panabot ngadto kon giunsa nila sa pagtubag sa unsay gitudlo kanila. Tudloi ang imong pamilya unsaon sa pagpangita og mga tubag diha sa mga kasulatan. (Tan-awa sa Pagtudlo sumala sa Pamaagi sa Manluluwas, 25–26.)

Si Kristo nagtuktok sa pultahan

Let Him In [Pasudla Siya], ni Greg K. Olsen