“Agosto 7–13. Mga Taga-Roma 1–6: ‘Ang Gahom sa Dios aron Pagluwas,’” Dali, Sunod Kanako—Alang sa Primary: Bag-ong Tugon 2023 (2022)
“Agosto 7–13. Mga Taga-Roma 1–6,” Dali, Sunod Kanako—Alang sa Primary: 2023
Agosto 7–13
Mga Taga-Roma 1–6
“Ang Gahom sa Dios aron Pagluwas”
Unsa nga mga pag-aghat ang imong nadawat samtang imong gibasa ang Mga Taga-Roma 1–6? Kini nga mga pag-aghat makatabang kanimo sa pagpili gikan sa mosunod nga mga ideya sa pagtudlo o sa pag-andam og imong kaugalingon.
Dapita ang Pagpaambit
Dapita ang mga bata sa pagpaambit kon unsay ilang gibuhat agig tubag sa bisan unsa nga mga pagdapit nga imong gihatag kanila diha sa leksiyon sa miaging semana.
Itudlo ang Doktrina: Mas Gagmay nga mga Bata
Akong mapakita ang akong hugot nga pagtuo ni Jesukristo pinaagi sa pagsunod Kaniya.
Si Pablo mitudlo nga ang ebanghelyo adunay gahom sa pagdala og kaluwasan ngadto sa tanan nga magpuyo pinaagi sa hugot nga pagtuo diha ni Jesukristo. Unsaon nimo pagtabang ang mga bata sa pagpakita sa ilang hugot nga pagtuo diha ni Jesukristo pinaagi sa pagsunod Kaniya?
Posible nga mga Kalihokan
-
Basaha ang Mga Taga-Roma 1:17 ngadto sa mga bata, ug tabangi sila sa pagsag-ulo sa pulongan nga “Ang gihimong matarong sa Dios mabuhi pinaagi sa [hugot nga] pagtuo.” Mahimo ka nga mo-assign og usa ka pulong gikan niana nga pulongan ngadto sa matag bata ug hangyoa sila sa pagsulti niana nga pulong kon imo silang itudlo. Ipasabot nga kini nga pulongan nagpasabot nga kinahanglang magbaton kita og hugot nga pagtuo diha ni Jesukristo. Pangutan-a ang mga bata kon nasayod ba sila kon unsa ang hugot nga pagtuo. Ipakita ang usa ka hulagway ni Jesukristo ug ipasabot nga kita nagtuo nga Siya tinuod bisan og wala kita makakita Kaniya. Kini mao ang hugot nga pagtuo—ang pagtuo sa usa ka butang bisan og wala kita makakita niini.
-
Ipasabot nga atong mapakita ang atong hugot nga pagtuo kang Jesukristo pinaagi sa pagsunod Kaniya. Tagoi palibot sa lawak ang mga hulagway sa mga tawo nga nagbuhat sa unsay gipabuhat kanato ni Jesus. Papuli-puliha ang mga bata sa pagpangita ug sa paghulagway sa mga litrato. Unsa ang atong mahimo aron sa pagsunod kang Jesus?
-
Hangyoa ang usa sa mga bata sa pagpiyong sa iyang mga mata, ug giyahi siya latas sa lawak paingon ngadto sa usa ka hulagway ni Jesus. Kon itugot sa oras, pasulaya usab ang ubang mga bata. Tabangi ang mga bata nga makasabot nga makasunod sila sa mga pagtulon-an ni Jesus sama sa ilang pagsunod sa imong giya.
Ang mabunyagan susama sa pagkahimong usa ka bag-o nga tawo.
Ang mga bata nga imong gitudloan nangandam alang sa bunyag. Unsa man ang ilang makat-onan mahitungod sa bunyag gikan sa Mga Taga-Roma 6?
Posible nga mga Kalihokan
-
Dapita ang mga bata sa pagsulti og balik sa pulongan nga “Magkinabuhi sa bag-ong kinabuhi” (Mga Taga-Roma 6:4). Sultihi ang mga bata kon unsay kahulogan niini alang kanimo. Sama pananglit, mahimo kang mopaambit og mga panumdoman mahitungod sa adlaw nga ikaw nabunyagan ug maghisgot kon sa unsang paagi nga ang imong bunyag nakatabang kanimo nga mahimong mas mahisama ni Jesukristo. Gamita ang pahina sa kalihokan niini nga semana aron sa pagtudlo sa mga bata nga ang bunyag nagtabang kanato nga mahimong usa ka bag-o nga tawo.
-
Kon duna man sa mga bata ang nakatambong ug bunyag, hangyoa sila sa pagpaambit sa ilang kasinatian. O ipakita ang litrato sa usa ka tawo nga gibunyagan (tan-awa sa Libro sa mga Hulagway sa Ebanghelyo, mga nu. 35, 103–4). Tabangi ang mga bata nga makasabot nga panahon sa bunyag mohimo kita og mga saad nga mahimong sama ni Jesus. Dapita sila sa pagdrowing og mga hulagway sa ilang kaugalingon nga gibunyagan ug sa pagpaambit sa unsay ilang mahimo aron mangandam alang sa ilang mga bunyag.
-
Kantaha uban sa mga bata ang usa ka awit mahitungod sa bunyag, sama sa “Kon Ako Bunyagan” (Songbook sa mga Bata, 53). Unsa ang atong makat-onan mahitungod sa bunyag gikan niini nga awit?
Ang bunyag nagsimbolo sa pagsugod og bag-o nga kinabuhi isip usa ka disipulo ni Kristo.
Itudlo ang Doktrina: Mas Magulang nga mga Bata
Akong mapakita ang akong hugot nga pagtuo ni Jesukristo pinaagi sa pagsunod Kaniya.
Si Pablo mitudlo nga ang ebanghelyo adunay gahom sa pagdala og kaluwasan ngadto sa tanan nga magpuyo pinaagi sa hugot nga pagtuo diha ni Jesukristo. Ang hugot nga pagtuo kang Jesukristo mao ang unang baroganan sa ebanghelyo. Modasig kini kanato sa pagsunod sa mga sugo. Unsaon nimo sa pagtabang ang mga bata nga mas makasabot sa hugot nga pagtuo?
Posible nga mga Kalihokan
-
Hangyoa ang usa ka bata sa pagpangita sa Roma diha sa usa ka mapa. Tabangi ang mga bata nga makasabot nga sa sunod nga pipila ka semana, magkat-on sila gikan sa mga sulat nga gihimo ni Pablo ngadto sa mga miyembro sa Simbahan sa lainlaing dapit, nga magsugod sa iyang sulat ngadto sa mga taga-Roma.
-
Isulat ang teksto gikan sa Mga Taga-Roma 1:16 diha sa pisara, nga ilisan og mga blangko ang pipila ka pulong. Hangyoa ang mga bata nga tan-awon ang kasulatan ug sulatan ang mga blangko. Dapita ang mga bata sa pagpaambit kon unsay kahulogan alang kanila sa “Dili ko ikaulaw ang Maayong Balita [ebanghelyo ni Kristo]”.
-
Dapita ang usa ka bata sa pagbasa og kusog sa Mga Taga-Roma 1:17, ug hangyoa ang ubang mga bata sa pagpaminaw sa usa ka pulong nga gibalik-balik. Unsay gipasabot sa “mabuhi pinaagi sa [hugot nga] pagtuo”? Tabangi ang mga bata sa pagpangita og kahulogan sa hugot nga pagtuo diha sa usa ka kapanguhaan sama sa Giya ngadto sa mga Kasulatan, “Hugot nga Pagtuo” (scriptures.ChurchofJesusChrist.org). Unsa kaha ang kalainan sa atong mga kinabuhi kon wala kitay hugot nga pagtuo diha ni Jesukristo?
-
Pakit-a ang mga bata og usa ka tanom ug usa ka liso, ug pangutana kon sa unsang paagi nga atong matabangan ang liso nga mahimong tanom. Ipasabot nga kon kita motanom ug mobisbis sa usa ka liso, gipakita nato nga aduna kitay hugot nga pagtuo nga motubo kini. Unsaon nato sa pagpakita nga aduna kitay hugot nga pagtuo ni Jesukristo? Ikonsiderar ang pagkanta og usa ka awit mahitungod sa hugot nga pagtuo, sama sa “Hugot nga Pagtuo” (Songbook sa mga Bata, 50–51), isip kabahin niini nga kalihokan.
Kitang tanan nagkinahanglan ni Jesukristo aron mapasaylo sa atong mga sala.
Gusto ni Pablo nga makasabot ang mga taga-Roma nga ang kaluwasan moabot lamang pinaagi kang Jesukristo ug sa Iyang grasya. Pamalandongi kon unsaon nimo sa pagtudlo niini nga kamatuoran ngadto sa mga bata.
Posible nga mga Kalihokan
-
Hatagi ang matag bata og pulongan gikan sa Mga Taga-Roma 3:23–24, nga gisulat diha sa usa ka piraso nga papel. Dapita ang mga bata sa pagbutang sa mga pulongan sa husto nga pagkahan-ay ug sa pagbasa og dungan sa mga bersikulo. Pangutan-a ang mga bata kon unsay ilang nakat-onan gikan niini nga mga bersikulo. Ipasabot nga ang “grasya” diha sa bersikulo 24 nagpasabot sa gasa sa gugma ug kaluoy sa Manluluwas, nga naghimong posible alang kanato nga makadawat og kapasayloan alang sa atong mga sala ug mahimong mas maayo.
-
Pagbitay og hulagway sa taas nga parte sa bungbong o sa laing dapit nga dili makab-ot sa mga bata kon sila ra. Pasulaya sila sa pagkab-ot niini, ug itandi kini sa unsay gitudlo ni Pablo diha sa Mga Taga-Roma 3:23. Dayon tabangi sila nga makab-ot ang hulagway. Unsay nabuhat sa Manluluwas alang kanato nga dili nato mahimo sa atong kaugalingon? Dapita ang mga bata sa pagpaambit sa unsay ilang bation mahitungod sa Manluluwas kon maghunahuna sila mahitungod sa unsay Iyang nabuhat ug mabuhat aron sa pagtabang kanila.
Ang mabunyagan susama sa pagkahimong usa ka bag-o nga tawo.
Gitudlo ni Pablo nga ang bunyag nagsimbolo sa kamatayon ug Pagkabanhaw ni Kristo. Nagsimbolo usab kini nga gipabangon nga “magkinabuhi sa bag-ong kinabuhi” (Mga Taga-Roma 6:4). Atong mabag-o ang atong pasalig nga magkinabuhi sa bag-ong kinabuhi sa matag higayon nga moambit kita sa sakramento.
Posible nga mga Kalihokan
-
Dapita ang usa ka bata sa pagbasa sa Mga Taga-Roma 6:3–6. Unsay gisulti ni Pablo nga ang bunyag mao ang “mahiusa”?
-
Hisgoti kon sa unsang paagi ang bunyag nagsimbolo sa kamatayon ug pagkabanhaw. Makatabang ang pagpakita og hulagway sa usa ka bunyag. Nganong ang kamatayon ug pagkabanhaw maayo nga mga simbolo sa unsay mahitabo kon bunyagan kita?
-
Basaha og dungan ang mga pag-ampo sa sakramento (tan-awa sa Doktrina ug mga Pakigsaad 20:77, 79). Pahinumdomi ang mga bata nga kon moambit kita sa sakramento, atong gibag-o ang pasalig nga kita mosunod ni Jesukristo nga atong gihimo sa dihang gibunyagan kita. Sa unsang paagi nga ang sakramento nagtabang kanato nga “magkinabuhi sa bag-ong kinabuhi”?
-
Dapita ang mga bata sa pagdrowing og mga hulagway nga nagpakita kon unsay kahulogan diha kanila nga “magkinabuhi sa bag-ong kinabuhi.” Mahimong ibitay sa mga bata kini nga mga hulagway diha sa ilang mga lawak aron sa pagtabang kanila nga mahinumdom nga mohimo og maayo nga mga pagpili.
Awhaga ang Pagkat-on diha sa Panimalay
Isugyot nga ang mga bata mohangyo sa mga sakop sa pamilya nga sultihan sila kon makakita sila sa mga bata nga naghimo og butang nga nagpakita og hugot nga pagtuo.
Pagpalambo sa Atong Pagtudlo
Lig-ona ang pagsalig sa mga bata. Dayga ang mga bata kon moapil sila diha sa klase. Kini mao ang usa ka paagi sa pagpalambo sa ilang pagsalig nga sila makakat-on sa ebanghelyo.