“Hunyo 5–11. Juan 14–17: ‘Pabilin Kamo sa Akong Gugma,’” Dali, Sunod Kanako—Alang sa Primary: Bag-ong Tugon 2023 (2022)
“Hunyo 5–11. Juan 14–17,” Dali, Sunod Kanako—Alang sa Primary: 2023
The Last Supper [Ang Kataposang Panihapon], ni William Henry Margetson
Hunyo 5–11
Juan 14–17
“Pabilin Kamo sa Akong Gugma”
Pag-ampo aron masayod sa mga panginahanglan sa mga bata nga imong gitudloan samtang mobasa ka sa Juan 14–17. Ang Dali, Sunod Kanako—Alang sa mga Indibidwal ug sa mga Pamilya makatabang sa pagsuporta sa imong pagtuon, ug kini nga latid makahatag kanimo og mga ideya kon unsaon sa pagtudlo ang mga bata diha sa imong klase.
Dapita ang Pagpaambit
Aron sa pagtabang sa mga bata sa pagpaambit sa unsay ilang nakat-onan sa panimalay, hatagi og kahigayonan ang matag bata sa paggunit og papel nga kasingkasing ug sa pagpaambit og usa ka butang nga iyang gibuhat aron sa pagpakita og gugma alang sa uban.
Itudlo ang Doktrina: Mas Gagmay nga mga Bata
Akong gipakita ang akong gugma alang kang Jesukristo pinaagi sa pagtuman sa Iyang mga sugo.
Tabangi ang mga bata nga makasabot nga sila makapakita sa Manluluwas nga sila nahigugma Kaniya pinaagi sa pagtuman sa Iyang mga sugo.
Posible nga mga Kalihokan
-
Tabangi ang mga bata sa pagsulti sa Juan 14:15. Hangyoa sila sa pagsulti sa “Kon nahigugma kamo kanako” kon imo nang ipataas ang papel nga kasingkasing. Hangyoa sila sa pagsulti sa “Tumana ninyo ang akong mga sugo” kon imo nang ipataas ang mga kasulatan.
-
Tabangi ang mga bata nga maghunahuna sa pipila sa mga sugo ni Jesus. Dapita sila sa pagsugyot og mga paagi nga sila makatuman sa matag sugo. Pagpamatuod nga ang pagbuhat niini nga mga butang nagpakita sa atong gugma alang kang Jesukristo.
-
Kantaha og dungan ang usa ka awit mahitungod sa mga sugo, sama sa “Sunda ang Kasugoan” (Songbook sa mga Bata, 68–69).
-
Buhata ang dula diha sa pahina sa kalihokan niini nga semana uban sa mga bata.
Juan 14:26–27; 15:26; 16:13–14
Ang Espiritu Santo motabang kanako.
Si Jesus mitudlo sa Iyang mga disipulo sa importante nga mga kamatuoran mahitungod sa Espiritu Santo. Ikonsiderar kon sa unsang paagi kini nga mga kamatuoran makapanalangin sa mga bata nga imong gitudloan.
Posible nga mga Kalihokan
-
Ipakita ang litrato nga Ang Kataposang Panihapon (Libro sa mga Hulagway sa Ebanghelyo, nu. 54). Ipasabot sa mga bata nga diha sa Kataposang Panihapon, si Jesus mitudlo sa Iyang mga disipulo mahitungod sa Espiritu Santo. Ipaambit ang pipila sa mga kamatuoran nga Iyang gitudlo sa Juan 14:26–27; 15:26; 16:13–14.
ImaheSi Jesus nga nakig-istorya sa mga disipuloThe Last Supper [Ang Kataposang Panihapon], ni Clark Kelley Price
-
Ipaambit ang usa ka kasinatian sa dihang ang Espiritu Santo mihupay kanimo, migiya kanimo, o mitabang kanimo nga mahibalo sa kamatuoran. Pagpamatuod nga ang Espiritu Santo makatabang sa mga bata sa susama nga mga paagi.
-
Dungan sa mga bata, kantaha ang usa ka awit mahitungod sa Espiritu Santo, sama sa “Ang Espiritu Santo” (Songbook sa mga Bata, 56). Dapita sila sa pagpaminaw sa mga butang nga gihisgotan diha sa awit nga buhaton sa Espiritu Santo.
Mahimo akong masayod sa Langitnong Amahan ug ni Jesukristo.
Si Jesukristo mitudlo nga ang “kinabuhing dayon” mao ang pagkaila sa “bugtong matuod nga Dios ug kang Jesukristo.” Samtang ang mga bata nga imong gitudloan makaila Kanila, makakaplag sila og espirituhanon nga kalig-on nga mopanalangin kanila sa ilang tibuok nga kinabuhi ug motabang kanila nga makabaton og kinabuhing dayon.
Posible nga mga Kalihokan
-
Basaha ang Juan 17:3, ug hangyoa ang mga bata sa pagpaminaw kon kinsa ang gusto ni Jesus nga atong mailhan. Ipakita ang pipila ka litrato nga nagrepresentar sa mga paagi nga kita makaila sa Langitnong Amahan ug ni Jesukristo, sama sa mga litrato sa mga kasulatan, usa ka pamilya nga nagkat-on og dungan, ug usa ka tawo nga nagserbisyo og laing tawo. Ipakulob ang mga litrato, ug dapita ang mga bata nga magpuli-puli sa pagbali niini ug sa paghulagway sa unsay anaa diha sa litrato. Sa unsang paagi nga kini nga mga butang makatabang kanato nga makaila sa Langitnong Amahan ug ni Jesus?
-
Hisgoti uban sa mga bata ang mahitungod sa mga butang nga ilang gibuhat aron mas makaila sa ilang mga higala. Unsaon nato aron mas makaila sa Langitnong Amahan ug ni Jesukristo? Pagpaambit og mga paagi nga imo kining nabuhat.
Itudlo ang Doktrina: Mas Magulang nga mga Bata
Akong gipakita ang akong gugma alang kang Jesukristo pinaagi sa pagtuman sa Iyang mga sugo.
Samtang imong basahon kini nga mga tudling sa imong personal nga pagtuon, hunahunaa ang mga bata nga imong gitudloan. Sa unsang paagi nga sila mapanalanginan kon makasabot sila nga ang ilang pagkamasulundon usa ka timaan sa ilang gugma alang Kaniya?
Posible nga mga Kalihokan
-
Dapita ang mga bata sa pagpaambit og mga paagi nga si Jesus mipakita nga masulundon Siya sa Langitnong Amahan. Ipakita ang mga hulagway gikan sa kinabuhi sa Manluluwas aron sa pagtabang kanila (tan-awa sa Libro sa mga Hulagway sa Ebanghelyo, mga nu. 34–35, 56–57). Hangyoa ang mga bata sa paghisgot mahitungod sa mga higayon sa dihang misunod sila sa Langitnong Amahan.
-
Dapita ang usa ka bata sa pagbasa sa Juan 14:15. Papuli-puliha ang mga bata sa pagdrowing og mga hulagway nga nagrepresentar og tawo nga nagsunod sa usa ka sugo, samtang ang ubang mga bata motag-an kon unsa ang iyang gidrowing. Alang sa mga ehemplo sa mga sugo, tan-awa ang Alang sa Kalig-on sa mga Kabatan-onan nga booklet (2022). Sa unsang paagi nga ang pagsunod niini nga mga sugo nagpakita sa Manluluwas nga gihigugma nato Siya?
Ang Espiritu Santo mogiya, mohupay, ug mopamatuod sa kamatuoran.
Ang mga bata nga imong gitudloan nakadawat na ba sa gasa sa Espiritu Santo? Unsa ang ilang nahibaloan mahitungod kon sa unsang paagi nga ang Espiritu Santo makatabang kanila? Hunahunaa kon unsaon nimo nga matabangan sila nga mas makasabot sa mga tahas sa Espiritu Santo.
Posible nga mga Kalihokan
-
Hatagi ang mga bata sa mosunod nga mga bersikulo aron basahon nga magpares: Juan 14:26; 15:26; ug 16:13. Hangyoa sila sa pagpangita og mga pulong nga nagtudlo kanila kon unsa ang ginabuhat sa Espiritu Santo. Isulat ang mga pulong diha sa pisara.
-
Pagpaambit og kasinatian sa dihang ang Espiritu Santo migiya kanimo, mihupay kanimo, mipasidaan kanimo, o mipamatuod kabahin sa kamatuoran diha kanimo. Dapita ang mga bata sa pagpaambit og bisan unsa nga mga kasinatian nga nasinati nila. Giunsa nila pag-ila sa impluwensiya sa Espiritu Santo?
-
Dapita ang matag bata sa pagdrowing sa iyang nawong sa usa ka bulsita. Pasigai og flashlight, nga nagrepresentar sa Espiritu Santo, pasulod sa matag bulsita. Dayon sudli ang mga bulsita og mga butang nga makababag sa kahayag, sama sa mga piraso sa panapton, aron sa pagtudlo nga ang atong sayop nga mga pagpili makalimita sa impluwensiya sa Espiritu Santo sa atong kinabuhi. Ipakuha sa mga bata ang mga butang gikan sa ilang mga bulsita aron sa pagrepresentar sa paghinulsol.
Gusto sa Langitnong Amahan ug ni Jesus nga makaila ako Kanila.
Mapanalanginan nimo ang mga kinabuhi sa mga bata pinaagi sa pagtabang kanila nga mas makaila sa Langitnong Amahan ug ni Jesukristo.
Posible nga mga Kalihokan
-
Ipakita ang usa ka tanom (o hulagway sa tanom) samtang ang mga bata magpuli-puli sa pagbasa sa mga bersikulo diha sa Juan 15:1–9. Sa unsang paagi nga si Jesus sama sa usa ka punoan sa paras [vine]? Sa unsang paagi nga kita sama sa mga sanga? Unsa ang atong mahimo aron kita “magpabilin,” o magpaduol ngadto, sa Manluluwas?
-
Basaha og kusog ang Juan 17:3. Pangutan-a ang mga bata kon unsay ilang gibuhat aron makaila sa Langitnong Amahan ug ni Jesukristo. Ipaambit kon sa unsang paagi nga ikaw nag-anam sa pagkaila Kanila.
Awhaga ang Pagkat-on diha sa Panimalay
Awhaga ang mga bata sa pagpaambit ngadto sa ilang pamilya og usa ka awit nga bag-ohay nilang nakat-onan sa klase o sa panahon sa pagpanganta.
Pagpalambo sa Atong Pagtudlo
Ipahiangay ang mga kalihokan. Kon nagtudlo ka og mas gagmayng mga bata, makakita ka og dugang nga mga ideya nga mahimo nimong ipahiangay alang sa imong klase dinhi sa latid sa seksiyon alang sa mas magulang nga mga bata. Sa samang paagi, ang mga kalihokan alang sa mas gagmayng mga bata mahimong ipahiangay sa pagtudlo og mas magulang nga mga bata.