Ti Maikadua a Yaay, ni Harry Anderson

Mayo 22–28

Joseph Smith—Mateo 1; Mateo 24–25; Marcos 12–13; Lucas 21

“Umayto ti Anak ti Tao”

Utobem no ania ti nasken a masursuro dagiti ubbing a sursuruam maipapan iti Joseph Smith—Mateo 1; Mateo 24–25; Marcos 12–13; ken Lucas 21. Nawayaka a mangibagay kadagiti kapanunotan para kadagiti in-inauna nga ubbing iti daytoy a balabala para kadagiti in-inaudi nga ubbing ken vice versa.

Yawis ti Panagbibinninglay

Mangitugot iti klase iti maysa a banag wenno ladawan a mainaig iti maysa kadagiti pangngarig wenno estoria iti daytoy a babasaen ita a lawas (kas iti lana a mangibagi iti sangapulo a babbalasang wenno sensilio a mangibagi kadagiti talento wenno kuarta ti balo). Idawatmo kadagiti ubbing a mangibinglay no ania ti ammoda maipapan iti pangngarig wenno estoria.

Isuro ti Doktrina: In-inaudi nga Ubbing

Joseph Smith—Mateo 1:31

Sakbay ti yaay manen ni Jesus, maikasabanto ti ebanghelio iti intero a lubong.

Maysa a tanda nga agsublinto ni Jesus iti mabiit ket maisursuro ti ebangheliona iti intero a lubong. Makatulong dagiti ubbing a mangipatungpal iti daytoy a padto babaen ti panangibinglay iti ebanghelio.

Dagiti Mabalin nga Aktibidad

• Ipakita ti maysa a mapa, globo, wenno ladawan ti daga (kitaen iti Libro ti Arte ti Ebanghelio, num.3) ken tulongam dagiti ubbing a mangisao iti, “Daytoy nga Ebanghelio … maikasabanto iti intero a lubong” (Joseph Smith—Mateo 1:31). Apay a kayat ti Dios a dumngeg iti ebangheliona ti amin nga annakna?

• Awisem dagiti ubbing nga agmartsa iti lugarda kabayatan iti aggigiddan a panangkantayo iti “I Want to Be a Missionary Now” wenno “Called to Serve” (Children’s Songbook, 168, 174).

• Ipabuyam ti video nga “I’ll Go Where You Want Me to Go” (ChurchofJesusChrist.org). Bayat ti panagbuya dagiti ubbing, tulongam ida nga agbilang kadagiti wagas a makaibinglayda iti ebanghelio a makitada iti video. Ania pay dagiti dadduma a wagas iti panangibinglay iti ebanghelio a mapanunotda?

Maikasabanto ti ebanghelio iti intero a lubong. Ladawan a Pammadayaw ti NASA Johnson Space Center

Mateo 25:14–30

Mabalinko nga usaren dagiti sagut nga inted kaniak ti Dios.

Taktakuaten dagiti babassit nga ubbing dagiti sagut ken kabaelanda. Tulongam ida a makaawat a naggapu dagitoy a sagut ken kabaelan iti Nailangitan nga Ama.

Dagiti Mabalin nga Aktibidad

• Mangitugot iti sumagmamano a sensilio a mausar bayat ti panangisaritam iti pangngarig dagiti talento, a masarakan iti Mateo 25:14–30. Mabalinmo nga idawat iti tallo nga ubbing a mangibagi iti tallo nga adipen. Ilawlawag nga iti aldaw ni Jesus, dagiti talento maitudo iti kuarta, ngem ita nga agdama dagiti talento ket mabalin a kaipapananna a dagiti sagut ken kabaelantayo.

• Idawat kadagiti ubbing a manginagan kadagiti wagas a nakatulong kadakuada dagiti nagannak, kakabsat, mannursuro, wenno gagayyemda. Ania dagiti kabaelan nga adda kadagitoy a tao a nakatulong kadakuada nga agserbi iti dadduma?

• Mangisuratka iti ababa a surat kadagiti ubbing a mangibaga iti tunggal maysa kadakuada maipapan kadagiti sagut wenno kabaelan a madlawmo kadakuada. Bayat ti panangibinglaymo iti tunggal maysa kadagiti ubbing iti sagsagut a makitam kadakuada, allukoyem ida a mangpadur-as iti sagsagutda ken usarenda nga agserbi iti dadduma.

Mateo 25:31–46

Kayat ni Jesus nga agserbiak iti dadduma.

Agserbitayo iti Nailangitan nga Ama ken ni Jesucristo babaen iti panagserbi kadagiti tao iti aglawlawtayo. Tulongam dagiti ubbing a mangpanunot kadagiti wagas a makapagserbida kadagiti dadduma.

Dagiti Mabalin nga Aktibidad

• Gupgopem ti pangngarig iti Mateo 25:34–46. Tulongam dagiti ubbing a makaawat a no agserserbitayo kadagiti dadduma, agserserbitayo ken ni Jesus.

• Igganam ti ladawan ti maysa nga ubing karaman ti maysa a ladawan ni Jesus a nakalinged iti likudan daytoy. Ania ti maaramidtayo a makapagserbi iti daytoy nga ubing? Ikkaten ti ladawan ti ubing ken ilawlawagmo a no agserbitayo iti tunggal maysa, agserserbitayo ken ni Jesus.

• Awisem dagiti ubbing a mangidrowing kadagiti ladawan ti bagbagida nga agserserbi iti dadduma kadagiti wagas nga iladawan ti Mangisalakan iti Mateo 25:35–36. Kiddawen iti dadduma pay nga ubbing a patanganda no ania dagiti idrowdrowingda.

• Awisem dagiti ubbing a mangibinglay kadagiti padasda idi nangipakita ti maysa a tao kadakuada wenno dagiti pamiliada iti serbisio a kas ken Cristo.

Isuro ti Doktrina: In-inauna nga Ubbing

Joseph Smith—Mateo 1:31

Sakbay ti yaay manen ni Jesus, maikasabanto ti ebanghelio iti intero a lubong.

Makatulong dagiti ubbing a sursuruam a mangikasaba iti ebanghelio iti intero a lubong sakbay ti Maikadua a Yaay ti Mangisalakan.

Dagiti Mabalin nga Aktibidad

• Awisem dagiti ubbing a mangibinglay kadagiti bendision a naawatdan wenno awatendanto gapu ta miembroda iti Simbaan ni Cristo. Aggigiddan a basaen ti Joseph Smith—Mateo 1:31; ken kiddawen kadagiti ubbing no kasano a bendisionanto ti ebanghelio dagiti annak ti Dios iti intero a lubong.

• Ipakitam kadagiti ubbing ti maysa a mapa ti lubong wenno ti pagilianyo, ken tulongam ida a mangilasin iti sumagmamano a lugar a nangikasabaan ti maysa a miembro ti pamilia wenno gayyem iti ebanghelio iti mision.

• Awisem ti sumagmamano nga ubbing nga umay a nakasagana a mangibinglay no kasano a nayam-ammo ti ebanghelio kadagiti miembro ti pamiliada wenno kapuonanda.

• Kiddawem ti tunggal ubing a mangisurat iti nagan ti maysa a tao a mabalinna a kasarita maipapan ken ni Jesucristo wenno awisenna iti simbaan. Kiddawem pay kadagiti ubbing a mangilista kadagiti banag a mabalinda nga aramiden tapno agbalinda a misionario itan.

Mateo 25:1–13

Pagrebbengak ti bukodko a kumbersion ken ni Jesucristo.

Isuro ti pangngarig ti sangapulo a babbalasang a saan a mabalin a bulodentayo ti kumbersiontayo iti Mangisalakan manipud iti dadduma. Kasano a matulongam dagiti ubbing nga umawat iti pagrebbenganda para iti bukodda a kumbersion?

Dagiti Mabalin nga Aktibidad

• Kiddawem iti maysa nga ubing nga umay a nakasagana a mangibinglay no kasano a nasursurona ti maipapan ti pangngarig ti sangapulo a babbalasang iti pagtaengan itoy a lawas.

• Agdrowing iti maysa a lampara iti pisarra, ken suratam daytoy iti pammaneknek. Mangted iti tunggal ubing iti maysa a papel a nagsukog a kas sangatedted ti lana, ket kiddawem iti tunggal ubing nga isurat ditoy ti maysa a banag nga aramidennanto tapno agbalin nga ad-adda a kumbert iti Mangisalakan. Ikapetmo dagiti tedtedda iti pisarra iti lawlaw ti lampara.

• Awisem dagiti ubbing a mangtulong kenka nga agaramid iti listaan dagiti banag nga aramiden nga agsagana para iti maysa a naisangsangayan a sangaili. Kasano a maipada wenno maigiddiat dagitoy a banag kadagiti wagas a naespirituan a pakapagsaganaantayo para iti Maikadua a Yaay ti Mangisalakan?

• Iti lima a piraso ti papel, isuratmo dagiti banag a saan a mabulod. Iti lima a sabali pay a piraso, isuratmo dagiti banag a mabalin a mabulod. Paglalaoken dagiti piraso, ken kiddawen kadagiti ubbing nga urnosenda dagitoy iti daytoy dua a grupo. Aggigiddan a basaen ti Mateo 25:1–13. Apay a napateg a saantayo nga agpannuray iti dadduma para iti kumbersiontayo ken ni Jesucristo?

Mateo 25:14–46

Iti Maudi a Panangukom, itedtayonto iti Apo ti pakaammuan maipapan ti biagtayo.

Kalpasan ti Panagungar, ukomennatayonto ti Apo a maibatay iti panagtungpaltayo kadagiti bilinna ken panangawattayo iti pangsubbot a sakripisiona. Ti pangngarig dagiti talento ken ti pangngarig ti karnero ken dagiti kalding ket mangisuro kadatayo maipapan iti daytoy Maudi a Panangukom.

Dagiti Mabalin nga Aktibidad

• Awisem ti kagudua iti klase a mangbasa iti Mateo 25:14–30 ken ti sabali pay a kagudua a mangbasa iti Mateo 25:31–46. Kiddawem kadagiti grupo a mangyakem kadagiti pangngarig para iti klase. Ania ti isursuro ti Apo kadatayo kadagitoy a pangngarig?

• Awisem dagiti ubbing a mangbasa iti Mateo 25:35–36 iti sagsangaparis ken agaramid iti listaan dagiti banag a maaramidda a mangipakita iti ayatda para ken ni Jesucristo.

Yallukoy ti Panagsursuro iti Pagtaengan

Kiddawem kadagiti ubbing a mangibinglay iti pamiliada dagiti wagas a pakapagbalinanda a nasaysayaat a misionario ken kasaritada dagiti pamiliada maipapan kadagiti tao a mabalin a pangibinglayanda iti ebanghelio.

Panangpadur-as iti Panangisurotayo

Dumngeg wenno mangyakem iti maysa nga estoria. Gapu ta paggugusto dagiti ubbing dagiti estoria, agsapulka kadagiti wagas a mangiraman kadakuada kadagiti estoria iti nasantuan a kasuratan nga ibinglaymo. Mabalinda ti mangiggem kadagiti ladawan wenno banag, mangidrowing kadagiti ladawan ti estoria, mangyakem kadagiti estoria, wenno tumulong a mangisarita iti estoria. Ulitem dagiti estoria a makatulong kadakuada a mangbigbig kadagiti napapateg a detalye ken pannursuro iti ebanghelio.