Si Jesukristo nagpahiyum samtang naglingkod uban sa nagpahiyum nga bata

Hingpit nga Gugma, ni Del Parson

Disyembre 2–8

1–3 Juan; Judas

“Ang Dios Gugma”

Ang Mga Sulat ni Juan ug ni Judas nagtudlo mahitungod sa gugma ug kahayag sa Langitnong Amahan. Samtang magtuon ka niining semanaha, pamalandungi nganong ang mga bata nga imong gitudloan nagkinahanglan sa Iyang kahayag ug gugma diha sa ilang kinabuhi. Hinumdumi ang pagkonsiderar sa tanang kalihokan nga gisugyot niini nga outline, dili lang kadtong gisulat alang sa edad sa grupo nga imong gitudloan.

Irekord ang Imong mga Impresyon

pagpaambit nga icon

Awhaga ang Pagpaambit

Dapita ang mga bata sa pagpaambit kon sa unsang paagi nga gibati nila ang gugma sa Langitnong Amahan o nganong gihunahuna nila nga ang Langitnong Amahan sama sa kahayag.

pagtudlo nga icon

Itudlo ang Doktrina

Mas Gagmay nga mga Bata

1 Juan 1:5–7; 2:8–11

Ang pagsunod ni Jesus naghatag og kahayag sa akong kinabuhi.

Sa unsang paagi ang mga pagkumpara ngadto sa pisikal nga kahayag ug kangitngit makatabang nimo sa pagtudlo sa mga bata mahitungod sa kahayag nga gidala sa Langitnong Amahan diha sa ilang mga kinabuhi?

Posible nga mga Kalihokan

• Hangyoa ang mga bata sa pagngalan og mga butang nga nagmugna og kahayag. Tabangi sila nga makasabut sa mga benepisyo sa kahayag, sama sa pagtabang sa mga tanom nga motubo, pagtugot kanato nga makakita, ug paghatag og kainit. Dapita ang mga bata nga magpulipuli sa pagpasiga og flashlight nganha sa usa ka hulagway ni Jesukristo samtang moingon sila, “Ang Dios kahayag” (1 Juan 1:5). Ipamatuod nga ang Langitnong Amahan ug si Jesukristo makahatag og kahayag sa atong kinabuhi kon mosunod kita sa mga sugo.

• Pangitngiti ang klasehanan ug dapita ang mga bata sa pagsugyot og mga paagi nga ang kahayag madala sulod sa kwarto. Tabangi sila sa paghunahuna og mga paagi nga madala nato ang kahayag ni Jesukristo sa atong kinabuhi. Samtang mopaambit sila sa ilang mga tubag, pagpasiga og mga flashlight o pag-abli og bintana aron hinay-hinay nga makadugang og kahayag sa kwarto.

1 Juan 4:10–11, 20–21

Akong mapakita ang akong gugma sa Dios kon mopakita ko og gugma alang sa uban .

Tabangi ang mga bata nga makakita sa koneksyon tali sa gugma nga ilang gibati alang sa Langitnong Amahan ug sa gugma nga ilang gipakita sa Iyang mga anak.

Posible nga mga Kalihokan

• Basaha ang 1 Juan 4:11 ngadto sa mga bata, ug pagkanta og usa ka awit mahitungod sa gugma sa Dios, sama sa “Gihigugma Ako sa Langitnong Amahan” (Songbook sa mga Bata, 16). Paghangyo og pipila ka mga bata sa pagpaambit kon sa unsang paagi nahibalo sila nga ang Langitnong Amahan nahigugma kanila. Human sa matag tubag, dapita ang mga bata sa paggakos sa ilang kaugalingon ug sa pag-ingon, “Ang Dios gugma, ug ang Dios nahigugma kanako.”

• Basaha ang 1 Juan 4:21 ngadto sa mga bata. Dapita sila sa pagpaambit o mo-aksyon og lain-laing mga paagi nga makapakita sila og gugma ngadto sa usa ka higala, sama sa paggakus o paghimo og kard. Unsa ang bation sa atong mga higala niining mga butanga? Unsa ang bation sa Langitnong Amahan kon maghimo kita og mabinationg butang alang sa uban?

1 Juan 2:3–5; 5:3

Akong mapakita ang akong gugma sa Dios kon mosunod ko sa Iyang mga sugo.

Ang mga bata makakat-on sa batan-on pang edad nga ang “mga sugo [sa Dios] dili mabug-at” ug nga ang pagsunod niini usa ka paagi sa pagpahayag og gugma ngadto Kaniya.

Posible nga mga Kalihokan

• Basaha ang 1 Juan 5:3, ug hangyoa ang mga bata sa pagpaminaw kon unsa ang gisulti niini nga bersikulo kon sa unsang paagi atong mapakita nga nahigugma kita sa Dios. Dapita ang mga bata sa paghingalan og daghang mga sugo kutob sa ilang mahimo. Unsa ang bation sa Langitnong Amahan kon motuman kita sa Iyang mga sugo?

• Dapita ang mga bata sa pagdrowing og hulagway nga nagpakita og usa ka paagi nga makapahayag sila sa ilang gugma alang sa Langitnong Amahan. Pananglitan, mahimo silang modrowing og hulagway sa ilang kaugalingon nga nagtuman sa usa sa mga sugo. Kantaha og dungan ang usa ka kanta mahitungod sa pagkamasulundon, sama sa “Pilia ang Matarung nga Paagi” (Songbook sa mga Bata, 82–83). Unsa ang atong bation kon motuman kita?

pagtudlo nga icon

Itudlo ang Doktrina

Mas Dagko nga mga Bata

1 Juan 2:8–11; 4:7–8, 20–21

Akong mapakita ang akong gugma sa Dios kon mopakita ko og gugma alang sa uban .

Unsaon ninyo pagtabang ang mga bata nga makasabut nga ang paghigugma sa Dios naglakip sa paghigugma niadtong naglibut nato—bisan sa mga tawo nga tingali lahi kay kanato o lisud higugmaon?

Posible nga mga Kalihokan

• Hangyoa ang mga bata sa paghanduraw nga usa ka bag-ong tawo nagsugod sa pagtambong sa ilang eskwelahan o ward ug wala pay nailhan nga bisan usa didto. Unsa kaha ang bation niining tawhana? Pagdapit og bata nga mobasa sa 1 Juan 4:7–8. Unsa man ang gisugyot niini nga bersikulo kon unsaon nato pagtagad kining tawhana? Pagpaambit og susama nga mga sitwasyon, o hangyoa ang mga bata sa paghunahuna og mga sitwasyon diin aduna tingali silay mga oportunidad sa pagpakita og gugma.

• Hangyoa ang mga bata sa pagbasa sa 1 Juan 4:7–8, 20–21, ug dapita ang matag usa kanila sa pagsulat og usa ka sentence sa pag-summarize sa unsay ilang gihunahuna nga mao ang labing importante nga leksyon niini nga mga bersikulo. Human sila mopaambit sa ilang mga sentence, mahimo nimong isaysay ang istorya ni Chy Johnson gikan sa pakigpulong ni Brother David L. Beck nga “Ang Sagrado Ninyong Katungdanan sa Pagpangalagad” (Liahona, Mayo 2013, 55). Unsaon sa mga bata sa pagsunod sa mga ehemplo sa batan-ong mga lalaki diha sa istorya kinsa mipakita og gugma kang Chy? Dapita ang mga bata sa pagpaambit og ubang paagi nga makapakita sila og gugma alang niadtong naglibut kanila.

1 Juan 2:3–6; 4:17–18; 5:2–5

Akong mapakita ang akong gugma sa Dios kon mosunod ko sa Iyang mga sugo.

Ang pagtuman sa mga sugo mahimong mas sayon kon makasabut kita sa mga kamatuoran nga gitudlo diha sa 1 Juan 5:3. Unsaon nimo pagtabang ang mga bata nga makakita sa mga sugo dili isip palas-anon apan isip mga oportunidad sa pagpahayag sa ilang gugma sa Dios?

Posible nga mga Kalihokan

• Dapita ang mga bata sa paglista diha sa pisara sa mga paagi nga makapakita sila sa Dios nga sila nahigugma Kaniya. Dayon basaha og dungan ang 1 Juan 2:5–6; 5:2–5 alang sa dugang nga mga ideya. Sa unsang paagi ang pagtuman sa mga sugo nagpakita nga kita nahigugma sa Langitnong Amahan?

  pamilya nga dungan nga nagluhod sa pag-ampo

  Bisan kon kini lisud, makapili kita sa pagsunod sa mga sugo.

• Basaha ang 1 Juan 4:17, ug ipasabut sa mga bata nga ang “may pagsalig unya sa adlaw sa hukom” nagpasabut sa pagbaton og pagsalig ug kalinaw kon mobarug sila atubangan sa Dios aron pagahukman. Unsa ang gitudlo niini nga bersikulo nga kinahanglan natong buhaton aron makabaton niini nga pagsalig? Unsa ang pipila ka mga butang nga atong mahimo karon aron mahimong masaligon atubangan sa Dios?

Judas 1:18–22

Mahimo akong magmatinud-anon bisan kon ang uban mobugal-bugal kanako.

Ang mga bata tingali biay-biayon tungod sa ilang pagtuo o sa paagi nga nagpuyo sila isip mga disipulo ni Jesukristo. Kini nga mga bersikulo naglangkob sa tambag ni Judas kon unsaon nga magpabiling matinud-anon sa ingon nga mga sitwasyon.

Posible nga mga Kalihokan

• Hangyoa ang mga bata sa pagpaambit og mga panahon sa dihang gibugal-bugalan sila tungod sa pagbuhat og matarung. Dapita ang mga bata sa pagbasa sa Judas 1:18–22 ug sa pagpangita kon unsaon nato nga magpabiling matinud-anon kon kita biay-biayon o bugal-bugalan. Isulat kon unsay ilang nakit-an diha sa pisara, ug hisguti ang mga paagi nga makasunod sila niini nga tambag.

• I-summarize ang damgo ni Lehi (tan-awa sa 1 Nephi 8:1–35), nga mohangyo sa pipila ka mga bata sa pagbasa sa mga bersikulo gikan sa 1 Nephi 8:26–28, 33. Hisguti kon sa unsang paagi ang mga tawo diha sa dako ug lapad nga gambalay susama sa mga mayubiton nga gihisgutan ni Judas. Unsay atong mabuhat aron dili maimpluwensyahan niadtong nagbugal-bugal kanato o wala mouyon sa unsay atong gituohan? (tan-awa sa 1 Nephi 8:30, 33).

pagkat-on nga icon

Awhaga ang Pagkat-on diha sa Panimalay

Awhaga ang mga bata sa paghimo og plano nga mobuhat og usa ka butang aron sa pagpaambit sa ilang kahayag ngadto sa ilang mga pamilya.

Pagpalambo sa Atong Pagtudlo

Ang mga bata aktibo. Usahay imong bation nga ang enerhiya sa mga bata makabalda sa pagkat-on. Apan magamit nimo ang ilang aktibo nga mga kinaiya pinaagi sa pagdapit kanila sa pagdrama-drama, pagdrowing, o sa pagkanta mahitungod sa usa ka baruganan sa ebanghelyo. (Tan-awa sa Pagtudlo sumala sa Pamaagi sa Manluluwas, 25–26.)

pahina sa kalihokan: ang pagsunod ni Jesus nagdala og kahayag sa akong kinabuhi