“Septyembre 16–22. 2 Mga Taga-Corinto 8–13: ‘Ang Dios Nagahigugma sa Malipayong Maghahatag’” Dali, Sunod Kanako—Alang sa Primary: Bag-ong Tugon 2019 (2019)
“Septyembre 16–22. 2 Mga Taga-Corinto 8–13,” Dali, Sunod Kanako—Alang sa Primary: 2019
Septyembre 16–22
2 Mga Taga-Corinto 8–13
“Ang Dios Nagahigugma sa Malipayong Maghahatag”
Ang imong labing maayong mga ideya sa pagtudlo sa mga bata sa imong klase moabut samtang mainampuon ka nga magtuon sa 2 Mga Taga-Corinto 8–13 nga maghunahuna kanila. Dugang nga mga ideya sa pagtudlo makita dinhi niini nga outline.
Irekord ang Imong mga Impresyon
Awhaga ang Pagpaambit
Usa ka maayong paagi aron makadapit og pagpaambit tali sa mga bata mao ang pagpahinumdom kanila sa usa ka butang nga imo silang gidapit sa pagbuhat sa miaging leksyon. Hangyoa sila sa pagpaambit sa ilang mga kasinatian.
Itudlo ang Doktrina
Mas Gagmay nga mga Bata
Makahatag ako nga malipayon sa mga tawo nga nanginahanglan.
Maayo kanunay ang pagserbisyo sa uban, apan mas maayo ang pagserbisyo nga malipayon. Ikonsiderar kon unsay makadasig sa matag bata aron mahimong “malipayong maghahatag.”
Posible nga mga Kalihokan
-
Dapita ang mga bata sa pagsulti og balik sa mga pulong nga “Ang Dios nagahigugma sa malipayong maghahatag” (2 Mga Taga-Corinto 9:7). Unsa ang gipasabut nga mahimong “malipayong maghahatag”? Pagpakita og hulagway sa usa ka malipayong nawong ug usa ka subo nga nawong, ug pangutan-a ang mga bata kon hain ang makita nga morag malipayong maghahatag.
-
Kantaha og dungan ang usa ka kanta mahitungod sa serbisyo, sama sa “Kon Kita Motabang” (Songbook sa mga Bata, 108), sa pipila ka higayon. Sa unang higayon, hangyoa ang mga bata sa pagkanta nga malipayon; dayon hangyoa sila sa pagkanta sa awit nga dunay lain-laing mga emosyon o mga kinaiya, sama sa masulub-on, gikapoy, nasuko, o nahadlok. Pahinumdumi ang mga bata nga gusto sa Langitnong Amahan nga malipayon kitang motabang sa uban. Dayon kantaha pag-usab ang kanta nga malipayon.
-
Hatagi ang mga bata og mga hulagway sa nagpahiyum nga mga nawong. Hangyoa sila sa pag-isa sa ilang mga hulagway kon makadungog sila sa mga pulong nga pahiyum o pahiyumi samtang manganta sila sa “Mga Pahiyum” (Songbook sa mga Bata, 128). Mahimo nilang buhaton ang samang butang sa mga litrato sa nagmug-ot nga mga nawong ug sa mga pulong nga nagkusmod ug kusmoran. Sultihi ang mga bata nga ang nagkusmod nga nawong dili malipayon; usa ka paagi nga magmalipayon ug magserbisyo sa uban mao ang pagpahiyum ug pagtabang sa uban nga magpahiyum.
-
Pagplano og kalihokan sa klase nga moserbisyo og tawo, sama sa usa ka bata nga dili motambong sa Primary o sakop sa ward o silingan nga nanginahanglan. Mahimo kamong magplano nga mobisita sa balay niining tawhana, mosulat og mabination nga mga sulat o modrowing og mga hulagway, o moandam og ikadalit.
-
Dapita ang matag bata nga magplano og usa ka buhat sa malipayon nga pagserbisyo alang sa usa ka sakop sa iyang pamilya. Atol sa sunod semana nga leksyon, hangyoa sila sa pagpaambit kon unsay ilang gibuhat.
Ang Langitnong Amahan kanunay nga motubag sa mga pag-ampo, apan dili Siya kanunay mohatag kanako sa tanan nga akong gipangayo.
Ang kasinatian ni Pablo nga nag-ampo aron kuhaon ang iyang “tunok dinhi sa lawas” nagtudlo kanato nga ang Dios usahay mopakita sa Iyang gugma kanato pinaagi sa dili paghatag kanato sa unsay atong gusto.
Posible nga mga Kalihokan
-
Pakit-a ang mga bata og tanom nga dunay mga tunok (o hulagway niini). Tabangi sila sa paghunahuna kon unsa kaha ang bation nga dunay tunok nga nagtusok sa ilang panit sa dugay na nga panahon. I-summarize ang 2 Mga Taga-Corinto 12:7–10 alang sa mga bata, gamit ang mga pulong nga ilang masabtan. Ipasabut nga ang “tunok dinhi sa lawas” ni Pablo usa ka pagsulay, sama sa usa ka pisikal nga kahuyang. Bisan tuod si Pablo mihangyo sa Dios nga tangtangon ang pagsulay, wala kini buhata sa Dios. Hinoon, ang Dios mitudlo ni Pablo nga ang mga hagit makatabang kanato nga makat-on sa pagpaubos ug mosalig Kaniya. Dayon ang Dios makahimo kanato nga lig-on.
-
Pagpamatuod nga ang Langitnong Amahan nasayud kon unsay labing maayo alang kanato, ug mohatag Siya kanato sa atong gikinahanglan, bisan kon lahi kini sa unsay atong gihunahuna nga atong gikinahanglan. Mahimo ka usab nga mopaambit og usa ka kasinatian diin ang imong mga pag-ampo gitubag sa paagi o sa panahon nga lahi kay sa imong gilauman. Ang istorya nga “Ayaw Kalimot sa Pag-ampo alang ni Erik” (Liahona, Ene. 2017, 74–75) makatabang usab.
-
Kantaha uban sa mga bata ang usa ka awit mahitungod sa gugma sa Langitnong Amahan, sama sa “Ampo sa Usa ka Bata” (Songbook sa mga Bata, 6–7). Pangutan-a ang mga bata kon unsay ilang isulti sa tawo nga naghunahuna kon ang Langitnong Amahan maminaw ug motubag ba sa mga pag-ampo. Kantaha ang awit pag-usab, ug itudlo ang mga linya nga naghulagway kon unsay gibati sa Langitnong Amahan kanato.
Itudlo ang Doktrina
Mas Dagko nga mga Bata
Makahatag ako nga malipayon sa mga tawo nga nanginahanglan.
Gusto ni Pablo nga madasig ang mga Santos sa paghatag og bahin sa ilang kaabunda aron sa pagtabang sa mga kabus. Unsaon nimo sa paggamit ang iyang mga pulong aron madasig ang mga bata sa pagserbisyo sa uban?
Posible nga mga Kalihokan
-
Isulat ang mga pulong sa 2 Mga Taga-Corinto 9:7 diha sa pisara, diin blangkuhan ang importanting mga pulong. Dapita ang mga bata sa pagtag-an kon unsa ang nawala nga mga pulong. Dayon pabasaha sila sa bersikulo diha sa mga kasulatan aron matubag ang mga blangko. Unsay gipasabut nga mohatag nga “magapanuko, o ni ingon nga pinugos”? Unsa ang gipasabut nga mahimong “malipayong maghahatag”?
-
Dapita ang mga bata sa pagtabang kanimo sa pagpangita og mga hulagway sa Manluluwas nga nagserbisyo sa uban (adunay pipila diha sa Dali, Sunod Kanako—Alang sa mga Indibidwal ug mga Pamilya). Pangutan-a sila kon unsay ilang nakita niini nga mga hulagway nga nagtabang kanila nga masayud nga mahigugmaong giserbisyuhan ni Jesus ang uban. Paghimo og tumong isip tibuok klase sa pagsugot kon ang mga sakop sa pamilya o ang uban mohangyo kanato sa pagserbisyo sa moabut nga semana, sama sa pagtabang diha sa panimalay o sa pag-atiman sa uban.
-
Tabangi ang mga bata sa pag-adorno og gagmay nga mga bato. Dapita sila sa pagdala sa ilang “mga bato sa pagserbisyo” sa ilang bulsa niining semanaha aron motabang kanila sa paghinumdom nga malipayong moserbisyo sa uban.
-
Tabangi ang mga bata sa paghunahuna og bag-o nga mga bersikulo sa kanta mahitungod sa pagserbisyo, sama sa “Makalingaw nga Buhaton” (Songbook sa mga Bata, 129), nga nagtudlo nga makalingaw ang pagserbisyo sa uban sa lain-laing mga paagi.
Ang Langitnong Amahan kanunay nga motubag sa mga pag-ampo, apan dili Siya kanunay mohatag kanako sa tanan nga akong gipangayo.
Mihangyo si Pablo sa Dios nga tangtangon ang iyang kahuyang, apan nasayud ang Dios nga ang kasakit ni Pablo mopaubos kaniya ug molig-on kaniya.
Posible nga mga Kalihokan
-
Dapita ang mga bata sa pagtandi sa 2 Mga Taga-Corinto 12:9–10 ug Ether 12:27. Unsa nga mga pulong ang gibalik? Unsa ang gitudlo niini nga mga bersikulo? (Mahimo nimong ipasabut nga gikumparar ni Pablo ang iyang kalisdanan ngadto sa usa ka tunok sa iyang panit.) Unsa ang gitudlo sa Dios kang Pablo mahitungod sa mga pagsulay?
-
Dapita ang mga bata sa paglista og pipila ka mga pagsulay sa kinabuhi sa mga tawo. Tabangi sila sa pagkonsiderar kon sa unsang paagi ang usa ka tawo makakat-on gikan niini nga mga pagsulay ug mapanalangin niini.
-
Basaha uban sa mga bata ang “Ang Langitnong Amahan Motubag ba Kanunay sa Akong mga Pag-ampo?” (Liahona, Ene. 2017, 69). Hangyoa ang mga bata sa pagpaambit og mga kasinatian sa dihang nag-ampo sila alang sa usa ka butang ug wala makadawat niini. Hangyoa sila sa pagpaambit kon unsa ang ilang nakat-unan gikan sa ilang mga kasinatian. Tingali aduna kay kaugalingong mga kasinatian nga mapaambit usab. Ipaambit ang imong pagpamatuod nga ang Langitnong Amahan kanunay nga motubag sa atong mga pag-ampo sa paagi ug sa panahon nga labing makapanalangin kanato.
Awhaga ang Pagkat-on diha sa Panimalay
Dapita ang mga bata nga mahimong malipayong maghahatag diha sa ilang mga panimalay niining semanaha ug sa pagtambong sa klase sa sunod semana nga andam nga mo-report kon giunsa nila pagserbisyo og tawo nga nanginahanglan.
Pagpalambo sa Atong Pagtudlo
Idumala ang mga kasamok uban sa gugma. “Usahay ang usa ka bata molihok sa mga paagi nga makasamok sa pagkat-on sa uban diha sa klase. Kon mahitabo kini, pagmapailubon, mahigugmaon, ug masinabtanon kabahin sa mga hagit nga tingali giatubang sa bata. … Kon ang bata nga maoy hinungdan sa kasamok adunay espesyal nga mga panginahanglan, pakigsulti sa ward o stake disability specialist o bisitaha ang disabilities.lds.org aron masayran kon unsaon nga mas maayong matubag kadto nga mga panginahanglan” (Pagtudlo sumala sa Pamaagi sa Manluluwas, 26).