“Septyembre 9–15. 2 Mga Taga-Corinto 1–7: ‘Magpasig-uli Kamo ngadto sa Dios’” Dali, Sunod Kanako—Alang sa Primary: Bag-ong Tugon 2019 (2019)
“Septyembre 9–15. 2 Mga Taga-Corinto 1–7,” Dali, Sunod Kanako—Alang sa Primary: 2019
Septyembre 9–15
2 Mga Taga-Corinto 1–7
“Magpasig-uli Kamo ngadto sa Dios”
Sugdi ang imong pagpangandam pinaagi sa pagbasa sa 2 Mga Taga-Corinto 1–7. Ang Dali, Sunod Kanako—Alang sa mga Indibidwal ug mga Pamilya makatabang kanimo sa pagsabut niini nga mga kapitulo, ug kini nga outline makahatag kanimo og mga ideya sa pagtudlo.
Irekord ang Imong mga Impresyon
Awhaga ang Pagpaambit
Ang pipila sa mga bata sa imong klase nakahimo tingali og mga sulat karong semanaha kon sa unsang paagi ang usa ka sakop sa pamilya maayo nga ehemplo sa usa ka disipulo ni Jesukristo. Kon nakahimo sila, hangyoa sila daan sa dili pa magklase sa pagpaambit sa sulat diha sa klase. O hangyoa ang mga bata sa pagpaambit og laing butang nga ilang nakat-unan.
Itudlo ang Doktrina
Mas Gagmay nga mga Bata
Mohupay kanako ang Langitnong Amahan, ug makahupay ako sa uban.
Unsaon nimo paghatag sa mga bata og pagsalig nga ang Langitnong Amahan mohupay kanila? Unsaon nimo sila sa pag-awhag sa paghupay sa uban?
Posible nga mga Kalihokan
-
Pagdala og mga butang diha sa klase nga makahatag og kahupayan, sama sa habol o bendahe. Pangutan-a ang mga bata kon unsay makahupay kanila kon sila maguol o mahadlok o dunay ubang problema. Basaha ang 2 Mga Taga-Corinto 1:3–4 ngadto sa mga bata, ug ipasabut nga ang “kasakit” laing pulong alang sa lisud nga mga problema. Pagpaambit og pipila ka mga paagi diin ang Langitnong Amahan mihupay kanimo, ug pagpamatuod nga mohupay usab Siya sa mga bata.
-
Pagpakita og mga litrato sa mga tawo nga gibunyagan (tan-awa sa Libro sa mga Hulagway sa Ebanghelyo, nu. 103 ug 104) samtang imong basahon ang 2 Mga Taga-Corinto 1:4 ug Mosiah 18:8–9 ngadto sa mga bata. Ipasabut nga panahon sa bunyag misaad kita nga mohupay sa uban. Unsaon nato sa pagsunod ang tambag ni Pablo sa “pagpalipay kanila nga anaa sa bisan unsang kasakit”?
-
Dapita ang mga bata sa pagdrowing og hulagway sa ilang kaugalingon nga nagtabang og tawo nga nanginahanglan. Tuguti sila sa pagpasabut kon sa unsang paagi ang pagbuhat niini nga mga butang makahatag og kahupayan sa uban.
Makapasaylo ko sa uban.
Pagpili gikan sa mosunod nga mga kalihokan—o paghimo og imong kaugalingon—aron makatabang sa paglig-on sa tinguha sa mga bata nga mopasaylo sa uban.
Posible nga mga Kalihokan
-
Ipasabut sa mga bata nga gusto ni Pablo nga pasayloon sa mga Santos sa Corinto ang usa ka tawo nga nakasala. Basaha ang 2 Mga Taga-Corinto 2:7–8, 10, ug dapita ang mga bata sa pagbutang sa ilang mga kamot tungod sa ilang kasingkasing matag higayon nga makadungog sila sa mga pulong nga pasayloon ug gipasaylo.
-
Dapita ang mga bata sa pag-role play kon unsay ilang buhaton sa mga sitwasyon nga dunay gibuhat nga dili maayo ang usa ka tawo. Papuli-puliha sila sa pagsulti og “Pasayloa ko” ug “Gipasaylo ko ikaw.” Unsaon nato sa pagtabang ang mga tawo nga masayud nga gipasaylo nato sila? Ipasabut nga usa ka paagi mao ang “ipasig-uli [sila] diha sa inyong paghigugma”, o mopakita og gugma ngadto kanila (2 Mga Taga-Corinto 2:8).
Nagtuo ako sa pagkamatinuoron.
Mitudlo si Pablo nga ang mga sulugoon ni Kristo dili mamakak ngadto sa uban—ilang “gisalikway … ang mga paagi nga makauulaw ug sinuwitik.” Pamalandungi ang mga paagi nga mapalig-on nimo ang tinguha sa mga bata nga mahimong matinuoron sa tanang butang.
Posible nga mga Kalihokan
-
Tabangi ang mga bata sa pagsag-ulo sa mga pulong nga “Kami nagtuo sa pagkamatinuoron” (Mga Artikulo sa Hugot nga Pagtuo 1:13). Isulat kini nga mga pulong diha sa mga pulseras nga papel nga mahimong adornuhan sa mga bata ug isul-ob sa pagpauli. Ipasabut nga ang pagkamatinuoron nagpasabut sa pagsulti sa kamatuoran.
-
Hangyoa ang mga bata sa pagpataas sa ilang mga kamot kon mosulti ka og usa ka butang nga tinuod ug ipaubos kini kon mosulti ka og butang nga dili tinuod. Paghimo og yano apan klaro nga pamahayag, sama sa “Dominggo karon” o “Aduna koy tulo ka ilong.” Balika ang kalihokan sa pipila ka higayon, nga papuli-pulihon ang mga bata nga maoy mosulti og tinuod ug dili tinuod nga mga pamahayag. Nganong maayo man nga mahimong matinuoron?
Itudlo ang Doktrina
Mas Dagko nga mga Bata
Mohupay kanako ang Langitnong Amahan, ug makahupay ako sa uban.
Ang paghinumdom kon giunsa sila sa paghupay sa Dios makadasig sa mga bata sa paghatag og kahupayan ngadto sa uban.
Posible nga mga Kalihokan
-
Samtang imong basahon ang 2 Mga Taga-Corinto 1:3–4, hangyoa ang mga bata sa pagpaminaw alang sa tubag sa pangutana “Unsa ang gibuhat sa Dios alang kanato?” Tabangi ang mga bata sa paglista og mga paagi diin ang Dios mohupay kanato. Dapita ang mga bata sa pagpaambit og mga kasinatian sa dihang naguol sila o nabalaka o nahadlok ug ang Dios mihupay kanila.
-
Dapita ang mga bata sa pagpaambit og mga paagi diin mahimo kitang mohupay sa uban. Hatagi sila og panahon sa paghunahuna og tawo nga ilang kaila nga nagkinahanglan og kahupayan ug sa paghimo og plano aron sa pagtabang nianang tawhana.
Makapasaylo ko sa uban.
Mahimong lisud ang pagpasaylo sa uban kon dili sila maayo kanato. Apan ang mga bata nga imong gitudloan makasinati og gugma, kalinaw, ug kalipay samtang makat-on sila sa pagpasaylo.
Posible nga mga Kalihokan
-
Sultihi ang mga bata nga usa ka tawo sa Corinto nakasala ug “nakapahimog kasakit” sa mga Santos (tan-awa sa 2 Mga Taga-Corinto 2:5). Hangyoa ang mga bata sa pagsiksik sa 2 Mga Taga-Corinto 2:7–8 aron mangita kon unsay gusto ni Pablo nga buhaton sa mga Santos.
-
Pagpaambit og kasinatian sa dihang mipasaylo ka og tawo—o dunay tawo nga mipasaylo nimo—ug unsay imong gibati pagkahuman.
Ako “nagakinabuhi man pinaagi sa pagtuo, dili pinaagi sa [akong] makita.”
Ikonsiderar kon unsaon nimo sa pag-awhag ang mga bata sa pagsunod sa mga sugo sa Dios bisan kon dili nila makita ang mga panalangin nga ilang gitinguha diha-diha dayon.
Posible nga mga Kalihokan
-
Basaha ang 2 Mga Taga-Corinto 5:6–7 ug Alma 32:21 uban sa mga bata, ug hangyoa sila sa pagpangita og mga pulong nga makatabang sa pagpasabut sa pagtuo. Hangyoa sila nga isulat ang ilang mga kahulugan, basahon kini og kusog, ug ibutang kini diha sa pisara.
-
Taptapi ang usa sa mga bata, ug hangyoa ang ubang mga bata sa paghatag og direksyon sa pagtabang kaniya nga makakompleto og usa ka buluhaton sama sa pagtukod og tore gamit ang mga bloke, paghan-ay og puzzle, o paglakaw tabok sa kwarto. Sa unsang paagi kini nga kalihokan makatabang kanato nga makasabut unsay gipasabut sa “nagakinabuhi man diha sa pagtuo” sa Dios?
-
Pagpaambit og kasinatian dihang nagkinahanglan ka nga magbaton og pagtuo sa Dios. Dapita ang mga bata sa pagpaambit og bisan unsa nila nga kasinatian nga nagpakabuhi sila diha sa pagtuo.
Ang diosnon nga kasubo modala kanako ngadto sa paghinulsol.
Natural lamang sa mga bata nga mobati og kaulaw kon masakpan sila nga naghimo og sayop nga butang. Tabangi sila nga makaila niini nga mga pagbati gikan sa diosnon nga kasubo, nga mosangput ngadto sa tinuod nga paghinulsol.
Posible nga mga Kalihokan
-
Ipasabut nga diha sa 2 Mga Taga-Corinto 7:8–11, naghisgut si Pablo kalabut sa usa ka sulat nga iyang gihimo ngadto sa mga Santos, maisugong mipahimangno kanila mahitungod sa ilang mga sala. Basaha og dungan kini nga mga bersikulo. Nganong nalipay man si Pablo nga ang mga Santos nagmasulub-on? Ipasabut nga kini nga matang sa kasubo gitawag og diosnon nga kasubo.
-
Hangyoa ang mga bata sa pagpiyong sa ilang mga mata ug sa paghunahuna og higayon nga nakabuhat sila og sayop ug mibati og dili maayo mahitungod niini. Dapita sila sa pagpangutana sa ilang kaugalingon, “Nganong dili man maayo ang akong gibati?” Isulat diha sa pisara ang pipila ka mga rason nga ang mga tawo mobati og dili maayo human makabuhat og sayop, sama sa “Nahadlok ko nga silutan ko” o “Naulaw ko kon unsa unya ang hunahunaon sa mga tawo kanako” o “Nasayud ko nga ang Langitnong Amahan nasagmuyo kanako.” Hain sa mga tubag diha sa pisara ang mora og “diosnon nga kasubo”? Nganong ang diosnon nga kasubo mas maayo man kay sa ubang matang sa kasubo nga atong bation human makabuhat og sayop?
Awhaga ang Pagkat-on diha sa Panimalay
Sultihi ang mga bata nga mahimo silang mopaambit og usa sa mga kalihokan gikan sa klase karon ngadto sa ilang mga pamilya diha sa panimalay, tingali panahon sa family home evening.
Pagpalambo sa Atong Pagtudlo
Pagpakita og usa ka kasulatan. Pagpili og usa ka bersikulo sa kasulatan nga makahuluganon kanimo ug i-display kini diha sa lawak klasehanan diin kanunay kining makita sa mga bata. Tingali mahimong magpuli-puli ang mga bata sa pagpili og kasulatan nga i-display.