Sīsū Kalaisi

9–15 Sepitema

2 Kolinitō 1–7

“Ke Mou Fakalelei mo e ʻOtuá”

Kamata hoʻo teuteú ʻaki hoʻo lau e 2 Kolinitō 1–7. ʻE lava ke tokoni atu ʻa e Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí ke mahino ʻa e ngaahi vahe ko ʻení, pea lava ke ʻoatu ʻe he lēsoni ko ʻení ha ngaahi fakakaukau ki hono akoʻí.

Lekooti e Ngaahi Ongo ʻOkú ke Maʻú

sharing icon

Fakaafeʻi Ke Vahevahe

ʻE ala tohi ʻe ha fānau ʻe niʻihi ʻi ho kalasí ha ngaahi tohi ʻi he uiké ni kau ki he hoko ha mēmipa ʻo e fāmilí ko ha faʻifaʻitakiʻanga lelei ʻo ha ākonga ʻo Sīsū Kalaisi. Kapau ne nau fai ia, kole ange kei taimi ke vahevahe ha tohi mo e kalasí. Pe kole ki he fānaú ke nau vahevahe ha meʻa kehe ne nau ako.

teaching icon

Akoʻi e Tokāteliné

Fānau Iiki Angé

2 Kolinitō 1:3–4

ʻOku fakafiemālieʻi au ʻe he Tamai Hēvaní, pea te u lava ʻo fakafiemālieʻi e niʻihi kehé.

Te ke lava fēfē ʻo ʻoange ki he fānaú ha loto falala ʻe fakafiemālieʻi kinautolu ʻe he Tamai Hēvaní? Te ke lava fēfē ʻo poupouʻi kinautolu ke nau fakafiemālieʻi e niʻihi kehé?

Ngaahi ʻEkitivitī ʻe Ala Fakahokó

• ʻOmi ha ngaahi meʻa ki he kalasí te ne lava ʻo ʻomi ha fakafiemālie, hangē ko ha kafu pe peniʻeiti. Fehuʻi ki he fānaú pe ko e hā ha ngaahi meʻa ʻokú ne fakafiemālieʻi kinautolu ʻi he taimi ʻoku nau lotomamahi, ilifia pe ʻi ai ha ngaahi palopalema kehe. Lau mo e fānaú e 2 Kolinitō 1:3–4, pea fakamatalaʻi ange ko e foʻi lea ʻe taha ki he ngaahi palopalema faingataʻá, ko e “mamahi.” Vahevahe ha ngaahi founga kuo fakafiemālieʻi ai koe ʻe he Tamai Hēvaní, pea fakamoʻoniʻi ange te Ne fakafiemālieʻi foki mo e fānaú.

• Fakaʻaliʻali ange ha ngaahi fakatātā ʻo ha kakai ʻoku papitaiso ʻa kinautolu (vakai Tohi Fakatātā ʻo e Ongoongoleleí, fika 103 mo e 104) lolotonga hoʻo lau e 2 Kolinitō 1:4 mo e Mōsaia 18:8–9 ki he fānaú. Fakamatalaʻi ange, ʻoku tau palōmesi ʻi heʻetau papitaisó, ke tau fakafiemālieʻi e niʻihi kehé. Te tau muimui fēfē ki he akonaki ʻa Paula ke “fakafiemālieʻi ʻa kinautolu ʻoku mamahiʻiá”?

• Fakaafeʻi e fānaú ke tā ha fakatātā ʻo kinautolu ʻoku nau tokoniʻi ha taha ʻoku fie maʻu tokoni. Tuku ke nau fakamatalaʻi e founga ʻoku lava ai ʻe hono fai e ngaahi meʻá ni ʻo ʻomi e fiemālié ki he niʻihi kehé.

2 Kolinitō 2:7–8, 10

ʻOku ou lava ʻo fakamolemoleʻi e niʻihi kehé.

Fili mei he ngaahi ʻekitivitī ko ʻení—pe faʻu haʻo ʻekitivitī pē ʻaʻau—ke tokoni ki hono fakamālohia e holi e fānaú ke fakamolemoleʻi e niʻihi kehé.

Ngaahi ʻEkitivitī ʻe Ala Fakahokó

• Fakamatalaʻi ange ki he fānaú naʻe fie maʻu ʻe Paula ke fakamolemoleʻi ʻe he Kāingalotu Kolinitoó ha tangata naʻe faiangahala. Lau e 2 Kolinitō 2:7–8, 10, pea fakaafeʻi e fānaú ke hili honau nimá ʻi honau fatafatá ʻi he taimi kotoa pē te nau fanongo ai ki he ongo foʻi lea ko e fakamolemole mo e fakamolemolea.

• Fakaafeʻi e fānaú ke nau fakafaivaʻi e founga te nau lava ai ʻo tali ki he ngaahi tuʻunga ʻoku fai ai ʻe ha taha ha ʻulungaanga taʻeʻofa. Tuku ke nau taufetongi ʻi hono leaʻaki e “Fakamolemole atu” mo e “ʻOku ou fakamolemoleʻi koe.” ʻOku tau tokoniʻi fēfē ʻa e kakaí ke nau ʻilo ʻoku tau fakamolemoleʻi kinautolu? Fakamatalaʻi ange, ko e taha ʻo e ngaahi foungá ko ʻetau “fakamoʻoniʻi ʻa e ʻofá,” pe fakahaaʻi kiate kinautolu ʻa e ʻofá (2 Kolinitō 2:8).

2 Kolinitō 4:1–2

ʻOku ou tui ʻoku totonu ke u faitotonu.

Naʻe akoʻi ʻe Paula ʻoku ʻikai ke loi ʻa e kau tamaioʻeiki ʻa Kalaisí ki he niʻihi kehé—kuo nau “liʻaki ʻa e ngaahi meʻa fufū ʻo e fakamaá.” Fakalaulauloto ki he ngaahi founga te ke lava ai ʻo fakamālohia e holi ʻa e fānaú ke faitotonu ʻi he ngaahi meʻa kotoa peé.

Ngaahi ʻEkitivitī ʻe Ala Fakahokó

• Tokoniʻi e fānaú ke nau maʻuloto e kupuʻi lea “ʻOku mau tui ʻoku totonu ke faitotonu” (Tefito ʻo e Tuí 1:13). Hiki ʻa e kupuʻi lea ko ʻení ʻi ha ngaahi vesa pepa ʻe lava ʻe he fānaú ʻo teuteuʻi mo tui ki ʻapi. Fakamatalaʻi ange ʻoku ʻuhinga ʻa e faitotonú ki hono tala ʻe moʻoní.

• Kole ki he fānaú ke hiki honau nimá ʻi he taimi te ke leaʻaki ai ha meʻa ʻoku moʻoni pea tuku hifo honau nimá ʻi he taimi te ke leaʻaki ai ha meʻa ʻoku ʻikai moʻoni. Faʻu ha fanga kiʻi fakamatala mahinongofua, hangē ko e “Ko e ʻaho Sāpate ʻa e ʻahó ni” pe “ʻOku ʻi ai hoku ihu ʻe tolu.” Toutou fai ʻa e ʻekitivitī, pea tuku ke taufetongi ʻa e fānaú ʻi he hoko ko e tokotaha ʻokú ne fakahoko mai e fakamatala moʻoní mo taʻemoʻoní. Ko e hā e ʻuhinga ʻoku lelei ai ke faitotonú?

teaching icon

Akoʻi e Tokāteliné

Fānau Lalahi Angé

2 Kolinitō 1:3–4

ʻOku fakafiemālieʻi au ʻe he Tamai Hēvaní, pea te u lava ʻo fakafiemālieʻi e niʻihi kehé.

ʻE lava ke ueʻi fakalaumālie ʻe hono manatua e founga kuo fakafiemālieʻi ai ʻe he ʻOtuá ʻa e fānaú, ke nau fakafiemālieʻi e niʻihi kehé.

Ngaahi ʻEkitivitī ʻe Ala Fakahokó

• ʻI hoʻo lau e 2 Kolinitō 1:3–4, kole ki he fānaú ke nau fakafanongo ki ha tali ki he fehuʻi “Ko e hā ʻoku fai ʻe he ʻOtuá maʻatautolú?” Tokoniʻi e fānaú ke nau lisi ha ngaahi founga ʻa ia ʻoku fakafiemālieʻi ai ʻe he ʻOtuá ʻakitautolu. Fakaafeʻi e fānaú ke nau vahevahe ha ngaahi aʻusia ʻi he taimi ne nau lotomamahi, hohaʻa pe ilifia ai, pea fakafiemālieʻi ai kinautolu ʻe he ʻOtuá.

• Fakaafeʻi e fānaú ke nau vahevahe ha ngaahi founga ʻa ia te tau lava ai ʻo fakafiemālieʻi e niʻihi kehé. ʻOange kiate kinautolu ha taimi ke nau fakakaukau ki ha taha ʻoku nau ʻilo ʻokú ne fie maʻu e fakafiemālié, pea faʻu ha palani ke nau ala atu ai ʻo tokoni ki he tokotaha ko iá.

2 Kolinitō 2:5–11

ʻOku ou lava ʻo fakamolemoleʻi e niʻihi kehé.

ʻE ala faingataʻa ke fakamolemoleʻi e niʻihi kehé ʻi he taimi ʻoku nau ʻulungaanga taʻeʻofa mai ai kiate kitautolú. Ka ʻe aʻusia ʻe he fānau ʻokú ke akoʻí ʻa e ʻofa, nonga, mo e fiefia ʻi heʻenau ako ke fakamolemolé.

Ngaahi ʻEkitivitī ʻe Ala Fakahokó

• Talaange ki he fānaú naʻe ʻi ai ha taha ʻi Kolinitō naʻe faiangahala pea “fai fakamamahi” ki he kau Māʻoniʻoní (vakai 2 Kolinitō 2:5). Kole ki he fānaú ke nau fekumi ʻi he 2 Kolinitō 2:7–8 ke ʻiloʻi ko e hā ne fie maʻu ʻe Paula ke fai ʻe he kau Māʻoniʻoní.

• Vahevahe ha aʻusia ʻi ha taimi naʻá ke fakamolemoleʻi ai ha taha—pe fakamolemoleʻi koe ʻe ha taha—pea ko e hā hoʻo ongo hili iá.

2 Kolinitō 5:6–7

ʻOku ou “ʻaʻeva ʻi he tui, kae ʻikai ʻi he mamata.”

Fakakaukau ki he founga te ke lava ai ʻo poupouʻi e fānaú ke nau tauhi e ngaahi fekau ʻa e ʻOtuá neongo e taimi ʻoku ʻikai ai ke nau mamata ki he ngaahi tāpuaki ʻoku nau holi ki aí he taimi pē ko iá.

Ngaahi ʻEkitivitī ʻe Ala Fakahokó

• Lau mo e fānaú e 2 Kolinitō 5:6–7 mo e ʻAlamā 32:21 pea kole kiate kinautolu ke nau fekumi ki he ngaahi lea mo e kupuʻi lea ʻoku tokoni ke fakamatalaʻi e tuí. Kole kiate kinautolu ke nau hiki ʻenau ngaahi ʻuhingá, lau leʻo lahi kinautolu, pea hiki kinautolu ʻi he palakipoé.

• Haʻi e mata ʻo ha taha ʻo e fānaú, pea kole ki he fānau kehé ke nau ʻoange ha ngaahi fakahinohino ke tokoniʻi e tokotahá ni ke ne fakakakato ha ngāue hangē ko hono langa ha taua ʻaki ha ngaahi poloka, fokotuʻutuʻu ha pāsolo, pe lue ʻi he loto loki akó. ʻOku tokoni fēfē ʻa e ʻekitivitī ko ʻení ke mahino kiate kitautolu ʻa hono ʻuhinga ʻo e “ʻaʻeva ʻi he tui” ki he ʻOtuá?

• Fakaʻaliʻali ʻa e vitioó “Pure and Simple Faith” (LDS.org), pea fehuʻi ki he fānaú pe naʻe founga fēfē ʻa e ʻaʻeva e finemuí ʻi he tuí. Vahevahe ha aʻusia ki ha taimi naʻe pau ai ke ke maʻu e tui ki he ʻOtuá. Fakaafeʻi e fānaú ke vahevahe ha aʻusia kuo nau maʻu ʻi heʻenau ʻaʻeva ʻi he tuí.

2 Kolinitō 7:8–11

ʻOku tataki au ʻe he mamahi faka-ʻOtuá ke u fakatomala.

ʻOku fakanatula ki he fānaú ke nau ongoʻi mā ʻi he taimi ʻoku maʻu ai haʻanau fai ha meʻa hala. Tokoniʻi kinautolu ke nau fakafaikehekeheʻi e ngaahi ongo ko ʻení mei he mamahi faka-ʻOtua ʻoku fakatau ki he fakatomala moʻoní.

Ngaahi ʻEkitivitī ʻe Ala Fakahokó

• Fakamatalaʻi ange, ʻi he 2 Kolinitō 7:8–11, naʻe lave ʻa Paula ki ha tohi naʻá ne fai ki he kau Māʻoniʻoní, ʻo fakatokanga lahi kiate kinautolu kau ki heʻenau ngaahi angahalá. Lau fakataha e ngaahi veesi ko ʻení. Ko e hā naʻe fiefia ai ʻa Paula ʻi he ongoʻi mamahi e Kāingalotú? Fakamahinoʻi ange, ko e faʻahinga mamahi ko ʻení ʻoku ui ia ko e mamahi faka-ʻotua.

• Kole ki he fānaú ke kuikui honau matá pea fakakaukau ki ha taimi ne nau fai ai ha meʻa ʻoku hala pea nau ongoʻi lotomamahi ai. Fakaafeʻi kinautolu ke nau fehuʻi kiate kinautolu pē, “Ko e hā e ʻuhinga ʻoku ou ongoʻi mamahi aí?” Hiki he palakipoé ha ngaahi ʻuhinga ʻe niʻihi ʻoku ongoʻi mamahi ai e kakaí hili hano fai ha meʻa ʻoku hala, hangē ko e “Naʻá ku ilifia naʻa tauteaʻi au” pe “Naʻá ku mā ʻi he fakakaukau ʻe fai mai ʻe he kakaí kiate aú” pe “Naʻá ku ʻilo naʻe loto-mamahi e Tamai Hēvaní ʻiate au.” Ko e fē ʻi he ngaahi tali ʻi he palakipoé ʻoku hangehangē ko e “mamahi faka-ʻotuá iá”? Ko e hā ʻoku lelei ange ai ʻa e mamahi faka-ʻotuá ʻi he ngaahi mamahi kehe te tau lava ongoʻi hili hano fai ha meʻa ʻoku halá?

fakaʻilonga akoʻi

Poupouʻi e Ako ʻi ʻApí

Talaange ki he fānaú te nau lava ʻo vahevahe ha taha ʻo e ngaahi ʻekitivitī mei he kalasi he ʻaho ní, ki honau ngaahi fāmilí ʻi ʻapi, pea malava ke fai he lolotonga ʻo ha efiafi fakafāmili ʻi ʻapi.

Fakatupulaki ʻEtau Akoʻí

Fakaʻaliʻali ha folofola. Fili ha veesi folofola ʻokú ke pehē ʻoku ʻuhingamālié pea fakaʻaliʻali ia ʻi ho loki akó ʻa ia ʻe lava ʻe he fānaú ke nau toutou mamata ki aí. Mahalo ʻe lava taufetongi e fānaú ʻi hono fili ha folofola ke fakaʻaliʻali.

peesi ʻekitivitií: ʻOku ou tui ʻoku totonu ke u faitotonu