“26 ʻAokosi–1 Sepitema. 1 Kolinitō 8–13: ‘Ko e Sino ʻo Kalaisí ʻAkimoutolu’” Haʻu, ʻo Muimui ʻIate Au—Maʻá e Palaimelí: Fuakava Foʻou 2019 (2019)
“26 ʻAokosi–1 Sepitema. 1 Kolinitō 8-13,” Haʻu, ʻo Muimui ʻIate Au—Maʻá e Palaimelí: 2019
26 ʻAokosi–1 Sepitema
1 Kolinitō 8–13
“Ko e Sino ʻo Kalaisí ʻA Kimoutolu”
ʻI hoʻo lau e 1 Kolinitō 8–13, fakafanongo ki he ngaahi ueʻi mei he Laumālié kau ki he founga ke akoʻi ʻaki e ngaahi tefitoʻi moʻoni ʻi he ngaahi vahe ko ʻení. Manatuʻi ʻe lava ke liliu ha faʻahinga fakakaukau ki he ʻekitivitií maʻá e fānau lalahi mo iiki angé fakatouʻosi.
Lekooti e Ngaahi Ongo ʻOkú ke Maʻú
Fakaafeʻi Ke Vahevahe
Fakaafeʻi e fānaú ke vahevahe ha meʻa ne nau fai lolotonga e sākalamēniti he ʻaho ní, ke nau fakakaukau ai kau kia Sīsū.
Akoʻi e Tokāteliné
Fānau Iiki Angé
ʻE tokoniʻi au ʻe he Tamai Hēvaní ke u fai e ngaahi fili totonú.
ʻOku ʻikai ke faingofua maʻu pē ke fili ki he totonú, ka ʻe tokoniʻi kitautolu ʻe he Tamai Hēvaní ke tau fai e ngaahi fili totonú.
Ngaahi ʻEkitivitī ʻe Ala Fakahokó
-
Lau e 1 Kolinitō 10:13 ki he fānaú, ʻo fakaafeʻi kinautolu ke nau tafoki meiate koe ʻi heʻenau fanongo ki he ongo foʻi lea ko e “ʻahiʻahiʻi” mo e “ʻahiʻahi.”
-
Faʻu ha fanga kiʻi fakaʻilonga taʻofi (stop) maʻá e fānaú. Fai ha fanga kiʻi talanoa nounou ki ha kakai ne ʻamanaki ke nau fai ha fili ʻoku hala. Lolotonga e fanongo ʻa e fānaú, fakaafeʻi kinautolu ke nau puke hake ʻenau ngaahi fakaʻilongá ʻi he taimi ʻoku fai ai ʻe he taha ʻi he talanoá ha fili ʻoku hala. Ko e hā e fili ʻoku totonú? Fakamoʻoniʻi ange ʻe tokoniʻi kinautolu ʻe he Tamai Hēvaní ke fili e totonú.
-
Fakaʻaliʻali ha fakatātā ʻo Sīsū, pea hivaʻi fakataha mo e fānaú ha hiva kau kia Sīsū, hangē ko e “ʻOku ou Feinga ke Hangē ko Sīsuú” (Tohi Hiva ʻa e Fānaú, 40–41). ʻOku tokoni fēfē nai ʻa hono manatuʻi ʻo Sīsuú ke tau fai ha ngaahi fili ʻoku leleí? Fakaʻaliʻali ha ngaahi fakatātā ʻo ha ngaahi meʻa kehe ʻokú ne tokoniʻi kitautolu ke tau fai ha fili lelei, hangē ko e mātuʻá pe folofolá. Fehuʻi ki he fānaú pe ko e hā ha ngaahi meʻa ʻoku tokoni kiate kinautolu ke nau fai e ngaahi fili ʻoku leleí.
Kuo faitāpuekina au ʻe he Tamai Hēvaní ʻaki ʻa e ngaahi meʻafoaki fakalaumālie.
Kuo foaki ʻe he Tamai Hēvaní ki he kotoa ʻo ʻEne fānaú ʻa e ngaahi meʻafoaki fakalaumālie. Ko e hā ha ngaahi meʻafoaki fakalaumālie ʻokú ke mamata ki ai ʻi he fānau ʻokú ke akoʻí?
Ngaahi ʻEkitivitī ʻe Ala Fakahokó
-
Lau fakataha e 1 Kolinitō 12:7–11, pea feinga ke ʻiloʻi e ngaahi meʻafoaki fakalaumālie naʻe fakahingoa ʻe Paulá. Tokoniʻi e fānaú ke nau fakakaukau ki he ngaahi ngāue ʻe lava ʻo ʻalu fakataha mo e ngaahi meʻafoaki ko ʻeni ʻo e Laumālié, pea fakaʻaongaʻi hono fakatātaaʻí ke tokoniʻi e fānaú ke nau manatuʻi e ngaahi meʻafoakí.
-
Kole ki he fānaú ke nau tā ha fakatātā ʻo ha meʻaʻofa ne nau maʻu, ʻoku nau manako ai. Fakamatalaʻi ange, ʻoku ʻomi ʻe he Tamai Hēvaní kiate kitautolu ha ngaahi meʻafoaki fakalaumālie, ke fakamālohia ʻetau tuí mo tokoniʻi kitautolu ke tau faitāpuekina e niʻihi kehé.
-
Fai ha kiʻi tohi maʻá e fānau takitaha, ʻo fakamatalaʻi ha meʻafoaki fakalaumālie kuó ke mātā ʻiate kinautolu (pe te ke lava fakaafeʻi e ngaahi mātuʻá ke nau fai e fanga kiʻi tohi ko ʻení). Kofukofu e fanga kiʻi tohí hangē ha meʻaʻofá. Fakaʻatā e fānaú ke nau fakaava ʻenau ngaahi meʻaʻofá, pea tokoniʻi kinautolu ke nau lau kau ki heʻenau ngaahi meʻafoaki fakalaumālié.
Kuo foaki ʻe he Tamai Hēvaní ki he kotoa ʻo ʻEne fānaú ʻa e ngaahi meʻafoaki fakalaumālie.
ʻOku ou lava ʻo ʻofa ki he niʻihi kehé.
ʻOku akoʻi mai ʻe he folofolá, ko e manavaʻofá ʻa e “ʻofa haohaoa ʻa Kalaisí” (Molonai 7:47). Te ke tokoniʻi fēfē ʻa e fānaú ke nau fakatupulaki mo fakahaaʻi e ʻofa faka-Kalaisí?
Ngaahi ʻEkitivitī ʻe Ala Fakahokó
-
Lau e 1 Kolinitō 13:8 mo e Molonai 7:47, pea tokoniʻi e fānaú ke nau toe lau e kupuʻi lea “Ko e manavaʻofá ʻa e ʻofa haohaoa ʻa Kalaisí.” Fakaʻaliʻali ha ngaahi fakatātā ʻo e loto ʻofa mo angaʻofa ʻa Kalaisí, pea fehuʻi ki he fānaú pe naʻá Ne fakahaaʻi fēfē ʻa e ʻofá ki he niʻihi kehé (vakai Tohi Fakatātā ʻo e Ongoongoleleí ki ha ngaahi fakakaukau).
-
Fili ha taha ʻi he fānaú ke ne tuʻu ʻi muʻa ʻi he loki akó. Fehuʻi ki he tokotahá pe ʻe tokoni fēfē ki ha taha kehe ʻi he kalasí. Fakamatalaʻi ange ko e founga ʻeni ʻe taha te tau lava ai ʻo fakahaaʻi e manavaʻofá ki he niʻihi kehé. Fakaafeʻi e fānaú kehé ke nau taufetongi ʻi hono fakahaaʻi e manavaʻofá.
-
Hivaʻi mo e fānaú ha hiva kau ki he ʻofa ki he niʻihi kehé, hangē ko e “Folofola ʻa Sīsū ʻFeʻofaʻaki’” pe “Ke Mou Feʻofaʻaki” (Tohi Hiva ʻa e Fānaú, 39, 74). Fakaʻaliʻali ha ngaahi fakatātā ʻo e kakai kehekehe (hangē ko e mātuʻá, faiakó, pe kaungāmeʻa), pea kole ki he fānaú ke vahevahe e founga te nau lava ai ʻo tokoni ki he tokotaha ko iá. Fakaafeʻi e fānaú ke nau fakakaukau ki ha tokotaha te nau lava ʻo tokoni ki ai pea fai ha kiʻi tohi pe tā ha fakatātā ke ʻoange ki he tokotaha ko iá.
Akoʻi e Tokāteliné
Fānau Lalahi Angé
ʻE tokoniʻi au ʻe he Tamai Hēvaní ke u tekeʻi ʻa e ʻahiʻahí.
ʻE lava ke ʻomi ʻe he ngaahi talaʻofa ʻi he veesi ko ʻení ʻa e loto falala ki he fānaú, ʻe tokoniʻi kinautolu ʻe he Tamai Hēvaní ʻi he taimi ʻe ʻahiʻahiʻi ai kinautolú.
Ngaahi ʻEkitivitī ʻe Ala Fakahokó
-
Fakaafeʻi e fānaú ke nau lau tautau toko ua ʻa e 1 Kolinitō 10:13 pea fakamatala fakanounouʻi ʻa e vēsí ʻi he ngaahi lea pē ʻanautolu. Kole ki he fānaú ke vahevahe ha aʻusia ʻa ia naʻe tokoniʻi ai kinautolu ʻe he Tamai Hēvaní ke nau fakaʻehiʻehi pe tekeʻi ʻa e ʻahiʻahí. Ko e hā te tau lava ʻo fai ke tau fakafalala ai ki he Tamai Hēvaní ʻi he taimi ʻe ʻahiʻahiʻi ai kitautolú?
-
Hiki ʻi ha ngaahi laʻipepa ʻa e ngaahi ʻahiʻahi ʻe ala fehangahangai mo e fānaú he kuongá ni. Fakaafeʻi e fānaú ke nau takitaha fili ha laʻipepa pea vahevahe ki ha meʻa kuo foaki mai ʻe he Tamai Hēvaní ke tokoni kiate kitautolu ke tau fakaʻehiʻehi pe tekeʻi e ngaahi ʻahiʻahi ko ʻení. Ki ha ngaahi fakakaukau, lau fakataha e ʻAlamā 13:28–29.
Lolotonga e sākalamēnití, te u lava ʻo fakakaukau ki he anga ʻo ʻeku muimui ki he Fakamoʻuí.
ʻOku maʻu ʻe he sākalamēnití ha mahuʻinga lahi ange maʻá e fānau kuo ʻosi papitaisó. Tokoniʻi kinautolu ke nau vakai ki he ouau toputapu ko ʻení, ko ha faingamālie ke “sivisiviʻi” ai kinautolu mo fakafoʻou ʻenau fuakava ki he Fakamoʻuí (1 Kolinitō 11:28).
Ngaahi ʻEkitivitī ʻe Ala Fakahokó
-
Kole ki ha taha ʻo e fānaú ke ne lau e 1 Kolinitō 11:28. Ko e hā hono ʻuhinga ke “sivisiviʻi” kitautolu kimuʻa ʻi hono maʻu ʻo e sākalamēnití? Kole ki he fānaú ke nau fakakaukau ki ha kakai kehe ʻoku nau sivisiviʻi ha ngaahi meʻa, hangē ko e kau toketaá, kau polisi fakatotoló, pe kau saienisí (hangē ko ʻení, ʻoku sivisiviʻi ʻe he kau toketaá hotau sinó, ki ha ngaahi lavea pe mahaki ʻoku fie maʻu ke fakamoʻui). Ko e hā ʻoku akoʻi mai ʻe heʻenau ngāué ʻo kau ki he founga ʻoku totonu ke tau sivisiviʻiʻaki ʻa kitautolu ʻi he taimi ʻoku tau maʻu ai e sākalamēnití?
-
Kole ki he fānaú ke nau faʻu ha lisi ʻo e ngaahi meʻa ʻoku nau lava ʻo fakakaukau ki ai ʻi he taimi ʻoku nau maʻu ai e sākalamēnití. Fakaafeʻi kinautolu ke fakaʻaongaʻi ʻenau ngaahi lisí ko ha fakamanatu ia ke sivisiviʻi kinautolu lolotonga e sākalamēnití.
1 Kolinitō 12:4, 7–12, 31; 13:1–8
ʻOku ʻi ai hoku ngaahi meʻafoaki fakalaumālie.
Naʻe akoʻi mai ʻe Paula, ko e ngaahi meʻafoaki ʻo e laumālié ʻoku foaki “ki he tangata kotoa pē” (1 Kolinitō 12:7). ʻE lava ke tokoni ʻa e tefitoʻi moʻoni ko ʻení ki he fānaú, ke nau langaki ʻenau ongoʻi mahuʻingaʻia ʻiate kinautolú, tautefito ki he taimi te nau fakaʻaongaʻi ai ʻenau ngaahi meʻafoakí ke faitāpuekina e niʻihi kehé.
Ngaahi ʻEkitivitī ʻe Ala Fakahokó
-
Kole ki he fānaú ke hiki ʻi he palakipoé ʻa e ngaahi meʻafoaki fakalaumālie ʻoku nau maʻu ʻi he 1 Kolinitō 12:7–11; 13:2. Fakaafeʻi kinautolu ke nau fekumi ki ha ngaahi toe meʻafoaki kehe ʻoku hā ʻi he Molonai 10:8–18 mo e Tokāteline mo e Ngaahi Fuakavá 46:13–26. Vahevahe mo kinautolu e ngaahi meʻafoaki fakalaumālie naʻe lave ki ai ʻa ʻEletā Marvin J. Ashton: “Ko e meʻafoaki ʻo e kolé; ʻa e meʻafoaki ʻo e fakafanongó; … ʻa e meʻafoaki ʻo e fakaʻehiʻehi mei he fekeʻikeʻí; … ʻa e meʻafoaki ʻo e fekumi ki he meʻa ʻoku māʻoniʻoní; ʻa e meʻafoaki ʻo e ʻikai ke fakamāú; ʻa e meʻafoaki ʻo e falala ʻe tataki koe ʻe he ʻOtuá; … ʻa e meʻafoaki ʻo e malava ʻo fakalaulaulotó; … ʻa e meʻafoaki ʻo e lotú; ʻa e meʻafoaki ʻo hono fai ʻo ha fakamoʻoni mālohí” (“There Are Many Gifts,” Ensign, Nōvema 1987, 20). Fakaafeʻi e fānaú ke nau talanoa ki ha ngaahi meʻafoaki fakalaumālie ʻoku nau mātā ʻi he niʻihi kehé.
-
Fehuʻi ki he ngaahi mātuʻá kimuʻa ʻi he kalasí, fekauʻaki mo e ngaahi meʻafoaki ʻoku nau mātā ʻi heʻenau fānaú, pe te ke fakakaukau pē ʻiate koe ki ha ngaahi meʻafoaki ʻoku nau maʻu. Talaange ki he fānaú ʻa e ngaahi meʻafoaki ko ʻení, pea kole kiate kinautolu ke nau mateʻi pe ko hai ʻi he fānaú ʻokú ne maʻu e meʻafoaki ko ʻení. Fakaafeʻi e fānaú ke nau hiki hifo ha taha ʻo e ngaahi founga te nau fakaʻaongaʻi ki ai ʻenau ngaahi meʻafoakí ke faitāpuekina ha taha ʻi he uiké ni.
-
Vahevahe ha ngaahi tūkunga ʻa ia ʻe lava ai ʻe he kakaí ʻo fakaʻaongaʻi ha meʻafoaki fakalaumālie mei he 1 Kolinitō 12:7–10. Fakaafeʻi e fānaú ke nau feinga ke ʻiloʻi ʻa e ngaahi meʻafoaki fakalaumālie ʻe lava ʻo fakaʻaongaʻi ʻi he ngaahi tūkunga takitaha.
Poupouʻi e Ako ʻi ʻApí
Fakaafeʻi e fānaú ke nau vahevahe mo honau ngaahi fāmilí ʻa e ngaahi meʻafoaki fakalaumālié, pea fehuʻi ki he ngaahi mēmipa ʻo e fāmilí pe ko e hā e ngaahi meʻafoaki ʻoku nau maʻú.
Fakatupulaki ʻEtau Akoʻí
Fai ha fakaafe ʻokú ne fakaʻapaʻapaʻi e tauʻatāina ke filí. ʻI hoʻo fakaafeʻi e fānaú ke nau ngāueʻi e meʻa ʻoku nau akó, fakakaukau ki ha ngaahi founga ke fakaʻapaʻapaʻi ai ʻenau tauʻatāina ke filí. Fakakaukau ke fakaafeʻi kinautolu ke nau fakakaukau ki he ngaahi founga pē ʻanautolu ke nau fakaʻaongaʻi ai e meʻa ne nau akó, kae ʻikai ko hono ʻoatu ha ngaahi fakaafe tukupau.