“Agosto 5–11. Mga Taga-Roma 1–6: ‘Ang Gahum sa Dios alang sa Kaluwasan’” Dali, Sunod Kanako—Alang sa Primary: Bag-ong Tugon 2019 (2019)
“Agosto 5–11. Mga Taga-Roma 1–6,” Dali, Sunod Kanako—Alang sa Primary: 2019
Agosto 5–11
Mga Taga-Roma 1–6
“Ang Gahum sa Dios alang sa Kaluwasan”
Unsa nga mga pag-aghat ang imong nadawat samtang imong gibasa ang Mga Taga-Roma 1–6? Kini nga mga pag-aghat makatabang kanimo sa pagpili gikan sa mosunod nga mga ideya sa pagtudlo.
Irekord ang Imong mga Impresyon
Awhaga ang Pagpaambit
Dapita ang mga bata sa pagpaambit kon unsay ilang gibuhat agig tubag sa bisan unsa nga mga pagdapit nga imong gihatag kanila diha sa leksyon sa miaging semana. Pananglit, gisultihan ba nila ang ilang mga pamilya mahitungod sa pagkaguba sa barko nga gihulagway diha sa Mga Buhat 27 ug mahitungod sa pagsunod sa propeta?
Itudlo ang Doktrina
Mas Gagmay nga mga Bata
Akong mapakita ang akong pagtuo kang Jesukristo pinaagi sa pagsunod Kaniya.
Si Pablo mitudlo nga ang ebanghelyo adunay gahum sa pagdala og kaluwasan ngadto sa tanan nga nagpuyo pinaagi sa pagtuo diha ni Jesukristo. Unsaon nimo pagtabang ang mga bata sa pagpakita sa ilang pagtuo diha ni Jesukristo pinaagi sa pagsunod Kaniya?
Posible nga mga Kalihokan
-
Tabangi ang mga bata sa pagpangita sa Roma diha sa mapa. Ipasabut nga ang basahon nga Mga Taga-Roma naglangkob sa usa ka sulat nga gihimo ni Pablo ngadto sa mga Santos sa Roma aron sa pagtabang kanila nga makasabut sa mga baruganan sa ebanghelyo sama sa pagtuo.
-
Basaha ang Mga Taga-Roma 1:17 ngadto sa mga bata, ug tabangi sila sa pagsag-ulo sa mga pulong nga “Mabuhi ang namatarung pinaagi sa pagtuo.” Mahimo ka nga mo-assign og usa ka pulong gikan niana nga hugpong sa mga pulong ngadto sa matag bata ug hangyoa sila sa pagsulti niana nga pulong kon imo silang itudlo. Ipasabut nga kini nga hugpong sa mga pulong nagpasabut nga kinahanglang magpuyo kita matag adlaw uban sa pagtuo diha ni Jesukristo. Nasayud ba ang mga bata kon unsa ang pagtuo? Pagpakita og hulagway ni Jesukristo ug ipasabut nga kita nagtuo nga Siya tinuod bisan tuod wala kita makakita Kaniya. Kini mao ang pagtuo—motuo sa usa ka butang bisan og wala kita makakita niini.
-
Ipasabut nga atong mapakita ang atong pagtuo kang Jesukristo pinaagi sa pagsunod Kaniya. Itago libut sa kwarto ang mga hulagway sa mga tawo nga nagbuhat sa unsay gipabuhat kanato ni Jesus. Papuli-puliha ang mga bata sa pagpangita ug paghulagway sa mga litrato. Unsa ang atong mahimo aron sa pagsunod kang Jesus?
-
Taptapi ang mata sa usa sa mga bata, ug giyahi siya tadlas sa kwarto ngadto sa usa ka hulagway ni Jesus. Pasulaya ang matag bata. Tabangi ang mga bata nga makasabut nga kinahanglan nilang sundon ang mga pagtulun-an ni Jesus sama nga misunod sila sa imong giya.
Ang mabunyagan susama sa pagkahimong bag-o nga tawo.
Ang mga bata nga imong gitudloan nangandam alang sa bunyag. Unsa ang ilang makat-unan mahitungod sa bunyag gikan sa instruksyon ni Pablo nga “managgawi diha sa kabag-o sa kinabuhi”?
Posible nga mga Kalihokan
-
Dapita ang mga bata sa pagsulti og balik sa mga pulong nga “managgawi diha sa kabag-o sa kinabuhi” (Mga Taga-Roma 6:4). Ipasabut nga kon kita bunyagan, kita gipasaylo sa atong mga sala. Aduna kitay kahigayunan nga magpadayon pinaagi sa paghimo og maayong mga pagpili, maghinulsol kon masayop kita, ug maningkamot nga mahimong mas sama kang Jesus. Gamita ang pahina sa kalihokan karong semanaha aron sa pagtudlo sa mga bata nga ang bunyag nagtabang kanato nga mahimong bag-o nga tawo.
-
Sultihi ang mga bata kon unsa ang imong gibati sa dihang gibunyagan ka, ug dapita sila sa pagpaambit og mga kasinatian sa dihang nakatambong sila og bunyag. Dapita sila sa pagdrowing og mga hulagway sa ilang kaugalingon sa ilang umaabut nga adlaw sa bunyag ug sa pagpaambit unsay ilang mahimo aron mangandam alang sa ilang bunyag.
-
Kantaha uban sa mga bata ang usa ka awit mahitungod sa bunyag, sama sa “Kon Ako Bunyagan” (Songbook sa mga Bata, 53). Unsa ang atong makat-unan mahitungod sa bunyag gikan niini nga kanta?
Ang bunyag nagsimbolo sa pagsugod og bag-ong kinabuhi isip disipulo ni Kristo.
Itudlo ang Doktrina
Mas Dagko nga mga Bata
Akong mapakita ang akong pagtuo kang Jesukristo pinaagi sa pagsunod Kaniya.
Si Pablo mitudlo nga ang ebanghelyo adunay gahum sa pagdala og kaluwasan ngadto sa tanan nga nagpuyo pinaagi sa pagtuo diha ni Jesukristo. Ang hugot nga pagtuo mao ang unang baruganan sa ebanghelyo. Moaghat kini kanato sa pagsunod sa mga kasugoan. Unsaon nimo sa pagtabang ang mga bata nga mas makasabut sa pagtuo?
Posible nga mga Kalihokan
-
Hangyoa ang usa ka bata sa pagpangita sa Roma diha sa mapa. Tabangi ang mga bata nga makasabut nga sa sunod nga pipila ka semana, magkat-on sila gikan sa mga sulat nga gihimo ni Pablo ngadto sa mga miyembro sa Simbahan sa lain-laing mga dapit, nga magsugod sa iyang sulat ngadto sa mga taga-Roma.
-
Isulat ang teksto gikan sa Mga Taga-Roma 1:16 diha sa pisara, nga ilisan og mga blangko ang pipila ka mga pulong. Hangyoa ang mga bata nga tan-awon ang mga kasulatan ug sulatan ang mga blangko. Itudlo ang mga pulong nga “Kay wala ko igakaulaw ang ebanghelyo ni Kristo”, ug dapita ang mga bata sa pagpaambit kon unsay ipasabut niini nga mga pulong ngadto kanila.
-
Dapita ang usa ka bata sa pagbasa og kusog sa Mga Taga-Roma 1:17, ug hangyoa ang mga bata sa pagpaminaw sa usa ka pulong nga gibalik-balik. Unsay gipasabut sa “mabuhi … pinaagi sa pagtuo”? Tabangi ang mga bata sa pagpangita sa kahulugan sa hugot nga pagtuo diha sa kapanguhaan sama sa Giya ngadto sa mga Kasulatan, “Hugot nga Pagtuo,” scriptures.lds.org. Unsa kaha ang kalainan sa atong kinabuhi kon wala kitay pagtuo diha ni Jesukristo?
-
Pakit-a ang mga bata og usa ka tanom ug usa ka liso, ug pangutan-a kon sa unsang paagi ang liso mahimong tanom. Ipasabut nga kon kita motanom ug mobisbis sa usa ka liso, gipakita nato nga aduna kitay pagtuo nga motubo kini. Unsaon nato sa pagpakita nga aduna kitay pagtuo ni Jesukristo? Ikonsiderar ang pagkanta og usa ka awit mahitungod sa pagtuo, sama sa “Hugot nga Pagtuo” (Songbook sa mga Bata, 50–51), isip parte niini nga kalihokan.
Nagkinahanglan kita ni Jesukristo aron mapasaylo sa atong mga sala.
Gusto ni Pablo nga makasabut ang mga taga-Roma nga ang kaluwasan moabut lamang pinaagi kang Jesukristo ug sa Iyang grasya. Pamalandungi kon unsaon nimo sa pagtudlo niini nga kamatuoran ngadto sa mga bata.
Posible nga mga Kalihokan
-
Dapita ang mga bata sa pagbasa sa Mga Taga-Roma 3:23–24. Unsa kaha ang hunahuna sa mga bata nga gitudlo niini nga mga bersikulo kanato? Ipasabut nga ang “grasya” diha sa bersikulo 24 nagpasabut sa gasa sa gugma ug kalooy sa Manluluwas, nga naghimong posible aron makadawat kita og kapasayloan sa atong mga sala.
-
Pagbitay og pagkaon o litrato sa taas nga parte sa bong-bong o sa laing dapit nga dili makab-ut sa mga bata kon sila ra. Pasulaya sila sa pagkab-ut niini, ug itandi kini sa unsay gitudlo ni Pablo diha sa Mga Taga-Roma 3:23. Dayon tabangi sila nga makab-ut kini. Unsay gibuhat sa Manluluwas alang kanato nga dili nato mahimo sa atong kaugalingon? Dapita ang mga bata sa pagpaambit sa unsay ilang bation sa Manluluwas kon maghunahuna sila sa Iyang gibuhat alang kanila.
Ang mabunyagan susama sa pagkahimong bag-o nga tawo.
Mitudlo si Pablo nga ang bunyag nagsimbolo sa kamatayon ug Pagkabanhaw ni Kristo. Nagsimbolo usab kini sa “kamatayon” sa atong makasasala nga kaugalingon ug sa pagbangon aron “managgawi diha sa kabag-o sa kinabuhi” (Mga Taga-Roma 6:4). Atong mabag-o ang atong pasalig nga magpuyo diha sa bag-ong kinabuhi sa matag higayon nga moambit kita sa sakrament.
Posible nga mga Kalihokan
-
Dapita ang usa ka bata sa pagbasa sa Mga Taga-Roma 6:3–6. Unsay gisulti ni Pablo nga ang bunyag maoy “sama sa iya”?
-
Hisguti kon sa unsang paagi ang bunyag nagsimbolo sa kamatayon ug pagkabanhaw. Nganong ang kamatayon ug pagkabanhaw maayo nga mga simbolo sa unsay mahitabo kon bunyagan kita?
-
Basaha og dungan ang mga pag-ampo sa sakrament (tan-awa sa D&P 20:77, 79). Pahinumdumi ang mga bata nga kon moambit kita sa sakrament, atong gibag-o ang pasalig nga atong gihimo sa dihang gibunyagan kita nga mosunod ni Jesukristo. Sa unsang paagi ang sakrament nagtabang kanato nga “managgawi diha sa kabag-o sa kinabuhi”?
-
Dapita ang mga bata sa paghimo og mga poster nga nagpakita kon unsay kahulugan diha kanila sa “managgawi diha sa kabag-o sa kinabuhi.” Mahimong ibitay nila kini sa ilang mga lawak aron sa pagtabang kanila nga mahinumdom nga mohimo og maayo nga mga pagpili.
Awhaga ang Pagkat-on diha sa Panimalay
Awhaga ang mga bata sa paghangyo sa mga sakop sa pamilya nga sultihan sila kon makakita sila sa mga bata nga naghimo og butang nga nagpakita og pagtuo.
Pagpalambo sa Atong Pagtudlo
Lig-una ang pagsalig sa mga bata. Aron matabangan ang mga bata sa paglig-on sa pagsalig nga makahimo sila sa pagkat-on sa ebanghelyo sa ilang kaugalingon, dayega sila kon moapil sila sa mga kalihokan sa klase.