Tu e matai Pailato o Karisito

Ecce Homo, mai vei Antonio Ciseri

June 17–23

Maciu 27; Marika 15; Luke 23; Joni 19

“Sa oti”

Tekivuna na nomu vakavakarau ena wiliki ni Maciu 27; Marika 15; Luke 23; kei na Joni 19. Segata ena yalomasumasu mo kila na nodra gagadre na gone.

Vola na Veika o Uqeti Kina

ivakatakilakila ni veiwasei

Sureta na Veiwasei

Raica me taura na gone yadua na iyaloyalo mai na ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale. Ni taura voli na iyaloyalo, me qai wasea na gone yadua e dua na ka e kila tu me baleta na mate i Jisu.

ivakatakilakila ni veivakavulici

Vakavulica na iVunau

Gone Sobu

Maciu 27:11–66; Luke 23; Joni 19

Ni a mate o Jisu ena vukuqu, au sa rawa ni tucake tale.

Era na rairai lomabibi na gone lalai ena italanoa ni nona Vakamatei o Jisu. “Wase 52: The Trials of Jesus” kei na “Wase 53: Jesus Is Crucified,” New Testament Stories, 133–38, se na kena vidio (LDS.org) sa vakarautaka e dua na ivakarau vinaka mo wasea kina vakadodonu na italanoa oqo vei ira.

iTaviqaravi e Rawa ni Caka

• Vakaraitaka na iyaloyalo ena ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale ni o tukuna na nona lewai, Vakamatei, ka bulu o Jisu (raica talega Gospel Art Book, naba 57 kei na 58). Sureti ira na gone me ra wasea na veika era kila baleta na veika a yaco oqo. Vakabibitaka ni ena ikatolu ni siga, a tucake tale mai na mate o Jisu, kena ibalebale ni sa bula tale ko Koya.

• Kerei ira na gone me ra cavuta eso na ka era cakava ena vukudra na nodra itubutubu ka ra sega ni rawa ni cakava vakaiira. Vakaraitaka e dua na iyaloyalo ni iVakabula. Vakamacalataka ni ena vuku i Jisu, sa rawa ni da tucaketale—e dua na ka eda sega ni rawa ni cakava vakaikeda.

• Vakaraitaka na kena iyaloyalo e dua o kila ni sa mate. Wasea na nomu ivakadinadina ni ena vuku i Jisu ena bula tale na tamata oya.

na bulu i Karisito

Na Veibulu, mai vei Carl Heinrich Bloch

Maciu 27:26–37; Luke 23:34

Au rawa ni vosoti ira na tani me vakataki Jisu.

O na vukei ira vakacava na gone me ra kila na ivakarau me ra vosoti ira kina era dau cakaca, me vakataki Jisu?

iTaviqaravi e Rawa ni Caka

• Vakamacalataka era a cakaca vakacava vei Jisu na sotia (raica na Maciu 27:26–37), qai wilika na Luke 23:34. Vakamacalataka ni gauna eda vosoti ira kina na tani, eda kauta tani na yaloca kivei ira ka vakaraitaka na loloma.

• Wasea na gauna eso a kaya se cakava kina e dua na ka ca. Kerei ira na gone me ra vakaraitaka na iwalewale era na vosota kina na tamata oya.

• Vola na vosa se malanivosa mai na “Help Me, Dear Father,” Children’s Songbook, 99, ena papa. Sureti ira na gone me ra lagata vakavica na sere, ni bokoci eso na vosa ena gauna yadua oqori me yacova ni ra sa vulica taucoko na sere. Mai na sere oqo, o cei e dodonu me da vosota? O cei e rawa ni vukei keda ni sa dredre na veivosoti?

• Vaqara e dua na ilavelave walega oqo ni Friend se Liaona mo kunea kina na italanoa ni dua na gone ka a vosota e dua. Wasea na italanoa oqo vata kei ira na gone.

Luke 23:32–33, 39–43

Baleta ni a vakararawataki ka mate ena vukuqu o Jisu, au sa rawa ni veivutuni ka vosoti.

Dina ga ni ra se bera ni yalomatua na gone bera ni yabaki walu, sa bibi kivei ira me ra sa tekivu vulica oqo na ivakarau me ra veivutunitaka kina na digidigi cala era cakava.

iTaviqaravi e Rawa ni Caka

• Vakalekalekataka na Luke 23:32–33, 39–43, ka dusi rau na rua na daubutako ena iyaloyalo 57 ena Gospel Art Book. Vakamacalataka ni gauna e vakalialiai Jisu tiko kina na imatai ni daubutako, sa vakadinadinataka na ikarua ni daubutako ni a cakava e dua na cala—sa mani tekivu me veivutuni.

• Wilika na Vunau kei na Veiyalayalati 19:16 vei ira na gone. Cava na vuna e vakararawataki kina ena vukuda o Jisu?

• Vakaraitaka na vidio “The Shiny Bicycle” (LDS.org). Vakamacalataka ni rawa ni vukei keda na Tamada Vakalomalagi kei Jisu Karisito ni vakavinakataka na noda ivalavala ca kei na cakacala ka ciqoma na veivosoti.

• Me ra caka maka ni joke ena papa na gone me matataka na digidigi cala eso. Qai kerei ira me ra bokoca na papa me matataka na veivutuni. Vakaraitaka e dua na iyaloyalo ni iVakabula, ka vakadinadinataka ni rawa ni da veivutuni ena Vukuna.

ivakatakilakila ni veivakavulici

Vakavulica na iVunau

Gone Qase Cake

Maciu 27:11–66; Luke 23; Joni 19

A mate o Jisu ena vukuqu baleta ni lomani au.

Cava na vuna o vakavinavinakataka kina ni a mate ena vukumu o Jisu Karisito? Navuca na iwalewale o rawa ni vukei ira kina na gone me ra kila na bibi ni nona solibula na iVakabula ena vukudra.

iTaviqaravi e Rawa ni Caka

• Vola na veika bibi a yaco ena Maciu 27:11–66 (me vukea na kena caka oqo, raica na “Wase 52: The Trials of Jesus” kei na “Wase 53: Jesus Is Crucified,” New Testament Stories, 133–38). Sureti ira na gone me ra vulica na veitikina oqo ka tuva vakadodonu na veika a yaco.

• Vakaraitaka na vidio “Jesus Is Condemned before Pilate” kei na “Jesus Is Scourged and Crucified” (LDS.org). (Raica talega na “The Atonement,” LDS.org.) Cava na vuna a lomasoli kina o Jisu me mai vakararawataki ena vukuda?

• Kerea e dua na gone me wilika na Maciu 27:54, ka sureti ira na gone me ra wasea na veika baleti Jisu e vukei ira ni kila ni o Koya na Luve ni Kalou.

• Tarogi ira na gone na cava era vulica me baleta na Mate mai na “Mai Mate Noda Tui Sau,” Sere ni Lotu, naba 108, se dua tale na sere ni sakaramede.

Maciu 27:26–37; Luke 23:34

Au rawa ni vosoti ira na tani me vakataki Jisu.

E rawa ni dredre me da vosoti ira na tani. Era na vakalougatataki na gone o vakavulica ni ra muria na ivakaraitaki ni iVakabula ka vosota na tamata kecega.

iTaviqaravi e Rawa ni Caka

• Sureti ira na gone me ra veivukevuke ni wilika baleti ira na sotia era cakaca voli vei Jisu ena Maciu 27:26–37 ka qai vosoti ira o Jisu ena Luke 23:34. (Raica na vakasama vakarautaki ni iVakadewa nei Josefa Simici ena Luke 23:34, ivakamacala e ra c.) Na cava eda vulica mai na ivakaraitaki nei Jisu?

• Vola ena papa Na cava o rawa ni cakava mo vosota kina e dua e cakaca vei iko? Me ra veivukevuke na gone ni vola na vakasama eso ena papa, me vaka na Masuta mo yalovinaka vua na tamata oqori se Vakasamataka e dua na ka vinaka baleta na tamata oqori.

• Sureti ira na gone me ra droinitaka na iyaloyalo ni ituvaki eso a cakaca kina e dua kei na ivakarau era na vosoti koya kina. Me ra wasea na nodra droini ki na kalasi.

Luke 23:32–33, 39–43

Baleta ni a vakararawataki ka mate ena vukuqu o Jisu, au sa rawa ni veivutuni ka vosoti.

Na lesoni oqo sa dua na gauna vinaka me vakadinadinataki kina ni ena vuku i Jisu Karisito, sa rawa ni da veivutunitaka na noda ivalavala ca ka vosoti.

iTaviqaravi e Rawa ni Caka

• Sureta e dua na gone me wilika na Luke 23:32–33, 39–43. Vakamacalataka ni o rau na tamata ka vakoti vata tu kei Jisu erau daubutako. A vakaraitaka vakacava e dua vei rau na daubutako ni sa tekivu veivutuni mai?

• Vola na iyatuvosa oqo ena papa, ka vakalala na vanua me biu kina na vosa kala eso: “Sa rawa niu vosoti niu veivutuni ena vuku ni Veisorovaki i Jisu Karisito.” Solia vei ira na gone na ivakatakilakila eso me vukea nodra vakalewena na vanualala.

• Sureta e dua na gone me taura tu e dua na katotuberi, ka vakatawana ena vatu lalai ni ra cavuta na vo ni gone na digidigi cala eso e rawa ni cakava e dua. Vukei ira na gone ni vakatauvatana na katotuberi ki na icolacola vakayalo eda colata tu ni da ivalavala ca. E sa vakataka vakacava na kau tani ni vatu mai na katotuberi na veivutuni?

• Vakayagataka na itukutuku ena “You Can Repent and Forgive” (Friend, Okosi. 2015, 10) me vakavulica vei ira na gone na ivakarau ni veivutuni.

ivakatakilakila ni vuli

Vakauqeta na Vuli e Vale

Vakauqeti ira na gone me ra vakasamataka e dua era gadreva me ra vosota ka navuca e dua na ka era na cakava me vakaraitaka kivua na tamata oya ni ra sa vosoti koya.

Vakatorocaketaki Noda Veivakavulici

Vulica mo vakila na ivakatakila. Sa dau yaco mai na ivakatakila ena “vosa ena vosa” (2 Nifai 28:30), sega ni taucoko ena dua ga na gauna. Ni o masuta ka vakananuma titobu na ivolanikalou kei na ituvatuva oqo, o na raica ni sa rawa ni basika mai na vakasama kei na veivakauqeti eso ena dua ga na gauna kei na vanua cavaga—ni o lako ki cakacaka, cakava na cakacaka ni vale, se veimaliwai kei ira na matavuvale kei na veitokani.

tabana ni itaviqaravi: au na tucake tale