“Me 6–12. Luka 12–17; Ioane 11: ‘Ia Tatou Olioli ia; aua ua Ou Maua La’u Mamoe na Le Iloa’” Sau, Mulimuli Mai ia te Au—Mo le Peraimeri: FeagaigaFou 2019 (2019)
“Me 6–12. Luka 12–17; Ioane,” Sau, Mulimuli Mai ia te Au—Mo le Peraimeri: 2019
O Le Atalii Faamaumau Oa, saunia e Liz Lemon Swindle
6--12 Me
Luka 12–17; Ioane 11
“Ia Tatou Olioli ia, aua ua Ou Maua La’u Mamoe na Le Iloa’”
Faitau ma le agaga tatalo le Luka 12–17 ma le Ioane 11, ma saili pe mafai faapefea ona e fesoasoani i tamaiti e te faiaoga ai ia malamalama i upumoni i nei mataupu ma lagonaina le alofa o le Tama Faalelagi.
Tusifaamaumau Ou Lagona Uunai
Valaaulia le Fefaasoaai
Faamanatu i tamaiti ni nai faataoto ma tala o loo maua i le Luka 12–17 ma le Ioane 11, ma valaaaulia i latou e filifili se tasi ma tusi sona ata.
Aoao atu Aoaoga Faavae
Tamaiti Laiti Ifo
E finagalo le Tama Faalelagi ia toe foi atu uma Ana fanau ia te Ia.
Atonu e i ai ni nai tamaiti i lau vasega e le o mai soo i le Peraimeri. E mafai faapefea ona e musuia tamaiti e te faiaoga ai e aapa atu ia i latou i le alofa?
Gaioiga e Mafai Ona Fai
-
Tuu atu i se tamaititi e toatasi se tupe siliva, i se isi tamaititi se ata o se mamoe, ma se isi tamaitiiti se ata o le atalii faamaumau oa (LDS.org). Faamatala faataoto e tolu o loo maua i le Luka 15 ma valaaulia tamaiti e uu i luga a latou tupe siliva po o ata pe a e ta’ua. E mafai ona e valaaulia tamaiti e toe faamatala atu faataoto e le tasi i le isi ia latou lava upu.
-
Fai i tamaiti e faasoa mai se taimi na leiloa ai sa latou mea. Faamalamalama atu e mafai e tagata ona leiloloa faaleagaga pe a latou le lagonaina le alofa o le Atua pe ua latou liliu ese foi mai ia te Ia. Molimau atu o nei faataoto o loo aoao mai ai mea e finagalo le Atua tatou te fesoasoani ai i tagata ua leiloloa ia toe foi mai ia te Ia.
-
Valaaulia tamaiti e mafaufau i isi tamaiti e le o o mai i le Peraimeri. Fesoasoani ia i latou e tusi ni valaaulia mo nei tamaiti e le o o mai i se gaoioiga a le Peraimeri. O le a se isi auala e mafai ai ona tatou fesoasoani i nei tamaiti ia lagonaina le alofa o le Tama Faalelagi mo i latou.
E mafai ona ou faaali atu lo’u alofa mo le Tama Faalelagi i lo’u faafetai atu mo o’u faamanuiaga.
E mafai faapefea e le tala i lepela e toasefulu ona faamalosiauina tamaiti ia loto faafetai?
Gaoioiga e Mafai Ona Fai
-
Faamatala le tala i lepela e toasefulu o e na faamaloloina e Iesu. Faaali atu le ata o loo maua i le otootoga o lenei vaiaso i le Sau, Mulimuli Mai ia te Au—Mo Tagata Taitoatasi ma Aiga ma valaaulia tamaiti e faitau le sefulu i o latou tamatamailima. Ona fai lea i ai e tuu i lalo tamatamailima e iva e faailoa mai ai le lepela e toatasi na faafetai atu ia Iesu. O anafea na faaali atu ai e tamaiti lo latou agaga faafetai i se uo po o se e alofa i ai?
-
Valaaulia tamaiti taitasi e faatino mai se mea ua ia faafetai ai, ae mate mai e tamaiti uma o le vasega. Fai i tamaiti e faasoa mai ni auala e mafai ona tatou faaali atu ai i le Tama Faalelagi lo tatou agaga faafetai mo o tatou faamanuiaga.
Tatou te talitonu o Iesu o le Alo o le Atua.
Na ta’u atu e Mareta, le tuafafine o Lasalo, ia Iesu: “Ua ou talitonu lava o oe le Keriso le Alo o le Atua” (Ioane 11:27). O le tala ia Maria, Mareta, ma Lasalo e mafai ona faamalolosia ai molimau a tamaiti ia Iesu Keriso.
Gaoioiga e Mafai Ona Fai
-
Aotele le tala ia Iesu ua faatuina Lasalo mai le oti (tagai foi “Mataupu 43: Ua Toe Faatuina mai Lasalo e Iesu,” Tala o le Feagaiga Fou,, 107–9, po o le vitio e o faatasi ai i luga o le LDS.org) ma faaali atu se lala ua mago ma se laau o ola. Tuu atu lau molimau ona o le mana o Iesu Keriso, o le a toetutu mai ai tagata ua oti ma ola e faavavau.
-
Fesoasoani i tamaiti e tauloto le fasifuaitau na fai atu e Iesu ia Mareta: “O a’u nei o le toetu ma le ola” (Ioane 11:26). Faamalamalama atu talu ai le Toetu o le Faaola, o le a tatou toe vaai ai i a tatou pele ua maliliu.
Aoao atu Aoaoga Faavae
Tamaiti Matutua Atu
E mafai ona ou fesoasoani ia Iesu e sue Lana mamoe ua leiloa.
Atonu e le o iloa e tamaiti e i ai isi i le vasega e le o o mai i le Peraimeri. E mafai faapefea ona e musuia i latou e aapa atu i nei tamaiti?
Gaoioiga e Mafai Ona Fai
-
Tofi tamaiti taitasi e faitau le leoa a le o le faataoto i le mamoe na leiloa poo le faataoto i le tupe na leiloa, o loo maua i le Luka 15:1–10, ma faasoa mai mea sa latou aoaoina.
-
Tusi igoa nei i le laupapa: tama, atalii matua, ma le uii Faaali le vitio “The Prodigal Son” (LDS.org) ma taofi i nisi taimi ina ia mafai ai e tamaiti ona tusitusi i luga o le laupapa.
-
Fai i se tamaitiiti e alu i fafo ae nana e isi tamaiti se tupe siliva poo se mamoe pepa. Toe foi ane le tamaitiiti ma sue le tupe poo le mamoe. Faamanatu i tamaiti e mafai ona leiloloa tagata i faamanuiaga o le talalelei. Valaaulia i latou e fautua mai ni auala e mafai ona latou aapa atu ai i na ituaiga o tagata. Usu faatasi ma tamaiti le “Pele i le Leoleo Mamoe,” Viiga, nu. 135, ma molimau atu i le olioli e maua pe a toe foi mai tagata i le Atua.
-
Faamalamalama atu sa faaaoga e Iesu le mamoe na leiloa, le tupe na leiloa, ma le atalii faamaumau oa e faatusa i tagata ua “leiloloa” aua ua latou le maua faamanuiaga o le talalelei. Valaaulia tamaiti e mafaufau i tagata latou te iloa ua le o o mai i le lotu. O le a se mea e mafai ona latou faia e fesoasoani ai i nei tagata e lagonaina le alofa o le Tama Faalelagi.
Mamoe na Leiloa, saunia e Liz Lemon Swindle
E mafai ona ou faaali atu lo’u alofa mo le Tama Faalelagi i lo’u faafetai atu mo o’u faamanuiaga.
O le tala i lepela e toasefulu o se auala lelei e musuia ai tamaiti ina ia faaali atu le loto faafetai i le Tama Faalelagi mo o latou faamanuiaga.
Gaoioiga e Mafai Ona Fai
-
Faitau faatasi le tala i lepela e toasefulu. Na faamanuiaina faapefea le lepela na faafetai atu ona o lona loto faafetai? Aisea e taua ai le faafetai atu i le Atua mo o tatou faamanuiaga?
-
Valaaulia tamaiti e lisi mai mea latou te faafetai ai e amata i mataitusi taitasi o o latou igoa.
-
Fai i tamaiti e tusi ni faamatalga faafetai i le Tama Faalelagi mo faamanuiaga ua Ia tuuina mai ia i latou. E mafai ona latou faatautauina na faamatalaga i autafa o o latou moega e faamanatu atu ai ia te i latou e faaali atu lo latou loto faafetai pe a latou tatalo.
Tatou te talitonu o Iesu o le Alo o le Atua.
E mafai faapefea ona tatou faaaogaina le tala ia Maria, Mareta, ma Lasalo e fesoasoani ai i tamaiti ia iloa, e pei ona sa faia e Mareta, o Iesu “o le Keriso, le Alo o le Atua”? (Ioane 11:27)
Gaoioiga e Mafai Ona Fai
-
Tusi i le laupapa ni nai faamatalaga na fai e tagata i le Ioane 11. Valaaulia tamaiti e mate mai po o ai e ona ia le faamatalaga, ma fai i ai e saili i le Ioane 11 e siaki ai a latou mate. O a ni o latou lagona pe ana o i latou o Iesu, Mareta, Maria, poo Lasalo? E mafai faapefea e le talitonu ia Iesu ona fesoasoani ia i tatou pe a tatou faanoanoa pe fefefe?
-
Faitau le molimau a Mareta, o loo maua i le Ioane 11:20–27. Fai i tamaiti e vaavaai mo upu ma fasifuaitau o loo faaalia ai sa faatuatua Mareta. O le a se mea e mafai ona tatou fai ia maua ai le faatuatua pe a faigata?
-
Fesoasoani i tamaiti e tauloto le Ioane 11:26. Faamalamalama o le a toetutu tagata uma, ae na o e amiotonu o le a maua le ola e faavavau ma toe nonofo faatasi ma le Tama Faalelagi ma Iesu Keriso.
Fautuaina le Aoaoina i le Aiga
Avatu i tamaiti ni pepa po o se tamai api e mafai ona latou faaaoga e tusitusi ai pe tusi ai ni ata o mea latou te faafetai ai i le gasologa o le vaiaso.
Faaleleia o Lo Tatou Aoao Atu
O le fai faafia o se ki i le aoaoina. E manuia tamaiti mai le faalogo i se mataupu faavae o le talalelei po o le faia o se gaoioiga e sili atu i le na o le tasi. Taumafai e faifai soo gaoioiga i ni auala eseese.