“Marso 25–31. Mateo 14–15; Marcos 6–7; Juan 5–6: ‘Dikay Agbuteng’” Umaykayo, Sumurot Kaniak—Para iti Primary: Baro a Tulag 2019 (2019)
“Marso 25–31. Mateo 14–15; Marcos 6–7; Juan 5–6,” Umaykayo, Sumurot Kaniak—Para iti Primary: 2019
Pakanen Ida, ni Jorge Cocco
Marso 25–31
Mateo 14–15; Marcos 6–7; Juan 5–6
“Dikayo Agbuteng”
Bayat ti panagsaganam a mangisuro manipud iti Mateo 14–15; Marcos 6–7; ken Juan 5–6, birokem dagiti mensahe a mainaig iti biag dagiti ubbing a sursuruam. Ania iti panagkunam a makatulongto kadakuada a makaawat kadagitoy a mensahe? Mabalin a mangted kenka daytoy a balabala iti sumagmamano a kapanunotan.
Isuratmo Dagiti Impresionmo
Yawis ti Panagbibinninglay
Mangipakita iti ladawan ni Jesus a magmagna iti rabaw ti danum (kitaen iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia), ket kiddawen kadagiti ubbing a mangibinglay no ania ti ammoda maipapan iti estoria.
Isuro ti Doktrina
Dagiti In-inaudi nga Ubbing
Ammo ni Jesuscristo no ania ti kasapulantayo ket matulongannatayo.
Bayat ti panangbasam maipapan iti panangagas ni Jesus iti lalaki iti an-aw ti Betesda, panunotem no kasano a matulongam dagiti ubbing a mangkita no ania ti isuro ti estoria maipapan iti kinaimbag, ayat, ken dadduma pay a kababalin ni Jesus.
Dagiti Mabalin nga Aktibidad
-
Usarem ti ladawan a Ni Cristo a Mangag-agas iti Masakit iti Betesda (Libro ti Arte ti Ebanghelio, num. 42) tapno mangisarita kadagiti ubbing iti estoria iti Juan 5:1–9. Wenno mangipabuya iti video “Jesus Heals a Man on the Sabbath” (LDS.org). Kiddawen kadagiti ubbing a mangipapan nga isuda dagiti tao nga inagasan ni Jesus. Ania koma ti nariknada idi inagasan ida ni Jesus?
-
Kiddawem kadagiti ubbing a manginagan iti sumagmamano a banag a narigat para kadakuada wenno makapaliday kadakuada. Isaritam kadakuada maipapan iti maysa a panawen iti biagmo a nakaawatka iti tulong manipud ti Mangisalakan bayat ti nakaro a pannubok iti biagmo. Paneknekam nga ammo ni Jesus maipapan iti amin a problematayo ket kayatna ti tumulong kadatayo.
Surotentayo ti pagwadan ni Jesus no nasayaattayo kadagiti dadduma.
Maysa a wagas a nangipakitaan ni Jesus iti ayatna ket ti panangpakanna kadagiti pasurotna idi mabisinda. Kasano a matulongam dagiti ubbing a masursuroda ti panangserbi kadagiti dadduma kas iti inaramid ni Jesus?
Dagiti Mabalin nga Aktibidad
-
Ipakitam kadagiti ubbing ti maysa a basket ken sumagmamano a tinapay bayat ti panangisaritam iti estoria iti Mateo 14:13–21. Ilawlawag a nupay pinadas ni Jesus ti mangsarak iti lugar tapno agmaymaysa, kayat dagiti tao ti umasideg Kenkuana. Ibinglaymo dagiti dadduma pay nga estoria kadagiti ubbing, ket kiddawem kadakuada a dumngeg iti inaramid ni Jesus a mangipakita iti kinaimbag ken ayat para kadakuada.
-
Kiddawen kadagiti ubbing a mangibinglay kadagiti wagas a nakapagbalinan a nasayaat ti maysa a tao kadakuada. Ania ti mabalin nga aramidenda tapno makapagbalinda a nasayaat kadagiti dadduma iti daytoy a lawas? Iti tunggal sungbat nga itedda, mangidrowing iti maysa a tinapay wenno ikan iti pisarra. Ibagam kadagiti ubbing a no aramidenda dagitoy a banag, sursurotenda ti pagwadan ni Jesus idi pinakanna dagiti mabisin a lima a ribu a tattao.
Makatulong ti pammati ken ni Jesucristo kadatayo a saan nga agbuteng.
Impakita ni Pedro iti nabileg a pammati idi nagna isuna iti rabaw ti danum nga agturong ken ni Jesus. Ania dagiti adalen a mabalin a para kadagiti ubbing iti daytoy nga estoria?
Dagiti Mabalin nga Aktibidad
-
Mangipakita iti ladawan Ni Jesus a Magmagna iti Rabaw ti Danum (Libro ti Arte ti Ebanghelio, num. 43) bayat ti panangisaritam ti estoria iti bukodmo a balikas. Ibilangmo ti panangusar iti panid ti aktibidad ti daytoy a lawas a makatulong kadagiti ubbing a mangisarita iti estoria kenka. Mabalinmo pay ti mangitugot iti bassit a malukong ti danum ken awisem dagiti ubbing nga agpammarang a “magmagna” dagiti ramayda a bumallasiw iti rabaw ti danum.
-
Ipabuya ti video “Wherefore Didst Thou Doubt?” (LDS.org), ket kiddawen kadagiti ubbing a mangbuya no ania ti gapu ti nagbutngan ni Pedro. Kalpasanna kiddawen kadakuada a mangisarita maipapan kadagiti panawen a nagbutengda ket ibinglayda no ania ti nangtulong kadakuada. Tulongam ida a mangkita a ti pammati ken ni Jesucristo ket makatulong kadakuada a mangparmek iti buteng.
Isuro ti Doktrina
Dagiti In-inauna nga Ubbing
Isuro kadatayo ni Jesucristo maipapan iti Nailangitan nga Ama.
Kasano a dagiti pannursuro ni Jesus maipapan Iti Amana ket makatulong kadagiti ubbing maipapan iti Nailangitan nga Ama?
Dagiti Mabalin nga Aktibidad
-
Mangaramidka iti dua nga asmang ti pagpaparisen a kard nga addaan iti naisurat a balikas nga inusar ni Jesus a mangisuro maipapan iti Nailangitan nga Ama iti Juan 5, kas iti ayat, biag, ken dagiti aramid (kitaen iti Juan 5:20, 26, 36). Ikabil a nakapakleb dagiti kard, ket kiddawen kadagiti ubbing a mangsapule kadagiti agpaparis babaen iti panangbalantik iti dua a kard iti sagpaminsan. Iti tunggal maaramid ti panagparis, basaen dagiti bersikulo a naglaon iti balikas, ken kiddawen kadagiti ubbing no ania ti isuro kadatayo dagiti balikas maipapan iti Nailangitan nga Ama.
-
Pabasa kadagiti ubbing ti Juan 5:30, ket kalpasanna paileppase daytoy a binatog: “Diak sapulen ti nakemko, no di ket …” Kasano nga inaramid ni Cristo iti nakem [pagayatan] ti Nailangitan nga Amana? Kasano a maaramidtayo ti pagayatan ti Nailangitan nga Ama?
Dagiti babassit a datontayo ket makaaramid iti pakaidumaan.
Maysa nga ubing a lalaki ti nangipaay iti tinapay ken ikan nga inusar ni Jesus a nangpakan iti lima ribu. Kasano a matulonganyo dagiti ubbing a sursuruam a mangkita no kasano a makatulongda iti aramid ti Apo?
Dagiti Mabalin nga Aktibidad
-
Bingayem ti sumagmamano a crackerwenno pedaso ti tinapay kadagiti ubbing. Tulongam ida a mangipapan no kasano ti kadakkel ti ummong dagiti lima a ribu a tao. Ania ngata ti kita ti panangpakan iti kasdiay kaadu a tao iti lima a pisi ti tinapay ken dua nga ikan?
-
Awisem ti maysa nga ubing a mangisarita iti estoria maipapan iti panangpakan iti lima a ribu iti bukodna a balikas. Kasano a makapagbalintayo a kas iti ubing a lalaki iti Juan 6:9? Awisem dagiti ubbing a mangidrowing iti tinapay ken ikan iti papel ket isuratda kadagitoy ti sumagmamano a banag a maitedda iti Apo a makatulong iti aramidna.
-
Mangted kadagiti ubbing ti bassit a puzzle tapno kumpletuen. Ania ti mapasamak no mapukaw ti maysa a pedaso iti puzzle? Ilawlawag a maipada ti tunggal maysa kadatayo iti maysa a pedaso iti puzzle—addaantayo amin iti maysa a napateg a banag a makatulong iti biag ti dadduma. Kasano a makatulong dagiti ubbing kadagiti pamilia wenno klaseda?
Namilagruan a pinakan ni Jesus ti 5,000 a tattao iti lima a tinapay ken dua nga ikan.
Makatulong ti pammati ken ni Jesucristo kadatayo a saan nga agbuteng.
Ti pammati ken buteng ket addaan iti napateg nga akem iti estoria maipapan kadaJesus ken Pedro a magmagna iti rabaw ti baybay. Ania ti masursuro dagiti ubbing manipud iti daytoy nga estoria?
Dagiti Mabalin nga Aktibidad
-
Ipakita ti ladawan iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia. Kiddawen kadagiti ubbing a mangsapul iti maysa a bersikulo iti Mateo 14 a mangilawlawag iti ladawan.
-
Kiddawen kadagiti ubbing a mangsapul kadagiti tanda ti pammati ken tanda ti buteng bayat ti panangbasada iti Mateo 14:22–33. Mabalin pay nga ipakitam ti video “Wherefore Didst Thou Doubt?” (LDS.org). Ania ti kayat a sawen ti maaddaan iti pammati ken ni Jesucristo? Kasanota a sukatantayo ti buteng iti pammati?
-
Kiddawen kadagiti ubbing a mangipapan nga addada ken adda kamerada idi nagna da Jesus ken Pedro iti rabaw ti baybay. Ania kadagiti kanito ti pilienda nga retratuen ken apay? Isingasing a sukisokenda iti Mateo 14:22–33 para kadagiti kapanunotan. Awisem ida a mangidrowing iti maysa a ladawan ti kanito a pinilida, mangibinglay kadagiti ladawanda, ken mangiilawlawag no apay a pinilida dayta a kanito.
Yallukoy ti Panagsursuro iti Pagtaengan
No naileppas dagiti ubbing ti panid iti aktibidad iti daytoy a lawas, awisem ida a mangusar iti daytoya mangisuro kadagiti pamiliada no ania ti nasursuroda ita nga agdama.
Panangpadur-as iti Panangisurotayo
Yawis ti Panagbibinninglay Saludsoden kadagiti ubbing maipapan kadagiti kapanunotan, rikna, ken padasda. Mammuamto a masansan nga addaanda iti simple ngem nauneg a pannakaawat ken pannakaammo.