“Marso 18–24. Mateo 13; Lucas 8; 13: ‘Siasino man nga Addaan Lapayag a Dumngeg, Bay-an a Dumngeg’” Umaykayo, Sumurot Kaniak—Para iti Primary: Baro a Tulag 2019 (2019)
“Marso 18–24. Mateo 1; Lucas 1,” Umaykayo, Sumurot Kaniak—Para iti Primary: 2019
Marso 18–24
Mateo 13; Lucas 8; 13
“Siasino man nga Addaan Lapayag a Dumngeg, Bay-an a Dumngeg‘
Dagiti pangngarig ket simple nga estoria a mabalin a makaay-ayo para kadagiti ubbing. Daytoy a balabala ken ti Umaykayo, Sumurot Kaniak—Para Kadagiti Indibidual ken Pamilia ket makatulong kenka a mangusar kadagiti pangngarig ti Mangisalakan a mangisuro kadagiti ubbing iti napapateg a kinapudno.
Isuratmo Dagiti Impresionmo
Yawis ti Panagbibinninglay
Mangitugot iti adu a banag a makatulong kadagiti ubbing a manglagip iti sumagmamano a pangngarig iti Mateo 13, kas iti maysa a bukel, maysa a perlas, wenno maysa a kahon ti kinabaknang. Awisem dagiti ubbing a mangibinglay iti ania man a malagipda maipanggep kadagiti pangngarig.
Isuro ti Doktrina
Dagiti In-inaudi nga Ubbing
Nasken nga agsaganaak a masursuruan kadagiti pannursuro ni Jesus.
Mabalin a saan a maawatan dagiti in-inaudi nga ubbing dagiti amin a simbolismo iti pangngarig maipapan ti agmulmula, ngem masursuroda dagiti simple a kinapudno ti ebanghelio nga isuro daytoy. Kasano a matulongam ida nga umawat a nasaysayaat no kasano a mainaig kadakuada daytoy a pangngarig?
Dagiti Mabalin nga Aktibidad
-
Mangipakita iti nadumaduma a kita ti daga (wenno ladawan ti daga) kabayatan ti pananggupgopmo iti Mateo 13:3–8. Mangted kadagiti ubbing ti bukel a maimula iti daga. Saludsudem dagiti ubbing no ania ti maaramidda tapno makatulong ti panagtubo dagiti bukel. Ilawlawag a ti kaadda iti pammati iti Nailangitan nga Ama ken ni Jesucristo ket maysa a wagas a pakatulongantayo iti panagtubo iti “bukel” ti pammaneknektayo.
-
Usarem daytoy a panid ti aktibidad ita a lawas a makatulong a maawatan dagiti ubbing no ania iti tunggal kita ti daga a nailadawan iti Mateo 13 ti mangsuro maipapan iti puspusotayo. Saludsodem kadagiti ubbing no ania a kita ti puso ti kayat ni Jesus nga adda kadakuada tapno maadalda dagiti pannursurona.
-
Basaem ti Mateo 13:9, 15, ket awisem dagiti ubbing a mangitudo iti nadumaduma a paset ti bagida no mangngeganda a madakamat dagitoy. Kasano a mausartayo dagitoy a paset iti bagitayo tapno maadaltayo dagiti pannursuro ni Jesus?
Kayat ti Nailangitan nga Ama a pilientayo ti rumbeng.
Isuro ti sumagmamano a pangngarig ni Jesus nga iti maudi nga aldaw, ilasinto ti Dios dagiti nadangkes kadagiti nalinteg. Kasano a mausarmo dagiti pangngarig a mangparegta kadagiti ubbing a pumili iti rumbeng?
Dagiti Mabalin nga Aktibidad
-
Payakem kadagiti ubbing ti pangngarig maipapan iti trigo ken ruruot (kitaen iti Mateo 13:24–30). Ilawlawag a dagiti trigo ket mangibagi kadagiti tao nga agpili iti nalinteg , ken dagiti ruruot (makadangran a ruruot) ket mangibagi kadagiti tao a saan nga agpili iti nalinteg. Maysa nga aldaw, ummongento ti Nailangitan nga Ama dagiti nalinteg a tao a makipagnaed Kenkuana.
-
Isalaysaymo ti sumangmamano a simple nga estoria maipapan dagiti ubbing nga agar-aramid kadagiti pili. Kiddawem kadagiti ubbing a mangisao iti “ti pili a trigo” no dagiti ubbing ti estoria ket pilienda ti nalinteg ken “ti pili a ruruot” no pilien dagiti ubbing ti madi.
-
Mangitugot kadagiti ladawan ti ungkay ti trigo, ket paidrowing kadagiti ubbing kadagiti a ladawan ti sumagmamano a wagas a pakapagbalinanda a nalinteg.
-
Mangaramid iti ay-ayam a pangidasigan dagiti ubbing kadagiti detalye manipud iti pangngarig maipapan ti agmulmula iti kayulogan iti Mateo 13:18–23.
Ti kinamiembrok iti Ti Simbaan ni Jesucristo dagiti Santo iti Ud-udina nga Aldaw ket maysa a gameng.
Kasano a mausarmo ti ladawan ti gameng ken dagiti napapateg a perlas tapno matulongam a maawatan dagiti ubbing ti kinapateg ti panakaikameng iti Simbaan ni Cristo?
Dagiti Mabalin nga Aktibidad
-
Ilemmeng dagiti ladawan ti baul ti gameng ken ti maysa a perlas iti siled, ken pasapulmo dagitoy kadagiti ubbing. Usarem dagiti ladawan a makatulong kenka a mangisuro maipapan kadagiti pangngarig iti Mateo 13:44–46. Ania ti maited dagiti ubbing tapno maaddaanda iti napintas a perlas wenno gameng iti talon? Ilawlawag a no dadduma isukotayo ti maysa a banag a nasayaat para iti nasaysayaat pay a maysa a banag. Ibagam kadagiti ubbing no apay a napateg ti ebanghelio kenka.
-
Ikabil iti maysa a kahon wenno baul ti sumagmamano a banag wenno ladawan nga mangibagi iti “gameng” iti Ti Simbaan ni Jesucristo dagiti Santo iti Ud-udina nga Aldaw, kas dagiti templo wenno ti Libro ni Mormon. Kiddawem iti tunggal ubing a pumili iti maysa a banag wenno ladawan ket isaritam no apay a gameng daytoy.
-
Aggigiddan a kantaenyo ti “The Church of Jesus Christ,” Children’s Songbook, 77, ken kiddawen kadagiti ubbing a dumngegda ti sumangbay a bendision manipud iti panagbalin a maysa a miembro ti Simbaan. Paneknekam maipapan dagiti bendision nga napadasamon gapu iti kinamiembrom iti Simbaan.
Isuro ti Doktrina
Dagiti In-inauna nga Ubbing
Masapul nga isaganak ti pusok tapno maawatko dagiti pannursuro ni Jesus.
Kasano a matulongam dagiti ubbing a mangbigbig iti kinapateg ti maaddaan iti nalukneng ken natallugod a puso tapno maisuro ida ni Jesus?
Dagiti Mabalin nga Aktibidad
-
Tudingam ti tunggal ubing a mangbasa ti maipapan iti maysa kadagiti uppat a kita ti daga iti Mateo 13:4–8. Awisem ida a mangsapul ken mangibinglay no ania ti mapasamak iti bukel iti kita ti daga a nabasada. Kasano a maipada ti puspusotayo iti nadumaduma a kita ti daga? (kitaen iti Mateo 13:19–23).
-
Ikkam ti tunggal maysa kadagiti ubbing iti dua a bukel, ken awisem ida a mangimula kadagiti bukelda iti nalukneng a daga ken iti bunton dagiti bato. Ania a bukel ti addaanto iti nasaysayaat a gundaway a dumakkel? Kasano a masiguradotayo a maipada dagiti puspusotayo a kas iti nalukneng a daga tapno magun-odtayo dagiti pannursuro ti Mangisalakan?
-
Awisem dagiti ubbing a mangbasa iti Mateo 13:9–17. Mangidrowing iti mata, lapayag, ken puso iti pisara. Kasano a mausartayo ti tunggal maysa kadagitoy a paset ti bagi nga agadal kadagiti pannursuro ni Jesus?
Makapagpiliak iti rumbeng uray no saan nga agpili iti rumbeng dagiti adda iti aglawlawko.
No basaem dagitoy a bersikulo a sipapanunot kadagiti ubbing, ania dagiti impresion ti umay kenka?
Dagiti Mabalin nga Aktibidad
-
Awisem dagiti ubbing a mangidrowing iti nadumaduma a senario manipud iti pangngarig maipapan iti trigo ken dagiti ruruot a masarakan iti Mateo 13:24–30, ket ibinglayda dagiti drowingda iti klase. Pasuratam kadakuada dagiti drowingda nga usaren ti kayulogan ti pangngarig a masarakan iti Mateo 13:36–43. Ilawlawag a makadadael dagiti ruruot.
-
No mabalin, i-display ti ladawan dagiti trigo ken ruruot. Ilawlawag a dagiti trigo ken ruruot ket aggigiddan a dumakkel agingga iti panaggibus ti lubong. Suruannatayo daytoy nga agbiagtayo nga adda dagiti naimbag ken dakes iti aglawlawtayo, ket nasken nga agannadtayo iti panangpili iti rumbeng. Paibinglay kadagiti ubbing no kasano a maibagada ti pagdumaan ti nasayaat ken dakes.
Ti kinamiembrok iti Ti Simbaan ni Jesucristo dagiti Santo iti Ud-udina nga Aldaw ket maysa a gameng.
Makita kadi dagiti ubbing a sursuruam a ti kinamiembroda iti Simbaan ket maysa a napateg a gameng? Nalabit a makatulong dagiti pangngarig iti Mateo 13:44–46 kadakuada.
Dagiti Mabalin nga Aktibidad
-
Awisem dagiti ubbing a mangbasa iti Mateo 13:44–46 iti bagbagida ket mangibinglay kadagiti pangngarig iti bukodda a balikas iti sabali pay a miembro ti klase.
-
Manggetteng iti sumagmamano a sirkulo a mangibagi kadagiti sensilio, ket ikabilda iti maysa a kahon ti gameng. Awisem dagiti ubbing a mangpidut iti maysa a sensilio ket idrowing wenno isurat iti daytoy ti maysa a banag a pagay-ayatda maipapan iti panagbalinda a maysa a miembro ti Simbaan. Paibinglay kadagiti ubbing no ania ti inkabilda iti sensilioda.
-
Awisem ti maysa a miembro ti ward a mangibinglay iti estoria maipapan iti kombersionna kadagiti ubbing ket isaritana no ania ti insakripisiona tapno agkameng iti Ti Simbaan ni Jesucristo dagiti Santo iti Ud-udina nga Aldaw.
Yallukoy ti Panagsursuro iti Pagtaengan
Awisem dagiti ubbing a mangisuro iti pamiliada maipapan iti maysa kadagiti pangngarig a nasursuroda iti Primary.
Panangpadur-as iti Panangisurotayo
Kayat dagiti ubbing ti mangibinglay iti no ania ti nasursuroda. Nupay ubbingda pay, mapapigsa dagiti ubbing dagiti miembro ti pamiliada. Allukoyem ida a mangibinglay iti pamiliada kadagiti banag a nasursuroda iti Primary. (Kitaen iti Panangisuro iti Wagas ti Mangisalakan, 30.)