Malanga he Moʻungá

Malanga he Moʻungá, tā ʻe Jorge Cocco

18–24 Fepueli

Mātiu 5; Luke 6

“ʻOku Monūʻia ʻa Kimoutolu”

Kamata ʻaki haʻo lau ʻa e Mātiu 5 mo e Luke 6. ʻE lava ke tokoni atu ʻa e Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí ke mahino ʻa e ngaahi vahe ko ʻení, pea lava ke ʻoatu ʻe he lēsoni ko ʻení ha ngaahi fakakaukau ki hono akoʻí.

Lekooti e Ngaahi Ongo ʻOkú ke Maʻú

fakaʻilonga vahevahe

Fakaafeʻi Ke Vahevahe

Kole ki he fānaú ke nau talaona fekauʻaki mo ha meʻa ne nau fai he uiké ni ke vahevahe ai mo ha tokotaha ʻa e maama ʻo e ʻEikí .

fakaʻilonga akoʻi

Akoʻi e Tokāteliné

Fānau Iiki Angé

Mātiu 5:9

ʻE lava ke u hoko ko ha taha faʻa fakalelei.

ʻE lava ke maʻu ʻe he fānau ʻokú ke akoʻí ha tākiekina mālohi ʻi ʻapi ʻi he taimi te nau ʻofa mo angaʻofa ai ki he niʻihi kehé.

Ngaahi ʻEkitivitī ʻe Ala Fakahokó

• Lau ʻa e Mātiu 5:9 ki he fānaú, pea fakamatalaʻi ange ʻoku ngaohi ʻe he kau faʻa fakaleleí ha feituʻu ko ha feituʻu melino neongo pe ko e fē feituʻu ʻoku nau ʻi aí. Fai ha talanoa faʻu, pea tokoniʻi e fānaú ke nau ʻiloʻi pe ko e kakai ʻoku kau he talanoá ʻoku nau faʻa fakalelei pe ʻikai.

• Fakaafeʻi ha niʻihi ʻo e mātuʻa ʻa e fānaú ke nau ʻaʻahi ki hoʻo kalasí pea vahevahe ha ngaahi sīpinga ʻo e ngaahi taimi ne hoko ai ʻenau fānaú ko ha kau faʻa fakalelei ʻi ʻapi.

• Hiki ʻi ha ʻū laʻipepa ha ngaahi tūkunga faingataʻa ʻe ala fehangahangai mo e fānaú (hangē ko ʻení, ko e fuhu mo e ngaahi tehiná pe taʻoketé ʻi ha meʻavaʻinga). Fakaafeʻi ha kiʻi tamasiʻi pe taʻahine ke ne toʻo ha laʻipepa. ʻI hoʻo lau e ngaahi talanoa faʻu ko ʻení, kole ange ke nau vahevahe pe ʻe founga fēfē haʻanau lava ʻo hoko ko ha taha faʻa fakalelei ʻi he tūkunga ko iá.

Mātiu 5:14–16

ʻOku finangalo ʻa Sīsū ke u hoko ko ha maama ki he niʻihi kehé.

ʻE lava ke maʻu ʻe he fānau īkí ha tākiekina mālohi ki he leleí ʻi he niʻihi kehé. Te ke ueʻi fēfē kinautolu ke nau tuku ʻenau māmá ke uló?

Ngaahi ʻEkitivitī ʻe Ala Fakahokó

• Fakaʻaliʻali ki he fānaú ha ngaahi meʻa ʻe niʻihi ʻoku nau ʻomi e māmá, kau ai ha fakatātā ʻo ha fānau. Lau e Mātiu 5:14–16, pea tala ange ki he fānaú ʻoku ʻi ai ha maama ʻi loto ʻiate kitautolu. Te tau lava fēfē ʻo fakaʻaongaʻi ʻetau māmá ke ʻomi ai e niʻihi kehé ki he ʻOtuá?

• Hulu takai ha kasa ʻi he lokí. ʻOku tokoni fēfē ʻa e māmá kiate kitautolú? ʻE lava fēfē ke tau hoko ko ha maama ki māmani? ʻUfiʻufiʻi e kasá. Ko e hā e meʻa ʻe hoko ʻo kapau he ʻikai ke tau vahevahe ʻetau māmá pe fufuuʻi?

• Fufuuʻi ha kasa ʻi he lokiakó, pea tamateʻi e māmá. Tuku ki he fānaú ke nau feinga ke ʻilo ia. Lau e Mātiu 5:15, pea talanoa fekauʻaki mo e ʻuhinga ʻoku ʻikai totonu ai ke tau fufuuʻi ʻetau māmá.

• Hulu ha kasa ki he holisí, pea fakaafeʻi e fānaú ke nau muimui ʻi he māmá ʻaki honau matá. Fakaʻaongaʻi e māmá ke tohoakiʻi honau matá ki ha fakatātā ʻo e Fakamoʻuí. Kole ki he fānaú ke nau vahevahe e founga te tau lava ai ʻo hoko ko ha maama te ne tataki e niʻihi kehé kia Sīsū Kalaisi.

• Tokoniʻi e fānaú ke nau ʻiloʻi mo valivali e ngaahi foʻi teʻelango fufū ʻi he peesi ʻekitivitī ʻo e uike ní.

• Hivaʻi mo e fānaú e “Fiemaʻu Au ʻe Sīsū Ke u Ulo Hangē ko ha Hueló,” “Ulo Atu,” pe “Ko ha Foʻi Fetuʻu Au,” Tohi Hiva ʻa e Fānaú, 38, 96, 84.

Mātiu 5:44–45

ʻOku finangalo ʻa Sīsū Kalaisi ke u ʻofa ki he taha kotoa pē.

ʻE lava he taimí ni ke kamata e fānau iiki angé ke akoako fakahā ʻenau ʻofá, neongo hono ngaohikovia kinautolu ʻe honau toʻú pe ngaahi tokouá. ʻI hoʻo lau e Mātiu 5:44–45, fakakaukau ki he founga ʻoku fehokotaki ai e ngaahi akonaki ʻa e Fakamoʻuí ki he fānau ʻokú ke akoʻí.

Ngaahi ʻEkitivitī ʻe Ala Fakahokó

• Toe lau e Mātiu 5:44 ʻo fakaʻaongaʻi e ngaahi lea mo e ngaahi tūkunga ʻe mahino mo fakafehokotaki ki ai e fānaú. Kole ki he fānaú ke nau vahevahe ha ngaahi taimi ne nau fakahaaʻi ai ʻenau ʻofá ki ha tokotaha neongo ʻene faingataʻá. Ko e hā ʻa e ongo ne nau maʻu mei he ngaahi aʻusia ko ʻení?

• Hiva fakataha mo e kalasí e “Te u ʻAʻeva Pea mo Koe,” Tohi Hiva ʻa e Fānaú, 78. Ko e hā ʻoku tau ako mei he hiva ko ʻení fekauʻaki mo e ʻofa ki he niʻihi kehé?

• ʻOange ki he fānaú ha ngaahi laʻipepa haati ʻoku tohi ai e ngaahi lea “Te u fakahaaʻi ʻeku ʻofá ki he taha kotoa pē.” Kole ange ke nau teuteuʻi ʻa e ngaahi haatí pea tautau kinautolu ʻi honau ngaahi ʻapí ko ha fakamanatu ke nau ʻofa ki he niʻihi kehé.

• Tokoniʻi e fānaú ke nau ako hono fakatātaaʻi e “Ke Mou Feʻofaʻaki,” Tohi Hiva ʻa e Fānaú, 74, hangē ko hono fokotuʻutuʻu ʻi he Tohi Hiva ʻa e Fānaú.

fakaʻilonga akoʻi

Akoʻi e Tokāteliné

Fānau Lalahi Angé

Mātiu 5:3–12

ʻE lava ke u fiefia ʻi he taimi ʻoku ou moʻui ʻaki ai e ngaahi akonaki ʻa Sīsuú.

ʻI hoʻo lau e Mātiu 5:3–12, ko e hā ha ngaahi lea pe kupuʻi lea ʻoku hā makehe kiate koe? ʻE faitāpuekina fēfē ʻe he ngaahi akonaki ko ʻení ʻa e moʻui ʻo e fānau ʻokú ke akoʻí?

Ngaahi ʻEkitivitī ʻe Ala Fakahokó

• Faʻu ha saati ʻi he palakipoé mo ha kōlomu ʻe ua ʻoku fakahingoa Tapuekina ʻakinautolu ʻoku … mo e Tāpuaki. Fakaafeʻi e fānaú ke nau fekumi ʻi he Mātiu 5:3–12 kiate kinautolu ʻoku folofola ʻe Sīsū ʻe tāpuekiná mo e ngaahi tāpuaki ʻokú Ne talaʻofa maʻanautolú.

• Tohiʻi ʻa e ngaahi ʻulungaanga lelei takitaha pea mo honau ngaahi tāpuaki ʻoku fekauʻaki mo ia mei he ngaahi veesi ko ʻeni ʻi he kātí, pea tuku ki he fānaú ke nau fakahoa ʻa e ngaahi ʻulungāngá mo e ngaahi tāpuakí. Kole ki he fānaú ke nau fili ha taha ʻo e ngaahi ʻulungaanga ʻi he vēsí ni ʻoku nau fie maʻu ke fakatupulakí.

Mātiu 5:9, 21–24, 38–47

ʻE lava ke u hoko ko ha taha faʻa fakalelei.

Naʻe akonaki ʻe Sīsū ʻe ui ʻa e kau faʻa fakaleleí ko e fānau ʻa e ʻOtuá. Te ke ueʻi fēfē e fānaú ke nau hoko ko ha niʻihi faʻa fakalelei?

Ngaahi ʻEkitivitī ʻe Ala Fakahokó

• Fakaafeʻi ha tamasiʻi pe taʻahine ke ne lau e Mātiu 5:9. Hili ia pea fehuʻi ange: Ko e hā ʻa e tokotaha faʻa fakalelei? Ko e hā ha ngaahi founga te tau lava ai ʻo hoko ko ha kau faʻa fakalelei ki hotau ngaahi fāmili mo e ngaahi kaungāmeʻá? (Ki ha toe ngaahi fakakaukau, vakai ki he veesi 21–24, 38–47.)

• Kole ki he fānau takitaha ke nau fakakaukau ki ha tūkunga ʻe fie maʻu ai e tokoni ʻo ha tokotaha faʻa fakalelei. Ko e hā ʻe fai ʻe ha tokotaha faʻa fakalelei ʻi he tūkunga ko iá?

• Fakaafeʻi e fānaú ke nau vahevahe e ngaahi taimi ne nau fakahaaʻi ai ʻenau ʻofá ki ha tokotaha, neongo kapau naʻe makehe ʻa e tokotaha ko iá meiate kinautolu pe naʻe faingataʻa ke ʻofa kiate ia.

Mātiu 5:14–16

ʻE lava ʻe heʻeku sīpingá ke ne fakamaama ʻa e halá ki he niʻihi kehé ke nau muimui ai kia Sīsū.

Fakakaukau fekauʻaki mo e fānau ʻokú ke akoʻí ʻi hoʻo lau e ngaahi veesi ko ʻení. Ko e hā ha ngaahi pōpoaki ʻoku ala maʻu ʻe he ʻEikí maʻá e fānaú ʻi he potu folofola ko ʻení?

Ngaahi ʻEkitivitī ʻe Ala Fakahokó

• Tokoniʻi e fānaú ke nau ako maʻuloto e Mātiu 5:16. Hiki e vēsí ʻi he palakipoé. Toutou lau fakataha ia, tamateʻi ha ngaahi lea ʻe niʻihi ʻi he taimi kotoa pē ʻokú ke lau ai. Hili hono maʻuloto ʻe he fānaú e vēsí, te mou lava foki ʻo hivaʻi e “Ulo Atu,” Tohi Hiva ʻa e Fānaú, 96.

• Kole ki he fānaú ke nau tā e ngaahi meʻa ʻokú ne ʻomi e māmá kiate kitautolú. Lau ʻa e Mātiu 5:14–16. ʻEke ange ko e hā e ʻuhinga ʻoku finangalo ai ʻa Sīsū ke tau hoko ko ha maama ki he māmaní.

• Fakaafeʻi e fānaú ke nau tā e ngaahi meʻa te nau lava ʻo fai ke nau hoko ai ko ha maama ki he niʻihi kehé. Te ke lava ʻo huluʻi e foʻi vitiō “Light the World: 25 Days of Service” (LDS.org). Fakaafeʻi ha fānau ʻe toko ua ke na fehangahangai, pea kole ki he tokotaha ke ne feinga ke malimali e tokotaha ʻe tahá taʻe te ne ala kiate ia. Talanoa kau ki he mālohi ʻoku maʻu ʻe he fānaú ke ne ʻomi e fiefiá ki he niʻihi kehé.

fakaʻilonga akoʻi

Poupouʻi e Ako ʻi ʻApí

Fakatukupaaʻi e fānaú ke nau fekumi ki ha taha ʻoku hoko ko ha tokotaha faʻa fakalelei ʻi he uiké ni. ʻI he kamataʻanga ʻo e kalasí ʻi he uike kahaʻú, fakaafeʻi kinautolu ke nau talanoa fekauʻaki mo e tokotaha mo e meʻa ne nau vakai ki aí.

Fakatupulaki ʻEtau Akoʻí

Tokoniʻi e fānaú ke nau longomoʻui. “ʻI hoʻo akoʻi ʻa e fānaú, tuku ke nau faʻu, tā fakatātaaʻi, valivali, tohi pe faʻu. ʻOku mahulu hake e ngaahi meʻá ni ia ko ha fanga kiʻi ʻekitivitī fakafiefia peé—ʻoku mahuʻinga ia ki he akó” (Ko e Faiako ʻi he Founga ʻa e Fakamoʻuí, 25).

peesi ʻekitivitií: Fiemaʻu ʻe Sīsú ke u hoko ko ha maama