Lauga i Luga o le Mauga

Lauga i luga o le Mauga, saunia e Jorge Cocco

Fepuari 18–24.

Mataio 5; Luka 6

“Amuia outou”

Amata i le faitauina o le Mataio 5 ma le Luka 6. Sau, Mulimuli Mai ia te Au—Mo Tagata Taitoatasi ma Aiga e mafai ona e malamalama ai i nei mataupu, ma e mafai ona avatu e lenei otootoga ia te oe ni manatu faafaiaoga.

Tusifaamaumau Ou Lagona Uunai

aikona fefaasoaai

valaaulia le Fefaasoaai

Fai i tamaiti e talanoa e uiga i se mea sa latou faia i lenei vaiaso e faasoa ai le malamalama o le Alii i se tasi.

aikona aoao atu

Aoao atu Aoaoga Faavae

Tamaiti Laiti Ifo

Mataio 5:9

E mafai ona avea au o se faatupu filemu.

E mafai e tamaiti e te faiaoga ai ona maua se tosinaga mamana i le fale a o latou taulimaina isi ma le alofa ma le agalelei.

Gaoioiga e Mafai ona Fai

• Faitau le Mataio 5:9 i tamaiti, ma faamalamalama i ai o e faatupuina le filemu e faia soo se nofoaga ma nofoaga toafilemu tusa lava po o fea e i ai. Faasoa atu ni nai ata fatu faataitai, e fesoasoani i tamaiti e faailoa mai pe o ni faatupu filemu ia tagata o loo aofia ai.

• Valaaulia ni nai matua o tamaiti e asiasi ane i le vasega ma faasoa mai ni faataitaiga o taimi na avea ai a latou fanau ma e faatupu filemu i le fale.

• Tusi ni fasipepa o ni mau tulaga faigata e ono feagai ma tamaiti (mo se faataitaiga, o tamaiti ma o latou tei o loo taufao se meataalo). Valaaulia tamaiti taitasi e piki se fasipepa. A o e faitauina le ata faataitai, fai ia i latou e faasoa mai pe mafai faapefea ona avea i latou o se e faatupuina le filemu i lena tulaga.

Mataio 5:14–16

E manao Iesu ia ou avea ma malamalama i isi.

E mafai e tamaiti laiti ona i ai se tosinaga mamana mo le lelei o isi. E mafai faapefea ona musuia i latou e faasusulu atu o latou malamalama?

Gaoioiga e Mafai ona Fai

• Faaali i tamaiti ni mea e maua mai ai le malamalama, e aofia ai se ata o tamaiti. Faitau le Mataio 5:14–16, ma ta’u i tamaiti e tofu uma lava i tatou ma se malamalama i totonu. E mafai faapefea ona tatou faaaogaina lo tatou malamalama e aumaia ai isi i le Atua?

• Faasusulu se moliuila faataamilo i le potu. E fesoasoani faapefea le malamalama ia i tatou? E mafai faapefea ona avea oe ma le malamalama i le lalolagi? Pupuni le moliuila. O le a le mea e tupu pe a tatou le faasoa atu lo tatou malamalama pe nanaina foi?

• Nana le moliuila i le potu, ma tape moli. Tuu i tamaiti e taumafai e sue. Toeiloilo le Mataio 5:15, ma talanoaina pe aisea e le tatau ai ona tatou nanaina lo tatou malamalama.

• Ki le moliuila i luga o le puipui, ma valaaulia tamaiti e mulimuli ai o latou mata i le malamalama. Faaaoga le malamalama e tata’i ai mata i se ata o le Faaola. Fai i tamaiti e faasoa mai pe mafai faapefea ona avea o se malamalama e taitai ai isi ia Iesu Keriso.

• Fesoasoani i tamaiti e sue ma valivali moliga’o o loo nana i le itulau o gaoioiga o lenei vaiaso.

• Usu faatasi ma tamaiti le “E Manao Iesu Ia Ou Fai ma Sulu,” “Susulu Pea,” po o le “E Pei Au O Se Fetu,” Tusipese a Tamaiti, 38, 96, 84.

Mataio 5:44–45

E manao Iesu Keriso ia ou alofa i tagata uma.

E mafai e tamaiti laiti ifo ona amata nei ona faata’ita’i le faaalia o le alofa, tusa lava pe soona fai i latou e a latou paaga po o o latou tei. A o e faitauina le Mataio 5:44–45, mafaufau pe faapefea ona faatatau aoaoga a le Faaola i tamaiti o loo e faiaoga ai.

Gaoioiga e Mafai ona Fai

• Toe faaupu le Mataio 5:44 e faaaoga ai upu ma tulaga o le a malamalama ma fesootai i ai tamaiti. Fai i tamaiti e faasoa mai ni taimi na latou faaali atu ai le alofa i se tasi tusa lava pe na faigata. O a ni o latou lagona e uiga i nei aafiaga?

• Usu e le vasega le “Ou Te Savali Faatasi ma Oe,” Tusipese a Tamaiti, 140–41. O le a se mea ua tatou aoao mai i lenei pese e uiga i le alofa i isi?

• Avatu i tamaiti ia fatu pepa ua tusia ai upu “O le a ou faaalia lo’u alofa mo tagata uma.” Fai i ai e teuteu ia ata ma faatautau i o latou fale e fai ma faamanatu e alolofa atu i isi.

• Fesoasoani i tamaiti e aoao ia taga e o faatasi ma le “Ia Fealofani,” Tusipese a Tamaiti, 74, e pei ona fautuaina mai i le Tusipese a Tamaiti.

aikona aoao atu

Aoao atu Aoaoga Faavae

Tamaiti Matutua Atu

Mataio 5:3–12

E mafai ona ou fiafia pe a ou ola i le ala ua aoao mai e Iesu.

A o e faitauina le Mataio 5:3–12, o upu ma fasifuaitau o tu matilatila mai ia te oe? Pe o le a faamanuiaina faapefea olaga o tamaiti e te faiaoga ai ona o nei aoaoga?

Gaoioiga e Mafai ona Fai

• Fatu se siata i le laupapa e i ai ni koluma se lua, faaigoa Amuia e … ma le Faamanuiaga. Valaaulia tamaiti e sailiili le Mataio 5:3–12 po o ai e ua fai mai Iesu amuia ma faamanuiaga ua Ia folafola atu ia i latou.

• Tusi uiga auaumama taitasi ma o latou faamanuiaga e o faatasi ma nei fuaiupu i luga o kata, ma tuu atu i tamaiti e faafetaui ia uiga auaumama ma faamanuiaga. Fai i tamaiti e piki se uiga auaumama se tasi i fuaiupu nei latou te mananao e atinae.

Matao 5:9, 21–24, 38–47

E mafai ona avea au o se faatupu filemu.

Na aoao mai e Iesu o le faatupu filemu o le a ta’ua o fanau a le Atua. E mafai faapefea ona musuia tamaiti e faatupu le filemu?

Gaoioiga e Mafai ona Fai

• Valaaulia se tagata e faitau le Mataio 5:9. Ona fesili lea: O le a le faatupu filemu? O a ni auala e mafai ai ona avea i tatou o ni e faatupuina le filemu i o tatou aiga ma uo? (Mo ni nai manatu, tagai fuaiupu 21–24, 38–47.)

• Fai i tamaiti taitasi e mafaufau i se tulaga e ono manaomia ai le fesoasoani a se faatupu filemu. O le a se mea e ono fai e se faatupu filemu i le tulaga lea?

• Valaaulia tamaiti e faasoa mai taimi na latou faaali atu ai le alofa i se tasi, tusa lava pe ese lena tagata mai ia i latou pe faigata foi ona alofa i ai.

Mataio 5:14–16

O la’u faataitaiga e mafai ona faamalamalama ai le ala mo isi e mulimuli ia Iesu.

Mafaufau i tamaiti e te faiaoga ai a o e faitauina nei fuaiupu. O a savali a le Alii e ono i ai i lenei fuaitau mo tamaiti?

Gaoioiga e Mafai ona Fai

• Fesoasoani i tamaiti e tauloto le Mataio 5:16. Tusi le fuaiupu i luga o le laupapa: Faitau faatasi mo ni nai taimi, ma tape ese ni nai upu i taimi taitasi. A uma ona tauloto e tamaiti le fuaiupu, e mafai ona outou usuina foi le “Susulu Pea,” Tusipese a Tamaiti, 96.

• Fai i tamaiti e tusi ata o mea e maua mai ai le malamalama. Faitau le Mataio 5:14–16. Fai i ai pe aisea ua manao ai Iesu ia avea i tatou ma malamalama o le lalolagi.

• Valaaulia tamaiti e tusi ata o mea e mafai ona latou fai e avea ai o se malamalama i isi. E mafai ona e faaali atu le vitio “Light the World: 25 Days of Service” (LDS.org). Valaaulia ni tamaiti se toalua e faafesagai, ona fai lea i le tasi e faa’ata le isi e aunoa ma le pa’i atu ia te ia. Talanoaina le mana o loo i ai i tamaiti e aumaia ai le fiafia i isi.

aikona aoaoina

Fautuaina le Aoaoina i le Aiga

Lu’i tamaiti e vaavaai mo se tasi na avea ma faatupu filemu i lenei vaiaso. I le amataga o le vasega i le vaiaso a sau, valaaulia i latou e talanoa mai po o ai ae pe o le a foi na latou vaai i ai.

Faaleleia o Lo Tatou Aoao Atu

Fesoasoani i tamaiti ia sagisagi mai. “Ao e aoaoina tamaiti, faataga i latou e fausia, tusi ata, valivali, tusitusi, ma fatufatuai. O nei mea e sili atu nai lo le na o ni gaoioiga malie—e taua i le aoaoina”(Aoao Atu i le Ala a le Alii, 25).

itulau o gaoioiga: E manao Iesu ia avea au o se malamalama.