Josefa Simici e Nauvu, 1840, mai vei Theodore Gorka

8–14 ni Noveba

Vunau kei na Veiyalayalati 129–132

“Ia Ni Da Sa Rawata e Dua Na Veivakalougatataki Mai Vua Na Kalou, Sa Rawa Ena Vuku Ni Da Sa Talairawarawa”

E vakamacalataka o Elder David A. Bednar: “Vosataka kei na tukutuku walega e sega ni veivakavulici. Vunautaka na kosipeli na sala ni Turaga e oka kina na vakadidike kei na vakarorogo kei rai vakamatata (“Becoming a Preach My Gospel Missionary,” New Era, Oct. 2013, 6). Na cava e vakavulici iko na Yalotabu ni o vakararai, ka vakarorogo vei ira na gone o vakavulica tiko?

Vola na Veika o Vakauqeti Kina

Sureta na Veiwasei

Digitaka e dua na ulutaga mai na iwase o 129–32, ka laivi ira na gone mera tukuna vei iko na veika era sa vulica oti me baleta na ulutaga o ya. Me kena ivakaraitaki, cava era kila me baleta na Tamada Vakalomalagi se na Lewe Tolu Vakalou? na vakamau tawamudu? me baleta na matanitu vakasilesitieli?

Vakavulica na iVunau: Gone Sobu

Vunau kei na Veiyalayalati 130:20–21; 132:5

Na veivakalougatataki e lako mai ena talairawarawa vua na Kalou.

E vakavulica o Josefa Simici ni veivakalougatataki mai vua na Kalou e yavutaki mai na noda talairawarawa ki na Nona lawa. O na vakavulici ira vakacava na ivakavuvuli oqo ena dua na sala era na kila na gone?

iTaviqaravi e Rawa ni Caka

• Wasea e dua na ivakatautauvata rawarawa vei ira na gone ka vakaraitaka na kena bibi me da muria na ivakasala; me kena ivakaraitaki, veitalanoa vata kei ira me baleta na ituvatuva me da muria me da vakarautaki kina na kakana se cakava e dua na qito se tara e dua na ka. Na cava ena yaco ni da sega ni muria na ivakasala? (E tiko beka e dua na ka o sa sotava o rawa ni wasea.) Wilika na Vunau kei na Veiyalayalati 130: 21, ka vakatauvatana na ivakasala oqo ki na ivakaro me da muria me ciqoma na veivakalougatataki mai vua na Tamada Vakalomalagi.

• Tarogi ira na gone kevaka era rawa ni vakasamataka e dua na gauna ni ra a vakamuria e dua na ivakaro ni Kalou. E vakacava tu na ka era vakila? Lagata vata e dua na sere me baleta na talairawarawa, me vaka na “Talairawarawa kina iVunau” (iVolanisere ni Gonelalai, 68), ka raica na veivakalougatataki ni talairawarawa e tukuni tiko ena sere. Veivosakitaka eso na ka sa vakarota na Kalou meda cakava. Na sala cava e vakalougatataki keda kina na Kalou ni da maroroya na ivakaro?

Vunau kei na Veiyalayalati 130:22

Na Tamada Vakalomalagi kei Jisu Karisito e vaka yago tawa mate rawa.

Ni da sa kila ni Kalou na Tamada kei Jisu Karisito sa vakayago me vakataki keda, eda vakila ni da veivolekati kei Rau, ka vaqaqacotaki na noda veimaliwai vata kei Rau.

iTaviqaravi e Rawa ni Caka

• Vakaraitaka vei ira na gone e dua na iyaloyalo kei Jisu Karisito, ka sureti ira mera dusia na yaloka ni matana, gusu, kei ira na vei tiki ni Yagona. Mo qai sureti ira mera tucake ka dusia na veitiki ni yagodra vata ga. Wilika mai na Vunau kei na Veiyalayalati 130:22: “Sa vakalewena ka vakasuina na yago i koya na Tamada … ; sa vakatale ga kina ko koya na Luvena.” Vakadinadinataka ni yagoda e tautauvata kei na yagodrau na Tamada Vakalomalagi kei Jisu.

• Lagata vata e dua na sere me baleta na yagoda, me vaka na “Veitiki ni Yagoqu” (iVolanisere ni Gonelalai, 129A), ka sureti ira na gone me ra vakatakarakarataka na qaqana. Kerei ira na gone me ra tukuna vei iko eso na ka e rawa ni ra cakava ena yagodra. Vakaraitaka na nomu vakavinavinaka me baleta na yago sa solia vei iko na Kalou. Eda na vakaraitaka vakacava na noda vakavinavinaka ena isolisoli talei oqo?

• Sureti ira na gone me ra droinitaka na iyaloyalo ni Tamada Vakalomalagi, Jisu Karisito, vata kei ira. Vukei ira mera raica ni yagoda e tautauvata kei na Tamada Vakalomalagi kei Jisu.

Vunau kei na Veiyalayalati 132:19

Na Tamada Vakalomalagi e sa vakarautaka me rawa ni tikovata na matavuvale me tawamudu.

Mai na kaukauwa ni veivauci ni Turaga kei na cakacaka vakalotu ni valetabu, na isema vakamatavuvale e rawa ni tawamudu kevaka eda maroroya na noda veiyalayalati.

iTaviqaravi e Rawa ni Caka

• Vukei na gone me ra vakasamataka na ivakaraitaki ni veika e sega ni (tu me tawamudu)balavu—kakana e dau ca, na senikau ka na malai mai, kei na so tale. Vakaraitaka e dua na iyaloyalo ni nomu matavuvale, ka wasea na nomu (vakila)nanuma me baleti ira. Vakadinadinataka ni na Turaga sa mai vakarautaka rawa, mai na cakacaka vakalotu ni valetabu, me baleta na matavuvale me tudei tawamudu.

• Dolava na Vunau kei na Veiyalayalati ki na wase 132, ka tukuna vei ira na gone ni sai koya oqo na ivakatakila a soli vei Josefa Simici me baleta na vakamau kei na matavuvale. Vakaraitaka vei ira na tikina e 19, ka dusia na vosa “gauna tawamudu kecega” ni ko wilika vei ira. Sureti ira na gone me ra lagata vata kei iko na laini oya.

• Me vukei ira na gone mera cakava na matakau pepa ka matataka na lewe ni nodra matavuvale (raica na tabana ni itaviqaravi ena macawa oqo ). Kotivi ira laivi, ka biuti ira ena dua na waqanivola se vakabiri ira vata kei na dua na qamu ni pepa me matataka na kaukauwa ni veivauci ka rawa ni cakava na noda matavuvale me tawamudu.

  

  Na cakacaka vakalotu ni valetabu e vakatara na matavuvale mera tiko vata ka sega ni mudu.

Vakavulica na iVunau: Gone Qase Cake

Vunau kei na Veiyalayalati 130:18–19

E vinakata na Tamada Vakalomalagi vei au me’u rawata na kila-ka kei na vuku.

E vuqa na ka eda rawata ena bula oqo ena sega ni lako vata kei keda ki na bula sa bera mai. Ia noda “vulica ka kila” ena lako (Vunau kei na Veiyalayalati 130:19).

iTaviqaravi e Rawa ni Caka

• Kerei ira na gone me ra wasea mada vei kemuni e dua na ka era sa vulica me baleta na tiko mai koronivuli se mai vei ira na nodra itubutubu. Sureti ira mera wilika Vunau kei na Veiyalayalati 130:18–19 me vaqaqa na cava ena yaco ki na noda kila-ka kei na vuku ena bula e tarava.

• Na cava e vakavulica na tikina e 19 me baleta na sala meda vulica ka kila? E rawa vakacava me da gugumatua tikoga ka talairawarawa ni da vakasaqara meda vulica? (Me baleta na ikuri ni ulutaga oqo, raica na “Vuli” ena Me iSakisaki ni itabagone [tabana e 9–10].)

Vunau kei na Veiyalayalati 130:20–21; 132:5, 21–23

Na veivakalougatataki e lako mai ena talairawarawa vua na Kalou.

Vakasamataka vagumatua e vakalougatataki iko vakacava na Turaga ni ko sa talairawarawa ki na Nona lawa. Na veika cava sotio sa sotava o rawa ni wasea vei ira na gone me vakauqeti ira?

iTaviqaravi e Rawa ni Caka

• Lagata na sere me baleta na talairawarawa, me vaka na “Keep the Commandments” (Children’s Songbook, 146–47), ka sureti ira na gone me ra wilika na Vunau kei na Veiyalayalati 130:20–21 kei 132:5. Vukei ira mera vakasaqara na vosa kei na vakasama ena ivolanikalou ka tautauvata kei ira ena sere. Eda na rawata vakacava na veivakalougatataki mai vua na Kalou? Sureti ira na gone mera wasea na sala era sa vakalougatataki kina ena nodra talairawarawa ki na lawa ni Kalou.

• Wilika vata na Vunau kei na Veiyalayalati 132:21–23, ka sureti ira na gone me ra droinitaka na iyaloyalo me vakatakarakara ni veika era sa vulica mai na veitikina oqo. Vakayaloqaqataki ira me ra vakasama vovou, ka vakatura me ra okata ena nodra droini na lawa se ivakaro e vukei keda meda tiko ga ena sala rabailailai ki na bula tawamudu.

Vunau kei na Veiyalayalati 131:1–4; 132:15, 19

Na Tamada Vakalomalagi e sa vakarautaka me rawa ni tikovata na matavuvale me tawamudu.

Se cava ga na noda ituvaki ena gauna oqo, eda rawa ni digidigi me vakarautaki keda meda ciqoma na veivakalougatataki ni dua na matavuvale tawamudu ena veisiga ni mataka.

iTaviqaravi e Rawa ni Caka

• Kerea e vica na gone me ra wilika na Vunau kei na Veiyalayalati 131:1–4 kei na so tale me ra wilika na 132:15. Vukei ira mera raica na cava era vakavulica na veitikina oqo me baleta na vakamau. Digitaka na malanivosa bibi eso mai na 132:19 (me vakataka “kevaka sa vakamautaka na watina,” “veiyalayalati vou ka sega ni mudu,” “vauci,” “muria na noqu veiyalayalati,” “gauna tawamudu kecega,” kei na “sega ni mudu ka sega ni mudu”), ka kerei ira na gone me ra kunea na veimalanivosa oqo ena tikina. Na cava e vakavulica vei keda na malanivosa eso oqo me baleti na vakamau?

• Lagata na “Matavuvale me Tawamudu Tu” (iVolanisere ni Gonelalai, 98), se railesuva na “Wase 55: Na iVakatakila me baleta na Vakamau” (iTalanoa mai na Vunau kei na Veiyalayalati, 198). Kerei ira na gone mera vakarogoca ka vakarau me ra wasea na veika me da vakayacora me rawa ni tawamudu na noda matavuvale. Vakadinadinataka ni se cava ga na noda ituvaki vaka matavuvale ena gauna oqo, eda rawa ni vakarautaki keda me da tiki ni dua na matavuvale tawamudu.

Vakauqeta na Vuli e Vale

Sureti ira na gone me ra tukuna vei ira na nodra matavuvale na nodra loloma levu ka ra vinakata me ra laki duavata tawamudu vakamatavuvale.

Vakatorocaketaki Noda Veivakavulici

Mo dau qarauna na kedra ituvaki vakamatavuvale. “O ira na gonelalai nikua era sa voliti tu ena vuqa sara na veimataqali ituvatuva veicurumaki ni matavuvale. … [Eda] sa dodonu meda dodoliga yani vei [ira] era dau galili, guilecavi, se tiko ena taudaku ni bai” (Neil L. Andersen, “O Koya sa Vinakati Ira, sa Vinakati Au,” Ensign se Liaona, Me 2016, 49, 52).