4–10 ni Okotova

Vunau kei na Veiyalayalati 111–114

“Au na Solia Vei Kemudou na Veika Kecega sa Ganiti Kemudou”

E vakavuvulitaka o Sisita Cheryl A. Esplin, daunivakasala e liu ena Mataveiliutaki Raraba ni Lalai, ni sa dodonu me da “[vukei] ira na luveda conaka na ivunau e yalodra, ena dua na sala … e vakaraitaki ena nodra ivakarau ni bula kei na nodra itovo ena nodra bula taucoko” (“Teaching Our Children to Understand,” Ensign se Liaona, Me 2012, 10).

Vola na Veika o Vakauqeti Kina

Sureta na Veiwasei

Me na vakayaloqaqataki ira na gone me ra veiwasei, kauta mai e vica na iyaya ka ra sema vata ki na dua na ka mai na dua na lesoni sa oti. Laiva mera tukuna mai na veika e vakananuma vei ira na iyaya yadudua.

Vakavulica na iVunau: Gone Sobu

Vunau kei na Veiyalayalati 111:2, 10–11

E rawa ni iyau vei au na veika va Kalou.

Ni ra vakasamataka na gone na vosa iyau, era na rawa ni raitayaloyalotaka na veika e duidui mai na iyau sa vakaibalebaletaki ena Vunau kei na Veiyalayalati 111:2, 10. E rawa vakacava ni o vukei ira me ra vulica me ra vakamareqeta na veika ni Turaga?

iTaviqaravi e Rawa ni Caka

• Sureti ira na gone me ra droinitaka na veika e lako mai nodra vakanananu ni ra sa rogoca na vosa iyau. Veidutaitaka vata na veika e raica na vuravura me vaka na iyau kei na veika e vakamareqeta na Turaga (raica na Vunau kei na veiyalayalati na 111:2, 10–11), me vaka na nona tamata, vuku kei na ivalavala dodonu, kei na digidigi vinaka.

• Vukei ira na gone me ra vakacavara na tabana ni itaviqaravi ni macawa oqo. Na cava eda vulica baleti Jisu mai na veika e vakamareqeta o Koya? Me da vakataki Koya vakalevu vakacava beka?

Vunau kei na Veiyalayalati 112:10

Na Turaga ena tuberi au e ligaqu ka sauma na noqu masu.

Vunau kei na Veiyalayalati 112:10 e rawa ni vukei ira na gone o vakavulica me taracake na vakabauti Jisu Karisito ni na liutaki ka dusimaki ira ena nodra bula taucoko.

iTaviqaravi e Rawa ni Caka

• Vukei ira na gone me ra vakasamataka eso na gauna e sa ka bibi me taura na liga ni dua na lewe ni matavuvale, me vaka ni takosova na gaunisala se me veivakacegui. Era na rawa ni matanataka eso na ivakaraitaki e ra wasea. Wilika na Vunau kei na Veiyalayalati 112:10. Na cava na vuna eda vinakata kina na Turaga me “tuberi [keda] e liga[da]”?

• Biuta e dua na ivesu ni mata ena dua vei ira na gone, ka kerei koya me lako takoso mai na rumu vata kei na dua tale na gone me liutaki koya e ligana. Tukuna vei ira me baleta e dua na gauna o na vakila na Turaga ni liutaki iko e ligamu.

  

  Tucake ka Lako voli, mai vei Simon Dewey

Vunau kei na Veiyalayalati 112:11

E vinakata o Jisu meu lomani ira na tamata kecega.

Vukei ira na gone me ra kila ni vinakata na iVakabula meda lomana na tamata kecega, vakakina o ira era yaloca taki keda.

iTaviqaravi e Rawa ni Caka

• Ni ko wasea “Wase 41: Leqa e Katiladi” (iTalanoa mai na Vunau kei na Veiyalayalati, 158–60), kerei ira na gone me ra bulia dua na ibulibuli ni uto e ligadra ni ra rogoca e dua na tamata e cakava na ka dodonu. Vukei ira me ra kila ni Turaga e vinakata meda lomana na tamata kecega, vakakina o ira era cakava na digidigi cala.

• Droinitaka e dua na mata rarawa ena papa ni volavola, ka kerei ira na gone na sala e rawa ni da vakaraitaka kina na loloma vei ira na tani sega tu ni marau (raica na Vunau kei na Veiyalayalati na 112:11). Ni ra wasea tiko na gone na vakasama eso, droinitaka tale na mata rarawa me dua na mata mamarau. Wasea na nomu ivakadinadina me baleta na kaukauwa e yaco mai ni da lomani ira na tani. Lagata vata e dua na sere ni vakarokoroko, me vaka na “Dauloloma ko Jisu” (iVolanisere ni Gonelalai, 39).

Vakavulica na iVunau: Gone Qase Cake

Vunau kei na Veiyalayalati 112:10

Au rawa ni yalomalumalumu ka vakasaqara na veidusimaki ni Kalou.

E vinakati keda me da yalomalumalumu me rawa ni tuberi keda na Tamada Vakalomalagi. Vukei ira na gone me ra kila na sala e rawa ni ra vakaraitaka kina na yalomalumalumu ena mata ni Kalou ena nodra cakava na veika me vaka na masuti Koya ka ciqoma na Nona ivakasala.

iTaviqaravi e Rawa ni Caka

• Tarogi ira na gone ena ibalebale ni yalomalua. (Era rawa ni wilika na “Yalomalumalumu” ena Tudei ena Vakabauta [tabana 86–87] kevaka e gadrevi). Vukei ira mera vakananuma na vosa se malanivosa e veisemati ki na “yalomalumalumu,” ka sureti ira mera wilika na Vunau kei na Veiyalayalati 112:10, ka vakaisosomitaka e dua na vosa se na malanivosa ni “yalomalumalumu” ena tikina oqo. A cava na vuna e vinakata kina na Tamada Vakalomalagi me da yalomalumalumu? Me ikuri ni vuli, me ra wilika na gone na ikuri ni ivolanikalou ka koto ena ruku ni “Yalomalua, Yalomalumalumu” ena iDusidusi ki na iVolanikalou (scriptures.ChurchofJesusChrist.org).

• Vola ena vava ni volavola na vosa ni Vunau kei na Veiyalayalati 112:10 , ka kerei ira na gone me ra wilika vakarogolevu. Sureta e dua na gone me lainitaka na veivakalougatataki vei ira era sa yalomalumalumu e tukuni ena tikina oqo. Vakayaloqaqataki ira na gone me ra wasea na gauna era yalomalumalumu ka vakasaqara na veivuke ni Turaga ka a liutaki ira ko Koya, me vaka na gauna a saumi kina na nodra masu.

Vunau kei na Veiyalayalati 112:11

E vinakata o Jisu meu lomani ira na tamata kecega.

O Jisu Karisito sa ivakaraitaki uasivi ni nodra lomani na tamata kecega, o ira mada ga era a vakalolomataki Koya. O Josefa Simici talega a vosota rawa na veivakacacani mai vei ira ka a nona itokani. Vukei ira na gone mera vulica ni sa rawa meda lomani ira tale eso me vakataka na iVakabula kei Josefa Simici.

iTaviqaravi e Rawa ni Caka

• Sureti ira na gone me ra veivukevuke ena wiliki mai na “Wase 41: Leqa e Katiladi” (iTalanona mai na Vunau kei na Veiyalayalati, 158 – 60). O cei ena italanoa mai Katiladi e vakavuna me ca sara na leqa? O cei ea tovolea me vakavinakataka? Sureti ira na gone mera wilika na Vunau kei na Veiyalayalati 112:11 ka veivosakitaka na vuna e bibi me da lomana na tamata kecega.

• Na cava na vuna e bibi kina me lomani o ira era na tamata e duatani mai vei keda? Na cava beka e solia kina vei keda na Tamada Vakalomalagi na duidui? E rawa vakacava “[meda] lomana vakatautauvata na tamata kecega” o ira talega era duatani mai vei keda? Lagasere vata kei ira na gone me baleta na lomani ira na tani, me vakataka “Meu Lako Tu kei Iko” (iVolanisere ni Lalai, 78).

• Vukea na gone me ra vakasamataka na ivakaraitaki ni dua na gauna na iVakabula e lomani ira era a vakalolomataki koya (me ivakaraitaki, raica na Luke 23:34).

Vunau kei na Veiyalayalati 112:12–15, 26

O ira era sa saumaki vakaidina era na kilai Jisu Karisito.

Na saumaki mai vei Jisu Karisito e taura na bula taucoko me cakacakataki kina, ka sega ni okati walega kina ni “tusanaka ni ra kila na [yacana]” (Vunau kei na Veiyalayalati 112:26). Vukei ira na gone me kila vakavinaka cake na kena ibalebale me da kila dina na iVakabula.

iTaviqaravi e Rawa ni Caka

• Wasea vata kei ira na gone ni ena 1837, ni eso vei ira na iApositolo era a saqata na Parofita o Josefa Simici. Na cava e bibi kina meda muri ira na parofita? (raica na tikina 15). Vukei ira na gone me vakayacora e dua na ituvatuva ni veika a kaya na Turaga vei Tomasi B. Masi, na Peresitedi ni Kuoramu ni iApositolo Le Tinikarua, me cakava (raica na Vunau kei na Veiyalayalati 112:12–15). Vakayagataka na ituvatuva me ra veivosakitaka kina na sala eda rawa ni saumaki vagumatua cake vei Jisu Karisito.

• Tarogi ira na gone na cava era nanuma e kena ibalebale me tukuna ni kilai Jisu Karisito ia me sega sara ga ni kilai Koya (raica na Vunau kei na Veiyalayalati 112:26). Na cava e vakavulica vei keda na tikina e 14 meda cakava me rawa ni kilai Koya vakavinaka cake? Vukei ira na gone mera kila vakavinaka na ibalebale ni “colata na [noda] kauveilatai” (Josefa Simici–Maciu 16:25–26 [ena ikuri ni vakamacala ni iVola Tabu]) se me ra “vakani ira na [Nona] Lami.”

Vakauqeta na Vuli e Vale

Sureti ira na gone me ra vakamacalataka vakalekaleka na veika era vulica ena kalasi nikua. Vukei ira mera laki vola se droinitaka e dua na iyaloyalo ka na vakananuma vei ira na veika era sa vulica me rawa ni ra wasea vei ira na nodra matavuvale.

Vakatorocaketaki Noda Veivakavulici

Era dau lomatarotaro na gone ka vuli ena vuqa na sala. Era dau marautaka na gone me ra vuli ena veika vovou ka duidui era sotava. Vakayagataka na itaviqaravi eso ena vukea me ra veitosoyaki, vakayagataka taucoko nodra wakilakila, vakadidike, ka tovolea na veika vovou. (Raica na Veivakavulici ena iVakarau ni iVakabula, 25–26.)