tagata o loo feiloai i tafatafa o le vai to’a

O Le Fonotaga a le Tolauapiga, saunia e Worthington Whittredge

Me 3–9

Mataupu Faavae ma Feagaiga 46–48

“Ia Outou Saili Ma Le Faamaoni Meaalofa Silisili ona Lelei”

Mafaufau i tamaiti e te faiaoga ai a o e faitauina le Mataupu Faavae ma Feagaiga 46–48. Faasino i le “Taulimaina o Manaoga o Tamaiti Laiti Ifo” i le amataga o lenei punaoa mo manatu faaopoopo e mafaufau i ai.

Tusi Faamaumau Ou Lagona Uunai

aikona o le fefaasoaai

Valaaulia le Fefaasoaai

Valaaulia tamaiti e tusi ata o mea sa latou aoaoina mai le lesona o le vaiaso ua te’a pe na aoao mai le aiga i le aluga o le vaiaso ua tuana’i. Tuu atu ia i latou ni faamanatu pe a manaomia. Ona tuu atu lea ia i latou e talanoa e uiga i a latou ata.

aikona o le aoao atu

Aoao atu le Aoaoga Faavae: Tamaiti Laiti

Mataupu Faavae ma Feagaiga 42:2–6

E mafai ona ou fesoasoani i isi ia lagona le talisapaia i le lotu.

O i tatou uma, e aofia ai tamaiti, e mananao ia lagona le talisapaia ma le taliaina. E mafai faapefea ona e faaaogaina nei fuaiupu e fesoasoani ai i tamaiti ia taulimaina isi ina ia lagona le talisapaia i le lotu?

Gaoioiga e Mafai Ona Fai.

• Faitau leotele le Mataupu Faavae ma Feagaiga 46:5, ma faamatala atu i tamaiti i au lava upu le uiga o lenei mau. Faaali atu ata o tagata mai le lalolagi atoa. Fesili atu i tamaiti po o ai o nei tagata e finagalo le Tama Faalelagi tatou te valaauliaina i a tatou sauniga faale-Ekalesia. Fesoasoani i tamaiti e faataitai le valaauliaina o oe po o le tasi ma le isi e o mai i se sauniga po o se gaoioiga a le Ekalesia.

• Fai atu i tamaiti e manatu faalemafaufau faapea o le a sau se uo i le lotu mo se taimi muamua. Fesoasoani ia i latou e mafaufau i auala e mafai ona latou fesoasoani ai i le latou uo ia lagona le talisapaia. Tuu atu ia i latou e faataitai upu o le a latou fai atu ai po o mea o le a latou faia pe afai latou te vaai i se uo o savali mai i le falesa po o le potuaoga mo se taimi muamua.

Mataupu Faavae ma Feagaiga 46:13–26

Ua faamanuiaina a’u e le Tama Faalelagi i Ana meaalofa.

O tamaiti taitasi e te aoaoina o se atalii po o se afafine a le Tama Faalelagi, ma ua Ia faamanuiaina i latou i meaalofa faaleagaga.

Gaoioiga e Mafai Ona Fai

• Faaaoga le Mataupu Faavae ma Feagaiga 46:13–26 po o le “Mataupu 20: O Meaalofa a le Agaga” (Tala a le Mataupu Faavae ma Feagaiga, 77–80) e faamatala atu ai i tamaiti nisi o meaalofa ua tuuina mai e le Tama Faalelagi ia i tatou e ala mai i Lona Agaga ma le mafuaaga ua Ia tuuina mai ai. Afai e mafai, faaali atu meafaitino po o ata o loo faailoa ai meaalofa taitasi. Ia i ai se taimi mai lea taimi i lea taimi e fesili atu ai i tamaiti pe faapefea ona faamanuiaina se tasi e nei meaalofa.

• Tuu atu i se tamaitiiti se mea e mafai ona faasoa atu, e pei o se fasi falaoa po o ni mea taalo se lua. Fai atu i se tamaitiiti e faasoa atu le mea na e tuuina atu ia te ia i se isi tagata o le vasega. Faamalamalama atu faapea ua aumaia e le Tama Faalelagi ia i tatou ni meaalofa, ma e finagalo o Ia ina ia tatou faaaogaina ia meaalofa e fesoasoani atu ai i isi. Faamatala atu i tamaiti se taimi na faamanuiaina ai oe ona na faasoa mai e se isi tagata ana meaalofa faaleagaga.

aikona o le aoao atu

Aoao atu le Aoaoga Faavae: Tamaiti Matutua

Mataupu Faavae ma Feagaiga 46:8–26

Ua tuuina mai e le Tama Faalelagi ia te a’u ni meaalofa faaleagaga ina ia faamanuiaina ai isi.

O meaalofa o loo faamatalaina mai i le Mataupu Faavae ma Feagaiga 46—ma le tele o isi meaalofa faaleagaga—e mai le Atua e ala mai i le Agaga Paia. E mafai ona e fesoasoani i tamaiti ina ia iloa meaalofa ua tuuina mai ia i latou—ma isi e mafai ona latou sailia—a o outou suesueina faatasi le Mataupu Faavae ma Feagaiga 46.

Gaoioiga e Mafai Ona Fai

• Tusi i luga o fasi pepa ni isi o meaalofa faaleagaga o loo maua i totonu o le Mataupu Faavae ma Feagaiga 46:13–26 ma le Mataupu Faavae o le Faatuatua 1:7, ma nana faataamilo i le potu. Valaaulia tamaiti taitasi e sue ia maua se tasi o na fasipepa ma saili ia mau e maua ai po o fea o ta’ua ai lena meaalofa i totonu o tusitusiga paia. Ona faitau faatasi lea o le Mataupu Faavae ma Feagaiga 46:8-9, 12. Aisea e tuuina mai ai e le Tama Faalelagi ia i tatou ni meaalofa faaleagaga?

• Fesoasoani i tamaiti e lisi i luga o le laupapa meaalofa a le Agaga o loo ta’ua i totonu o le Mataupu Faavae ma Feagaiga 46. A o lisiina taitasi ia meaalofa, talanoa e uiga i le auala e mafai ai ona faaaoga lena meaalofa e faamanuiaina ai isi. O faamatalaga o loo i totonu o le “Mataupu 20: O Meaalofa a le Agaga” (Tala o le Mataupu Faavae ma Feagaiga, 77-80) e mafai ona fesoasoani. Fai i tamaiti e tofu i latou ma meaalofa a le agaga. Uunai i latou e aioi atu i le Tama Faalelagi ina ia fesoasoani mai ia i latou ia latou iloa a latou meaalofa ma le auala e mafai ai ona latou faaaogaina e fesoasoani atu ai i isi.

Mataupu Faavae ma Feagaiga 47:1, 3

E mafai ona ou faamaumauina lo’u talafaasolopito.

Na tofia e le Alii ia Ioane Uitimera e tausia se talafaasolopito faamaumauina o le Ekalesia. I lenei vaitaimi, ua matua faamanuiaina i tatou ona o talafaasolopito a le Ekalesia lea na tausia mai le tele o tausaga.

Gaoioiga e Mafai Ona Fai

• Faitau faatasi le Mataupu Faavae ma Feagaiga 47:1,3, ma fai atu i tamaiti ia faailoa mai po o le a le mea na finagalo le Alii ia Ioane Uitimera e fai. O le a le uiga o upu “e le aunoa” i totonu o le fuaiupu e 3? Ua faapefea ona faamanuiaina i tatou i le iloa lea e uiga i le talafaasolopito o le Ekalesia?

• Afai o tamaiti o loo e aoaoina o loo tausia se api o talaaga, fai atu ia i latou e talanoa e uiga i ituaiga o mea ua latou tusia i totonu o a latou api o talaaga. E ono fiafia tamaiti e faalogologo i se tala mai lau api o talaaga a o e laitiiti po o se api talaaga a sou augatuaa.

• Faaali atu i tamaiti faataitaiga o auala e mafai ona latou tausia ai i se ala fai soo se talafaasolopito o o latou olaga. Mo se faataitaiga, e mafai ona latou tusia i totonu o se tusi, faamaopoopo ata i totonu o se tusi o faamaumauga, ta i totonu o se komepiuta, po o le pueina o leo po o se ata vitio. Fesoasoani i tamaiti ia faia se lisi o mea e lelei pe a aofia ai i a latou talafaamaumau patino, e pei o la latou molimau ia Iesu Keriso. Valaaulia tamaiti e fai se faailoga po o se pepa lautele o i ai se savali e ave i le fale faatasi ai ma nisi o nei manatu e faamanatu ai ia i latou e tusi faamaumau a latou talafaasolopito patino.

  teineitiiti o loo suesue

  O api talaaga o se tasi lea o auala e mafai ai ona tatou tausia se talafaasolopito.

Mataupu Faavae ma Feagaiga 48:1–4

E mafai ona ou fesoasoani i isi e ala i le faasoa atu o mea na tuuina mai ia te a’u.

Ua uunaia e le Alii le Au Paia i Ohaio e fesoasoani i isi Au Paia e ala i le faasoa atu o a latou eleele ma a latou tupe. E mafai faapefea ona e faaaogaina nei fuaiupu e fesoasoani ai i tamaiti e saili auala e faasoa atu ai i isi mea ua tuuina mai e le Atua ia i latou?

Gaoioiga e Mafai Ona Fai

• Faaali i tamaiti se faafanua o Niu Ioka ma Ohaio (tagai i le otootoga mo Aperila 12–18 i le Sau, Mulimuli Mai ia te A’u—Mo Tagata Taitoatasi ma Aiga). Faamalamalama atu e faapea, na poloaiina e le Alii le Au Paia i Niu Ioka ma isi nofoaga ia faapotopoto i Ohaio, peitai e toatele i latou e le’i lava seleni e fausia ai se fale pe a latou taunuu. Fesoasoani i tamaiti e sue i totonu o le Mataupu Faavae ma Feagaiga 48:1-4 mea na talosaga atu ai le Alii i le Au Paia i Ohaio e fai e fesoasoani ai. Fesili atu i tamaiti pe o le a se mea latou te mananao e fai e fesoasoani ai pe afai o loo latou ola ma nonofo ai i totonu o Ohaio i le vaitaimi lea. O le a le mea ua tuuina mai ia i tatou i lenei vaitaimi lea e mafai ona tatou faaaogaina e fesoasoani atu ai i isi? Mo se faataitaiga, tagai i le “The Coat” (vitio, ChurchofJesusChrist.org).

• Faitau faatasi le Mataupu Faavae ma Feagaiga 48:4, ma fai atu i tamaiti e vaavaai mo se mea na fetalai atu ai le Alii i le Au Paia e fai e fesoasoani ai i Lana galuega. Faamalamalama atu e faapea, o le faasaoina o tupe o le a faatagaina ai i latou e faatau fanua ma fausia se malumalu i se aso. O a ni mea e mafai ona tatou faasaoina ai tupe ia mafai ai ona tatou fesoasoani e faatino le galuega a le Alii? Faaali le vitio “First Things First” (ChurchofJesuChrist.org), ma talanoaina le ala na mafai ai e tamaiti o loo i totonu o le vitio ona faataunuuina le poloaiga a le Alii ia faasaoina tupe.

aikona o le aoaoina

Uunaia le Aoaoina i le Aiga

Ia uunaia tamaiti e fesili atu i tagata o le aiga i le fale e uiga i se meaalofa faaleagaga latou te lagona na tuuina atu ia i latou. Ia uunaia foi tamaiti ina ia tatalo ma saili atu mo se meaalofa o le Agaga lea latou te mananao ina ia atiina ae.

Faaleleia o Lo Tatou Aoao Atu

Fesoasoani i tamaiti e aoao mai tusitusiga paia. Atonu e le mafai e tamaiti laiti ona tele se faitauga, ae e mafai lava ona e fesoasoani ia i latou ina ia aoao mai tusitusiga paia. Mo se faataitaiga, e mafai ona e faitauina se fuaitau ma valaaulia i latou e tutu i luga pe sii i luga o latou lima pe a latou faalogoina se upu patino poʻo se fasi fuaitau.

Itulau o gaoioiga: Ua tuuina mai e le Atua ia te a’u ni meaalofa faaleagaga