5–11 ni Epereli

Vunau kei na Veiyalayalati 30–36

“Ko Sa Kacivi Mo Vunautaka na Noqu Kosipeli”

Ni o vulica ena masumasu na Vunau kei na Veiyalayalati 30–36 ni ra vakasamataki tu na gone ena nomu kalasi, sa rawa ni soli vakasama vei iko na Yalotabu ena sala mo vakatavulici ira kina. Raica na ikuri ni vakasama ena ituvatuva oqo.

Vola na Veika o Vakauqeti Kina

Sureta na Veiwasei

Taura cake e dua na kedra iyaloyalo na daukaulotu, ka kerei ira na gone mera wasea na ka era kila tu me baleta na cakacaka vakaulotu.

Vakavulica na iVunau: Gone Sobu

Vunau kei na Veiyalayalati 33:2–3, 6–10

Au rawa ni wasea na kosipeli i Jisu Karisito.

O ira mada ga na gone lalai e rawa ni ra wasea na nodra ivakadinadina me baleta na kosipeli i Jisu Karisito. O rawa vakacava ni vakayagataka na veitikina oqo mo vakauqeti ira me ra vakayacora vakakina?

iTaviqaravi e Rawa ni Caka

• Sureti ira na gone me ra tovolea me ra tukuna e dua na malanivosa me vaka na “Sa lomani iko na Kalou” ni tasogo tu na gusudra. Dusimaka yani ni da sega ni rawa ni veivakavulici vei ira na tamata ena kosipeli kevaka eda sega ni dolava na gusuda. Wilika na Vunau kei na Veiyalayalati 33:8–10, ka sureti ira na gone me ra dolava na gusudra ena veigauna kece era rogoca kina na malanivosa “dolava na gusumuni.” Na cava na vuna e vinakata kina na Tamada Vakalomalagi meda dolava na gusuda ka wasea na kosipeli vei ira tale eso?

• Vakasolokakanataka vakamalua e dua na ka vei ira na gone, me vakataka o “Josefa Simici a dua na parofita ni Kalou,” ka kerei ira me ra tokaruataka na ka o tukuna. Qai tukuna vakadomoilevu na malanivosa vata ga. Wilika na Vunau kei na Veiyalayalati 33:2. Vukei ira mera kila vakamatata na gone ni kena “lave[ti] cake na domo[da]” o ya me da kakua ni rerevaka na tukuni Jisu Karisito, na iVola i Momani, kei na dina ni kosipeli tale eso vei ira na tamata.

• Biuta wavolita na rumu na matakau pepa se iyaloyalo ni tamata eso. Sureti ira na gone me ra vakaraica ira mai ka vakasoqoni ira vata yani i cake ena lomani rumu. Wilika na Vunau kei na Veiyalayalati 33:6, ka vakamacalataka na kena ibalebale ni na “vakasoqoni ira vata na [Nona] tamata digitaki” na Turaga. Vakadinadinataka ni da rawa ni vakasoqoni ira na tamata vua na Turaga ni da wasea na kosipeli.

• Lagata e dua na sere me baleta na wasei ni kosipeli, vaka na “Au Bole Meu sa Kaulotu Edai” (iVolanisere ni Gonelalai, 90). Vukea mera vakasamataka na gone na sala eso era rawa ni vukei ira kina na tamata eso me ra vulica na veika baleti Jisu Karisito.

Vunau kei na Veiyalayalati 33:12–17

Au rawa ni taracake noqu bula ena kosipeli i Jisu Karisito.

Na ivakasala a solia na Turaga kivei Ezra Thayer kei Northrop Sweet e rawa ni vukei ira na gone o vakavulica me ra taracake na nodra bula ena kosipeli i Jisu Karisito.

iTaviqaravi e Rawa ni Caka

• Vakaraitaka vei ira na gone na iyaloyalo ni yavu ni dua na vale, ka kerei ira mera vakamacalataka. Na cava na vuna e gadrevi kina e dua na vale na yavu kaukauwa ka tudei? Wilika vata kei ira na gone na Vunau kei na Veiyalayalati 33:12–13, ka vakamacalataka ni sa vinakata na Turaga me da taracake na noda bula ena Nona kosipeli. Vukea mera vakasamataka na gone na sala eso era rawa ni taracake kina na nodra bula ena kosipeli i Jisu Karisito.

• Solia vei ira na gone eso na iyaya era rawa ni vakayagataka me ra taracake kina e dua na vale, vaka na buloko se bilo palasitika eso. Vakayacana yadua na iyaya ena dua na iyaloyalo e matataka na veika e kaya na Turaga ena Vunau kei na Veiyalayalati 33:14–17. Sureti ira na gone mera taracake e dua na vale ni o vakamacalataka tiko vei ira na sala e vukei keda kina na veika oqo ena tarai cake ni noda bula ena kosipeli i Jisu Karisito.

Vakavulica na iVunau: Gone Qase Cake

Vunau kei na Veiyalayalati 30:1–2

Sa dodonu meu vakanamata vakalevu tu ki na veika va-Kalou mai na veika vaka vuravura.

Na ivakasala ni Turaga kivei Tevita Witima ena wase 30 e rawa ni vukei ira na gone o vakatavulica mera yalodina tiko ki na kosipeli i Jisu Karisito.

iTaviqaravi e Rawa ni Caka

• Wilika vata na Vunau kei na Veiyalayalati 30:1 ka kerei ira mera vakalekalekataka na gone, ena nodra vosa ga, na ivakasala a solia na Turaga vei David Whitmer. Na sala cava beka eda “rerevaka kina na tamata” ena so na gauna, se lomaleqataka na ka era nanuma na tani, mai na noda vakayacora ga na ka eda kila sa dodonu vei keda?

• Kerei ira na gone me ra saga me ra cakava e rua na itavi ena dua na gauna, vaka na cavuqaqataki ni dua na yavu ni vakabauta ni volai tiko na yacadra kece na gone ena kalasi. Tarogi ira na vuna e a dredre kina na qaravi ni matai ni tavi. Na cava soti na “veika ni vuravura” (Vunau kei na Veiyalayalati 30: 2) e rawa ni vakagolea tani na noda nanumi Jisu Karisito kei na Nona kosipeli? E rawa vakacava ni da vakanamata tikoga ki Vua ka vakalailai ena veika e sega soti ni bibi?

Vunau kei na Veiyalayalati 30–34

Au rawa ni wasea na kosipeli i Jisu Karisito.

Sa vakanamata tu e vuqa na gone ena Lotu ki na buturara ni kaulotu tudei se vaka-veiqaravi. Na veika era sotava na daukaulotu ka tukuni ena wase 30–34 e rawa ni vukea na nodra vakavakarau.

iTaviqaravi e Rawa ni Caka

• Sureta e dua na lewe ni tabanalevu me vulica na veika me baleta e dua na daukaulotu a kacivi ena Vunau kei na Veiyalayalati 30–34 ka wasea vei ira na gone na ka e sa vulica (raica na “Na Domo ni Veivakalesuitale: Ira na Saumaki Taumada” ena Lako Mai, Mo Muri Au—Me Baleta na Tamata Yadua kei na Matavuvale se “The Faith and Fall of Thomas Marsh,” “Ezra Thayer: From Skeptic to Believer,” “Orson Pratt’s Call to Serve,” Revelations in Context, 54–69).

• Droinitaka e dua na gusu levu ena papa ni volavola, ka vukei ira na gone me ra raica ena Vunau kei na Veiyalayalati 33:8–10 na yalayala eso ni Turaga vei keda ni da dolava na gusuda me da wasea na kosipeli. Me ra qai vola ena papa ni volavola na gone na yalayala eso oqo, ka vukei ira me ra kila vakamatata na ibalebale ni veiyalayala oqo. Kerea yadua na gone me vola ena loma ni gusu e dua na dina ni kosipeli era rawa ni wasea vei ira tale eso.

• Vakaraitaka e dua na iyaloyalo ni davui, ka vakamacalataka na ibalebale ni vunautaki na kosipeli “me vaka na rorogo ni davui.” Eda dau “laveta cake” vakacava na domoda? (Vunau kei na Veiyalayalati 33:2; 34:6).

• Kerei ra na gone me ra wasea na sala era sa vakavakarau tiko kina me ra laki kaulotu ena dua na siga. Kevaka era kila e dua (beka na lewe ni matavuvale) ka veiqaravi voli, sureti ira mera wasea na veika era a sotava. Se sureti ira na daukaulotu, e dua sa kaulotu oti, se dua e vakavakarau tiko ki na kaulotu me wasea na nona maqusataka na cakacaka ni kaulotu. Wasea eso na ka o a sotava ena kena wasei na kosipeli, oka kina na veika e sotavi ena nomu bula e veisiga.

  

  Au rawa ni wasea na kosipeli vei ira na noqu itokani.

Vunau kei na Veiyalayalati 33:12–17

Au rawa ni taracake na noqu bula ena kosipeli i Jisu Karisito.

Kevaka era rawa ni ra vakavulici ni ra sa yabaki lalai na gone ena sala mera taracake kina na nodra bula ena kosipeli i Jisu Karisito, era na rawa ni yalodina tikoga ki Vua. Na ivakasala e soli tu ena veitikina oqo e rawa ni vukei ira.

iTaviqaravi e Rawa ni Caka

• Kauta mai ki na kalasi eso na iyaya duidui na kedra kaukauwa, vaka e dua na ivakatakarakara ni manumanu vakasoso, dua na sipaji, tete, kei na dua na vatu. Vakatara na gone me ra tara yadudua. Kerea mera raica na Vunau kei na Veiyalayalati 33:12–13 me laurai na sala e vakamacalataka kina na Turaga na Nona kosipeli. Na cava na vuna e vosa vinaka kina na “vatu” me vakamacalataka na kosipeli? Eda na taracake vakacava na noda bula ena vatu ni kosipeli?

• Vukei ira na gone mera wilika na Vunau kei na Veiyalayalati 33:12–17 ka raica na veika eda rawa ni cakava me tarai cake kina na noda bula ena kosipeli i Jisu Karisito. Sureti ira mera droinitaka na gone e dua na iyaloyalo ni ka era raica, me ra qai vakilakila se cava e vakamacalataka tiko na veiyaloyalo yadua.

Vakauqeta na Vuli e Vale

Sureti ira na gone mera vakataki ira na daukaulotu ena nodra wasea vei ira na nodra matavuvale e dua na ka era sa vulica nikua ena Lalai.

Vakatoroicaketaki na Noda Veivakavulici

Vakadinadinataka na veivakalougatataki yalataki. Ni o sureta na gone me ra bulataka e dua na ivakavuvuli ni kosipeli, wasea na yalayala eso sa vakayacora na Kalou vei ira era bulataka na ivakavuvuli oya. Me ivakaraitaki, e rawa ni o vakadinadinataka na veivakalougatataki sa solia na Turaga vei ira era dolava na gusudra ka wasea na kosipeli.