Faatoaga a Matini Harisi

Faatoaga a Matini Harisi, saunia e Al Rounds

22–28 Fepuari

Mataupu Faavae ma Feagaiga 18–19

“Ua Tele Lava le Taua o Agaga”

Ole atu i le Tama Faalelagi e fesoasoani ia te oe e saili mataupu faavae i totonu o le Mataupu Faavae ma Feagaiga 18–19 o le a sili ona aoga i tamaiti.

Tusi Faamaumau Ou Lagona Uunai

aikona o le fefaasoaai

Valaaulia le Fefaasoaai

Faitau le Mataupu Faavae ma Feagaiga 18:2, ma faamatala atu faapea na fesoasoani le Agaga ia Oliva Kaotui ia iloa e moni tusitusiga paia. Tau atu i tamaiti e uiga i se mea na tupu ina ua molimau atu le Agaga ia te oe e moni tusitusiga paia. Tuu atu ia i latou e faasoa mai ni aafiaga ina ua latou lagona e moni tusitusiga paia.

aikona o le aoao atu

Aoao atu le Aoaoga Faavae: Tamaiti Laiti

Mataupu Faavae ma Feagaiga 18:10–12

O i tatou taitoatasi e taua tele i le Atua.

Pe a iloa e tamaiti e alofa le Tama Faalelagi ia i latou—ma Ana fanau uma—e sili atu lo latou mautinoa ma agalelei atu i isi.

Gaoioiga e Mafai Ona Fai

• Fai atu i tamaiti e toe fai le fuaitau Mataupu Faavae ma Feagaiga 18:10 mo ni nai taimi. Faamatala atu o “agaga” e faatatau i fanau uma a le Atua. Toe fai le fuaiupu 10 faatasi ma tamaiti, ae sui le upu “agaga” i igoa o tamaiti. (Tagai foi i le itulau o gaoioiga o lenei vaiaso.)

• Fesoasoani i tamaiti e mafaufau i mea e manatu tagata e taua. Ona tuu atu lea i tamaiti e auauai e tilotilo i le faʻata, ma ao latou faia, ia taʻu atu i tamaiti taitasi o ia o se alo o le Atua ma e taua tele. Molimau atu faapea, i le Tama Faalelagi, e sili atu lo latou taua nai lo mea uma na latou mafaufau muamua i ai.

Mataupu Faavae ma Feagaiga 18:13–16.

O le faasoaina atu o le talalelei e aumai ai le olioli tele.

E faapefea ona e musuia tamaiti e valaauliaina isi e o mai ia Keriso ma maua le olioli sili?

Gaoioiga e Mafai Ona Fai

• Faamatala atu i tamaiti e uiga i se mea e aumaia ia te oe le olioli. Tuu atu i tamaiti taitoatasi e taʻu atu ia te oe se mea e aumaia ia te ia le olioli. Faitau le Mataupu Faavae ma Feagaiga 18:13, 16. O le a se mea e aumaia ai le olioli i le Alii? O le a se mea na Ia fetalai mai o le a aumaia ia i tatou le fiafia?

• Usu faatasi se pese e faatatau i le galuega faifeautalai, e pei o le “Ou Te Fia Avea Nei Ma Faifeautalai” (Tusipese a Tamaiti, 90), ma fesoasoani i tamaiti e mafaufau i auala e mafai ai ona latou faasoa atu le talalelei, e aofia ai ma totonu o latou lava fale. Faamatala e uiga i se taimi na e faasoa atu ai le talalelei, ma tuu atu i tamaiti e faasoa o latou aafiaga.

Mataupu Faavae ma Feagaiga 19:18–19, 23–24

Na usitai Iesu Keriso i le Tama Faalelagi, e oo lava i le taimi na matua faigata ai.

O le naunautaiga a le Faaola e “inuina le ipu oona, ma [le] maʼeʼeʼe” (fuaiupu 18) o se faataitaiga ia i tatou uma le usiusitai i le finagalo a le Tama Faalelagi. Mafaufau pe mafai faapefea ona e musuia tamaiti e mulimuli i le faataitaiga a Iesu.

Gaoioiga e Mafai Ona Fai

• Faaali atu se ata o Iesu Keriso o puapuagatia i Ketesemane (tagai i le otootoga o lenei vaiaso i le Sau, Mulimuli Mai ia te A’u—Mo Tagata Taitoatasi ma Aiga). Fai i tamaiti e taʻu atu ia te oe mea latou te iloa e uiga i mea o loʻo tutupu i lenei ata. Aotele i au lava upu le mea na fai mai ai le Faaola i le Mataupu Faavae ma Feagaiga 19:18–19 e faatatau i Lona puapuagatia. Ia faamamafa atu o le puapuagatia mo a tatou agasala o le mea aupito faigata lea na faia e se tasi, ae ona e alofa Iesu i Lona Tama ma i tatou, na Ia usitai ai i le finagalo o le Atua. E faapefea ona tatou usiusitai i le Tama Faalelagi?

• Fesoasoani i tamaiti e mafaufau i taga faigofie e o faatasi ma fuaitau i totonu o le Mataupu Faavae ma Feagaiga 19:23. Faitau faatele le fuaiupu ao faia e tamaiti taga. Fesoasoani ia i latou e mafaufau i auala e mafai ai ona tatou aoao e uiga ia Keriso ma faalogo i Ana afioga.

aikona o le aoao atu

Aoao atu le Aoaoga Faavae: Tamaiti Matutua

Mataupu Faavae ma Feagaiga 18:10–12

O i tatou taitoatasi e taua tele i le Atua.

E toatele tagata e tauivi ma lagona o le faatauvaa o le tagata lava ia; o isi e agaleaga i tagata e ese mai ia i latou. O le savali mamana o le Mataupu Faavae ma Feagaiga 18:10 e mafai ona suia ai le auala tatou te vaai ai ia i tatou lava ma tagata o loo siomia i tatou.

Gaoioiga e Mafai Ona Fai

• Fai atu i tamaiti taitasi e tusi lona igoa i luga o se fasi pepa ma pasi solo pepa i totonu o le potu. Valaaulia i latou e tusi i luga o pepa taitasi latou te mauaina se mea latou te fiafia i ai e uiga i lena tagata. Ia fautuaina i latou ia agalelei ma mafaufau ia latou faamatalaga. Ona fesoasoani lea i tamaiti e faitau le Mataupu Faavae ma Feagaiga 18:10–12, ma valaaulia i latou e faasoa mai mea na latou aoaoina e uiga i lagona o le Atua ia i tatou. Faamalamalama atu e taua tele i tatou i le Atua aua o i tatou o Ana fanau.

• Faaali atu i tamaiti se mea e taua tele ia te oe. E faapefea ona tatou taulimaina mea e taua ia i tatou? Fai atu i se tamaitiiti e faitau le Mataupu Faavae ma Feagaiga 18:10. E faapefea ona tatou faaali atu i isi tagata e “taua tele o [latou] agaga” i la tatou vaai?

  O Iesu o loo siiina se tamaitiiti laitiiti

  Taua o se Agaga, saunia e Liz Lemon Swindle

Mataupu Faavae ma Feagaiga 19:16–19

Na puapuagatia Iesu Keriso mo a’u.

E faapefea ona e valaauliaina se agaga o le migao i lau vasega ina ia mafai ai e le Agaga Paia ona molimau atu i tamaiti faapea na totogiina e Iesu Keriso le tau mo a latou agasala?

Gaoioiga e Mafai Ona Fai

• Faasoa atu le tala ia Iesu Keriso o puapuaga mo a tatou agasala (tagai “Mataupu 51: Sa Puapuagatia Iesu i le Togalaau o Ketesemane,” Tala o le Feagaiga Fou, 129–32, po o le vitio talafeagai i luga o le ChurchofJesusChrist.org). Valaaulia tamaiti e toe faamatala le tala ia latou lava upu, ona valaaulia lea o i latou e faitau pe na faapefea ona faamatalaina e le Faaola le aafiaga i totonu o le Mataupu Faavae ma Feagaiga 19:16–19. O a mea tatou te aʻoaʻoina mai i Lana faʻamatalaga?

• Valaaulia tamaiti e moeiini o latou mata a o e faitauina le Mataupu Faavae ma Feagaiga 19:16–19 ma ia mafaufau pe o a ni o latou lagona e uiga i le Faaola. Fesoasoani i tamaiti e sue i totonu o Viiga po o le Tusipese a Tamaiti mo pese e fesoasoani ia i latou e faaalia ai o latou lagona e uiga ia Iesu Keriso (tagai i le faasino upu o igoa autu i nei tusi). Valaaulia tamaiti e usu ni pese na latou filifilia ma tuuina atu a latou molimau.

• Fesoasoani i tamaiti e tauloto le mataupu faavae lona tolu o le faatuatua.

Mataupu Faavae ma Feagaiga 19:26, 34–35, 38

O faamanuiaga a le Atua e sili atu nai lo oa o le lalolagi.

O le lolomiina o le Tusi a Mamona e taugata, ma e le mafai e Iosefa Samita ona gafatia. Na talosagaina e le Alii Matini Harisi e “tuuina atu se vaega o [ana] meatotino,” o lona faatoaga faamanuiaina, e totogi ai le lomitusi (fuaiupu 34). Ua tatou maua le tele o faamanuiaga ona o osigataulaga a Matini ma le tele o isi tagata.

Gaoioiga e Mafai Ona Fai

• Tusi i luga o le laupapa fesili e pei o fesili nei e fesoasoani ai i tamaiti ina ia malamalama i le Mataupu Faavae ma Feagaiga 19:26, 34–35, 38: O le a le mea na fai atu ai le Alii ia Matini Harisi e fai? Aisea na Ia fai atu ai ia te ia e fai? O le a se mea na Ia folafola mai o le a avea ma taui? Valaaulia tamaiti e galulue taitoalua e saili tali i nei fuaiupu. Fesili atu ia i latou pe o a ni o latou lagona pe ana fai o i latou o Matini Harisi.

• Faaali atu i tamaiti se kopi o le Tusi a Mamona, ma taʻu atu ia i latou se mea e te fiafia e uiga i ai. Valaaulia i latou e faasoa mai o latou lagona e uiga i ai. Talanoa puupuu e uiga i le ositaulaga a Matini Harisi ina ia mafai ai ona lomia le Tusi a Mamona (Tala o le Mataup Faavae ma Feagaiga, 33). O le a le fetalaiga a le Alii ia Matini i le Mataupu Faavae ma Feagaiga 19:38 atonu na fesoasoani ia te ia ia faamaoni ma usiusitai? Fesoasoani i tamaiti e mafaufau i se mea e mafai ona latou ositaulagaina e usitai ai i le Atua pe fesoasoani i Lana galuega.

aikona o le aoaoina

Fautuaina le Aoaoina i le Aiga

Valaaulia tamaiti e mafaufau i se tasi e mafai ona fesoasoani i mea na latou aoaoina mai le Mataupu Faavae ma Feagaiga 18 po o le 19—mo se faataitaiga, tatou te taua uma lava i le Atua Uunaia i latou e fuafua pe faapefea ona latou faasoa mea na latou aoaoina ma lena tagata.

Faaleleia o Lo Tatou Aoao Atu

Fesoasoani i tamaiti e aoao mai tusitusiga paia. O nisi tamaiti e faigata ona faitauina tusitusiga paia. Taulai atu i se fuaiupu se tasi po o se fasifuaitau e mafai ona fesoasoani ia i latou.

itulau o gaoioiga: E matua taua tele a’u