28 diciembre–3 enero

Tzolʼlebʼ ut Sumwank 1

“Chex’ab’inq, ex tenamit”

Li xb’een na’leb’ taab’aanu re xkawresinkil aawib’ re k’utuk a’an xtzolb’al rik’in tijok Tzol’leb’ ut Sumwank 1. Naq taab’aanu, k’e reetal li taaweek’a rik’in li Musiq’ej chirix li rajomeb’ ru li kok’al, ut sik’eb’ li na’leb’ li te’wanq xyaalal choq’ reheb’. Eb’ li eek’ahom a’an te’k’anjelaq aawe re xk’uub’ankileb’ li kok’ k’anjel li te’tenq’anq aawe chixk’utb’aleb’ li na’leb’ a’an.

Tz’iib’a li nakak’oxla

Xkanab’ankileb’ chi wotzok

Chap chi kutankil reetalil li hu Tzol’leb’ ut Sumwank ut kanab’eb’ li kok’al chixwotzb’al k’a’ru neke’xnaw chirix li hu a’in. Ani kitz’iib’ank re? K’a’ru wan chi sa’? K’a’ut naq aajel ru? Re aatenq’ankil, naru taawoksi li “Ch’ol 23: Li Tzol’leb’ ut Sumwank” (Eb’ li Esilal sa’ li Tzol’leb’ ut Sumwank, 90–92). Wotz resilal laa rahom chirix li hu Tzol’leb’ ut Sumwank ut lix sahil aach’ool xb’aan tzolok chi sa’ chiru li chihab’ a’in.

Xk’utb’al li tzol’leb’: Kok’al toj ka’ch’ineb’ xyu’am

Tzol’leb’ ut Sumwank 1:4

Rik’in xtz’uumaleb’ re lix profeet, li Qaawa’ nokoxq’us chirixeb’ li musiq’ejil xiwxiw.

Li Qaawa’ kixye naq lix yaab’ xkux a’an jun “xyaab’ kuxej re tije’k.” Chan ru taamusiq’aheb’ li kok’al chirab’inkil ut chixpaab’ankileb’ li tijom naxk’e a’an?

Kok’ k’anjel naru chi b’aanumank

• Kanab’eb’ li kok’al chixchapb’aleb’ chi kutankil xjalam-uucheb’ li eetalil re q’usuk—jo’eb’ li xiwxiw sa’ li b’e, li kawil hab’, malaj li may—ut aatinanqex chirix chan ru naq nokohe’xq’us chiru li xiwxiw. Malaj ut, wotz junaq seraq’ re jun sutaq b’ar wi’ laa’at xat-ab’in chiru junaq q’usum. Juntaq’eetaheb’ li q’usum a’an rik’ineb’ li q’usum naxk’e qe li Qaawa’ rik’in xtz’uumaleb’ re lix profeet. Ch’olob’ xyaalal naq a’an nokoxq’us xb’aan naq nokoxra ut naraj naq chi kolb’il qix wanqo (chi’ilmanq ajwi’ li perel re kok’ k’anjel re li xamaan a’in).

• Sa’ Tzol’leb’ ut Sumwank 1:4, il ru choq’ reheb’ li kok’al: “Ut lix yaab’ kuxej re tije’k taawanq chiruheb’ chixjunil li tenamit.” Wotz k’a’ruhaq kixk’ut li profeet toje’ li naru naxkol qix. Wi naru, k’uteb’ xjalam-uuch chiruheb’. Aatinan chirix chan ru naq laa’at yookat chixtaaqenkil li raatin li profeet.

Tzol’leb’ ut Sumwank 1:17, 29

Laj Jose Smith a’an jun xprofeet li Dios.

Naq laa’at ut eb’ li kok’al te’xtikib’ xtzolb’al li Tzol’leb’ ut Sumwank, tenq’aheb’ chixtawb’al xnawomeb’ xch’ool chirix lix choxahil b’oqb’al laj Jose Smith.

Kok’ k’anjel naru chi b’aanumank

• K’ut jun xjalam-uuch li Profeet aj Jose Smith (chi’ilmanq Kim, Taaqehin—Choq’ reheb’ li komon ut li junkab’al; chi’ilmanq ajwi’ Hu reheb’ li Jalam-uuch re li Evangelio, 87). Kanab’eb’ li kok’al chi xaqliik chixk’atq li jalam-uuch ut chixwotzb’al li neke’xnaw chirix laj Jose Smith.

• Kanab’eb’ li kok’al chixchapb’al chi kutankil jun xjalam-uuch li Kolonel ut jun xjalam-uuch laj Jose Smith. Aatinaheb’ chirix k’a’ru kixk’e qe li Kolonel rik’in laj Jose Smith, jo’eb’ li taqlahom (chi’ilmanq li raqal 17) ut lix Hu laj Mormon (chi’ilmanq li raqal 29). Ye reheb’ naq sa’ Tzol’leb’ ut Sumwank te’tzoloq chirixeb’ lix taqlahom li Qaawa’ kixk’e re li Iglees rik’in laj Jose Smith.

• Wotzeb’ laa week’ahom chirix laj Jose Smith ut ch’olob’ xyaalal naq li Dios “kixb’oq chaq lix moos aj Jose Smith, alalb’ej, ut kiraatina chalen chaq sa’ choxa” (raqal 17).

Tzol’leb’ ut Sumwank 1:38

Eb’ li raatin li profeet a’aneb’ raatin li Dios.

Eb’ li kok’al nakatzoleb’ maare ak rab’ihomeb’ li Awa’b’ej re li Iglees chi aatinak, a’b’an maare ink’a’ neke’xnaw naq eb’ li raatin neke’chal chaq rik’in li Dios. Tenq’aheb’ chirilb’aleb’ li raatin li profeet jo’ eb’ li raatin li Dios.

Kok’ k’anjel naru chi b’aanumank

• B’atz’uhomaq jun li b’atz’unk moko ch’a’aj ta, b’ar wi’ naq laa’at taab’aanu jun ch’olob’ank chiru junaq ch’ina al malaj ch’ina xqa’al, ut taakanab’ chixka’sutinkil choq’ reheb’ xkomon li kok’al. Tenq’aheb’ chirilb’al naq xtaaqenkil lix ch’olob’ahom li ch’ina al juntaq’eet rik’in xtaaqenkil laa ch’olob’ahom la’aat, ut xtaaqenkil li profeet a’an ajwi’ xtaaqenkil li Dios. Il ru choq’ reheb’ lix raqik Tzol’leb’ ut Sumwank 1:38: “Ma rik’in tz’aqal xyaab’ inkux malaj rik’in xyaab’ xkuxeb’ inmoos, juntaq’eet na’el.”

• B’ichahomaq sa’ komonil jun li b’ich na’aatinak chirixeb’ li profeet, jo’ li roso’jik li tasal re “Jun li profeet” (B’ichleb’aal choq’ reheb’ li Kok’al, 58–59). Wotz lix nawom aach’ool chirix naq li profeet naxjultika li raatin li Dios.

• K’ut jun jalam-uuch, jun chapb’il xyaab’ kuxej, malaj xcha’al jun video re junaq yo’yookil profeet. Ch’olob’ xyaalal naq li profeet naxye qe li k’a’ru naraj li Dios naq taqanaw. Kanab’eb’ li kok’al chixwotzb’al li reek’ahomeb’ chirix li profeet.

  

  Li profeet naxk’ut chiqu k’a’ru naraj li Dios naq taqanaw.

Xk’utb’al li tzol’leb’: Kok’al ak ninqeb’

Tzol’leb’ ut Sumwank 1:15–17, 29–30

Li Qaawa’ kixnaweb’ li ch’a’ajkilal li te’qanumsi, ut xb’aan a’an naq kixk’ojob’ wi’chik lix evangelio rik’in laj Jose Smith.

Laa’at naru nakatenq’aheb’ li kok’al chixkawresinkil rib’eb’ choq’ reheb’ li ch’a’ajkilal chalel rik’in xk’utb’al chiruheb’ chan ru naq lix k’ojob’ankil li evangelio nak’ehok musiq’ejil kolb’a-ib’.

Kok’ k’anjel naru chi b’aanumank

• Tenq’aheb’ li kok’al chixk’oxlankil junjunqeb’ xch’a’ajkilal li ruchich’och’ sa’eb’ li kutan a’in. Il wi’chik ru Tzol’leb’ ut Sumwank 1:15–16 rik’ineb’ a’an ut tenq’aheb’ chixyeeb’al junjunqeb’ li ch’a’ajkilal kixye li Qaawa’ naq taak’ulmanq. Kanab’eb’ chixtawb’al sa’eb’ li raqal 17 ut 29–30 k’a’ru naxb’aanu li Qaawa’ re qatenq’ankil chixnumsinkileb’ li ch’a’ajkilal sa’eb’ li qakutan.

• Kanab’eb’ li kok’al chixk’oxlankil naq yookeb’ chixkawresinkil rib’ re xik chi b’eek. K’a’ raj ru te’xk’am? Chan raj ru te’tenq’aaq xb’aan xnawb’al naq chiru li b’eek tixk’e li hab’ malaj naq li b’eleb’aal ch’iich’ taapuk’e’q xyaant? Ilomaq ru sa’ komonil li raqal 17 ut aatinanqex chirix k’a’ru kixnaw chaq li Qaawa’ naq taak’ulmanq ut chan ru naq kixkawresi rib’ choq’ re a’an. Chan ru nokohe’xtenq’a lix taqlahom li Dios chixnumsinkileb’ li ch’a’ajkilal sa’eb’ li qakutan?

Tzol’leb’ ut Sumwank 1:30

Lix Iglees li Jesukristo reheb’ laj Santil Paab’anel sa’ Roso’jikeb’ li Kutan a’an lix “yaalil ut yo’yookil iglees” li Qaawa’.

Chan ru naru nakatenq’aheb’ li kok’al chixb’antioxinkil li xnimal ru osob’tesiik naq laa’o komon sa’ “li jun ajwi’ chi yaalil ut yo’yookil iglees”?

Kok’ k’anjel naru chi b’aanumank

• Kanab’eb’ li kok’al chixyiib’ankil jun xtusulal k’a’aq re ru wankeb’ xyu’am ut junjunqeb’ li maak’a’eb’ xyu’am (wi naru, k’ameb’ jalam-uuch malaj eetalil). K’a’ru xjalanil li k’a’aq re ru wan xyu’am rik’in li maak’a’ xyu’am? Ilomaq ru sa’ komonil li raqal 30. K’a’ru naraj naxye naq li Iglees a’an “yaal”? K’a’ru naraj naxye naq “yo’yo”?

• K’ut jun jalam-uuch, jo’ jun b’onb’il xjalam-uuch li Kolonel, ut kanab’eb’ li kok’al chixch’olob’ankil a’an chi chupchuukeb’ li saqen sa’ li tzoleb’aal. Oksi li ch’ina k’anjel a’in re xtenq’ankileb’ li kok’al chirilb’al k’a’ut naq choq’ reheb’ naab’al li kristiaan, lix yaalil Iglees li Qaawa’ wan sa’ li “aak’ab’ ” ut sa’ li “q’ojyin.” Chan ru naru naqatenq’aheb’ li qas qiitz’in chi tzolok chirix li Iglees?

Tzolʼlebʼ ut Sumwank 1:37–38

Lix k’anjel li Qaawa’ nakana chi junelik.

Naru nakatenq’aheb’ li kok’al chixch’olaninkil lix paab’aaleb’ chirix li Jesukristo naq nakak’ut chiruheb’ naq li raatin tz’aqal xaqxo ut paab’ajel.

Kok’ k’anjel naru chi b’aanumank

• Tenq’aheb’ li kok’al chixjuntaq’eetankileb’ k’a’aq re ru yal junpaat neke’kana, jo’ jun xwoqx xab’on malaj saqb’ach, rik’ineb’ k’a’aq re ru junelik neke’kana, jo’ jun li tzuul malaj li saq’e. Kanab’eb’ chixtawb’al sa’eb’ li raqal 37–38 k’a’ruhaq kixye li Qaawa’ naq junelik nakana. K’a’ut naq xnawb’al naq li raatin li Dios “ink’a’ taa’oso’q” a’an jun osob’tesihom?

• Tenq’aheb’ li kok’al chixtawb’al ru naq li “xyaab’ xkuxeb’ inmoos” a’an ajwi’ xyaab’eb’ xkux li qaprofeet ut apostol. Tenq’aheb’ chixtawb’aleb’ “profeetil aatin ut yeechi’ihom” sa’ raatin junaq xmoos li Qaawa’ yeeb’il sa’ junaq li jolomil ch’utub’aj-ib’ toje’ numenaq. Wotz lix nawom aach’ool chirix naq eb’ li aatin a’an musiq’anb’ileb’ xb’aan li Qaawa’ ut naq “taatz’aqloq ru chixjunil.”

Xb’oqb’aleb’ chi tzolok sa’ kab’l

Numsi wi’chik rik’ineb’ li kok’al li k’a’ru xe’xtzol chiru li kutan a’in ut kanab’eb’ chixsik’b’al ru k’a’ruhaq li neke’xk’oxla naq chixjunileb’ li ras riitz’in tento te’xnaw. Waklesi xch’ooleb’ chixwotzb’al a’an rik’in junaq ramiiweb’ malaj komon sa’ lix junkab’aleb’.

Xchaab’ilob’resinkil li qak’utum

Eb’ li kok’al neke’tzolok chi jalan jalanq ru. “Moko juntaq’eeteb’ ta chixjunileb’ li kok’al, ut li junjunq sa’ junpaat yoo chi k’iik. Q’axaal chaab’il xyalom aaq’e chixtzolb’aleb’ li kok’al naq jalan jalanq paay chan ru nakatzoleb’,” rik’in roksinkil li seraq’, li k’a’ru ilb’il, ut li wajb’ (Li k’utuk jo’ li Kolonel, 25).