“Jeptōm̧ba 14–20. 3 Nipai 8–11: ‘Kom̧in Jutak im Wōnm̧aantak N̄an Ippa.’” Itok, Ļoor Eō—N̄an Būraimere: Bok in Mormon 2020 (2020)
“Jeptōm̧ba 14–20. 3 Nipai 8–11,” Itok, Ļoor Eō—N̄an Būraimere: 2020
N̄a Meram eo an laļ, jān James Fullmer
Jeptōm̧ba 14–20
3 Nipai 8–11
“Kom̧in Jutak im Wōnm̧aantak N̄an Ippa”
Riiti 3 Nipai 8–11 ippān ajri ro kwoj katakin ilo kōļmenļo̧kjen. Ļōmņak ko ilo laajrak in emaron̄ jipan̄ tōl kōppopo eo am̧.
Je En̄jake ko Rej Im̧we Eok
Kajjitōk bwe ren Kwaļo̧k
Kwaļo̧k juon pijain an Jisōs waļo̧k ļo̧k ilo Amedka, āinwōt eo ilo laajrak eo an wiik in ilo Itok, Ļoor Eō—N̄an Kajjojo Armej im Baam̧le ko. Kajjitōk ippān ajri ro n̄an kwaļo̧k meļeļe ko ilo pija eo im kwaļo̧k jet men rejeļā kake ilo bwebwenato eo ej waļo̧k.
Katakin Katak ko: Ajri ro Reddikļo̧k
Jisōs Kraist ej kūr eō n̄an itok n̄an E.
Kwomaron̄ jab kwaļo̧k n̄an ajri ro aolep meļeļe ko kōn waļo̧k ļo̧k eo an Rilo̧mo̧o̧r n̄an armej ro an Nipai, ak kwomaron̄ jipan̄ er en̄jake iakwe eo Eaar kwaļo̧k n̄an armej ro ilo 3 Nipai 8–11).
M̧akūtkūt ko Maron̄ Kōm̧m̧ani
-
Ba n̄an ajri ro kōn lan̄ ko im maroklep eo kar kwaļo̧ke ilo 3 Nipai 8, lukkuun lale bwe kwon jab kamijak ak kalluik er. Kwomaron̄ bar kōjerbale “Jebta 42: The Signs of Christ’s Crucifixion” (Book of Mormon Stories, 117–19, ak pija in alooj eo ilo ChurchofJesusChrist.org). Kajjitōk ippān ajri ro ewi wāween aer nej kar en̄jake eļan̄n̄e ren kar ioon ļan̄ im marok ko. Kōmeļeļeik bwe lan̄ im marok ko raar kōkkaļļein mej eo an Jisōs, im kwaļo̧k juon pija in Debwāāl eo (lale Gospel Art Book, no.57). Innām riiti 3 Nipai 9:13. Ta eo Jisōs eaar ba Enaaj kōm̧m̧ane n̄an ro rej ukweļo̧k? Jipan̄ ajri ro meļeļe bwe naan eo “kōmour” ilo eoon in meļeļein bwe Jisōs enaaj jeo̧rļo̧k aer bōd.
-
Kwaļo̧k pija eo ilo laajrak eo an wiik in ilo Itok, Ļoor Eō—N̄an Kajjojo Armej im Baam̧le ko ilo am̧ kōmeļeļeiki ilo naan ko am̧ make Rilo̧mo̧o̧r eo eaar jerkakpej waļo̧k ļo̧k n̄an Rinipai im Rilemanro. Riiti eoon ko jān 3 Nipai 11 me enaaj jipan̄ eok en̄jake kwojarjar eo an iien in. Kajjitōk ippāer n̄an kiil mejeer im antooņe ewi wāween aer nej kar en̄jake eļan̄n̄e ren kar lo Jisōs. Ak kwaļo̧k pija eo “My Joy Is Full” (ChurchofJesusChrist.org). Ba n̄an ajri ro kōn wāween am̧ en̄jake n̄e kwoj riit im kōļmenļo̧kjeņ kōn iien kein. Kam̧ool bwe Jisōs ekōņaan bwe jen aolep itok n̄an E im en̄jake iakwe eo An. Kadedeikļo̧k peij in makūtkūt ko ippān ajri ro?
Jisōs ej kōjparok armej ro An āinwōt an lolo eo kōjparok tokki ko nejin.
Antoone ļo̧k an juon lolo aiin tokki ko nejin emaron̄ katakin ajri ro kōn aenōm̧m̧an im kōjparok eo Rilo̧mo̧o̧r ej letok eļan̄n̄e jenaaj itok n̄an E.
Makūtkūt ko Maron̄ Kōm̧m̧ani
-
Kwaļo̧k juon pija in juon lolo an kōjparok tokki ko nejin. Riiti 3 Nipai 10:6, im ba n̄an ajri ro kōn ewi wāween an juon lolo kūr tokki ko nejin im kōjerparok er ium̧win pe ko pein n̄e ewōr kauwōtata. Kōnono wāween an Jisōs āinwōt lolo eo im jej āinwōt tokki ko. Ewi wāween ad itok n̄an E n̄an lo kōjparok?
-
Likūt juon pijain Jisōs ioon wooļ eo. Kajjitōk ippān ajri ro n̄an etetal ipeļaakin kūlaaj ruum̧ eo ilo am̧ riiti 3 Nipai 10:4 ilo elaaj. Ba n̄an er bwe ren kōm̧akūt m̧aanļo̧k pijain Jisōs n̄e rej ron̄ naan ko “ippān doon” ak “kuk” Āliji m̧akūtkūt in ilo am̧ riit eoon 5 im 6. Kwaļo̧k n̄an ajri ro ewi wāween am̧ lo kōjparok ilo am̧ itok n̄an Rilo̧mo̧o̧r, im kam̧ool bwe Enaaj kōjparok kōj jān jetōbin kauwōtata ko ilo ad kōjparok kien ko An.
Jisōs Kraist ekōņaan bwe in peptaij.
Ajri ro kwoj katakin rej pojak in peptaij. Katak ko an Kraist ilo eoon kein remaron̄ jipan̄ er jeļā etke peptaij eaorōk.
Makūtkūt ko Maron̄ Kōm̧m̧ani
-
Riiti 3 Nipai 11:21–26, im kajjitōk ippān ajri ro n̄an jutak aolep iien n̄e rej ron̄ naan eo “peptaij.” Kōmeļeļeik bwe Jisōs eaar katakin kōj iaļ eo ejim̧we n̄an peptaij. Kwaļo̧k juon pija in juon ajri ej an peptaij (lale Gospel Art Book, no. 104). Eļan̄n̄e ajri ro raar lo an juon peptaij, kajjitōk ippāer n̄an kōmeļeļeik ta eo raar loe. Wōn eaar kōm̧m̧ane peptaij eo, im elmen an kar kōm̧m̧ane?
-
Moktaļo̧k, kūrtok juon jemen juon iaan ajri ro n̄an pād ilo kūlaaj eo am̧ im kwaļo̧k n̄an ajri ro unin an aorōk bwe jen tuļo̧k kōn dān jen juon eo ej kabwijer priesthood eo. Emaron̄ bar kōmeļeļeik n̄an ajri ro ta eo enaaj waļo̧k n̄e rej peptaij im kōjeraam̧m̧an ko renaaj būki. Rōjan̄ e n̄an kōjerbal 3 Nipai 11:23–26 ilo an kōmeļeļe.
Katakin Katak ko: Ajri ro Rerūttoļo̧k
N̄e ij pād ilo marok, Jisōs Kraist emaron̄ aō meram.
Juon enaan eo ekajoor kōn jebta kein ej bwe Jisōs Kraist ej meram eo an laļ, im Emaron̄ in meram eo n̄an mour ko ad.
Makūtkūt ko Maron̄ Kōm̧m̧ani
-
Riit ippān doon 3 Nipai 8:5–7, 11–23, im 10:9–13 (eļan̄n̄e ekkar, kōmarok ruum̧ eo ilo am̧ riit). Bōjrak ilo iien riit im kajitōk ippān ajri ro ewi wāween ar kar en̄jake kōn men kein. Riit n̄an ajriro jet iaan naan ko an Jisōs Kraist kar kōnono n̄an armej ro ke raar pād ilo marok (lale 3 Nipai 9:13–14, 18). Etke Jisōs Kraist ej kūr Emake Meram in Laļ? Ta eo Jisōs ekar kūr armej ro, im kōj, n̄an kōm̧m̧ane bwe En maron̄ ad meram? (lale 3 Nipai 9:20–22).
-
Kwaļo̧k n̄an ajri ro juon mab in laļ in, im jipan̄ er pukot Jerusalem im Amedka. Kōmeļeļeik bwe kakkure eo kar kōmeļeļeiki ilo 3 Nipai 8 eaar juon kōkkaļļe n̄an armej ro ilo Amedka bwe Jisōs Kraist em̧ōj an debwāāl ilo Jerusalem. Riit ippān doon 3 Nipai 11:1–15, im kajjitōk ippān ajri ro bwe ren kwaļo̧k n̄an kwe iien eo raar lo jet men ilo eoon kein me ejipan̄ er en̄jake iakwe eo an Anij. Kwaļo̧k eoon 37, kam̧ool bwe Rilo̧mo̧o̧r ej iakwe aolep ajri. Kwaļo̧k am̧ naan in kam̧ool kōn m̧ool eo kōn ta eo kwaar riiti.
Juon ļo̧k Juon, jān Walter Rane
Imaron̄ jeļā kile ainikien Anij ilo mour eo aō.
Ilo jinoin armej ro raar jab meļeļe ainikien eo raar ron̄ jān lan̄. Ta eo ajri ro remaron̄ jeļā jen bwebwenato in kōn bōk revelāsōn?
Makūtkūt ko Maron̄ Kōm̧m̧ani
-
Riiti 3 Nephi 11:1–4 ippān ajri ro, bōjrak im kajjitōk kajjitōk ko āinwōt “Etke kwoj ļōmņak ajmejro raar jab meļeļe ainikien eo?” Innām kajjitōk ippāer n̄an riiti eoon 5–7 n̄an pukot ta eo armej ro raar kōm̧m̧ane me ekar jipan̄ er meļeļe ainikien eo ilo būruweer. Ewi wāween jemaron̄ kajjieon̄ n̄an ron̄jake Anij n̄e Ej kōnono n̄an būruwōd jen Jetōb Kwojarjar?
-
Kōjo̧ juon al em̧ōj kanne ak al in ajri eo me epen meļeļeiki. Kajjitōk ippān ajri ro eļan̄n̄e remaron̄ meļeļe kakinaan ko ilo al eo. Innām jipan̄ er pukote 3 Nipai 11:3 n̄an kōmeļeļeik ainikien eo jen lan̄. Etke Anij ejjab kōnono n̄an kōj ilo ainikein “elaaj” ak “lāj”? Ta eo jemaron̄ kōm̧m̧ane bwe en em̧m̧anļo̧k ad ron̄jake E?
Kōketak Ekkatak ilo Mweo
Kajjitōk ippān ajri ro n̄an jiron̄ ro jet kōn loļo̧k eo an Jisōs n̄an Amedka—eļan̄n̄e ekkar, juon eo me ejjan̄in kar jeļā kake.
Kōkōm̧anm̧anļo̧k Ad Katakin
Kōnono ilo iakwe kōn kakkure. “Jet iien paoktokin juon ajri .emaron̄ in kakkure iien ekkatak eo an ro jet ilo kūlaaj eo. N̄e menin ewaļo̧k, kijenmej, iakwe, im meļeļe kōn apan̄ ko an ajri eo ej jelm̧ae. … Eļan̄n̄e emenin aikuj n̄an kōnono kake ajri eo, kōnono ilo ward ak stake disability specialist ro ak etal n̄an disabilities.ChurchofJesusChrist.org n̄an pukot wāween am̧ maron̄ tōpar aikuj in eļap” (Teaching in the Saviors’s Way,26).