“Tebetembwa 7–13. 3 Nibwaai 1–7: ‘Tabekarake Atuum ao Kukurei’” Nakomai, Iriirai—Ibukin te Moanrinan: Ana Boki Moomon 2020 (2020)
“Tebetembwa 7–13. 3 Nibwaai 1–7,” Nakomai, Iriirai—Ibukin te Moanrinan: 2020
Teuana te Ngaina, Teuana te Bong, ao Teuana te Ngaina, iroun Jorge Cocco
Tebetembwa 7–13
3 Nibwaai 1–7
“Tabekarake Atuum ao Kukurei”
Ngkana ko kainnanoi iango riki n am tai ni katauraoi n anga reirei, taraa “Bwsai n Ibuobuoki riki tabeua ibukin Reiakinaia Ataei” ao “Tobwaan Kainnanoia ataei aika a uarereke” ni moan te boki ni kairi aei.
Korei Am Namakin
Kaoa te Tibwatibwa
Kaoiia ataei bwa a na tibwaua te bwai ae a uringnga ae a reiakinna n te wiiki ae nako ibukin kanikina ake e taekin Tamuera te Reimwanaite aika a na buokia aomata n ataia bwa e bungiaki Iesu. Tuangia ataei bwa n te bong aei ao a na maroroakina taekaia aomata ake a noori kanikina akanne n riki.
Reirei te Reirei: Ataei aika a Uarereke
Te itoi ae boou e kaoti ngke e bungiaki Iesu.
Ana rongorongo te Nu Tetemanti ibukin bungiakin te Tia Kamaiu e nang tanoata, irouia naba ataei. Te wiiki aei bon te tai ae tamaroa n reireinia ataei ake n am kiraati taekan taian kakai ake a noori Nibwaite ngke e bungiaki Iesu.
Waaki ni Kakukurei aika a Kona ni Karaoaki
-
Imwain te kiraati, kanimwa te itoi iaon te oo. Kaoiia ataei bwa a na kakaea te bwai iaon te oo ae e boou. Tuangia ataei bwa Nibwaite a noora te itoi ae boou i karawa ngke e bungiaki Iesu. Kakimototoa te rongorongo are n 3 Nibwaai 1:4–15, ao 19–21. Ko kona naba ni kabongana “Mwakoro 41: Kanikinaean Bungiakin Kristo” (Karaki man Ana Boki Moomon, 114–16, ke te witeo ae irekereke ma ngaia iaon ChurchofJesusChrist.org).
-
Kaota tamnein bungiakin te Tia Kamaiu nakoia ataei (taraa Bokin Tamnein te Euangkerio, nambwa. 30), ao anenea te anene ni kiritimati ae tatangiraki, n aron “The Nativity Song” (Aia Boki n Anene Ataei, 52–53). Buokia ataei bwa a na oota bwa Nibwaite a bon raroa nako ma te tabo are e bungiaki iai Iesu, ma a ataia bwa E bungiaki man kanikina ake a noori. Kaota am koaua bwa e ngae ngke ti aki noora bungiakin te Tia Kamaiu, te Tamnei ae Raoiroi e na buokira n ataia bwa karaki ibukina ake ni koroboki aika tabu a koaua.
Aia taeka burabeti a kakoroaki bukiia n taainako.
Te Uea e tuanga Nibwaai, “N [na]kaotia nakon te aonaaba bwa N na kakoroi bukin bwaai ni kabane ake I a tia n tua bwa a na taekinaki ni wiia au burabeti aika a tabu.” (3 Nibwaai 1:13).
Waaki ni Kakukurei aika a Kona ni Karaoaki
-
Kaoti tamnei ake a kaotia bwa e a tia te Atua n taetae rinanoia burabeti, n aron Noa (Bokin Tamnein te Euangkerio, nambwa. 7–8; taraa Karikanbwai 6–7) ao Tamuera te Reimwanaite (Bokin Tamnein te Euangkerio, nambwa. 81; taraa Ereman 14:1–7). Kaoiia ataei bwa a na tibwauai baike a atai ibukin karaki aikai.
-
Wareka nakoia ataei 3 Nibwaai 1:20, ao tibwaua am koaua bwa aia taeka burabeti a koro bukiia n taainako. Kaoiia ataei bwa a na ongora nakon te burabeti n te maungatabu ni kabuta ae i mwaira.
I kona n ira Iesu Kristo.
E taekinna Moomon, “Bon Ngai ana reirei Iesu Kristo.” Ko na kanga ni buokia ataei n taraia bwa ana reirei Iesu Kristo naba Ngaiia?
Waaki ni Kakukurei aika a Kona ni Karaoaki
-
Wareka 3 Nibwaai 5:13, ao kaoiia ataei bwa a na kaokioka te mwakoro n taeka are “Ngai bon ana reirei Iesu Kristo.” Reireinia bwa ana reirei Iesu Kristo e kataia n iriria. Tibwauai tabeua bwai ake e karaoi Moomon n riki n aron Iesu, n aron tataekinan ana taeka te Atua ao kawakinan ana tua nako te Atua (taraa 3 Nibwaai 5:13–18). Buokia ataei ni iangoi kawai ake a kona iai n riki bwa ana reirei Iesu.
-
N te mwakoro ni beeba, buokia ataei bwa a na katanea mwin baia ao ni koreia. Korei “Ngai bon ana reirei Iesu Kristo” n are te iterana, ao kaoiia bwa a na korea tamnein te bwai ae a kona ni karaoia n riki bwa ana reirei Iesu n iterana are teuana (tao ko na buokiia ni karekei aia iango). Bootaki anenea te kuna ae taekana iriran te Tia Kamaiu, n aron “I’m Trying to Be like Jesus” (Aia Boki n Anene Ataei, 78–79).
Reirei te Reirei: Ataei aika a Ikawai
Ana berita te Atua, aika a roko rinanoia Ana burabeti, a koro bukiia n taainako.
Te rongorongo n 3 Nibwaai 1:4–21 e kona ni kamatoa aia onimaki ataei bwa te Atua e kawakin Ana berita n taainako.
Waaki ni Kakukurei aika a Kona ni Karaoaki
-
Kaoiia ataei bwa a na kabotaua ana taetae ni burabeti Tamuera te Reimwanaite n Ereman 14:1–7 ma kakoroan nanona 3 Nibwaai 1:19–21. Kaota am koaua bwa ana berita te Atua ake a taekinaki rinanoia Ana burabeti a koro bukiia n taainako.
-
Wareware ma ataei n te rongorongo ae kuneaki n 3 Nibwaai 1:4–10. Titirakinia ataei bwa e na tera aia namakin ngke arona bwa temanna ngaiia te tia kakoaua n te tai anne. Kaoiia ataei bwa a na wareka nikiran te rongorongo n te kibu 11–15 ao n anga kawai ibukin kabwaninan te kibuntaeka aei: “Te reirei man te karaki aei bon …” Ti na kanga ni kaota ara onimaki iroun te Atua ngkana ti raraoma ke ti bwarannano?
-
Tibwaua te bwai teuana ae e a tia ni berita nakoira ara burabeti ae maiu. Tera ae ti kona ni karaoia ni kaota ara onimaki bwa ana taeka te burabeti e roko mairoun te Atua?
3 Nibwaai 2:11–12; 3:13–14, 24–26
Ti korakora ngkana ti ikotaki.
Nibwaite a ikotaki ibukin kamanoan maiuia. Ko na kanga ni buokia ataei n nooria bwa te ikotaki ma rao aika raoiroi e kona naba n anganiia te korakora n te tamnei?
Waaki ni Kakukurei aika a Kona ni Karaoaki
-
Warekii kibu aikai ma ataei, ao kaoiia bwa a na kakaei bukina ngkai a ikotaki Nibwaite ao kakabwaia ake a roko nakoia: 3 Nibwaai 2:11–12 ao 3:13–14, 24–26. Bukin tera e kakawaki bwa ti na “ikotaki” ni bong aikai n ara utu ao n te ekaretia? E na kanga te ikotaki ni kakorakoraira n te tamnei?
-
Kabongana te reirei ae kabonganai bwai ni kabotau n reirei bwa ti korakora riki n te ikotaki nakon te maenako. Te katoto, kaoiia ataei bwa a na kamwaotoua teuana te kai ao imwiina te bwabwati ni kai ke n raeuaka teuana te beeba ao imwina te bwabwati ni beeba. N te aro ra ae titebo ngaira ma taian kai ke te beeba? Ti na kanga ni kakorakoraira imarenara ngkana ti ikotaki n ara utu ke n te ekaretia?
-
Kamatataa bwa Iesu e ikotia Ana Aomata nako nanon te Ekaretia ni boong aikai rinanon te mwakuri ni mitinare (taraa 3 Nibwaai 5:24–26). Kaoa te mitinare ae bwanin ana tai ke te mitinare n te uoote bwa e na tibwaua te taneiai ae e kaotia bwa a kakorakoraaki aomata n ikotakia nako nanon te Ekaretia.
3 Nibwaai 4:30–33; 5:12–26; 6:14; 7:15–26
Ngai bon ana reirei Iesu Kristo.
Ko na kanga ni buokiia ataei n taraiia bwa bon ana reirei Iesu Kristo Ngaiia, n aron ae karaoia Moomon? (taraa 3 Nibwaai 5:13).
Waaki ni Kakukurei aika a Kona ni Karaoaki
-
Kaota tamnein Moomon (n aron Bokin Tamnein te Euangkerio, nambwa. 73). Kaoiia ataei bwa a na ikaruoruo n taekina ana taeka Moomon n 3 Nibwaai 5:13: “Ngai bon ana reirei Iesu Kristo.” Tera nanon te riki bwa ana reirei Iesu Kristo? (taraa RB 41:5).
-
TIbwaa te kiraati nakon kurubu aika uarereke, ao anganiia kurubu nako bwa ana wareka rongorongon temanna ana reirei Iesu: Reimwanaite ake a rairaki (taraa 3 Nibwaai 4:30–33; 6:14), Moomon (taraa 3 Nibwaai 5:12–26), ao Nibwaai (taraa 3 Nibwaai 7:15–26). N te aro ra ae aomata aikai ana reirei ni koaua Iesu Kristo? Tera ae ti kona ni karaoia n ira aia katoto?
Kaungaa te Kamatebwai n te Mweenga
Kaoiia ataei bwa a na iangoa te bwai ae a na karaoia n te wiiki aei n riki bwa ana reirei Kristo. Kaungaia bwa a na koreia ao n tibwaia ma aia utu.
Kanakoraoan Ara Anga reirei
Kaota te kibu. Rinea te kibu ae ko taku bwa e uaana ( ke kaoiia ataei bwa a na rinea teuana), ao katekea n am umwanreirei n te aro are a na nooria ataei n taainako. Ko kona ni katekea inanon wiiki aika a mwaiti n okiria tabeua te tai.