“Eberi 27–Meei 3. Motiaea 7-10: ‘Ni Korakoran te Uea,’” Nakomai, Iriirai—Ibukin te Moanrinan: Ana Boki Moomon 2020 (2020)
“Eberi 27–Meei 3. Motiaea 7-10,” Nakomai, Iriirai – Ibukin te Moanrinan: Ana Boki Moomon 2020
Minerva K. Teichert (1888-1976), Ammon imatan te Uea ae Rimwaai, 1949-1951, te oera iaon te mitionaite, 35 15/16 x 48 te inti. Brigham Young University Museum of Art, 1969.
Eberi 27–Meei 3
Motiaea 7–10
“Ni Korakoran te Uea”
Ma te tataromwaaka wareka Motiaea 7-10, iangoa te namakin are ko karekea. E na kanga te koaua ni mwakoro aikai ni buoka aron kainnanoia ataei ake ko reireiniia?
Korea Am Namakin
Kaungaa te Tibwatibwa
Kaungaia ataei bwa a na tibwaua te bwai are tao a ataia ibukin te bwai ae riki n te tai aei ni mwakoro aikai. Ko na bae ni kunea buokam inanon “Mwakoro 13: Tinebi” (Karaki man Ana Boki Moomon, 36–37, ke te witeo ae ae irekereke ma ngaia iaon ChurchofJesusChrist.org).
Reireia te Reirei: Ataei aika a Uarereke
E buokiia aomata te Atua inanon koroboki aika tabu, ao e kona ni buokai.
Ana botanaomata Rimwaai, ake a riki n tautoronaki irouia Reimwanaite, a kainnanoa te onimaki bwa e na buokiia te Atua, ngaia are e kauringiia Rimwaai n aron taai ngke te Atua e a tia ni buokiia Ana aomata.
Waaki ni kakukurei aika a kona ni karaoaki
-
Tuangiia ataei bwa a na tibwaua te tai are ngke a kainnanoa te buoka. Kabwarabwaraa bwa ana botanaomata te Uea ae Rimwaai a mena inanon te kaangaanga, ngaia are e tibwaua te karaki bwa a aonga ni buokaki aia onimaki. Wareka Motiaea 7:19 nakoia ataei, ao kaota tamneia natin Iteraera n rinanon Taari ae Uraura (taraa Mote Ngke e Karaurea Taari ae Uraura, ChurchofJesusChrist.org). Rinanoa te karaki aei ao te karaki iaon temanna, ao buokiia ataei bwa a na karaoa te kaotioti iaona (taraa mwakoro 17 ao 18 inanon Karaki man Te Otetemanti, ke te witeo ae irekereke ma ngaia iaon ChurchofJesusChrist.org). E kangaa ni buokiia aomata te Uea? Kaota koauana ae te Uea e kona naba ni buokira.
-
Wareka Motiaea 7:33 nakoia ataei, ao buokiia bwa a na mataata bwa tera ae e tuangiira te kibu aei bwa ti na karaoia ni karekea ana buoka te Uea. Buokiia ataei ni iangoi mwakuri ake a kona ni karaoaki ake a tei ibukin bwaai aikai, ao kaokioka te kibu n tain karaoan te mwakuri. Baikara bwaai aika ti kainnanoa buokara iai? Ti na kanga ni kaotia bwa ti kakoaua te Uea? Tibwaua te bwai ae ko a tia n rinanona ngke ko onimakina te Uea ao E buokiko.
-
Rinei tabeua taian kibu man “Karaki man Ana Boki Moomon” ke ”Ninikorian Nibwaai” (Aia Boki n Anene Ataei, 118-119, 12—121) n anene ma Ataei. Buokiia ni kinaa bwa e kanga te Uea ni buokiia aomata n Ana Boki Moomon. Tibwauai tabeua riki karaki man koroboki aika tabu are ko taku bwa e na buokiia ataei n reiakinna bwa a na kakoaua te Uea.
E a tia n anganiira te Atua burabeti, taan mamata, ao taan kaotioti.
Ko na kanga ni kabongana Motiaea 8:16-17 n reireniia ataei ibukiia burabeti ao tabeia ngkai taan mamata ngaiia?
Waaki ni kakukurei aika a Kona ni Karaoaki
-
Kaotia nakoia ataei bwa a na kanga n taui baia ieta nakon mataia n ae aongkoa a taratara n te kiraati ke te bwai ni kataratara. Wareka Motiaea 8:17, ao tuangiia ataei bwa a na kanimwa aia “bwai ni kataratara” ni katoa tai are a ongo te taeka ae te “tia mamata.” Kabwarabwaraa bwa te Uea e a tia n anganiira burabeti ao teuana tabeia burabeti bwa taan “mamata” ibukina bwa a kona n “noori” bwaai aika a na roko. Tibwauai tabeua katooto ni bwaai ake a tia burabeti n noori ao ni kaoki nakoira (ni ikotaki ma koroboki aika tabu), ke tibwaua te katooto ngke te burabeti e riki bwa te tia mamata (n aron 1 Nibwaai 11:20-21).
-
Karaoa mwanekan te wae i aon te beeba, ao korei tamnein bwaai ake a reireiniira burabeti i aoia. Katikui tamnein mwanekan te wae aikai n te kawai inanon te ruu, ao kabwarabwarai tamnei. Anganiia ataei temanna imwin temanna bwa a na riki n aroia burabeti ao ni kairiia ataei ake tabeman n iriira mwanekan te wae akanne.
-
Kaota te tamnei n te kabwarabwara n te wiiki aei n Nakomai, Iriirai—Ibukiia Aomata n Tatabemaniia ao Utu, ao tuangiia ataei bwa a na kabwarabwaraa te bwai ae a nooria. Kabwarabwaraa bwa te Burabeti Iotebwa Timiti bon te tia mamata. Te Uea e anganna te bwai ni mwakuri ae te Urim ao te Tammim ao te atibu ni mamata ni kabongana n raira Ana Boki Moomon.
-
Kaota te witeo ae e kimototo iaon te rongorongo man te maungatabu ae e a tibwa tia n nako mai iroun te Burabeti n te Ekaretia (ke kaota tamneina ao wareka te bwai are e reireiniira iai). Kaota am koaua bwa bon ngaia te burabeti, te tia mamata, ao te tia kaotioti.
Reirei te Reirei: Ataei aika a Ikawai
Motiaea 7:18–20, 33; 9:14–19; 10:6–10, 19–21
E buokiia aomata te Atua ake inanon koroboki aika a tabu, ao E kona ni buokai.
Tinebi ao ana botanaomata, ake a maeka n abaia Reimwanaite, a buakanaki irouia Reimwanaite ao a kainnanoa ana ibuobuoki te Atua. Tera ae a kona n reiakinna ataei man te karaki aio ibukin ana ibuobuoki te Atua nakoia natina?
Waaki ni kakukurei aika a Kona ni karaoaki
-
Kamaenakoia ataei inanon teniua te kurubu, ao kaoiia kurubu bwa a na kamatebwaia teuana te karaki man koroboki aika tabu: kain Iteraera ngke a rinanon Tari ae e Uraura (taraa te Te Otinako 14:10-14, 21-31), ana utu Riaai n rianna inanon te rereua (taraa 1 Nibwaai 16:9-16; 17:1-6; 17:1–6), ao ana botanaomata Tinebi ngke a kainaomataaki mai irouia Reimwanaite (taraa Motiaea 9:14-19; 10:6–10, 19–21). A kanga aomata inanon karaki aikai ni kaota ae iai aia onimaki iroun te Atua? E kanga te Atua ni buokiia? E kanga ni buokiira ngkana ti onimakinna?
-
Kaoiia teniman ataei bwa a na korea te kakatai ke te kaanganga are a kaitarai iaon te burakibooti. Tuanga te ataei bwa e na wareka Motiaea 7:33, ao kaungaia ataei ake tabeman bwa a na kamaunai taian kakatai ke kaangaanga ni katoaa te tai are a ongo te bwai teuana are a kona ni karaoia ni karekea ana ibuobuoki te Uea. E kanga onimakinan te Uea ni buokiira bwa ti na tokanikai iaon ara kaangaanga?
Te Atua e katauraoiia burabeti, taan mamata, ao taan kaotioti ibukin kabwaiaia aomata.
Ti kamatoaia te Moan Beretitentii ao Abotoro ake Tengaun ma Uoman bwa burabeti, taan mamata, ao taan kaotioti. Ko na kanga n reireiniia ataei taekan kakawakin te burabeti?
Waaki ni kakukurei aika a Kona ni karaoaki
-
Rinei tabeua taeka aika a kakawaki man Motiaea 8:12-19, ao korei iaon te burakibooti. Kaoa te ataei bwa e na wareki kiibu aikai, ao tuangiia ataei ake tabeman bwa a na katei baia ngkana a ongo tatabeua taeka ake a koreaki iaon te burakibooti. Katoka te wareware ao marooroakina te taeka ma kaain te kiraati.
-
Tuangiia ataei bwa a na rinanoa Motiaea 8:16-18 n reiakinna bwa tera te tia mamata. Korea te taeka aio iaon te burakibooti: Te tia mamata bon titebo ma . Buokiia ataei bwa a na iangoi kawai are a na kabwanina iai te kibuntaeka ni kabwarabwaraa bwa bukin tera te tia mamata bon te kakabwaia nakoira—te katooto, te tia mamata bon titebo ma te tia tararua n te kamaiu, are e kauringiira man te kabuanibwai.
-
Rinea te mwakoro n taeka man Motiaea 8:16–17, ao koreia iaon te burakibooti, onoi mwiin taian taeka ma kanikina aika a karioaki. Anganiia ataei te beeba are e koreaki ni karinanaki iai aran taian kanikina ake a karioaki ma taeka ake a tei ibukiia, ao kariaia bwa a na kakaea nanona ke n “raira” te mwakoro n taeka n aron are a karaoia taan mamata. Tera riki tabeua kawai are burabeti, taan mamata, ao taan kaotioti bon “te kabwaia ae korakora” nakoira? (Motiaea 8:18).
Ngke I mamaara, e kakorakoraai te Uea.
Ngkana a rootaki ataei n te kaangaanga, n tabetai a na namakina te mamaara ao te bwarannano. Kabongana rongorongoia ana botanaomata Tinebi n reireiniia ataei bwa a na kona ni karekea te korakora mai iroun te Uea.
Waaki ni kakukurei aika a Kona ni karaoaki
-
Tuangiia ataei bwa a na tibwauai kawai ake a kona n riki iai ni korakora n rabwataia. Tera ae e nanonaki ni karekean korakoran te aomata”?(taraa Motiaea 10:11). Tera ae e nanonaki ni karekean “korakoran te Uea”? (taraa Motiaea 9:17–18; 10:10). E kanga n reke iroura korakoran te Uea?
-
Kaoiia ataei bwa a na korea tamnein te aomata temanna are a namakinna bwa iai irouna korakoran te Uea ao n tibwauaia bwa bukin tera a korea tamnein te aomata anne.
Kaungaa te Kamatebwai n te Mweenga
Kaoiia ataei bwa a na tibwauaia ma aia utu te karaki man koroboki aika a tabu te bwai are e kaunga nanoia bwa a na “kawenea [aia] onimaki iroun te Atua” (Motiaea 7:19).
Kanakoraoan Ara Anga reirei
Anga titiraki aika a kaunga te nano. Anga titiraki are e na kaoiia ataei ni tibwauai aia koaua ni koauan te euangkerio. Te katooto, ngkana ko maroroakina te burabeti, ko kona n tuangiia ataei bwa a na tibwauaia bwa e kanga te burabeti n tia ni kakabwaiaia.