Li jaljookil ru aatin chirix lix toonal li che’ olivo, xb’aan laj Brad Teare

16–22 marzo

Jakob 5–7

Li Qaawa’ qochb’een nak’anjelak

Tzol, k’oxla sa’ aach’ool, ut tijon re xnawb’al chan ru taatzoleb’ li kok’al chi chaab’il rik’ineb’ li yaal neke’tawman sa’ Jakob 5─7. Tz’iib’a a’ yaal li na’leb’ taak’ul.

Xtz’iib’ankil li nakak’oxla

Xkanab’ankileb’ chi wotzok

Re xtikib’ankil xtz’ilb’al rix li esil neke’tawman sa’ Jakob 5─7, kanab’eb’ li kok’al chi aatinak chirix k’a’ru natenq’ank reheb’ re sa’ lix yu’ameb’ chireek’ankil lix rahom li qaChoxahil Yuwa’ ut li Jesukristo. Chan ru naqak’ut li qarahom choq’ reheb’ li qas qiitz’in?

Xk’utb’al li tzol’leb’: Kok’al toj ka’ch’ineb’ xyu’am

Jakob 5

Eb’ li misioneer neke’k’anjelak chiruheb’ li ralal xk’ajol li qaChoxahil Yuwa’.

K’oxla chan ru naru nakawotz li jaljookil ru aatin reheb’ lix toonal li che’ olivo rik’ineb’ li kok’al re naq te’xtaw ru.

Kok’ k’anjel naru chi b’aanumank

• K’ut xjalam-uuch jun li che’, malaj elenqex chi b’eek chirix li kapiiy re rilb’al jun li che’, ut jultikaheb’ wi’chik sa’ junpaat li na’leb’ re li jaljookil ru aatin reheb’ lix toonal li che’ olivo li natawman sa’ Jakob 5. Qayehaq: li Qaawa’ re li awimq (li naru nareetali li Jesus) kik’anjelak chi kaw re xk’aak’alenkil li che’ olivo (li naru nareetaliheb’ li kristiaan sa’ li ruchich’och’) xb’aan naq jwal aajeleb’ ru choq’ re a’an. Kixb’oqeb’ aj k’anjel (li naru neke’reetali li misioneer) re tenq’ank chixk’aak’alenkileb’ li che’. Sik’ ru junaq li raqal malaj wiib’ sa’ Jakob 5 re rilb’al ru rik’ineb’ li kok’al (jo’eb’ li raqal 71─72).

• Patz’ reheb’ li kok’al ma neke’xnaw ru anihaq li kiwulak chaq sa’ xmision, malaj aatinan chirix anihaq nakanaw ru laa’at. Tenq’aheb’ li kok’al chixtawb’aleb’ sa’ jun reetalil ch’och’ li na’ajej b’ar ke’k’anjelak li misioneer a’an malaj b’ar toj yookeb’ chi k’anjelak. Ch’olob’ naq laj Jakob kixjuntaq’eeta li ruchich’och’ rik’in jun ch’uut li che’ olivo. Eb’ li che’ chanchaneb’ li kristiaan sa’ li ruchich’och’, ut xk’aak’alenkileb’ li che’ a’an, a’an li neke’xb’aanu li misioneer rik’ineb’ li ralal xk’ajol li Dios. K’a’ru neke’xb’aanu li misioneer re rosob’tesinkileb’ li ralal xk’ajol li qaChoxahil Yuwa’? Sik’ junjunqeb’ xsumenkil li patz’om a’an sa’ junaq li b’ich jo’ “B’oqb’ilo choq’ xmoos” (B’ichleb’aal choq’ reheb’ li Kok’al, 94─95). Chan ru naru nokowan jo’ misioneer?

Lix jultikankil li evangelio a’an jun reheb’ chan ru naru neke’qatenq’a li ralal xk’ajol li Dios chi q’ajk rik’in a’an.

Jakob 6:5

Lin Choxahil Yuwa’ nikinixra.

Chan ru naru nakak’ut chiruheb’ li kok’al sa’ laa tzoleb’aal naq li Dios naxraheb’ li ralal xk’ajol ut naq naxye’ “li ruq’ aj uxtaan” choq’ reheb’ a’an?

Kok’ k’anjel naru chi b’aanumank

• Kanab’eb’ li kok’al chixq’alunkileb’ rib’ chirib’ileb’ rib’. Chan ru naqeek’a naq anihaq li nokoxra naxk’e jun qaq’alunkil? Il ru Jakob 6:5 rik’ineb’ li kok’al ut ch’olob’ chiruheb’ naq eb’ li ch’ol aatin “Li Dios najilok eerik’in” ut “ye’b’il eere li ruq’ aj uxtaan” neke’xk’ut naq li qaChoxahil Yuwa’ nokoxra ut naraj naq tooq’ajq rik’in sa’ jun kutan.

• B’ichahomaq sa’ komonil jun li b’ich li na’aatinak chirix li rahok, jo’ “Ninnaw naq raab’ilin” (B’ichleb’aal choq’ reheb’ li Kok’al, 42─43). Kanab’eb’ li kok’al chixyeeb’al k’a’ru natenq’ank reheb’ chireek’ankil lix rahom li Kolonel.

Jakob 7:1–23

Naru ninkol rix li k’a’ru ninnaw naq yaal.

Laj Jakob a’an jun chaab’il eetalil re anihaq li kitenq’aak xb’aan lix nawom xch’ool chixkolb’al rix li yaal chiru li ka’pak’alil.

Kok’ k’anjel naru chi b’aanumank

• Seraq’i li esil chirix laj Jakob ut laj Xerem (Jakob 7:1─23) re naq eb’ li kok’al te’xtaw ru. Naru nakawoksi “Ch’ol  10: Laj Jakob ut laj Xerem” (Eb’ li Esilal sa’ lix Hu laj Mormon, 27─29, malaj li video sa’ ChurchofJesusChrist.org). Chirix a’an seraq’i wi’chik li esil, a’b’an taakanab’eb’ chik li kok’al chatenq’ankil chixseraq’inkil. Patz’ reheb’ k’a’ru neke’xtzol rik’in laj Jakob. Chan ru naru naqataaqe lix b’aanuhom a’an?

• Kanab’eb’ li kok’al chixb’ichankil jun li b’ich li na’aatinak chirix xsik’b’al ru li us, jo’ “Sik’ xb’aanunkil li tiikilal” malaj “Saqaq aawu” (B’ichleb’aal choq’ reheb’ li Kok’al, 80, 81). Ye reheb’ naq te’xaqliiq rajlal sut naq te’xb’icha li aatin tiikilal malaj saqaq aawu.

Xk’utb’al li tzol’leb’: Kok’al ak ninqeb’

Jakob 5

Li Qaawa’ naxk’oxlaheb’ lix tenamit.

Laj Jakob kixwotz li jaljookil ru aatin chirix lix toonal li che’ olivo re xtenq’ankileb’ lix tenamit chi chalk rik’in li Kristo. Naru ajwi’ na’uxman li ajom a’an rik’ineb’ li kok’al nakatzoleb’.

Kok’ k’anjel naru chi b’aanumank

• Il ru ut ch’olob’eb’ chiruheb’ li kok’al li raqal aajeleb’ ru re xk’osb’al ru li jaljookil ru aatin chirixeb’ lix toonal li che’ olivo, jo’ Jakob 5: 3─4, 28─29, 47, ut 70─72, ut kanab’eb’ li kok’al chixyiib’ankileb’ jalam-uuch reheb’ li k’a’ru neke’xch’olob’ li raqal a’an. K’a’ru naqatzol sa’eb’ li raqal a’an chirix li nareek’a li Qaawa’ choq’ re lix tenamit? Kanab’eb’ li kok’al chixk’oxlankil naq yookeb’ chixk’aak’alenkil jun li che’ olivo naq laa’at yooqat chixk’osb’al ruheb’ li raqal 61─71 (naru neke’xk’utb’esi naq yookeb’ chi pikok, malaj taq’resink, ut wan chik xkomon). Kanab’eb’ junjunqeb’ li kok’al chirilb’al ru Jakob 6:11, 41, 47 ut 72 re xsik’b’al li naxk’ut chan ru naq jwal aajel ru li che’ olivo choq’ re li Qaawa’ sa’ li awimq (Jesukristo). K’a’ru naxb’aanu li Kolonel re xk’utb’al naq aajel qu choq’ re? Li video “La viña del Antiguo Testamento” (ChurchofJesusChrist.org) naru nakawoksi re li ch’ina k’anjel a’in.

• Tz’iib’aheb’ junjunq li eetalil wankeb’ sa’ Jakob 5 chiru li pizarron, jo’ li awimq, li Qaawa’ re li awimq, li moos, ut eb’ li che’ olivo. Chirix a’an yiib’ chi jek’inb’il ru jun chik xtusulaleb’ li k’a’aq re ru li neke’reetali, jo’ li ruchich’och’, li Kolonel, eb’ laj jolominel re li Iglees malaj eb’ li misioneer, ut lix tenamit li Dios. Ilomaq sa’ komonil junjunq raqal sa’ Jakob 5 li te’aatinaq chirixeb’ li eetalil a’an ut tenq’aheb’ li kok’al chixk’ulinkil rib’eb’ li eetalil rik’in li naraj naxye rik’ineb’ juch’ (che’ilmanq, jo’ eetalil li raqal 3─4, 28─29, 47, 70─72).

Jakob 6:4–5

Li qaChoxahil Yuwa’ nikinixra ut tixkuy lin maak naq tinjal ink’a’uxl.

Aajel ru xtenq’ankileb’ li kok’al nakatzoleb’ chixtawb’al ru naq neke’rahe’ xb’aan li Dios ut naq junelik tixkuy lix maakeb’ naq neke’xjal xk’a’uxl chi anchal xch’ooleb’.

Kok’ k’anjel naru chi b’aanumank

• Yiib’ jun li kaaxukuut chiru li pizarron wiib’ jachal ru, rik’ineb’ li aatin qaChoxahil Yuwa’ ut Laa’o. Ilomaq ru sa’ komonil Jakob 6:4─5 ut kanab’eb’ lix yijach li tzoleb’aal chixsik’b’aleb’ ch’ol aatin neke’k’anjelak rik’in li Dios, ut li yijach chik te’xsik’ ch’ol aatin neke’k’anjelak qik’in laa’o. Tz’iib’a li k’a’ru te’xtaw sa’ li yijach taawanq wi’. Tenq’aheb’ chixtawb’al ru li aatin ink’a’ neke’xtaw ru.

• Wotz li esil kixseraq’i li Elder Allen D. Haynie chirix chan ru naq kixtz’ajni rib’ sa’ jun li jul, sa’ li raatin “Xjultikankil ani xqakanab’ wi’ qib’ ” (Jolomil ch’utub’aj-ib’ re octubre 2015). K’a’ru naxk’ut chiqu li esil a’an chirix li k’a’ru tento taqab’aanu re tookole’q sa’ li rawa’b’ejihom li Dios? K’a’ru chik naqatzol sa’ Jakob 6:4─5?

Jakob 7:1–23

Naru ninkol rix li k’a’ru ninnaw naq yaal.

Chan ru naru nakamusiq’aheb’ li kok’al chixkolb’al rix li yaal jo’ kixb’aanu laj Jakob?

Kok’ k’anjel naru chi b’aanumank

• Kanab’eb’ li kok’al chixk’utb’esinkil naq kiseraq’ik laj Jakob rik’in laj Xerem, rik’in roksinkil Jakob 7:1─23 jo’ tenq’. Malaj k’ut li video “Jacob y Sherem” (ChurchofJesusChrist.org). Kanab’eb’ li kok’al chi aatinak chirix b’ar wan re li esil jwal nawulak chiruheb’. Chan ru naq laj Jakob kixkol rix li k’a’ru naxnaw naq us? Kanab’eb’ li kok’al chixwotzb’al xnumsihomeb’ b’ar wi’ xe’xkol rix li k’a’ru us, malaj wotz laa we laa’at.

• Kanab’eb’ li kok’al chixb’ichankil jun li b’ich li na’aatinak chirix xsik’b’al ru li us, jo’ “Sik’ xb’aanunkil li tiikilal” malaj “Saqaq aawu” (B’ichleb’aal choq’ reheb’ li Kok’al, 80, 81). K’uub’eb’ sa’ kok’ ch’uut ut kanab’eb’ chixyiib’ankil jun li eetalil malaj jun jalam-uuch li taareetali li neke’xkol rix malaj li neke’xpaab’.

Xb’oqb’aleb’ chi tzolok sa’ kab’l

Kanab’eb’ li kok’al chixk’oxlankil chan ru naru neke’xtenq’a lix junkab’al chireek’ankil lix rahom li Kolonel—qayehaq, naq neke’xch’olob’ chan ru naq li Qaawa’ kixkol rix li rawimq re li che’ olivo.

Xchaab’ilob’resinkil li qak’utum

Eb’ li kok’al nawulak chiruheb’ xwotzb’al li k’a’ru yookeb’ chixtzolb’al. Us ta toj kok’eb’, naru neke’xkawob’resiheb’ li komon sa’ lix junkab’aleb’. Waklesiheb’ xch’ool chixwotzb’al rik’ineb’ lix junkab’al li neke’xtzol sa’ li Tzoleb’aal reheb’ li Kok’al. (Chi’ilmanq Li k’utuk jo’ li Kolonel, 30.)