Si Eliseo nagpakita sa sulugoon sa mga karo nga kalayo

Paghulagway kang Eliseo nga nagpakita sa iyang sulugoon sa mga karo sa kalayo, © Review & Herald Publishing/gilisensyahan gikan sa goodsalt.com

Hulyo 4–10

2 Mga Hari 2–7

“Adunay usa ka Manalagna sa Israel”

Samtang magbasa ka sa mga kasulatan, ang Espiritu Santo mahimong modala og pihong mga pulong o mga tudling nganha sa imong pagtagad. Ikonsiderar ang pagsulat nganong kadto nga mga tudling makahuluganon kanimo.

Irekord ang Imong mga Impresyon

Ang nag-unang misyon sa usa ka propeta mao ang pagtudlo ug pagpamatuod mahitungod sa Manluluwas nga si Jesukristo. Hinoon, ang atong rekord bahin ni propeta Eliseo, wala kaayo maglakip sa iyang pagtudlo ug pagpamatuod. Ang nalakip diha sa rekord mao ang mga milagro nga gihimo ni Eliseo, lakip ang pagbuhi sa usa ka bata gikan sa patay (tan-awa sa 2 Mga Hari 4:18–37), pagpakaon og panon sa katawhan gamit ang diyutay ra nga pagkaon (tan-awa sa 2 Mga Hari 4:42–44), ug pag-ayo sa usa ka sanlahon (tan-awa sa 2 Mga Hari 5:1–14). Mao nga samtang wala kitay mga pulong ni Eliseo nga nagsaksi mahitungod kang Kristo, sa tibuok nga pagpangalagad ni Eliseo, aduna kitay gamhanang mga pagpakita nga makahatag og kinabuhi, makaalima, ug makaayo nga gahom sa Ginoo. Ang ingon nga mga pagpakita mas daghan sa atong kinabuhi kay sa atong maamgohan usahay. Aron makita kini, kinahanglang kitang magtinguha sa milagro nga gitinguha ni Eliseo sa dihang nag-ampo siya alang sa iyang nahadlok nga batan-ong sulugoon, “Ginoo, ako nagaampo kanimo, bukha ang iyang mga mata, aron siya makakita” (2 Mga Hari 6:17).

Alang sa dugang nga impormasyon mahitungod sa 2 Mga Hari, tan-awa ang “Hari,Mga” diha sa Giya ngadto sa mga Kasulatan.

icon sa personal nga pagtuon

Mga Ideya alang sa Personal nga Pagtuon sa Kasulatan

2 Mga Hari 2–6

Ang Dios makahimo og mga milagro sa akong kinabuhi.

Ang mga milagro kanunay nga makatabang kanato sa pagbuntog sa mga kalisdanan sa mortalidad—sa panahon ni Eliseo, ang usa ka yuta nga walay abot nagkinahanglan og lunsay nga tubig ug ang usa ka wasay nga nawala kinahanglang makit-an (tan-awa sa 2 Mga Hari 2:19–22; 6:4–7). Apan ang mga milagro mopabaling usab sa atong mga kasingkasing ngadto sa Ginoo ug motudlo kanato og espirituhanong mga leksyon. Samtang magbasa ka sa 2 Mga Hari 2–6, ikonsiderar ang paghimo og lista sa mga milagro nga imong makit-an, ug pamalandongi ang espirituhanong mga leksyon nga imong makat-onan gikan sa matag usa. Unsa ang gitudlo niini nga mga milagro kanimo mahitungod sa Ginoo ug sa Iyang mabuhat diha sa imong kinabuhi?

Tan-awa usab sa 2 Nephi 26:12–13; 27:23; Mormon 9:7–21; Moroni 7:35–37; Donald L. Hallstrom, “Nahunong ba ang Adlaw sa mga Milagro?” Liahona, Nob. 2017, 88–90.

2 Mga Hari 4:8–17; 7:1–16

Ang mga pulong sa Ginoo pinaagi sa mga propeta matuman.

Sumala sa narekord diha sa 2 Mga Hari 4:8–17; 7:1–16, ang Ginoo midasig kang Eliseo sa pagpanagna sa mga butang nga moabot—mga butang nga daw, gikan sa panglantaw sa uban, walay kalagmitan nga mahitabo. Samtang magbasa ka niini nga mga bersikulo, hunahunaa kon unsaon nimo sa pagtubag sa pulong sa Ginoo nga gipaagi sa Iyang mga propeta karon. Unsa nga mga pagtulun-an, mga panagna, o mga saad ang imong nadunggan gikan sa buhi nga mga propeta? Unsa ang imong gibuhat aron sa paglihok uban sa pagtuo kalabot niadto nga mga saad?

Tan-awa usab sa 3 Nephi 29:6; Doktrina ug mga Pakigsaad 1:37–38.

2 Mga Hari 5

Kon ako mapainubsanon ug masulundon, si Jesukristo makaayo kanako.

Usahay mas sayon ang pagkakita og personal nga kahulugan diha sa mga kasulatan kon imong itandi ang pisikal nga mga butang sa usa ka istorya ngadto sa espirituhanong mga butang. Pananglitan, samtang magbasa sa 2 Mga Hari 5, mahimo nimong itandi ang sanla ni Naaman ngadto sa usa ka espirituhanong hagit nga imong giatubang. Sama ni Naaman, tingali naglaom ka nga ang Ginoo “[mobuhat og] dakong butang” (bersikulo 13) sa pagtabang kanimo. Unsa ang gitudlo kanimo sa kasinatian ni Naaman? Sa imong kinabuhi, unsa kaha ang katumbas sa pagsunod sa yanong tambag nga “panghimasa, ug magmahinlo ka”?

Timan-i kon sa unsang paagi ang kasinatian ni Naaman nakaapekto sa iyang pagtuo sa Dios sa Israel (tan-awa sa bersikulo 15). Unsa nga mga kasinatian ang nakapalig-on sa imong pagtuo sa Dios?

Tan-awa usab sa Lucas 4:27; 1 Pedro 5:5–7; Alma 37:3–7; Ether 12:27; L. Whitney Clayton, “Unsa ganiy Iyang Isugo Kaninyo, Buhata Ninyo,” Liahona, Mayo 2017, 97–99.

2 Mga Hari 6:8–23

“Sila nga ania uban kanato labing daghan kay kanila nga anaa kanila.”

Mibati ka ba sukad nga nalupigan sa gidaghanon ug nahadlok, naghunahuna, sama sa batan-ong sulugoon ni Eliseo, “Unsaon nato paghimo?” (tan-awa sa 2 Mga Hari 6:8–23). Unsa ang nakadasig kanimo mahitungod sa tubag ni Eliseo? Sa unsang paagi kini nga istorya makausab sa paagi sa imong paghunahuna ug pagbati mahitungod sa imong mga pagsulay, imong mga responsibilidad, o imong mga paningkamot sa pagsunod sa ebanghelyo?

Samtang mamalandong ka, hunahunaa ang mga pulong ni Presidente Henry B. Eyring: “Sama niana nga sulugoon ni Eliseo, adunay mas daghan pa nga nag-uban kaninyo kay sa niadtong inyong makita nga mibatok kaninyo. Ang pipila kinsa nag-uban kaninyo mahimo nga dili makita sa inyong mortal nga mga mata. Ang Ginoo mopaluyo kaninyo ug usahay motawag sa uban aron motabang kaninyo” (“O Kamo Nga Anaa sa Pag-alagad,” Liahona, Nob. 2008, 59).

Tan-awa usab sa Salmo 121; Doktrina ug mga Pakigsaad 84:88.

icon sa pamilya nga pagtuon

Mga Ideya alang sa Pamilya nga Pagtuon sa Kasulatan ug Family Home Evening

2 Mga Hari 2:1–14.Hunahunaa ang mga tawo kinsa nakakita ni Eliseo nga “[mi]kuha” sa manto ni Elias (o kupo—usa ka simbolo sa iyang propetikanhong tawag). Sa unsang paagi kaha kini nakaapekto sa paagi nga mitubag sila sa pagpangalagad ni Eliseo? (Tan-awa usab sa 1 Mga Hari 19:19.) Tingali ang mga sakop sa pamilya mahimong magpuli-puli sa pagsul-ob sa “manto” ug sa pagpamatuod sa mga paagi nga ilang nakita ang Ginoo nga misuporta ug milig-on niadtong gitawag sa pagserbisyo diha sa Iyang Simbahan.

2 Mga Hari 4.Mahimo nimong dapiton ang mga sakop sa pamilya sa pagbasa mahitungod sa usa sa mga milagro diha sa 2 Mga Hari 4 (tan-awa sa mga bersikulo 1–7, 14–17, 32–35, 38–41, 42–44) ug sa pagsulat og timailhan aron sa pagtabang sa ubang mga sakop sa pamilya sa pagtag-an kon unsa nga milagro ang iyang gihulagway. Unsa ang atong makat-unan mahitungod sa Ginoo ug sa Iyang mga milagro gikan niini nga kapitulo? Unsa nga mga milagro—dako o gamay—ang atong nakita sa atong mga kinabuhi?

2 Mga Hari 5:1–15.Samtang magbasa ka niini nga mga bersikulo ug mamalandong sa yanong butang nga gipabuhat kang Naaman, hunahunaa ang yanong mga butang nga gihangyo sa atong propeta nga atong buhaton. Sa unsang paagi nga mas maayong masunod sa atong pamilya ang iyang tambag?

Ang inyong pamilya mahimo usab nga mobasa sa “Ang Propeta Eliseo: Tulo ka mga Milagro [Ang Ikatulo nga Milagro]” (sa Mga Istorya sa Daang Tugon).

2 Mga Hari 5:20–27.Sa unsang paagi si Giesi nakabenepisyo sa pagbasa sa “Pagkamatinuoron ug Kaligdong” sa Alang sa Kalig-on sa mga Kabatan-onan? (pahina 19). Sa unsang paagi ang pagkadili matinuoron makadaot kanato? Sa unsang paagi kita mapanalanginan sa pagkahimong matinuoron?

2 Mga Hari 6:13–17.Ang mga sakop sa pamilya tingali malingaw sa pagdrowing og hulagway sa kasinatian ni Eliseo ug sa iyang sulugoon nga gihulagway niini nga mga bersikulo. Sa unsang paagi kini nga mga bersikulo makatabang kanato kon kita mobati nga nag-inusara o nabug-atan?

Alang sa dugang nga mga ideya sa pagtudlo sa mga bata, tan-awa sa latid niining semanaha sa Dali, Sunod Kanako—Alang sa Primary.

Gisugyot nga awit: “Pinalangga nga mga Anak, ang Dios duol Kaninyo,” Mga Himno, nu. 50.

Pagpalambo sa Atong Pagtudlo

Iawhag ang mga pagpangutana. Ang mga pangutana gikan sa mga bata usa ka timailhan nga andam sila nga magkat-on. Kon wala ka mahibalo sa mga tubag sa ilang mga pangutana, pangitaa ang mga tubag uban nila. (Tan-awa sa Pagtudlo Sumala sa Pamaagi sa Manluluwas, 25–26.)

Si Naaman nga nanghimasa sa suba

Paghulagway ni Naaman nga naayo sa sanla, ni Paul Mann