“Hunyo 27–Hulyo 3. 1 Mga Hari 17–19: “Kon ang Ginoo Dios man, Sumunod Kamo Kaniya,’” Dali, Sunod Kanako—Alang sa mga Indibidwal ug mga Pamilya: Daang Tugon 2022 (2021)
“Hunyo 27–Hulyo 3. 1 Mga Hari 17–19,” Dali, Sunod Kanako—Alang sa mga Indibidwal ug mga Pamilya: 2022
Elijah Contends against the Priests of Baal [Si Elias Nakigtigi sa mga Pari ni Baal], ni Jerry Harston
Hunyo 27–Hulyo 3
1 Mga Hari 17–19
“Kon ang Ginoo Dios man, Sumunod Kamo Kaniya”
Kon magbasa ka sa mga kasulatan, nagpakita ka og pagtuo, nga nag-andam sa imong kasingkasing ug hunahuna nga makadungog sa “malinawon nga diyutayng tingog” sa Espiritu (1 Mga Hari 19:12).
Irekord ang Imong mga Impresyon
Ang balay ni Israel nagkagubot. Ang panaghiusa ug kalamboan nga nakab-ot ubos ni David ug Salomon dugay nang nawala, ug ang relasyon sa pakigsaad sa nasod ngadto sa Ginoo, alang sa daghang tawo, usa ka dugay na nga panumdoman. Ang Gingharian sa Israel nabahin, diin ang napulo ka tribo miporma sa Amihanang Gingharian sa Israel ug ang duha ka tribo miporma sa Habagatang Gingharian sa Juda. Ang duha ka gingharian dili lig-on sa espirituhanong paagi, gipangulohan og mga hari kinsa misupak sa ilang mga pakigsaad sa Ginoo ug miimpluwensya sa uban sa pagbuhat usab sa ingon (tan-awa sa 1 Mga Hari 11–16). Apan ang apostasiya hilabihan ka grabe sa Amihanang Gingharian, diin si Hari Achab miawhag sa Israel sa pagsimba sa mini nga dios-dios nga si Baal.
Dinhi niini nga sitwasyon nga si propeta Elias gitawag sa pagsangyaw. Ang asoy sa iyang pagpangalagad nagklaro nga ang personal nga pagtuo diha sa Ginoo mahimong molambo taliwala sa mga matarong bisan sa usa ka daotan nga palibot. Usahay ang Ginoo motubag sa ingon nga pagtuo pinaagi sa impresibo, dayag nga mga milagro, sama sa kalayo nga mahulog gikan sa langit. Apan mohimo usab Siya og hilom, pribado nga mga milagro, sama sa pagtubag sa personal nga mga panginahanglan sa usa ka matinud-anon nga biyuda ug sa iyang anak. Ug kasagaran ang Iyang mga milagro alang ra gayod sa indibidwal nga ikaw lamang ang nahibalo niini—sama pananglit, kon ang Ginoo mopadayag sa Iyang kaugalingon ug sa Iyang kabubut-on pinaagi sa “malinawon nga diyutayng tingog” (1 Mga Hari 19:12).
Alang sa dugang pa mahitungod ni Elias, tan-awa ang “Elias” diha sa Giya ngadto sa mga Kasulatan.
Mga Ideya alang sa Personal nga Pagtuon sa Kasulatan
Ang usa ka pagdapit sa pagsakripisyo maoy usa ka oportunidad sa pagpakita og pagtuo.
Sa sinugdanan lisod tingali sabton nganong gihangyo ni propeta Elias ang biyuda sa Sarepta sa paghatag kaniya og pagkaon ug tubig sa dili pa mokaon ang biyuda ug ang iyang gigutom nga anak. Apan ang hangyo ni Elias mahimo usab nga tan-awon nga usa ka panalangin alang niining gamay nga pamilya. Nagkinahanglan sila sa mga panalangin sa Ginoo, ug ang pagsakripisyo kanunay nga magdala og mga panalangin—lakip ang panalangin sa mas lig-on nga pagtuo.
Samtang magbasa ka niini nga istorya, ibutang ang imong kaugalingon sa lugar niining talagsaong biyuda. Unsa ang nagustohan nimo mahitungod kaniya? Ikonsiderar ang imong mga oportunidad sa pagpakita og pagtuo—lakip ang mga oportunidad sa pagsakripisyo. Sa unsang paagi nga mahimo ka nga mas sama niini nga biyuda?
Tan-awa usab sa Mateo 6:25–33; Lucas 4:24–26; Lynn G. Robbins, “Ikapulo—Usa ka Sugo Bisan Pa Gani sa mga Pobre,” Liahona, Mayo 2005, 34–36.
“Kon ang Ginoo Dios man, sumunod kamo kaniya.”
Ang mga Israelihanon tingali mibati nga aduna silay maayong mga rason sa pagsimba kang Baal bisan pa sa sugo sa Ginoo nga, “Dili ka magbaton ug lain nga mga dios sa atubangan ko” (Exodo 20:3). Si Baal nailhan isip ang dios sa mga bagyo ug ulan, ug human sa tulo ka tuig nga hulaw, nanginahanglan kaayo sila og bagyo. Ug ang pagsimba kang Baal gidawat sa katilingban ug giduso sa hari ug rayna. Samtang magbasa ka sa 1 Mga Hari 18, ikonsiderar ang bisan unsang sitwasyon sa imong kinabuhi nga makumpara ngadto sa sitwasyon nga nahimutangan sa mga Israelihanon. Nakaplagan ba nimo ang imong kaugalingon sukad nga nagduhaduha sa pagsunod sa Ginoo tungod kay ang mga alternatibo daw resonable ug mapugsanon? (tan-awa sa 1 Mga Hari 18:21). Sa mga panghitabo nga makita niini nga kapitulo, unsa kaha ang gustong itudlo sa Ginoo sa mga tawo mahitungod Kaniya ug mahitungod ni Baal? Unsa nga mga kasinatian ang nagtudlo kanimo og susama nga mga kamatuoran?
Makapaikag nga timan-an ang mga butang nga gisulti ug gibuhat ni Elias dinhi niini nga kapitulo nga nagpakita sa iyang pagtuo diha sa Ginoo. Unsa ang imong nakat-unan gikan ni Elias mahitungod sa pagtuo?
Tan-awa usab sa Josue 24:15; 2 Nephi 2:26–28; D. Todd Christofferson, “Pagpili ug Pasalig” (tibuok kalibutan nga debosyonal alang sa mga young adult, Ene. 12, 2020), ChurchofJesusChrist.org.
Usa ka simbolikanhong paghulagway sa 1 Mga Hari 19:11–12. The Prophet [Ang Propeta], © Robert Booth Charles/Bridgeman Images
Ang Ginoo sa kasagaran mamulong sa hinay, yano nga mga paagi.
Sa dihang nakadungog si Rayna Jezabel sa nahitabo sa iyang mga pari didto sa Bukid sa Carmelo, wala siya makabig—nasuko siya. Nahadlok alang sa iyang kinabuhi, si Elias milayas ngadto sa kamingawan ug mitago sa usa ka langob. Didto, nanglimbasog sa kamingaw ug kawalay kadasig, aduna siyay kasinatian sa Ginoo nga lahi kaayo kay sa nahitabo sa Bukid sa Carmelo. Unsa ang gitudlo kanimo sa kasinatian ni Elias diha sa 1 Mga Hari 19:1–18 kon sa unsang paagi ang Ginoo makigsulti kanimo sa imong mga panahon sa panginahanglan? Pamalandongi ang mga panahon sa imong kinabuhi dihang nasinati nimo ang Iyang tingog. Unsa ang kinahanglan nimong buhaton aron mas kanunay nga madawat ang Iyang giya?
Pamalandongi ang mga pulong ug mga hugpong sa mga pulong nga gigamit sa mosunod nga mga bersikulo aron sa paghulagway kon sa unsang paagi ang Ginoo makigsulti kanato: Helaman 5:30; 3 Nephi 11:3–7; Doktrina ug mga Pakigsaad 6:22–23; 8:2–3; 9:8–9; 11:12–14; 36:2.
Tan-awa usab sa Salmo 46:10; 1 Nephi 17:45; Russell M. Nelson, “Paminaw Kaniya,” Liahona, Mayo 2020, 88–92.
Ang pagserbisyo sa Ginoo labaw nga prayoridad kay sa kalibutanon nga mga kabalaka.
Ang kamatuoran nga si Eliseo nanag-iya og 12 ka yugo sa mga baka nagpasabot nga tingali usa siya ka adunahan nga tawo. Unsay nagustohan nimo sa iyang mga gipangbuhat nga narekord diha sa 1 Mga Hari 19:19–21? Unsaon nimo sa pagsunod sa ehemplo ni Eliseo?
Tan-awa usab sa Mateo 4:18–22.
Mga Ideya alang sa Pamilya nga Pagtuon sa Kasulatan ug Family Home Evening
-
1 Mga Hari 17:1–16.Ang hulagway dinhi niini nga latid makatabang sa inyong pamilya sa paghanduraw sa istorya diha sa 1 Mga Hari 17:1–16. Human mabasa ang mga bersikulo ug makatan-aw niini nga mga kapanguhaan, ang matag sakop sa pamilya mahimong molista og makadasig nga mga hiyas nga aduna ang biyuda. Unsa ang gihangyo sa Ginoo nga atong buhaton aron sa pagpakita sa atong pagtuo?
-
1 Mga Hari 18.Ang “Elias ug ang mga Pari sa Baal” (sa Mga Istorya sa Daang Tugon) makatabang sa inyong pamilya nga makakat-on sa istorya diha sa 1 Mga Hari 18. Aduna bay mga butang nga makapugong kanato gikan sa hingpit nga pagkamapasaligon ngadto sa Ginoo? Unsaon nato sa pagpakita sa atong kaandam sa pagpili Kaniya? (tan-awa sa bersikulo 21).
-
1 Mga Hari 19:11–12.Unsa ang makatabang sa inyong pamilya nga makasabot sa kaimportante sa pagpaminaw sa “malinawon nga diyutayng tingog”? Mahimo ninyong dungan nga basahon ang 1 Mga Hari 19:11–12 pinaagi sa hinay nga tingog o hinay nga manganta og usa ka awit mahitungod sa Espiritu, sama sa “Ang Espiritu Santo” (Songbook sa mga Bata, 56). Mahimo ka nga modugang og makabalda nga mga kabanha aron sa paghulagway kon sa unsang paagi si Satanas mosulay sa pagpugong kanato sa pagpaminaw sa malinawon nga diyutayng tingog. Ang mga sakop sa pamilya mahimong mopaambit sa unsay ilang gibuhat aron mahimong sensitibo sa mga pag-aghat sa Espiritu.
Alang sa dugang nga mga ideya sa pagtudlo sa mga bata, tan-awa sa latid niining semanaha sa Dali, Sunod Kanako—Alang sa Primary.
Gisugyot nga awit: “Ang Espiritu Santo,” Songbook sa mga Bata, 56.
Pagpalambo sa Personal nga Pagtuon
Irekord ang imong mga impresyon. Kon imong mabati ang Espiritu nga namulong kanimo, ikonsiderar ang pagsulat sa unsay imong gibati nga Iyang gisulti kanimo. Ang panghunahuna nga gikinahanglan aron mabutang sa mga pulong kini nga mga impresyon makatabang nimo sa pagpamalandong ug pagmanggad niini.
Widow of Zarephath [Biyuda sa Sarepta], ni Rose Datoc Dall