“Hunyo 13–19. 1 Samuel 8–10; 13; 15–18: ‘Ang Gubat Iya sa Ginoo,’” Dali, Sunod Kanako—Alang sa mga Indibidwal ug mga Pamilya: Daang Tugon 2022 (2021)
“Hunyo 13–19. 1 Samuel 8–10; 13; 15–18,” Dali, Sunod Kanako—Alang sa mga Individual ug mga Pamilya: 2022
David and Goliath [David ug Goliath], ni Steve Nethercott
Hunyo 13–19
1 Samuel 8–10; 13; 15–18
“Ang Gubat Iya sa Ginoo”
Ang mga sugyot niini nga latid makatabang nimo sa pag-ila sa pipila ka importante nga mga baruganan niini nga mga kapitulo. Mahimong makakaplag ka og ubang mga baruganan samtang magtuon ka.
Irekord ang Imong mga Impresyon
Sukad nga ang mga tribo sa Israel nanimuyo sa gisaad nga yuta, ang mga Filistehanon maoy usa ka nagpadayon nga hulga sa ilang kahilwasan. Sa makadaghang higayon nga milabay, ang Ginoo miluwas sa mga Israelihanon gikan sa ilang mga kaaway. Apan karon ang mga anciano sa Israel mihangyo, “Magabaton kami og usa ka hari … [aron] magauna kanamo, ug moaway sa among mga gubat” (1 Samuel 8:19–20). Ang Ginoo misugot, ug si Saul gidihogan nga mahimong hari. Apan sa dihang ang makahadlok nga higanteng si Goliath mihagit sa mga kasundalohan sa Israel, si Saul—sama sa tibuok niyang kasundalohan—“dako ang … kahadlok” (1 Samuel 17:11). Nianang adlawa, dili si Hari Saul ang miluwas sa Israel apan ang usa ka mapaubsanong batang lalaki nga magbalantay sa karnero nga ginganlan og David, kinsa wala magsul-ob og panagang apan gisul-oban sa dili madutlan nga pagtuo diha sa Ginoo. Kini nga gubat mimatuod sa Israel, ug ngadto ni bisan kinsa nga adunay espirituhanong mga gubat nga pakigbatokan, nga “ang Ginoo magaluwas dili pinaagi sa pinuti ug bangkaw” ug nga “ang gubat iya sa Ginoo” (1 Samuel 17:47).
Mga Ideya alang sa Personal nga Pagtuon sa Kasulatan
Si Jesukristo mao ang akong Hari.
Samtang magbasa ka sa 1 Samuel 8, timan-i kon unsa ang gibati sa Ginoo mahitungod sa tinguha sa mga Israelihanon alang sa usa ka hari gawas Kaniya. Unsay gipasabut sa pagpili sa Ginoo nga”mahimong hari sa ibabaw [kaninyo]”? (1 Samuel 8:7). Mahimo usab nimong ikonsiderar ang mga paagi nga gitintal ka sa pagsunod sa dili matarong nga mga uso sa kalibutan imbis nga mosunod sa Ginoo. Unsaon nimo pagpakita nga gusto nimo si Jesukristo nga maoy imong Mahangturong Hari?
Tan-awa usab sa Mga Maghuhukom 8:22–23; Mosiah 29:1–36; Neil L. Andersen, “Pagbuntog sa Kalibutan,” Liahona, Mayo 2017, 58–62.
1 Samuel 9:15–17; 10:1–12; 16:1–13
Ang Dios motawag og mga tawo pinaagi sa pagpanagna aron moserbisyo sa Iyang gingharian.
Ang Dios mipili kang Saul ug David nga mahimong mga hari pinaagi sa pagpanagna ug pagpadayag (tan-awa sa 1 Samuel 9:15–17; 10:1–12; 16:1–13). Ingon niini usab ang Iyang pagtawag og mga lalaki ug mga babaye aron moserbisyo sa Iyang Simbahan karon. Unsa ang imong nakat-unan gikan niini nga mga istorya mahitungod sa gipasabut sa “pagatawgon sa Dios, pinaagi sa pagpanagna”? (Mga Artikulo sa Hugot nga Pagtuo 1:5). Unsa nga mga panalangin ang moabot gikan sa pagkatawag ug pagka-set apart pinaagi sa awtorisado nga mga sulugoon sa Ginoo?
Paghulagway ni Samuel nga nagdihog ni Saul, © Lifeway Collection/gilisensyahan gikan sa goodsalt.com
“Ang pagsugot labi pang maayo kay sa halad.”
Bisan og si Saul taas nga tawo, gibati niya nga “diyutay sa [iyang] kaugalingong pagtan-aw” sa dihang nahimo siyang hari (1 Samuel 15:17). Hinoon, samtang napanalanginan siya og kalamposan, misugod nga mas misalig siya sa iyang kaugalingon ug dili na kaayo sa Ginoo. Unsa nga ebidensya ang imong makita niini diha sa 1 Samuel 13:5–14; 15? Kon kauban ka kaniadto ni Saul, unsa kaha ang imong isulti kaniya nga makatabang niya sa pagbuntog sa iyang “pagsukol” ug “pagkagahi sa kasingkasing”? (1 Samuel 15:23).
Tan-awa usab sa 2 Nephi 9:28–29; Helaman 12:4–5; Doktrina ug mga Pakigsaad 121:39–40; Thomas S. Monson, “Pamalandonga ang Agianan sa Imong mga Tiil,” Liahona, Nob. 2014, 86–88.
“Ang Ginoo nagatan-aw sa kasingkasing.”
Unsa ang pipila ka paagi nga ang mga tawo mohukom sa uban base “sa panagway sa gawas”? Unsa ang gipasabut nga motan-aw “sa kasingkasing,” sama sa buhaton sa Ginoo? (1 Samuel 16:7). Hunahunaa kon unsaon nimo sa paggamit niini nga baruganan sa paagi sa imong pagtan-aw sa uban—ug sa imong kaugalingon. Sa unsang paagi ang pagbuhat niini makaapekto sa imong mga inter-aksyon o mga relasyon sa uban?
Uban sa tabang sa Ginoo, makabuntog ako sa bisan unsa nga hagit.
Samtang magbasa ka sa 1 Samuel 17, pamalandongi ang mga pulong sa lain-laing tawo niini nga kapitulo (tan-awa ang lista sa ubos). Unsa ang gipadayag sa ilang mga pulong mahitungod kanila? Sa unsang paagi ang mga pulong ni David nagpakita sa iyang kaisog ug pagtuo sa Ginoo?
-
Goliath: mga bersikulo 8–10, 43–44
-
Eliab: bersikulo 28
-
Saul: bersikulo 33
Pamalandongi ang personal nga mga pakiggubat nga imong giatubang. Unsa ang imong nakita diha sa 1 Samuel 17 nga makalig-on sa imong pagtuo nga ang Ginoo makatabang kanimo?
Mga Ideya alang sa Pamilya nga Pagtuon sa Kasulatan ug Family Home Evening
-
1 Samuel 9:15–21; 16:7.Ang pagbasa niini nga mga bersikulo uban sa mosunod nga mga pulong gikan ni Elder Dieter F. Uchtdorf mahimong makadasig og diskusyon kon nganong ang Ginoo mipili ni Saul ug David: “Kon kita motan-aw sa atong kaugalingon pinaagi lamang sa atong mortal nga mga mata, mahimong dili nato makita ang atong kaugalingon nga maayo. Apan ang atong Langitnong Amahan nakakita kanato kon kinsa gayud kita ug kinsa kita sa umaabut” (“Nakabenepisyo Kaayo Kini!” Liahona, Nob. 2015, 23). Tingali ang mga sakop sa pamilya mahimong magpuli-puli sa paghisgot kon unsa nga maayo nga mga hiyas ang ilang nakita sa kasingkasing sa matag usa (tan-awa sa 1 Samuel 16:7).
-
1 Samuel 10:6–12.Kanus-a kita nakakita nga ang Dios mipanalangin sa usa ka tawo og espirituhanong gahom aron matuman ang usa ka buluhaton o calling sama sa Iyang pagpanalangin ni Saul? Unsa nga mga kasinatian ang atong mapaambit sa dihang “ang Dios nagahatag [kanato] og laing kasingkasing” o “ang Espiritu sa Dios miabot [kanato]” diha sa pagserbisyo Kaniya? (mga bersikulo 9–10).
-
1 Samuel 17:20–54.Ang imong pamilya tingali malingaw nga magdungan og basa sa istorya ni David ug Goliath (ang “David ug Goliath” sa Mga Istorya sa Daang Tugon makatabang). Mahimong mosangpot kini sa usa ka diskusyon mahitungod sa mga hagit nga atong giatubang nga tingali mabati nga daw “mga Goliath” alang kanato. Mahimo pa gani ninyong isulat ang pipila niini nga mga hagit sa usa ka ig-anan [target] o sa usa ka drowing ni Goliath ug magpuli-puli sa paglabay og mga butang (sama sa mga bolang papel) ngadto niini.
Tingali makapainteresado usab ang pagbasa mahitungod sa panagang ug mga hinagiban ni Goliath (tan-awa sa mga bersikulo 4–7). Unsa ang anaa kang David? (tan-awa sa mga bersikulo 38–40, 45–47). Unsa ang gihatag sa Ginoo sa pagtabang kanato sa pagbuntog sa atong mga Goliath?
-
1 Samuel 18:1–4.Sa unsang paagi nga si David ug Jonathan maayo nga higala sa usag usa? Sa unsang paagi ang maayo nga mga higala nakapanalangin kanato? Unsa ang atong mabuhat aron mahimong maayo nga mga higala—lakip ngadto sa mga sakop sa atong pamilya?
Alang sa dugang nga mga ideya sa pagtudlo sa mga bata, tan-awa sa latid niining semanaha sa Dali, Sunod Kanako—Alang sa Primary.
Gisugyot nga awit: “Magmaisugon Ko,” Songbook sa mga Bata, 85.
Pagpalambo sa Atong Pagtudlo
Ihatag ang imong pagpamatuod kanunay. “Ang imong yano, kinasingkasing nga saksi sa espirituhanong kamatuoran mahimong adunay gamhanang impluwensya sa [inyong pamilya]. Ang usa ka pagpamatuod labing gamhanan kon kini direkta ug kinasingkasing. Dili kinahanglan nga larino ang pagkasulti o taas” (Pagtudlo sumala sa Pamaagi sa Manluluwas, 10–11).
Paghulagway kang David, ni Dilleen Marsh