“7–13 marzo. Genesis 37–41: “Li Qaawa’ kiwan rik’in laj Jose,” ” Kim, Taaqehin—Choq’ reheb’ li komon ut li junkab’al: Li Najter Chaq’rab’ 2022 (2021)
“7–13 marzo. Genesis 37–41,” Kim, Taaqehin—Choq’ reheb’ li komon ut li junkab’al: 2022
Xjalam-uuch laj Jose re Egipto sa’ tz’alam, xb’aan laj Jeff Ward
7–13 marzo
Genesis 37–41
“Li Qaawa’ kiwan rik’in laj Jose”
Naq nakawil Genesis 37–41, tz’aama sa’ tij naq li Santil Musiq’ej tatxtenq’a chixk’eeb’al reetal chan ru taayu’ami li nakatzol. Tz’iib’a li na’leb’ nachal sa’ laa k’a’uxl.
Tz’iib’a li nakak’oxla
Wan naq li ani chaab’il xch’ool naxk’ul li rahilal. Naqatzol a’an sa’ li qayu’am, jo’ ajwi’ sa’ lix yu’am laj Jose, li ralal laj Jakob. A’an chaq aj eechal re li sumwank li kixk’uub’ li Dios rik’ineb’ lix xe’toonil, a’b’an xik’ ilb’il xb’aaneb’ li ras ut kik’ayiik choq’ loq’b’il moos. Ink’a’ kixkanab’ lix k’ulub’ejil naq kitawe’ xb’aan li rixaqil laj Potifar, jo’kan naq kitz’ape’ sa’ tz’alam. Naq kikana chi tiik xpaab’aal, anchal naq ke’tam lix ch’a’ajkilal. A’b’an moko kixk’ul ta li ch’a’ajkilal xb’aan naq tz’eqtaananb’il xb’aan li Dios. Relik chi yaal, sa’ chixjunil li kixk’ul, “li Qaawa’ kiwan rik’in” (Genesis 39:3). Lix yu’am laj Jose nareetali li na’leb’ a’in: li Dios ink’a’ tooxkanab’ qajunes. “Xtaaqenkil li Kolonel moko taarisi ta chixjunileb’ laa ch’a’ajkilal,” chan li Awa’b’ej Dieter F. Uchtdorf. “A’b’anan, taarisiheb’ li ramleb’ li neke’xram chawu laa tenq’ankil li naraj xk’eeb’al aawe laa Yuwa’. Li Dios tatrochb’eeni” (“Xpatz’b’al li qochochnal,” Jolomil ch’utub’aj-ib’ re octubre 2017).
Li na’leb’ re xtzolb’aleb’ li loq’laj hu aajunes
“Li Qaawa’ kiwan rik’in laj Jose” sa’ lix ch’a’ajkilal.
Wulaj wulaj, anchal kikanab’aak xjunes laj Jose xb’aan li ruchich’och’, a’b’an maajun wa kikanab’aak xb’aan li Qaawa’. Naq nakawil li resil laj Jose, k’oxlaheb’ li patz’om a’in: K’a’ru kixb’aanu laj Jose re taakanaaq rik’in li Qaawa’ sa’ xch’a’ajkilal? Chan ru naq li Qaawa’ “kiwan rik’in”? (Genesis 39:2–3, 21, 23).
Maare nakapatz’ ajwi’ a’an sa’ laa yu’am. Ma nakawil reetalil naq li Qaawa’ ink’a’ nakatxkanab’ aajunes sa’ laa ch’a’ajkilal? K’oxla chan ru taaye resil laa yu’am reheb’ laa komon ut reheb’ aawalal aak’ajol (chi’ilmanq 1 Nefi 5:14). K’a’ru naru taab’aanu anajwan re xkawresinkil aawib’ chi kanaak chi tiik aapaab’aal naq taak’ul li ch’a’ajkilal?
Chi’ilmanq ajwi’ Jwan 14:18; Romanos 8:28; Alma 36:3; Tzol’leb’ ut Sumwank 121:7–8; D. Todd Christofferson, “Lix sahileb’ xch’ool laj santil paab’anel,” Jolomil ch’utub’aj-ib’ re octubre 2019.
Wi wankin chi tiik inpaab’aal, li Qaawa’ tinixb’eresi ut tixk’e inna’leb’.
Li Elder David A. Bednar kixye, “K’iila paay chan ru nak’utb’esiman li na’leb’: sa’ matk’, sa’ k’utb’esinb’il matk’, sa’ aatinak rik’in li choxahil taql, ut sa’ musiq’anb’il na’leb’ ” (“El Espíritu de revelación,” Liahona, mayo 2011, 88). Li Qaawa’ kixk’utb’esi lix na’leb’ sa’ matk’ chiru laj Jose, chiru lix moos laj Farahon, ut chiru ajwi’ laj Farahon. Li Qaawa’ kixk’utb’esi ajwi’ chiru laj Jose chan ru tixk’ut xyaalaleb’ li matk’ a’in. K’a’ru nakatzol sa’ Genesis 37:5–11; 40:5–8; 41:14–25, 37–38 chirix xk’ulb’al ut xtawb’al ru li na’leb’ k’utb’esinb’il xb’aan li Qaawa’? K’a’ru naru taatzol rik’in laj Jose naq anchal ch’a’aj xtawb’al ru li na’leb’ li nakak’ul? (chi’ilmanq Genesis 40:8; 41:16).
Laj Jose naxk’ut xyaalaleb’ lix matk’ lix moos laj Farahon, xb’aan laj François Gérard
K’oxla chan ru naq li Qaawa’ naxk’utb’esi li rajom chawu. K’a’ru yookat chixb’aanunkil re xyu’aminkil li na’leb’ k’utb’esinb’il chawu xb’aan li Qaawa’? Chan ru yookat chixsik’b’al xkomon chik lix b’eresihom?
Chi’ilmanq ajwi’ Russell M. Nelson, “Li k’utb’esinb’il na’leb’ choq’ re li Iglees ut choq’ re qayu’am,” Jolomil ch’utub’aj-ib’ re abril 2018; Michelle Craig, “Musiq’ejil seeb’al,” Jolomil ch’utub’aj-ib’ re octubre 2019.
Rik’in xtenq’ li Qaawa’, naru tin’eeleliq chiru li aaleek.
Naq nakak’ul li aaleek, lix yu’am laj Jose naru tixkawob’resi aach’ool ut aametz’ew. Naq nakawil li k’a’ru kixk’ul sa’ Genesis 39, k’e reetal k’a’ru kixb’aanu laj Jose re xtz’eqtaanankil li aaleek. A’in li kixb’aanu:
-
Kixtz’eqtaana li rixaqil laj Potifar naq xko’o xch’ool chirix (raqal 8).
-
Kixk’e reetal naq li maakob’k tixrahob’tesi xch’ool li Dios ut li ras riitz’in (eb’ li raqal 8–9).
-
Ink’a’ ki’ab’in chiru li aaleek, us ta naxk’ul “rajlal kutan” (raqal 10).
-
“Kixkanab’ li raq’ … ut ki’eelelik chirix kab’l” (raqal 12).
Rik’in li kixb’aanu laj Jose sa’ aak’a’uxl, naru taakuub’ chan ru taatz’eqtaana li aaleek. Naru taak’oxla jun li aaleek li nakatch’a’ajkilo’ wi’, taatz’iib’a b’ar ink’a’ tat-ok wi’, ut taak’e aach’ool chixpatz’b’al xtenq’ laa Choxahil Yuwa’ naq nakak’ul li aaleek a’an (chi’ilmanq 2 Nefi 4:18, 27–33).
Li aaleek:
B’ar ink’a’ tat-ok wi’:
K’a’ru taab’aanu re xtz’eqtaanankil:
Li seraq’ a’in chirix xkawilal xch’ool laj Jose chiru li aaleek jalan wi’ rik’in li seraq’ chirix laj Juda, li ras, li natawman sa’ Genesis 38. Sa’ roxichal, k’a’ru neke’xk’ut li ch’ol 37, 38, ut 39 chirix li saq ru ch’oolej?
Chi’ilmanq ajwi’ 1 Korintios 10:13; 1 Nefi 15:23–24; 3 Nefi 18:17–18.
Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al
-
Genesis 37.Wi ta laa’at chaq li ras laj Jose, k’a’ raj ru xab’aanu re naq li sowenak ink’a’ tixch’a’ajkila lee wanjik cherib’il eerib’? Chan ru naq a’an texxtenq’a chi aatinak sa’ tuqtuukilal cherib’il erib’? (chi’ilmanq, li raqal 4).
-
Genesis 39. Naru teeb’icha “Chinwanq raj jo’ li Jesus” (B’ichleb’aal choq’ reheb’ li Kok’al, 40–41), ut teesik’ li na’leb’ kexru raj chixyeeb’al re xtenq’ankil laj Jose sa’ xch’a’ajkilal.
-
Genesis 39:7–12.Eb’ li raqal a’in naru texxtenq’a chi aatinak jo’ junkab’al chirix li chaq’rab’ re saq ru ch’oolej. Eb’ li hu a’in naru ajwi’ te’xk’e eena’leb’: Jakob 2:28; Alma 39:3–9; “Xsaqal ru li tib’elej” (sa’ Choq’ re Xkawilaleb’ li Saaj [2011], 35–37); “La intimidad sexual es sagrada y hermosa” (sa’ Ayuda para los padres [2019], AddressingPornography.ChurchofJesusChrist.org).
-
Genesis 41:15–57.K’a’ru naqatzol sa’eb’ li raqal a’in chirix li tenq’ kixk’e li Qaawa’ reheb’ laj Egipto rik’in laj Jose? K’a’ru naqatzol chirix xkawresinkil qib’ choq’ re li ch’a’ajkilal? Aatinanqex chirix xkawresinkil eerib’ jo’ junkab’al. Re xtawb’al eena’leb’, chi’ilmanq Temas del Evangelio, “Preparación para las emergencias,” topics.ChurchofJesusChrist.org.
Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.
Jun b’ich naru xb’ichankil: “Li Jesus narahok qe,” B’ichleb’aal choq’ reheb’ li Kok’al, 37.
Xkawresinkil aawib’ chi tzolok
Juntaq’eetaheb’ li loq’laj hu rik’in laa yu’am. Naq nakawil, k’oxla chan ru naq eb’ li esilal ut li na’leb’ sa’eb’ li loq’laj hu neke’k’anjelak sa’ laa yu’am. Chan raj ru naq lix tiikilal laj Jose sa’ Egipto tixwaklesi aach’ool chi kanaak rik’in li Qaawa’ naq wan aach’a’ajkilal?
Xjalam-uucheb’ li ras laj Jose naq ke’xmaq’ lix b’aatal, xb’aan laj Sam Lawlor