laj Adan ut li xEva chirix li awimq Eden

Chaab’il wi’chik chiru li awimq, xb’aan laj Kendal Ray Johnson

17–23 enero

Genesis 5; Moises 6

“Teek’ut li k’a’aq re ru a’in chi moko ramb’il ta chiruheb’ lee ralal eek’ajol”

Naq nakawil ut nakak’oxla Genesis 5 ut Moises 6, tz’iib’a li na’leb’ naxk’e li Musiq’ej sa’ laa k’a’uxl. K’a’ru li chaab’il na’leb’ li nakak’ul choq’ aawe ut choq’ re laa junkab’al?

Tz’iib’a li nakak’oxla

Sa’ xk’ihal li hu Genesis 5, tz’iib’anb’il xk’ab’a’eb’ li riyajil laj Adan ut li xEva toj laj Noe. Naqileb’ k’iila k’ab’a’ej, a’b’an b’ayaq ajwi’ naqatzol chirixeb’. Toja’ naq naqil resil laj Enok, waqib’ tasal tenamit chirix laj Adan, li nayeeman resil chi jo’ka’in: “Laj Enok kiwan sa’ sum aatin rik’in li Dios. Sa’ jun kutan ink’a’ chik ki’ile’k ru, xb’aan naq kolsaapuuq xb’aan li Dios” (Genesis 5:24). K’a’ru kixk’ul laj Enok? Maak’a’ chik nayeeman chirix, ut naqil xkomoneb’ chik li k’ab’a’ej.

A’b’anan, wan resil li k’a’ru kixk’ul laj Enok sa’ Moises 6—ut nim xwankil li esil a’an. Naqak’e reetal lix tuulanil laj Enok, li k’a’ru kiwiib’an wi’ xch’ool, li k’a’ru kiril li Dios rik’in, ut li nimla k’anjel kixb’aanu jo’ xprofeet li Dios. Naqataw ajwi’ qana’leb’ chirix lix junkab’al laj Adan ut li xEva ut k’a’ru ke’xk’ul li ralal xk’ajoleb’. Naqil naq laj Satanas “kiwan xnimal lix awa’b’ejil,” a’b’an naqil ajwi’ naq ke’wan li na’b’ej yuwa’b’ej li ke’xtzoleb’ lix kok’al “sa’ chixjunil lix b’e li Dios,” ut a’aneb’ chaq “aj jultikahom re li tiikilal” li “ke’aatinak ut ke’xye profeetil aatin” (Moises 6:15, 21, 23). Q’axal loq’ li na’leb’ naqatzol chirix li k’a’ru ke’xk’ut li na’b’ej yuwa’b’ej ut laj jultikanel: li paab’aal, li jalb’a-k’a’uxlej, li kub’iha’, ut xk’ulb’al li Santil Musiq’ej (chi’ilmanq Moises 6:50–52). Li na’leb’ a’an, jo’ li tijonelil li narochb’eeni, “kiwan chaq sa’ xtiklajik,” ut “taawanq ajwi’ sa’ roso’jik li ruchich’och’ ” (Moises 6:7).

reetalil li tzolok aajunes

Li na’leb’ re xtzolb’aleb’ li loq’laj hu aajunes

Moises 6:26–36

Jun li profeet, a’an ajwi’ aj ilol na’leb’.

Naq nakawil Moises 6:26–36, k’a’ru nakatzol chirix li xnaq’ uhej, li q’ojyin, ut li ilok? Sa’ xkutankil laj Enok, ani “ink’a’ najt [naru] na’ilok”? K’a’ut naq ink’a’ ke’ru chirilb’al li yaal? K’a’ut naq laj Enok kiru chirilb’al? K’a’ru ak xk’e chi nimank laa paab’aal naq eb’ li profeet sa’ roso’jikeb’ li kutan, a’aneb’ aj ilol na’leb’? (chi’ilmanq li raqal 36; K’utul Raqal reheb’ li Loq’laj Hu, “Aj Ilol Na’leb’ ”).

Moises 6:26–47

Li Dios nokoxb’oq chixb’aanunkil lix k’anjel, us ta toj wan qamajelal.

Wan naq nalukta qach’ool xb’aan li nokoxb’oq li Qaawa’ chixb’aanunkil. Laj Enok kilutka ajwi’ xch’ool naq kib’oqe’ choq’ profeet xb’aan li Qaawa’. Naq nakawil Moises 6:26–36, k’e reetal k’a’ut naq kilukta xch’ool laj Enok ut k’a’ru kixye li Qaawa’ re xk’eeb’al xkawilal xch’ool. Sa’eb’ li raqal 37–47, k’e reetal k’a’ru kixb’aanu li Qaawa’ re xtenq’ankil laj Enok ut re xk’eeb’al xmetz’ew sa’ xb’aanunkil lix k’anjel (chi’ilmanq ajwi’ Moises 7:13). Naru taajuntaq’eeta li kixk’ul laj Enok rik’in jalaneb’ chik li profeet li xe’reek’a xnimal xmajelal; maare laj Moises (chi’ilmanq Exodo 4:10–16), laj Jeremias (chi’ilmanq Jeremias 1:4–10), laj Nefi (chi’ilmanq 2 Nefi 33:1–4), ut laj Moroni (chi’ilmanq Eter 12:23–29). K’a’ru nakak’oxla naq li Dios naraj naq taatzol sa’eb’ li raqal a’in chirix li k’anjel li naxk’e aawe?

Chi’ilmanq ajwi’ Jakob 4:6–8.

Moises 6:48–68

Li tzol’leb’ re li Kristo wan choq’ xch’oolil lix k’uub’anb’il na’leb’ li Dios re li kolb’a-ib’.

B’antiox re lix hu laj Moises, naqanaw naq chalen chaq xtiklajik, li Dios naxk’ut chiruheb’ li ralal xk’ajol chan ru te’kuye’q xmaak ut te’toje’q rix. Sa’eb’ li loq’laj hu, wan naq li tzol’leb’ re li Kristo nayeeman re li na’leb’ a’in (chi’ilmanq 2 Nefi 31:13–21). Naq nakawil Moises 6:48–68, k’e reetal li tento taqanaw ut taqab’aanu re naq taatoje’q qix. Maare usaq choq’ aawe xtz’iib’ankil chi k’osb’il ru li raatin laj Enok. K’a’ut naq aajel ru naq k’utb’ileb’ li na’leb’ a’in chalen chaq xkutankil laj Adan ut li xEva? K’a’ru eek’asinb’ilat chixb’aanunkil xb’aan li na’leb’ xatzol?

Moises 6:51–62

“Teek’ut li k’a’aq re ru a’in chi moko ramb’il ta chiru lee ralal eek’ajol.”

Kik’utman li loq’laj na’leb’ re lix evangelio li Jesukristo chiru laj Adan ut li xEva. A’b’anan, sa’ Moises 6:27–28 li Qaawa’ naxye naq sa’eb’ li kutan naq maji’ nayo’la laj Enok, ke’wan naab’al li tenamit li ink’a’ chik ke’xpaab’eb’ li na’leb’ a’an. Li Qaawa’ kiraj naq laj Enok tixk’ojob’eb’ wi’chik li na’leb’ li sachb’ileb’—jo’ ajwi’ li taqlahom kik’eeman re laj Adan: “Teek’ut li k’a’aq re ru a’in chi moko ramb’il ta chiru lee ralal eek’ajol” (Moises 6:58). Naq nakawil Moises 6:51–62, k’a’ru nakatzol chirix li Jesukristo? K’a’ru aajelaq ru choq’ reheb’ li saaj ut li kok’al? K’a’ru naru taab’aanu re xnumsinkil li na’leb’ a’in reheb’ li tenamit li te’chalq moqon?

jun junkab’al narileb’ li loq’laj hu

Ebʼ li naʼbʼej yuwaʼbʼej tento teʼxkʼut li evangelio chiruhebʼ lix kokʼal.

reetalil li tzolok jo’ junkab’al

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Genesis 5; Moises 6:5–25, 46.Sa’ tzolok chirix “xhuhil li jultikaak” re lix junkab’al laj Adan ut li xEva, maare taamusiq’aaq laa junkab’al chixtz’iib’ankil jun xhuhil li jultikaak. Aatinanqex jo’ junkab’al chirix li teeraj xk’eeb’al chi sa’. Maare wankeb’ li jalam-uuch, li seraq’, malaj li hu chirix li resilal lee junkab’al. Malaj ut teetz’iib’a resil li yookex chixk’ulb’al anajwan. K’a’ru taawanq xloq’al choq’ reheb’ li te’chalq moqon? Naru ajwi’ tex’aatinaq chirixeb’ li na’leb’ a’in: “rik’in li musiq’ej li nak’utuk chi musiq’anb’il” (Moises 6:5) ut “li k’utb’il eetalil k’eeb’il xb’aan li ru’uj ruq’ li Dios” (Moises 6:46). Chan ru texb’eresiiq xb’aaneb’ li na’leb’ a’an? Naru teek’uula li na’leb’ sa’ lee huhil re jultikaak sa’ FamilySearch.org.

Moises 6:53–62.Chan raj ru taasume lix patz’om laj Adan sa’ Moises 6:53? K’a’ru naqataw sa’eb’ li raqal 57–62 re xsumenkil?

Moises 6:59.K’a’ru naraj naxye naq “tooyo’laaq wi’chik sa’ li awa’b’ejihom re choxa”? K’a’ru naru taqab’aanu re naq rajlal yooqo chi yo’laak wi’chik sa’ li qayu’am? Re xtawb’al eena’leb’, chi’ilmanq Alma 5:7–14, 26; K’utul Raqal reheb’ li Loq’laj Hu, “Yo’laak wi’chik, Yo’laak rik’in li Dios”; David A. Bednar, “Junelik taakanaaq eerik’in li risinkil lee maak” (Jolomil ch’utub’aj-ib’ re abril 2016).

Moises 6:61.K’a’ru naqatzol chirix li Santil Musiq’ej sa’ li raqal a’in?

Moises 6:63.K’a’ru li “naxch’olob’ xyaalal” li Kristo? (chi’ilmanq ajwi’ 2 Nefi 11:4). Maare taapatz’ re laa junkab’al naq te’xye k’a’ru neke’ril “sa’ choxa taqe’q” malaj “sa’ xb’een li ruchich’och’ ” li natenq’an reheb’ chi tzolok chirix li Jesukristo. Chan ru nokohe’xtenq’a li toon che’, li pek, malaj li saq’e chixk’oxlankil li Kolonel? K’a’ru naqatzol chirix li Kolonel rik’in li aatin “yo’yookil ha’ ” ut “yu’am wa”? (Jwan 4:10–14; 6:35).

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “Tinxik b’ar taawaj naq tinxik,” Eb’ li B’ich, 174.

Xkawresinkil aawib’ chi tzolok

Sik’eb’ li eetalil. Sa’eb’ li loq’laj hu, wankeb’ li k’a’aq re ru ut li esil li neke’reetali li musiq’ejil na’leb’. Eb’ li eetalil a’in naru tixk’e xkomon chik aana’leb’ chirix li tzol’leb’. K’a’ru nakatzol rik’ineb’ li eetalil re li xnaq’ uhej ut li seb’ sa’ Moises 6:35?

laj Adan ut li xEva rik’ineb’ li kok’al

Laj Adan ut li xEva neke’xtzoleb’ li ralal xk’ajol, xb’aan laj Del Parson