“16–22 ni Okotova. 1 kei na 2 Cesalonaika: ‘Tinia Vinaka Talega Na Ka sa Sega Ena Nomudou Vakabauta,’” Lako Mai, Mo Muri Au—Baleta na Tamata Yadua kei na Matavuvale: Veiyalayalati Vou 2023 (2022)

“16–22 ni Okotova. 1 kei na 2 ni Cesalonaika,” Lako Mai, Mo Muri Au—Baleta na Tamata Yadua kei na Matavuvale: 2023

iVakatakilakila

rau vosa tiko na goneyalewa daukaulotu vei cauravou

16–22 ni Okotova

1 kei na 2 Cesalonaika

“Tinia Vinaka Talega na Ka Sa Sega Ena Nomudou Vakabauta”

Kevaka eda sega ni vola na veika eda vakila mai vua na Yalo, ena rawa ni da guilecava. Na cava e vakauqeti iko kina na Yalo mo vola ni ko wilika na 1 kei na 2 Cesalonaika?

Vola na Veika o Vakauqeti Kina

Ena Cesalonaika, e rau a beitaki o Paula kei Sailasa ni “ratou sa vukici vuravura me ca” (Cakacaka 17:6). Na nodrau vunau sa vakacudruya eso na iliuliu vaka-Jiu, ka ra laki vakavuna na nodra yavavala na tamata (raica na Cakacaka 17:1–10). Sa yaco e muri, me tukuni vei Paula kei Sailasa me rau sa biuti Cesalonaika. Sa lomaleqa o Paula baleti ira na kai Cesalonaika a saumaki vou mai kei na nodra vakacacani, ia a sega ni rawa ni lesu tale me sikovi ira. “Niu a sega tiko ni vosota rawa,” e vola o koya, “au a qai talatala yani meu kila na nomudou vakabauta.” E kena isau, na ivukevuke nei Paula o Timoci, a veiqaravi mai Cesalonaika, “sa kauta mai nai rogorogo vinaka ni nomudou vakabauta kei na loloma” (1 Cesalonaika 3:5–6). Na kena dina, o ira na Yalosavasava ni Cesalonaika era a kilai me nodra ivakarau “kecega era sa vakabauta” (1 Cesalonaika 1:7), ka sa rogovaki ki na veivanua na nodra vakabauta. Vakasamataka na reki nei Paula ni sa rogoca ni nona cakacaka ena kedra maliwa a “sega ni ka walega” (1 Cesalonaika 2:1). Ia e kila tu o Paula ni yalodina ni veigauna sa oti e sega ni veirauti me veivakabulai tiko vakayalo ena veigauna mai liu, ka sa leqataki ira nai vakavuvuli vakailasu ena kedra maliwa na Yalosavasava (raica na 2 Cesalonaika 2:2–3). Na nona itukutuku vei ira, kei keda, meda tomana tiko ka “tinia vinaka talega na ka esa sega ena [noda] vakabauta” ka “mo dou uasivi cake sara” ena loloma (raica na 1 Cesalonaika 3:10; 4:10).

iVakatakilakila

ivakatakilakila ni vuli ni tamata yadua

Vakasama Eso ni Vuli iVolanikalou ni Tamata Yadua

1 Cesalonaika 1–2

O ira na tisaipeli i Karisito era qaravi ira na tani ena yalodina kei na loloma.

Ena 1 Cesalonaika, e vakaraitaka na vosa i Paula na kauwai kei na reki nei dua na tamata e soli koya tu vakataucoko ena nodra qaravi o ira na luve ni Kalou. O na kunea vakalevu ena i matai ni rua na wase ni 1 Cesalonaika, na vosa kei na veimalanivosa e vakamacalataka na ivakarau kei na ivalavala ni dua na tisaipeli ni Turaga. Me ivakaraitaki, na cava o vulica mai na 1 Cesalonaika 1:5–8; 2:1–13 me baleta na qaravi ni Turaga?

Vakasamataka mada na nomu madigi mo qarava na Kalou kei ira na Luvena. Na cava so o raica ena veiwase oqo e vakauqeti iko mo toroya cake na nomu veiqaravi? Sa rawa mo tarogi iko ena taro eso e yavutaki ena veika o kunea, me vaka na “Au sa ivakaraitaki beka ni veika au sa kila?” (raica na 1 Cesalonaika 1:7).

1 Cesalonaika 3:7-13; 4:1-12

“Vakalevutaki ka vakasinaiti ena loloma.”

A rekitaka o Paula na nodra yalodina na Yalododonu mai Cesalonaika (raica na 1 Cesalonaika 3:7–9). Ia e vinakata talega o koya me ra “tiko sautu vakalevu cake” ena yalodina oqori (1 Cesalonaika 4:1). Ni o wilika na 1 Cesalonaika 3:7–13; 4:1–12, vakasamataka vakatitobu na sala eso o rawa ni “uasivi cake vakalevu sara” vakayalo (1 Cesalonaika 4:10). Me ivakaraitaki, raica ni a vakayagataka o Paula na vosa me vaka na “yalosavasava” kei na “vakatabui.” Na cava o vulica mai na volavola nei Paula me baleta na ibalebale ni veivosa oqo? Ena vukei iko vakacava na iVakabula mo yaco mo yalosavasava cake ka vakatabui?

Raica talega na iDusidusi ki na iVolanikalou, “Tabu,” “Veivakasavasavataki,” scriptures.ChurchofJesusChrist.org.

1 Cesalonaika 4:16–18; 5:1–10; 2 Cesalonaika 1:4–10

Kevaka au yalodina ka qaqarauni tiko, au na vakavakarau tu ki na iKarua ni Lako mai ni iVakabula.

Ena 1 Cesalonaika 5:1–10, a vakayagataka o Paula e vica na ivakaibalebale me vakavulica na gauna ena lesu mai kina o Jisu ki vuravura. Ni o wilika na vosa vakaibalebale eso oqo, sa rawa mo vola eso na ka o vakila e yaco mai vei iko me baleta na iKarua ni Lako Mai i Jisu Karisito:

“Vaka na daubutako ena bogi”:
“Vakararawataki koya e dua na yalewa sa vakaluveni”:
Eso tale na vosa vakaibalebale o kunea:

Na cava eso tale na ikuri ni dina o sa vulica mai na 1 Cesalonaika 4:16–18; 5:1–10; 2 Cesalonaika 1:4–10? Na cava o sa vakauqeti mo cakava mo yadrava ka vakavakarau tiko ki na lako mai ni iVakabula?

Raica talega na D. Todd Christofferson, “Vakavakarau ki na Lesu Mai ni Turaga,” Liaona, Me 2019, 81–84.

2 Cesalonaika 2

Na vukitani, se lutu tani mai na dina, a parofisaitaki ni na yaco e liu ni se bera na iKarua ni Lako Mai.

Ena loma ni veivakacacani, e vuqa vei ira na Yalosavasava ni Cesalonaika era vakabauta ni sa voleka na iKarua ni Lako Mai ni iVakabula. Ia, e kila o Paula ni se bera na nona lesu mai ki vuravura o Jisu ena liu mai e dua na vukitani—na veivorati se na “vuki tani” mai na dina (raica na 2 Cesalonaika 2:1–4). Ena rawa ni o vakatitobutaka na nomu kila ka baleta na Vukitani Levu—kei na nomu vakavinavinakataka na Vakalesuimai—ena kena vakasamataki vakatitobu na veika eso oqo:

Na veivolanikalou e parofisaitaka na Vukitani: Aisea 24:5, Emosi 8:11–12; Maciu 24:4–14; 2 Timoci 4:3–4
Na veivolanikalou oqo era vakaraitaka ni a sa tekivu tiko mai ena gauna i Paula na Vukitani: Cakacaka 20:28–30; Kalatia 1:6–7; 1 Timoci 1:5–7
Na rai me baleta na Vuki Tani Levu mai vei ira na dauveivakavoui Va-Karisito:

Martin Luther: “E sega niu vakasaqara meu vakavouia na Lotu, ia me sala vata ga na veilawa kei na ituvatuva ena iVolanikalou Tabu. … Au kaya ga ni Lotu Vakarisito esa sega ni tiko ena kedra maliwa o ira e dodonu me ra taqomaka” (ena E. G. Schweibert, Luther kei na Nona Gauna: Na Veisau mai na Dua na Rai Vou [1950], 590).

Roger Williams: “Na vukitani … esa vakadukadukalitaka na veika kece ka sa sega ni rawa ni vakabulai tale mai na vukitani oqori me yacova ni sa talai ira mai na iapositolo vou o Karisito me teivaka vou na lotu” (ena Phillip Schaff, Na Lawa Vakararavi ena Lotu Vakarisito [1877], 851).

Raica talega na 2 Nifai 28; Ulutaga Vakosipeli, “Vukitani,” topics.ChurchofJesusChrist.org.

iVakatakilakila

ivakatakilakila ni vuli vakamatavuvale

Na Vakasama Eso Me Baleta na Vuli iVolanikalou Vakamatavuvale kei na Lotu Vakamatavuvale

1 Cesalonaika 3:9–13.Na cava e veivakurabuitaki vei iko mai na veika e vakila o Paula me baleti iratou na nona itokani? E rawa vakacava ni da “vakalevutaki ka uasivi cake e na loloma vakai kemudou”? (tikina e 12).

1 Cesalonaika 4:13–18.Na malanivosa cava soti ena veitikina oqo me baleta na Tucaketale e solia vei iko na vakacegu?

1 Cesalonaika 5:14–25.Ni o railesuva na ivakasala nei Paula ena 1 Cesalonaika 5:14–25, sureta na lewe ni matavuvale yadua me vaqara e dua na malanivosa e rawa ni vakanamata kina na matavuvale. Vakaraica na sala vovou mo vakaraitaka kina na veimalanivosa oqo ena nomu itikotiko me ivakananumi. Me ivakaraitaki, na tamata yadua e rawa ni kunea se droinitaka na iyaloyalo e vakaraitaka se vaqaqacotaka na malanivosa a digitaka.

2 Cesalonaika 3:13.Eda dau vakila beka ni da sa “ceguoca ena cakacaka vinaka”—uabaleti, beka, ena icolacola vakatisaipeli? Na cava ena vukei keda ni da vakila vakaoqo? (Raica na Kalatia 6:9; Vunau kei na Veiyalayalati 64:33.) Ena rawa vakacava ni da veitokoni vakaikeda ni yaco mai na veika oqo?

Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Baleta na Lalai.

Sere vakaturi: “Meu Na Muri Jisu Tu,” iVolanisere ni Gonelalai, 40.

Vakatorocaketaki ni Vuli ni Tamata Yadudua

Vakasaqara na ivakatakila e veisiga “Sa dau yaco mai na ivakatakila ena ‘vosa ena vosa’ (2 Nifai 28:30), sega ni taucoko ena dua ga na gauna. … Kakua ni vakasamataka na [vulici ni kosipeli] me dua na ka mo solia kina na nomu gauna ia me dua na ka sa ivakarau tiko mai ni nomu bula” (Veivakavulici ena iVakarau ni iVakabula, 12).