O Paulo o loo faalauina atu se tusi mai le falepuipui

9–15 Oketopa

Filipi; Kolose

“Ou Te Mafaia Mea Uma Lava i le Faamalosi Mai o Keriso Ia Te A’u”

O le a se taimi mulimuli sa e faitau ai i uunaiga faaleagaga sa e tusifaamaumauina i le taimi o au suesuega o le Feagaiga Fou? Atonu e aoga le toe faamanatu o uunaiga sa e maua.

Tusifaamaumau Ou Lagona Uuna‘i

Na tusi e Paulo ana tusi ia Filipi ma Kolose a o avea o ia ma se pagota i Roma. Ae o nei tusi e le o i ai le ituaiga leo lea e te ono faamoemoeina mai se tasi o i totonu o le falepuipui. Sa matele ina talanoa Paulo e uiga i le olioli, fiafia, ma le faafetai nai lo le talanoa e uiga i faigata ma tofotofoga: Fai mai o ia, “Ua talaiina atu ai Keriso, o le mea lea ua ou olioli ai, e moni ou te olioli ai lava” (Filipi 1:18). “Aua e ui lava ina ou le i ai ia te outou i le tino, a e peitai ou te i ai ia te outou i le agaga, o loo ou fiafia ma ou vaai atu … ma le mausali o lo outou faatuatua ia Keriso” (Kolose 2:5). O le mea mautinoa, “o le manuia foi mai le Atua” lea sa maua e Paulo i ona tulaga faigata, e “silisili lava i mea uma e manatu i ai” (Filipi 4:7), ae ui i lea e moni. I o tatou lava tofotofoga, e mafai ona tatou lagona lenei lava manuia ma le “olioli i le Alii e le aunoa” (Filipi 4:4). E mafai ona tatou faalagolago atoa atu, e pei ona sa faia e Paulo, ia Iesu Keriso, “o ia ua tatou maua ai le togiola” (Kolose 1:14). E mafai ona tatou fai atu, e pei ona sa fai mai o Paulo “Ou te mafaia mea uma lava i le faamalosi mai o Keriso ia te au” (Filipi 4:13; tagai foi Kolose 1:11).

aikona o suesuega faaletagata lava ia

Manatu mo Suesuega Faaletagata Lava Ia o Tusitusiga Paia

Filipi 2:5–11; Kolose 1:12–23

Ua faavae lo’u faatuatua ia Iesu Keriso.

Na saunoa Peresitene Russell M. Nelson e faapea, a taulai atu ana suesuega o tusitusiga paia i fuaiupu e uiga ia Iesu Keriso, na i ai se aafiaga tele ia te ia lea na ia lagona ai le pei o “se tagata ese!” (“Mauaina o le Mana o Iesu Keriso i o Tatou Olaga,” Liahona, Me 2017, 39). Mafaufau e mulimuli i lana faataitaiga a o e faitau i le Filipi ma le Kolose (tagai faapitoa i le Filipi 2:5–11; Kolose 1:12–23). O a mea ua e aoaoina e uiga i le Faaola? E mafai faapefea ona fesoasoani nei upumoni e te avea ai ma “se tagata [alii] ese” po o se tamaitai?

Filipi 2:12–13

Pe tatou te “galulue aiai … ina ia faaolaina [tatou]”?

E faaaoga e ni isi o tagata le fuaitau o le “galulue aiai … ina ia faaolaina outou” (Filipi 2:12) e lagolago ai le manatu e faapea, e nao a tatou lava taumafaiga e faaolaina ai i tatou. E faaaoga e isi aoaoga a Paulo “o le alofa tunoa ua faaolaina ai outou i le faatuatua” (Efeso 2:8) e faauiga faapea, e le manaomia ni galuega mo le faaolataga. Ae peitai, o loo manino le aoao mai a tusitusiga paia, e aofia ai tusitusiga a Paulo, i le manaomia uma o le alofa tunoa o Iesu Keriso ma taumafaiga a le tagata lava ia ina ia maua ai le faaolataga. Ma e oo lava i a tatou taumafaiga e galulue ai mo lo tatou faaolataga, “o le Atua, o ia le galue i totonu ia te outou” (Filipi 2:13; tagai foi Filipi 1:6; 2 Nifae 25:23; Bible Dictionary, “Grace”).

Filipi 3:4–14

E matuai aoga osigataulaga uma mo le talalelei a Iesu Keriso.

Sa tele mea na lafoai ese e Paulo ina ua liliu mai o ia i le talalelei a Iesu Keriso, e aofia ai le tulaga iloga sa ia umia i le faapotopotoga o tagata Iutaia, o le avea ma se Faresaio. I le Filipi 3:4–14, vaavaai mo le mea na maua e Paulo ona sa naunau o ia e faia ni ositaulaga mo le talalelei. Na faapei ona lagona e uiga i ana taulaga?

Ona e mafaufau lea i lo oe lava avea ma se soo. O le a se mea ua e ositaulagaina mo le talalelei a Iesu Keriso? O a ni mea na e mauaina? Pe o i ai nisi osigataulaga faaopoopo e te manatu e tatau ona e faia e avea ai o se soo tuuto atili o le Faaola?

Tagai foi 3 Nifae 9:19–20; Mataupu Faavae ma Feagaiga 58:2–5; Taylor G. Godoy, “Toe Tasi Lava le Aso,” Liahona, Me 2018, 34–36.

Filipi 4:1–13

E mafai ona ou maua le olioli ia Keriso, e tusa lava po o a ou tulaga.

O le olaga o Paulo o se faaaliga manino lelei lea o le upumoni na tautalagia e Peresitene Russell M. Nelson: “Afai o le taulaiga o tatou olaga e … ia Iesu Keriso ma Lana talalelei, e mafai ona tatou lagona le olioli e tusa lava po o a mea o tutupu—pe le o tutupu foi—i o tatou olaga. O le olioli e sau mai [ia te Ia] ma ona o Ia” (“Olioli ma le Ola ai Faaleagaga,” Liahona, Nov. 2016, 82).

Ao e faitau i le Filipi—ae maise lava le mataupu 4—saili mo faamatalaga e mafai ona fesoasoani e te maua ai le olioli i soo se tulaga o lou olaga. O le a se taimi sa e maua ai “le manuia mai le Atua” i se taimi sa luitauina? (fuaiupu 7). O le a se taimi na e maua ai le malosi “[mai ] ia Keriso” e fai ai ni mea faigata? (fuaiupu 13). Aisea e te manatu ai e taua le “toa filemu” i tulaga uma lava? (fuaiupu 11). E mafai faapefea e le faataitai i uiga faaalia o loo i le fuaiupu 8 ona fesoasoani ia te oe ia maua le olioli i ou tulaga?

Tagai Alema 33:23; Dieter F. Uchtdorf, “Ia Lotofaafetai i Soo Se Tulaga,” Liahona, Me 2014, 70–77.

Kolose 3:1–17

E oo ina “fou” soo o Iesu Keriso, a o latou ola i Lana talalelei.

E faapefea ona e iloa o loo fesoasoani Iesu Keriso ia te oe ia e avea ma se “alii [po o se tamaitai] fou”? O se tasi o auala e mafaufau loloto ai i lenei mea, o le vailiili o le Kolose 3:1–17 ma fai se lisi o uiga faaalia, uiga auaumama, ma faatinoga a le “tagata tuai” ma se isi lisi o uiga faaalia, uiga auaumama, ma faatinoga a le “tagata fou.”

Tusifaamaumau ou manatu e uiga i auala o loo sui ai oe e le Faaola, ina ia e toeiloiloina i le lumanai ma mafaufau loloto ai pe o a mai lou agai i luma.

aikona o suesuega faaleaiga

Manatu mo Suesuega Faaleaiga o Tusitusiga Paia ma Afiafi Faaleaiga

Filipi.Atonu e maitau e lou aiga le taua faafia o upu fiafia po o le olioli i le Filipi. Soo se taimi lava e te tau ai i se tasi o nei upu, e mafai ona e taofi ma talanoa po o le a le mea sa aoao mai e Paulo i le pe faapefea ona maua le olioli.

Filipi 2:14–16.E mafai faapefea ona tatou “pupula … o se malamalama i le lalolagi”?

Filipi 4:8.Atonu e mafai e tagata o le aiga ona faailoa mai ni mea e “manatunatu i [ai]” e fetaui ma faamatalaga o loo i le fuaiupu lenei (tagai foi Mataupu Faavae o le Faatuatua 1:13). O le a faapefea ona faamanuiaina lou aiga e ala i le mulimuli i le fautuaga a Paulo?

Kolose 1:23; 2:7.Atonu e mafai ona faitau e lou aiga nei fuaiupu ao saofafai faataamilo i se laau pe matamata i se ata o se laau (e pei o le laau o loo faaalia i le aotelega lenei). O le a le uiga o le ia “mausali” ma “mauaa” ia Keriso? E mafai faapefea ona tatou fesoasoani i le tasi ma le isi ia faamalosia o tatou aa faaleagaga?

Kolose 2:2–3.Atonu e fiafia lou aiga e faatumu se “pusa oloa” i mea e fatusa i “oloa” ma “oloa uma o le poto atoa ma le malamalama” e te maua i le talalelei.

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Viiga fautuaina: “Fiafia, o le Alii o le Tupu!,” Viiga,“ nu. 38.

Faaleleia o Lo Tatou Aoao Atu

Ola i lau molimau. “E te aoao atu mea o loo avea ai oe,” na aoao mai ai Elder Neal A. Maxwell. “O le a sili atu le manatuaina o ou uiga tulaga ese … nai lo o se upumoni faapitoa i se lesona faapitoa” (i le Teaching in the Savior’s Way,13).

laau ma ona aa e tele

Sa aoao mai Paulo o o tatou faatuatua e tatau ona “mauaa” ia Iesu Keriso (Kolose 2:7).