“8–14 Mei. Matiu 19–20; Mak 10; Luk 18: ‘?Wanem Samting Moa I Stap, we Mi Mi No Mekem Yet?’” Kam Folem Mi—Blong Wanwan Man, Woman mo Famli: Niu Testeman 2023 (2022)
“8–14 Mei. Matiu 19–20; Mak 10; Luk 18,” Kam Folem Mi—Blong Wanwan Man, Woman mo Famli: 2023
8–14 Mei
Matiu 19–20; Mak 10; Luk 18
?Wanem Samting Moa I Stap, we Mi Mi No Mekem Yet?”
Taem yu stap ridim Matiu 19–20, Mak 10, mo Luk 18, luklukgud long eni niu tingting long saed blong spirit, we yu kasem. Raetemdaon ol kwaet toktok ia blong Spirit, mo disaed olsem wanem bae yu putum olgeta long aksen.
Raetemdaon Ol Filing mo Tingting blong Yu
Sapos yu yu gat janis blong askem wan kwestin long Sevya, ?bae yu askem wanem? Wan yang rula i bin mitim Sevya blong fas taem, nao hem i askem: “?Tija, mi mi mas mekem wanem gudfala wok blong bambae mi save kasem laef ya we i no save finis?” (Matiu 19:16). Ansa blong Sevya i soem se Hem i save laekem ol gud samting we yang man ia i bin mekem finis, mo Hem i save leftemap tingting blong hem i mekem moa. Taem yumi tingting hevi se, i posibol o no, blong gat laef we i no save finis, maet bae yumi askem yumiwan nomo se i gat moa samting blong yumi mas mekem. Taem we yumi askem, long wei blong yumi: ?Wanem samting moa i stap we mi mi no mekem yet? (Matiu 19:20), Lod i save givim yumi ol ansa we oli blong yumiwan, semmak olsem ansa blong Hem i go long rij yang rula ia. I nomata wanem we Lod i askem yumi blong mekem, taem yumi tekem aksen folem ansa blong hem, bae i nidim yumi blong yumi trastem hem, i moa bitim stret mo gud fasin blong yumi, (luk long Luk 18:9–14) mo blong yumi kasem kingdom blong God olsem wan smol pikinini” (Luk 18:17; luk tu long 3 Nifae 9:22).
Sam Aedia blong Skripja Stadi blong Yuwan
Mared bitwin wan man mo wan woman, God nao i odenem.
Toktok go kam bitwin Sevya mo Ol Farisi, i wan long olgeta taem we Sevya i bin tij speseli abaot mared. Afta we yu ridim Matiu 19:3–9 mo Mak 10:2–12, mekem wan lis blong samfala toktok we yu filim se oli talem, long sot toktok, ol lukluk blong Lod long saed blong mared. Afta, stadi long samfala risos we yu save faenem long “Marriage” (Gospel Topics, topics.ChurchofJesusChrist.org), mo ademap moa toktok long lis blong yu. ?Olsem wanem save blong yu long saed blong plan blong fasin blong sevem man i tajem wei we yu tingting mo filim abaot mared.
?Weswe? ?Jisas i bin tijim se divos, oli no save akseptem, o we ol pipol we oli divos, oli no sapos blong mared bakegen?
Long toktok blong hem long saed blong divos, Presiden Dallin H. Oaks i tijim se tingting blong Papa long Heven long saed blong mared, i blong mared rilesensip i blong taem we i no save finis. Be, God i andastanem tu se, samtaem, i nid blong gat divos. Presiden Oaks i eksplenem se Lod “i letem ol pipol we oli divos blong oli mared bakegen mo oli no gat mak ia blong rabis fasin olsem we oli talem long hae loa. Be sapos wan memba we i divos i no mekem wan bigfala sin, nao hem i save kasem wan tempol rekomen folem ol sem standet blong stap klin inaf we i blong ol narafala memba tu” (“Divorce,” Liahona, May 2007, 70).
Matiu 19:16–22; Mak 10:17–22; Luk 18:18–23
Sapos mi askem Lod, bambae Hem i tijim mi wanem mi nidim blong mekem blong kasem laef we i no save finis.
Stori blong yang rij rula ia, i save givim wan taem blong spel, iven long disaepol ia we i fetful ful laef blong hem. Taem yu stap ridim Mak 10:17–22, ?wanem pruf yu luk, se yang man ia i fetful mo i tru? ?Olsem wanem nao Lod i filim abaot yang man ia?
Stori ia, maet i save pusum yuwan blong askem: ?Wanem samting moa i stap we mi mi no mekem yet? (Matiu 19:20). ?Long wanem wei nao Lod i stap helpem yumi blong mekemap wanem yumi no mekem yet? (luk long Ita 12:27). ?Wanem nao yumi save rere long hem blong yumi akseptem se bae Hem i stretem yumi, mo bae i helpem yumi taem yumi stap lukaot blong kam antap?
Luk tu long Larry R. Lawrence, “?Wanem Nao I Stap blong Mi Mekem Yet?,” Jeneral Konfrens, Oktoba 2015, ChurchofJesusChrist.org/general-conference/conferences?lang=bis; S. Mak Palmer, “Then Jesus Beholding Him Loved Him,” Liahona, May 2017, 114–16.
Evriwan i save kasem blesing ia blong laef we i no save finis, i nomata se wetaem nao oli akseptem gospel.
?Yu yu save putum yu long eksperiens ia blong eniwan we i kam blong wok long plantesen? ?Wanem lesen yu faenem se i blong yu insaed long stori ia? Mesej blong Elda Jeffrey R. Holland “The Laborers in the Vineyard” (Liahona, May 2012, 31–33) i save helpem yu blong yu luk ol niu wei blong yusum parabol ia long laef. ?Wanem moa samting nao Spirit i talem long yu?
Man blong Takis we I Wantem Sakem Sin mo Farisi we I Ting Hae long Hem, insaed long Tempol, i kam long Frank Adams
Mi mas trastem sore blong God be i no fasin blong mi blong stap stret mo gud.
?Hao nao bae yu save talemsot, ol samting we oli defren bitwin tufala prea insaed long parabol ia? Tingting hevi long wanem yu filim blong mekem blong kam moa olsem man blong tekem takis insaed long stori ia, mo i no tumas olsem Farisi ia.
Luk tu long Filipae 4:11–13; Alma 31:12–23; 32:12–16.
Ol Aedia blong Famli Skripja Stadi mo Haos Naet
-
Mak 10:13–16; Luk 18:15–17.Blong helpem ol memba blong famli oli tingting hevi long stori we i stap long ves ia, yu save singsing tugeta wan singsing, olsem “I Think When I Read That Sweet Story” (Children’s Songbook, 56). ?Yu ting se i olsem wanem blong stap olsem wan long ol pikinini ia we Jisas i bin blesem olgeta? ?Bae i minim wanem blong “kasem kingdom blong God olsem wan smol pikinini? (Mak 10:15).
-
Mak 10:23–27.? Wanem i defren bitwin blong gat ol rij samting, mo blong trastem ol rij samting? (luk long Mak 10:23–24). Taem yu stap ridim ves 27, yu save poen i go long Josef Smit Translesen: “Wetem man we i gat tras long ol rij samting, samting i no posibol; be hem i posibol blong ol man we oli trastem God mo oli lego evri samting from mi, from se, wetem fasin olsem evri samting ia oli posibol” (Luk long Joseph Smith Translation, Mark 10:26 [long Inglis, insaed long Mark 10:27, futnot a]). Olsem wan famli,?olsem wanem nao yumi save soem se yumi trastem God bitim ol samting blong wol ia?
-
Matiu 20:1–16.Blong soem ol prinsipol we oli stap long Matiu 20:1–16, maet bae yu save mekem wan simpol kompetisen, olsem wan sot resis. Afta we evriwan i finisim kompetisen ia, givim wan sem praes long evriwan, stat wetem hem we i kam laswan, mo yu en wetem hem we i kam faswan. ?Hemia i tijim wanem long yumi abaot huia i kasem ol blesing blong laef we i no save finis long plan ia blong Papa long Heven?
-
Matiu 20:25–28; Mak 10:42–45.?Wanem nao hem i mining blong sentens ia “Mo sapos wan long yufala i wantem kam bos blong yufala, hem i mas kam olsem slef nomo blong yufala”? (Matiu 20:27). ?Olsem wanem nao Jisas Kraes i eksampol blong prinsipol ia? ?Olsem wanem nao yumi save folem eksampol blong Hem insaed long famli blong yumi, insaed long wod o branj blong yumi, mo insaed long ol ples we yumi stap laef long hem?
-
Luk 18:1–14.?Wanem nao yumi lanem abaot prea long tufala parabol insaed long ol ves ia?
Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.
Wan singsing: “Dearest Children, God Is Near You,” Hymns, namba 96.
Stap Kam Antap long Stadi blong Yuwan
Faenem wan taem we i stret long yu. Plante taem, i isi moa blong lanem samting taem we yu save stadi ol skripja we i no gat man i kam stopem yu smol. Faenem wan taem we i stret long yu, mo mekem bes blong stadi oltaem long sem taem ia long evri dei.
Kraes mo Yangfala Rij Rula, i kam long Heinrich Hofmann