li trigo li ok re chi q’ole’k

20–26 marzo

Mateo 13; Lukas 8; 13

“Ani wan xxik, chi’ab’inq”

Naq nakawil Mateo 13 ut Lukas 8; 13, k’oxla chan ru naq taakawresi aawib’ re “rab’inkil” ut xtawb’al ru li raatin li Kolonel sa’eb’ li jaljookil ru aatin a’in. K’a’ru taab’aanu re xk’anjelankil li aatin a’in sa’ laa yu’am?

Tz’iib’a li nakak’oxla

Jun paay reheb’ lix yehom li Kolonel li q’axal jultikanb’il a’aneb’ li kok’ seraq’, jaljookil ru aatin yeeb’il reheb’. Maawa’eb’ yal kok’ seraq’ chirix li k’a’aq re ru re wulaj wulaj. Sa’eb’ a’an wan li nimla na’leb’ chirix lix awa’b’ejihom li Dios choq’ reheb’ li ani kawresinb’ileb’ xmusiq’. Jun reheb’ li xb’een jaljookil ru aatin li tz’iib’anb’il sa’ li Ak’ Chaq’rab’—li jaljookil ru aatin chirix laj awinel (chi’ilmanq Mateo 13:3–23—naxk’e qab’oqb’al chixtz’ilb’al rix chan ru qach’ool naq naqab’i li raatin li Dios. “Xb’aan naq ani nak’uluk,” chan li Jesus, “re a’an taak’eemanq, ut taawanq re xnimal chik li naab’alil (Mateo 13:10, chi jaltesinb’il ru xb’aan laj Jose Smith). Chi jo’kan, naq noko’ok chixtzolb’aleb’ li jaljookil ru aatin re li Kolonel—malaj k’a’ruhaq chik li kixk’ut—us naq taqatikib’ rik’in xtz’ilb’al rix li qach’ool, ut xk’eeb’al reetal ma “chaab’il li ch’och’ yooko chirawb’al wi’ li raatin li Dios” (Mateo 13:8) re taaruuq chi nimank, chi atz’umak, chi q’ano’k, ut chiruuchininkil li k’a’ru taa’osob’tesinq qe laa’o ut re li qajunkab’al chi naab’al.

reetalil li tzolok aajunes

Li na’leb’ re xtzolb’aleb’ li loq’laj hu aajunes

Mateo 13:3–23; Lukas 8:4–15; 13:6–9

Tento taawanq inch’ool chi kawresinb’il re xk’ulb’al li raatin li Dios.

K’a’ut naq wan hoonal naq li qach’ool naxk’ulub’a li yaal sa’ junpaat, ut wan hoonal naq ink’a’ naraj xk’ulub’ankil? Naq nakawil li jaljookil ru aatin chirix laj awinel, naru nakatxtenq’a chixk’oxlankil chan ru naq nakak’ul li na’leb’ naxk’e li Qaawa’. Maare us xb’een wa rilb’al li aatin sa’eb’ li raqal 3–8 re Mateo 13 rochb’een li wan sa’eb’ li raqal 18–23 b’ar wi’ ch’olob’anb’il xyaalal. K’a’ru naru taab’aanu re taawanq “chaab’il ch’och’ ” aawik’in? K’a’ruheb’ li “k’ix” li neke’ramok aawe chirab’inkil ut chixtaaqenkil chi yaal li raatin li Dios? Chan ru tatruuq chi numtaak sa’ xb’een li “k’ix” a’an?

Lix tzolb’al li jaljookil ru aatin a’in naru tatxtenq’a chixtawb’al ru li jaljookil ru aatin wan sa’ Lukas 13:6–9. B’ar wan li “quuchinihom” naxsik’ li Qaawa’? Chan ru naqach’olani li qach’och’ re naq “taa’uuchinq”?

Chi’ilmanq ajwi’ Mosiah 2:9; Alma 12:10–11; 32:28–43; Dallin H. Oaks, “Li jaljookil ru aatin chirix laj awinel,” Jolomil ch’utub’aj-ib’ re abril 2015.

Mateo 13:24–35, 44–52; Lukas 13:18–21

Eb’ li jaljookil ru aatin re li Jesus nikine’xtenq’a chixtawb’al ru lix k’iijik lix Iglees, ut li k’a’ru chalel choq’ re.

Li profeet aj Jose Smith kixk’ut naq li jaljookil ru aatin wan sa’ Mateo 13 naxch’olob’ lix k’iijik li Iglees sa’ roso’jikeb’ li kutan. Naru nakawil li raatin li profeet sa’ Enseñanzas de los Presidentes de la Iglesia: José Smith (2007), 309–321, naq taak’e reetal li neke’xk’ut li jaljookil ru aatin chirix lix Iglees li Qaawa’:

• Li trigo ut li yib’ aj pim (13:24–30, 36–43)

• Li riyajil li mostaas (13:31–32)

• Lix yu li kaxlan wa (13:33)

• Li muqmuukil b’ihomal, ut li q’ol terto xtz’aq (13:44–46)

• Li yooy (13:47–50)

• Laj eechal kab’l (13:52)

Chirix xk’oxlankileb’ li jaljookil ru aatin a’in, k’a’ru nakaweek’a naq tento taab’aanu re naq mas wi’chik yooqat chi tz’aqonk sa’ xk’anjel lix Iglees li Kristo sa’eb’ li kutan a’in?

Chi’ilmanq ajwi’ K’utul Raqal reheb’ li Loq’laj Hu, “Awa’b’ejihom re choxa malaj rawa’b’ejihom li Dios,” “Jaljookil ru aatin.”

saqi lemtz’ q’ol

Lix evangelio li Jesukristo a’an jun li “lemtz’ q’ol terto xtz’aq” (Mateo 13:46).

Mateo 13:24–30, 36–43

Eb’ li tiikeb’ xch’ool tento te’nimanq sa’ xyanqeb’ laj maak toj sa’ roso’jik li ruchich’och’.

Re xtz’ilb’al rix li jaljookil ru aatin a’in, naru xk’uub’ankil jun jalam-uuch, ut xtz’iib’ankil lix ch’olob’ankil sa’ Mateo 13:36–43 ut sa’ Tzol’leb’ ut Sumwank 86:1–7. Li yib’ aj pim yeeb’il resil a’an “jun pim wan xmay, li chanchan li trigo. Ink’a’ naru natz’ile’ rix ma trigo toj reetal naq xk’iik chi tz’aqal” (K’utul Raqal reheb’ li Loq’laj Hu, “Yib’ aj pim”). K’a’ru li na’leb’ sa’ li jaljookil ru aatin a’in li nakatreek’asi chi wank chi tiik chi paab’ank, us ta wan li maa’usilal sa’ li ruchich’och’?

Lukas 8:1–3

Chan ru naq eb’ li ixq ke’k’anjelak chiru li Kolonel?

“Wankeb’ li tzolom ixq li ke’b’eek rochb’een li Jesus ut eb’ li Kab’laju, li ke’tzolok rik’in li Jesus chirix li k’a’ru re li musiq’ej, ut ke’k’anjelak chiru rik’in li k’a’ru re li yu’am a’in. … Chirix xk’ulb’al lix k’utum li Jesus—li sahil esil re lix evangelio ut lix wankilal chi k’irtesink—eb’ li ixq a’in ke’k’anjelak ajwi’ chiru, ut ke’xk’e re a’an li k’a’ru reheb’ ut lix anchalileb’ xch’ool” (Hijas en mi reino [2017], 4–5). Eb’ li ixq li ke’taaqenk re li Kolonel jo’kan ajwi’ ke’xch’olob’ xyaalal a’an (chi’ilmanq Linda K. Burton, “Eb’ li ixq k’ojk’ookeb’ xnawom,” Jolomil ch’utub’aj-ib’ re abril 2017).

reetalil li tzolok jo’ junkab’al

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Mateo 13.Naq eb’ li komon sa’ li junkab’al yookeb’ chirilb’aleb’ lix jaljookil ru aatin li Kolonel, maare taawulaq chiruheb’ xyiib’ankil sa’ xk’a’uxl jun li jaljookil ru aatin chirix li k’a’ru nawb’il ru xb’aaneb’, re xk’utb’al li na’leb’ chirix lix awa’b’ejihom li choxa (li Iglees), rik’in roksinkil li k’a’aq re ru malaj li taaruuq chiruheb’.

Mateo 13:3–23; Lukas 8:4–15.Chirix rilb’al ru li jaljookil ru aatin chirix laj awinel, laa junkab’al naru naxtz’il rixeb’ li patz’om jo’eb’ a’in: K’a’ru naru tixk’e naq li “qoch’och’ ” (li qach’ool) jwal “pekaq” malaj “tixkamsi” li aatin? K’a’ru taqab’aanu re naq li qach’och’ chaab’ilaq ut taa’uuchinq?

Wi wankeb’ li kok’al li ka’ch’ineb’ xyu’am sa’ laa junkab’al, naru xpatz’b’al reheb’ li komon naq te’xk’utatq li na’leb’ chan ru xkawresinkil li qach’ool chirab’inkil li raatin li Dios, ut eb’ li jun siir chik naru te’xq’ehi k’a’ru yookeb’.

Mateo 13:13–16.Chan ru taatenq’aheb’ li komon sa’ laa junkab’al re te’xtaw ru naq aajel ru xk’ulb’al chi anchaleb’ xch’ool li raatin li Kristo? Re xk’utb’al li “xik li neke’a’b’in chi ch’a’aj,” naru taatz’ap lix xik junaq re laa junkab’al naq laa’at yooqat chirilb’al Mateo 13:13–16 chi ka’ch’in xyaab’ aakux. Jo’ k’ihal xtaw ru li komon sa’eb’ li raqal a’an? Chan ru naru taqate li qu, li qaxik, ut li qach’ool chiru li raatin li Dios?

Mateo 13:44–46.Chan ru naq juntaq’eeteb’ li wiib’ chi winq sa’eb’ li jaljookil ru aatin a’in? Ma wan chik k’a’ru tento raj taqab’aanu qajunes ut jo’ junkab’al re naq taawanq lix awa’b’ejihom li Dios xb’een wa sa’ li qayu’am?

Lukas 13:11–17.Ma xk’ulum anihaq re laa junkab’al b’ar wi’ xe’reek’a naq ink’a’ “neke’ru chi tiiko’k malaj chi wakliik”? Ma naqanaw ru ani li yoo chireek’ankil rib’ chi jo’kan? Chan ru taqatenq’a? Chan ru naq li Kolonel narisi li qayajel?

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “Li iyaj naqaw rajlal,” Eb’ li B’ich, 138

Xkawresinkil qib’ jo’ aj k’utunel

Xtzolb’al jun raqal. Sik’ ru jun raqal sa’eb’ li loq’laj hu li mas nawulak chiru laa junkab’al, ut b’oqeb’ li komon naq te’xtzol. Li Elder Richard G. Scott kixye, “Naq naqatzol jun raqal sa’eb’ li loq’laj hu, na’ok a’an choq’ jun qochb’een li ink’a’ nokoxkanab’ chirix xnumik li kutan” (“El poder de las escrituras,” Liahona, noviembre 2011, 6).

jun winq li yoo chi awk

Jaljookil ru aatin chirix laj awinel, xb’aan laj George Soper