li Jesus naxwaklesi jun winq sa’ xch’aat

27 febrero–5 marzo

Mateo 8; Markos 2–4; Lukas 7

“Laa paab’aal xkolok aawe”

Maatzol chi alinanb’il li loq’laj hu. K’e aahoonal chixtz’ilb’al rix rik’in tijok, us ta ink’a’ tatruuq chirilb’al chixjunileb’ li raqal. Chiruheb’ li hoonal a’an naru taak’ul li k’utb’esinb’il na’leb’ choq’ aawe.

Tz’iib’a li nakak’oxla

Jun li esil wan sa’ li Ak’ Chaq’rab’ a’an naq li Jesukristo a’an aj b’anonel. Wan naab’al li esil chirix li Jesukristo naq kixk’irtesiheb’ li yaj ut li lub’luukeb’—jun li ixq rik’in jolomb’ej, jo’kan ajwi’ xyum jun li ixq xmalka’an li kikam. K’a’ut naq jwal kixk’irtesiheb’ sa’ tib’elej? K’a’ru naqatzol rik’ineb’ li sachb’a-ch’oolej a’an? Jun lix yaalalil a’an naq li Jesukristo a’an li Ralal li Dios, ut wan xwankil sa’ xb’een chixjunil li k’a’aq re ru, ut sa’ xb’een ajwi’ lix rahil li qatib’el ut li qamajelal. A’ut jun chik xyaalalil choq’ qe natawman sa’ li raatin li Jesus choq’ reheb’ laj tz’iib’ li ink’a’ neke’paab’an: “Re naq teenaw naq li K’ajolb’ej wank xwankil sa’ ruchich’och’ re kuyuk sachok maak” (Markos 2:10). Chi jo’kan b’i’, naq taawil resil anihaq li mutz’, malaj jun li saqlep rix li nak’irtesiik, naru nakak’oxla li k’irtesiik—re musiq’ej jo’ ajwi’ re tz’ejwalej—li naru nakak’ul rik’in li Kolonel, ut naru nakawab’i a’an chixyeeb’al aawe, “Laa paab’aal xk’irtesink aawe” (Lukas 7:50).

reetalil li tzolok aajunes

Li na’leb’ re xtzolb’aleb’ li loq’laj hu aajunes

Mateo 8; Markos 2–3; Lukas 7

Li Kolonel naru chixk’irtesinkileb’ li rahilal ut li yajel.

Sa’eb’ li ch’ol a’in wankeb’ k’iila esil chirix li k’irtesink kixb’aanu li Kolonel rik’in sachb’a-ch’oolej. Naq nakatzoleb’ li k’irtesink a’in, k’e reetal ma wan li esilal choq’ aawe. Naru taapatz’ aawib’: K’a’ru naxk’ut li esilal a’in chirix li paab’aal chirix li Jesukristo? K’a’ru naxk’ut li esilal a’in chirix li Kolonel? K’a’ru naraj li Dios naq tintzol rik’in li sachb’a-ch’oolej a’in? A’ineb’ junjunq li eetalil, a’b’an wankeb’ naab’al chik:

• Jun winq saqlep rix (Mateo 8:1–4)

• Lix moos li centurion (Mateo 8:5–13; Lukas 7:1–10)

• Lix na’ rixaqil laj Pedro (Mateo 8:14–15)

• Jun winq sik (Markos 2:1–12)

• Jun winq chaqi li ruq’ (Markos 3:1–5)

• Lix yum li xmalka’an re Nain (Lukas 7:11–16)

Chi’ilmanq ajwi’ David A. Bednar, “Aceptar la voluntad y el tiempo del Señor,” Liahona, agosto 2016, 17–23; Neil L. Andersen, “Eb’ li rahob’tesinb’il,” Jolomil ch’utub’aj-ib’ re octubre 2018.

Markos 2:15–17; Lukas 7:36–50

Li Jesukristo moko kichal ta chixraqb’al aatin sa’ xb’eeneb’ laj maak, kichal b’an chixb’anb’aleb’.

Chirix rilb’aleb’ li raqal a’in chirix li kixb’aanu li Jesus rik’ineb’ laj tz’iib’ ut eb’ laj Fariseo, naru nakapatz’ aawib’ ma naru raj wanqat aran. Jo’ jun eetalil, laa k’a’uxl malaj laa b’aanuhom—ma naxjuntaq’eeta rib’ rik’in lix b’aanuhom laj Simon aj Fariseo? Chan raj ru taach’olob’ chan ru naq li Jesus kirileb’ laj maak ut chan ru naq kirileb’ laj Fariseo jo’ laj Simon? K’oxla k’a’ ta wi’ ru neke’reek’a li rahob’tesinb’ileb’ xb’aan li maak naq wankeb’ rik’in li Kolonel. K’a’ru neke’reek’a naq wankeb’ aawik’in?

Naru nakatz’il rix k’a’ru juntaq’eetat wi’ rik’in li ixq wan resil sa’ Lukas 7:36–50. Jo’q’e xak’ul laa’at li chaab’ilal ut li uxtaan li kixk’ut li Kolonel chiru li ixq a’an? K’a’ru nakatzol rik’in li eetalil a’in chirix li paab’aal, li rahok, ut lix q’unal li ixq?

Chi’ilmanq ajwi’ Jwan 3:17; Lukas 9:51–56; Dieter F. Uchtdorf, “Li maatan re usilal,” Jolomil ch’utub’aj-ib’ re abril 2015.

Mateo 8:18–22; Markos 3:31–35

Li wank choq’ xtzolom li Jesukristo naraj naxye naq nink’e a’an xb’een wa sa’ lin yu’am.

Sa’eb’ li raqal a’in, li Jesus kixk’ut naq re toowanq choq’ xtzolom, tento taqak’e a’an xb’een wa sa’ li qayu’am, us ta wan naq taa’ajmanq ru xmayejankil li k’a’aq chik re ru wan xloq’al choq’ qe. Naq nakawileb’ li raqal a’in, k’oxla chan ru naq wankat jo’ xtzolom li Kristo. K’a’ut naq eb’ li tzolom tento naq te’xk’e li Kolonel xb’een wa sa’ xyu’ameb’? K’a’ru taa’ajmanq ru naq taamayeja re tatruuq chixk’eeb’al li Jesus xb’een wa sa’ laa yu’am? (Chi’ilmanq ajwi’ Lukas 9: 57–62.)

Mateo 8:23–27; Markos 4:35–41

Li Jesukristo wan xwankil chixk’amb’al chaq li tuqtuukilal sa’ xyiheb’ li kaq-sut-iq’ re li yu’am a’in.

Ma xaweek’a jun sutaq jo’ ke’reek’a lix tzolom li Jesus sa’ li kaq-sut-iq’ chiru palaw, naq ke’ril li ha’ chi ok sa’ li jukub’ ut ke’xpatz’, “At Tzolonel, Ma maak’a’ nakawaj wi’ naq too’oso’q?”

Sa’ Markos 4:35–41, taataw kaahib’ li patz’om. Tz’iib’a li junjunq, ut k’oxla k’a’ru naxk’ut chawu chirix xk’ulb’aleb’ li ch’a’ajkilal re li yu’am a’in rik’in paab’aal chirix li Jesukristo. Chan ru naq li Kolonel naxk’am chaq li tuqtuukilal sa’eb’ li kaq-sut-iq’ sa’ laa yu’am?

Chi’ilmanq ajwi’ Lisa L. Harkness, “Matchoqink, Ch’anaqat,” Jolomil ch’utub’aj-ib’ re octubre 2020.

li Jesus naxch’anab’ li kaq-sut-iq’

Chalen li xiw toj li paab’aal, xb’aan laj Howard Lyon

reetalil li tzolok jo’ junkab’al

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Mateo 8; Markos 2–4; Lukas 7.Naru nakatz’iib’a chixjunileb’ li sachb’a-ch’oolej neke’tawman sa’eb’ li ch’ol a’in. Sik’eb’ malaj taab’on junqaq reheb’ a’an (chi’ilmanq Hu reheb’ li Jalam-uuch re li Evangelio malaj ChurchofJesusChrist.org). Eb’ li komon re li junkab’al naru neke’roksi li eetalil b’onb’il re te’xwotz junaq reheb’ li sachb’a-ch’oolej ut li neke’xtaw ru chirix. Naru ajwi’ nakaye resil junaq li sachb’a-ch’oolej xawil malaj xawab’i sa’ li kutan a’in.

Che’ilmanq ajwi’ li video “La viuda de Naín” ut “Calma la tempestad” (ChurchofJesusChrist.org).

Mateo 8:5–13; Lukas 7:1–10.K’a’ru kitoch’ok xch’ool li Jesus chirix lix paab’aal li centurion? Chan ru naru taawanq qapaabʼaal chanchan a’an chirix li Jesukristo?

Markos 2:1–12.“Ch’ol 23: Li winq li ink’a’ naru chi b’eek” (sa’ Eb’ li Esil sa’ li Ak’ Chaq’rab’, 57–58, malaj li video sa’ ChurchofJesusChrist.org) naru tixtenq’a li junkab’al chixtz’ilb’al rix Markos 2:1–12. (Chi’ilmanq ajwi’ li video “Jesús perdona los pecados y sana a un paralítico” ChurchofJesusChrist.org.) Chan ru naru toowanq jo’eb’ li ramiiw li winq li ink’a’ naru chi b’eek? Aniheb’ li qamiiw chanchaneb’ a’an?

Markos 4:35–41.Ma naru li esilal a’in chixtenq’ankileb’ li komon sa’ li junkab’al naq wankeb’ xxiw? Maare te’ruuq chirilb’al li raqal 39 ut te’xwotz lix k’ulb’il na’leb’ b’ar wi’ li Kolonel xtenq’aheb’ chireek’ankil li tuqtuukilal.

Maare te’wulaq chiru li kok’al xk’oxlankil naq wankeb’ sa’ jun li jukub’ chiru li xiwxiwil palaw naq junaq yooq chirilb’al Markos 4:35–38. Naq jun li komon naril li raqal 39, naru neke’xk’oxla naq li jukub’ wan chik sa’ xb’een tuqtuukil ha’. Naru nekeb’icha junqaq li b’ich li na’aatinak chirix xtawb’al li tuqtuukilal rik’in li Kolonel, maare “Qaawa’, xwakli chik li iq’ ” (Eb’ li B’ich, 59). K’a’ru raqal re li b’ich naxk’ut chiqu li tuqtuukilal naxyeechi’i li Jesus?

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “Qaawa’, xwakli chik li iq’,” Eb’ li B’ich, 59.

Xkawresinkil qib’ jo’ aj k’utunel

Chatwanq rik’ineb’ ut chawab’iheb’. Wan naq li k’utuk q’axal chaab’il natikla naq wan li patz’om malaj li ch’a’ajkilal sa’ xch’ooleb’ li komon sa’ li junkab’al. K’eheb’ li komon sa’ laa junkab’al chixnaw rik’in laa waatin ut rik’in laa b’aanuhom naq wan aach’ool chirab’inkileb’. (Chi’ilmanq Li k’utuk jo’ li Kolonel, 16.)

li Jesus rik’in li winq wan chiru lix warib’aal, li kikub’siik chaq sa’ xb’een li ochoch

Li Kristo ut li winq sik, xb’aan laj J. Kirk Richards