E veivakavulici tiko o Jisu ena ulunivanua

E Vunau tiko o Jisu ena Ulunivanua, mai vei Gustave Doré

13–19 ni Feperueri

Maciu 5; Luke 6

“Dou Sa Kalougata”

Yadrava vakavinaka na vakanananu eso o sa ciqoma ni ko wilika na Maciu 5 kei na Luke 6, ka vola ena ivola ni veisiga ni vuli se ena so tale na sala. Na ituvatuva oqo e rawa ni vukei iko mo raica eso na ivakavuvuli bibi ena vei wase oqo, ia mo dolava tu na yalomu ki na so tale o na kunea ena nomu vuli.

Vola na Nomu Nanuma

Ena gauna oqo ni Nona veiqaravi, e sa matata ni ivakavuvuli i Jisu Karisito ena sega ni tautauvata kei na ka era dau rogoca tiko mai o ira ena Nona gauna. Era na ciqoma na dravudravua na matanitu ni Kalou? Era na taukena na yalomalua na vuravura? Sa kalougata ko ira era vakacacani? Era sega ni vakatavulica tiko o ira na vunivola kei na Farisi na vei ka oqo. Ia, o ira era kila vakaidina sara na lawa ni Kalou era kila na dina ena vosa ni iVakabula. “Me kenai isau ni mata na mata” ka “cata na nomu meca” era sa lawa lailai (Maciu 5:38, 43). Ia, a lako mai o Jisu Karisito me vakatavulica na lawa cecere (raica na 3 Nifai 15:2–10), e namaki me vukei keda ena dua na siga me “dou qai vinaka sara, me vaka sa vinaka sara na Tama[da] sa tiko mai lomalagi” (Maciu 5:48).

ivakatakilakila ni vuli ni tamata yadua

Vakasama Eso ni Vuli iVolanikalou ni Tamata Yadua

Maciu 5:1–12; Luke 6:20–26, 46–49

Na marau tawayalani e lako mai ni da bulataka na sala e vakatavulica o Jisu Karisito.

Na tamata kece era via marau, ia e sega ni o ira kece era na vakasaqara na marau ena vanua vata ga. Eso era vakasaqara ena veikaukauwa kei na itutu vaka vuravura, eso tale ena iyau se ena kena vakamamautaki na nodra vei gagadre vakayago. E lako mai o Jisu Karisito me vakatavulica na sala ki na marau tawayalani, ka me vakatavulica na ibalebale dina ni noda vakalougatataki. Na cava o sa vulica me baleta na marau tawayalani mai na Maciu 5:1–12 kei na Luke 6:20–26? E duidui beka vakacava na kena oqo mai na rai nei vuravura me baleta na marau?

Na cava e vakatavulica vei iko na vei tikina oqo, vata kei na Luke 6:46–49, me baleta na nomu na rawa ni tisaipeli i Jisu Karisito? Na cava o vakauqeti kina mo vakayacora me rawa ni o tauyavutaka kina na ivakarau ni bula e vakamacalataki tiko ena vei tikina oqo?

Raica talega na iDusidusi ki na iVolanikalou,“Beatitudes,” scriptures.ChurchofJesusChrist.org; “Sermon on the Mount: The Beatitudes” (vidio), ChurchofJesusChrist.org.

Maciu 5:13

“Oi kemudou na masima kei vuravura.”

Na masima e sa vakayagataki balavu tu mai me maroroya, vakaikanakana taka, ka vakasavasava taka na cava ga. Na masima e a tu talega na kena ibalebale vakalotu vei ira na kawa i Isireli. E semati vata tu kina ivakarau makawa ni sorovaki ni manumanu ena lawa i Mosese (raica na Vunau ni Soro 2:13; Tiko Voli ena Lekutu 18:19). Ni sa seyavu mai na tuituina ni masima, sa sega na kena kaukauwa, se “sa qai sega ni yaga ena dua na ka” (Maciu 5:13). E yaco oqo ni sa waki vata se sa vaka dukadukali taki mai na ka tani eso.

Nanuma tiko oqo ni o vakasamataka vakatitobu na Maciu 5:13. O na maroroya vakacava na kemu tuituina me vaka e dua na tisaipeli i Jisu Karisito? O na vakayacora vakacava na nomu cakacaka ni vei maroroi ka vei vakasavasavataki ni ko sa masima kei vuravura?

Raica talega na Vunau kei na Veiyalayalati 103:9–10.

masima

“Oi kemudou na masima kei vuravura” (Maciu 5:13).

Maciu 5:17–48; Luke 6:27–35

Na lawa i Karisito e cecere cake mai na lawa i Mosese.

Era kidroa beka na tisaipeli i Jisu ni ra rogoci Jisu ni tukuna ni gadrevi me vakalevutaki cake na nodra bula dodonu mai vei ira na vunivola kei na Farisi (raica na Maciu 5:20), o ira oqo era dau dokadokataka tu na nodra bulataka na lawa i Mosese.

Ni wilika na Maciu 5:21–48 kei na Luke 6:27–35, nanuma mo makataka na ivakarau ruarua oqo ena lawa i Mosese (“Dou sa rogoca ni sa …”) kei na veika sa vakatavulica o Jisu me laveti cake kina na itovo oqo. Na cava na vuna o nanuma kina ni ivakarau ni iVakabula e lawa cecere cake?

Me ivakaraitaki, na cava e vakatavulica o Jisu ena Maciu 5:27–28 esa noda itavi me baleta na noda vakanananu? Ena rawa vakacava mo lewa na vei vakanananu ena basika mai ena nomu vakasama kei na lomamu? (raica na Vunau kei na Veiyalayalati 121:45).

Raica talega na “Sermon on the Mount: The Higher Law” (vidio, ChurchofJesusChrist.org.

Maciu 5:48

E namaka dina vei au na Tamada Vakalomalagi me’u vinaka sara?

E vakatavulica o Peresitedi Russell M. Nelson:

“Na vosa na vinaka sara se perfect e vakadewataki mai ena vosa vaka-Kiriki na teleios, ka kena i balebale mo ‘taucoko.’ … Na vosa tawacava ni ivosavosa e cakacakataki wasoma na teleiono, e kena ibalebale me ‘yacova sara yani vakayawa, me taucoko na veivakatoroicaketaki, me vakaceceretaki, se me vakaotia.’ Yalovinaka me kilai tiko ni vosa oqo e sega ni tukuna tiko na ‘galala mai na cala’; e tukuna tiko ‘me rawati e dua na inaki sa tu sara mai liu.’

“… E vakavulica na Turaga, ‘Dou sa sega ni tu rawa ena iserau ni Kalou ena gauna oqo … ; o koya, mo dou vosota tikoga me yacova ni dou sa vinaka sara’ [Vunau kei na Veiyalayalati 67:13].

“Me da kakua ni yalolailai kevaka e sa veivakaocai se dredre na noda sasaga gumatua me da vinaka sara. Na vinaka sara ena veiwaraki tiko ga. Ena qai rawa ni yaco mai vakataucoko ni sa oti na Tucake tale ka na yaco ena na vukuna ga na Turaga. E waraki ira kece era lomani koya ka maroroya na nona ivunau” (“Perfection Pending,” Ensign, Nov. 1995, 86, 88).

Raica talega na 2 Pita 1:3–11; Moronai 10:32–33; Vunau kei na Veiyalayalati 76:69; Jeffrey R. Holland, “Be Ye Therefore Perfect—Eventually,” Liaona, Nove. 2017, 40–42.

ivakatakilakila ni vuli vakamatavuvale

Na Vakasama Eso Me Baleta na Vuli iVolanikalou Vakamatavuvale kei na Lotu Vakamatavuvale

Maciu 5:1–9.Na ivakavuvuli cava e vakatavulici ena Maciu 5:1–9 e rawa ni vukea na nomu vale me itikotiko marautaki? Ena rawa ni o digitaka e dua se rua na ka e bibi sara kina nomu matavuvale. Me vaka, na ivakavuvuli cava e rawa ni da kunea me vukei keda me da dauveisaututaki? (raica na Maciu 5:21–25, 38–44). Na lalawa cava eso eda rawa ni tuvanaka? Eda na qai talemuria tiko vakacava?

Maciu 5:13.Kania vata eso na kakana e vaka masima kei na kakana vata ga ka sega ni vakamasima. Na duidui cava eda na raica? Na cava na ibalebale ni “masima kei vuravura”? Eda na cakava vakacava na ka oqo?

Maciu 5:14–16.Me vukea na nomu vuvale me kila vinaka na ibalebale ni “rarama kei vuravura,” sa rawa ni o vakasaqara eso na ivurevure ni rarama ena nomu vale, nomu itikotiko raraba, vata kei vuravura. Ena rawa ni veivuke nio vakaraitaka na vei ka ena yaco ni o vunitaka na rarama. Na cava na kena ibalebale nia kaya o Jisu, “Oi kemudou na rarama kei vuravura”? (Maciu 5:14). O cei e sa bau vaka na rarama ki na noda matavuvale? Eda rawa vakacava ni da rarama ki vei ira tale eso? (raica na 3 Nifai 18:16, 24–25).

Maciu 5:43–45.Ni sa wilika tiko na nomu vuvale na vosa ni iVakabula ena vei tikina oqo, o na tukuna beka se o cei, vakatabakidua, o vakila ni rawa nio lomana, vakalougatataka, ka masulaka. Ena rawa vakacava me da vakalevutaka na noda lomani ira?

Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.

Sere vakaturi: “Cila, Cila,” iVolanisere ni Lalai, 96.

Vakatoroicaketaki ni Noda Veivakavulici

Dau wadrava vakavinaka na ka. “Nio yadrava na veika e yaco tiko ena nodra bula na luvemu, o na raica na vei madigi vakasakiti ni veivakatavulici. … Na vei ka [era] kaya se vei ka era taroga ena rawa talega ni veimuataki kina vei gauna eso ni veivakatavulici” (Veivakavulici ena iVakarau ni iVakabula, 16).

kadrala

“Oi kemudou na rarama kei vuravura” (Maciu 5:14).