Veivosaki o Jisu kei Nikotimo

6–12 ni Feperueri

Joni 2–4

“E Dodonu Mo Sucu Tale”

Nio wilika na Joni 2–4, ena vakavulici iko na Yalo ena vei ka me baleta na nomu saumaki. Vola toka na Nona veivakauqeti. O na rairai kunea eso na ikuri ni raititobu vakayalo mai na veivakasama ni vuli ena idusidusi oqo.

Vola na Nomu Nanuma

Ena dua na kanavata ni vakamau mai Kena, e vukica na Karisito na wai me waini—e dua na ka e vakatoka o Joni me “vakatekivu oqo ni cakacaka mana” (Joni 2:11). Oqori e dina saraga ena vuqa na kena vakasama. E dina ga ni oqori e imatai ni cakamana e a vakayacora e matana levu o Jisu, ena rawa talega ni ivakatakilakila ni dua na ivakatekivu ni cakamana—na cakacakataki ni yaloda me veisautaki me da vakataka vakalevu cake na noda iVakabula. Na cakamana ni bula oqo e tekivu mai na noda digitaka me da vakamuri Jisu Karisito, me da veisau ka bulataka e dua na bula e vinaka cake ka da na rawata mai Vua. Na cakamana oqo e rawa ni veisautaka saraga na bula ka yaco kina na “sucu tale” me dua vei ira na sala vinaka duadua me vakamacalataki kina (Joni 3:7). Ia na sucu tale sa itekitekivu ga ni salatu ki na bula vakatisaepeli. Na nona vosa na Karisito vua na marama ni Samaria ena tobu ni wai e vakananuma vei keda, ni kevaka eda na muria tikoga na salatu oqo, ena yaco me “mata ni wai” e lomada, “sa tovure ki na bula tawamudu” (Joni 4:14).

ivakatakilakila ni vuli ni tamata yadua

Vakasama Eso ni Vuli iVolanikalou ni Tamata Yadua

Joni 2:1–11

Na cakamana i Jisu Karisito “sa vakatakilai mai kina na nona lagilagi.”

Ni o wilika na nona a vukica na iVakabula na wai me waini ena Joni 2:1–11, sa rawa ni o rawata eso tale na raititobu ena nomu vakasamataka na nodra rai na tamata duidui era a tiko kina, oka kina o Meri, o iratou na tisaepeli, kei na so tale. Kevaka o sa vakadinadinataka na veika a yaco eke, na cava beka o na vakasamataka me baleti Jisu? Na cava e vakavulica vei iko na cakamana qo me baleta na Turaga?

Joni 3:1–21

E dodonu me’u na sucu tale me rawa ni’u curu kina matanitu ni Kalou.

Ena gauna e lako vuni mai kina o Nikotimo vei Jisu, e a vakadidike ena qaqarauni o koya. Ia e muri, a qai, taqomaki Jisu e matana levu (raica na Joni 7:45–52) ka qai tomani ira na dauvakabauta ena veibulu ni iVakabula (raica na Joni 19:38–40). Na ivakavuvuli cava so o kunea ena Joni 3:1–21 ka a rawa beka ni vakauqeti Nikotimo me vakamuri Jisu ka sucu tale?

A vakatavulica na Parofita o Josefa Simici, “Na sucu tale, e yaco mai ena Yalo ni Kalou ena cakacaka vakalotu” (Nodra iVakavuvuli na Peresitedi ni Lotu: Josefa Simici [2007], 95). Na itavi cava e a vakayacora na nomu papitaiso kei na veivakadeitaki—ena “sucu ena wai kei na Yalo Tabu” (Joni 3:5) ena nomu sucu tale? Na cava o sa cakava tiko me tomana tikoga kina na ikalawa oqo ni veisau? (raica Alama 5:11–14).

Raica talega na Mosaia 5:7; 27:25–26; David A. Bednar, “Ye Must Be Born Again,” Liaona, Me 2007, 19–22.

Joni 3:16–17

Na Tamada Vakalomalagi e vakaraitaka na Nona loloma vei au mai vei Jisu Karisito.

E vakatavulica o Elder Jeffrey R. Holland, “Na imatai ni dina cecere ni vei gauna tawamudu kece sa ikoya ni Kalou e lomani keda mai na vu ni Yalona igu, kei na kaukauwa” (“Tomorrow the Lord Will Do Wonders Among You,” Liaona, Me 2016, 127). O sa vakila vakacava na nona loloma na Kalou ena isolisoli ni Luvena?

Na sakaramede ena vakarautaka e dua na gauna me vakananumi vakatitobu kina na loloma ni Kalou kei na isolisoli ni Luvena. Na serenilotu cava ni sakaramede ena vukei iko mo vakila na loloma oqo? Na cava o rawa ni cakava me vakaibalebale cake kina na sakaramede?

Nio tomana tiko na nomu wilika na ivakavuvuli kei na veiqaravi ni iVakabula, tarogi iko se na vukei iko vakacava na veika o wilika mo kila ka vakila kina na loloma ni Kalou.

Joni 4:24

Na Kalou e Yalo?

Eso era na rawa ni veilecayaki ena vei ka e kaya o Jisu ni Kalou e yalo. Na iVakadewa nei Josefa Simici ena tikina oqo e vakarautaka e dua na veivakamatatataki bibi: “Sa yalataka na Kalou na Yalona vei ira era sa vakabauta dina” (ena Joni 4:24, ivakamacala e ra a). Na ivakatakila ena gauna oqo e vakavulica ni vakalewe kei na sui na Kalou (raica na Vunau kei na Veiyalayalati 130:22–23; raica talega na Vakatekivu 5:1–3; Iperiu 1:1–3).

Joni 4:5–26

E solia vei au o Karisito na Nona wai ni bula.

Na cava e vakaibalebaletaka o Jisu ni a kaya vua na marama ni Samaria ni o koya ga e gunuva na wai e solia o Koya ena sega ni via gunu tale ka tawamudu? Na kosipeli e tautauvata vakacava kei na wai ni bula?

na wai lailai

Na kosipeli i Karisito e wai ni bula ka vakabulabulataka na yaloda.

E dua na nona itukutuku na iVakabula vua na marama ni Samaria sa ikoya ni iwalewale ni noda sokalou e bibi cake mai na vanua eda sokalou kina (raica na Joni 4:21–24). Na cava o sa cakava tiko mo “lotu vakayalo ka vakaidina vei Tamada”? (Joni 4:23).

Raica talega na iDusidusi ki na iVolanikalou, “Worship,” scriptures.ChurchofJesusChrist.org; Dean M. Davies, “The Blessings of Worship,” Liaona, Nove. 2016, 93–95.

ivakatakilakila ni vuli vakamatavuvale

Na Vakasama Eso Me Baleta na Vuli iVolanikalou Vakamatavuvale kei na Lotu Vakamatavuvale

Joni 14:2.Ni wilika na nomu vuvale na vei wase oqo ena macawa oqo, vakaraica matua na nona vakayagataka na iVakabula na vei ka ni vei siga—sucu, cagi, wai, kei na kakana—me vakavulica na vei dina vakayalo. Na iyaya cava ena loma ni nomu vale o rawa ni vakayagataka mo vakavulica kina na vei dina vakayalo?

Nio vulica na vei wase oqo, navuca mo sarava vata na vidio ka vakaraitaka na vei ka oqo: “Jesus Turns Water into Wine,” “Jesus Cleanses the Temple,” “Jesus Teaches of Being Born Again,” kei na “Jesus Teaches a Samaritan Woman” (ChurchofJesusChrist.org).

Joni 2:13–17.Na veivakauqeti tawa savasava cava e gadreva na nomu vuvale me biuta tani mai loma ni nomu vale me rawa ni vanua tabu—me vaka na valetabu? Na cava o rawa ni cakava me tiko ga e tuba na vei ka oqori?

Joni 3:1–6.Veitalanoataka kei na nomu vuvale na cakacaka mana ni bukete kei na vakasucu—na cakacaka ni kena buli e dua na tamata bula, ka vuku sara. E vakatavulica o Karisito ni dodonu me da sucu tale ni bera ni da curu ki na matanitu ni Kalou. Na cava e ivakaibalebale vinaka sara kina na sucu tale me baleta na veisau e gadrevi vei keda ni se bera ni da curu ki na matanitu ni Kalou? Eda na sotava vakacava na cakacaka ni sucu tale vakayalo?

Joni 3:16–17.Sureti ira na lewe ni matavuvale me ra tukuna tale na tikina oqori ena nodra duivosa me vaka era vakamacalataka tiko vua e dua na itokani. Sa vukei keda vakacava o Jisu Karisito me da vakila na loloma ni Kalou?

Joni 4:5–15.Na cava a vakavulici keda tiko kina na iVakabula ena Nona vakatauvatataka na Nona kosipeli ki na wai ni bula? Ena vinaka beka me ratou raica na nomu vuvale eso na wai drodro ka vakamacalataka na ituvaki ni wai. Na cava eda gadreva kina me da gunu wai ena vei siga? Ena sala cava sa yaco kina na kosipeli i Jisu Karisito me vaka na “mata-ni-wai sa tovure ki na bula tawamudu”? (Joni 4:14)

Me ikuri ni itukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.

Sere vakaturi: “God’s Love,” Children’s Songbook, 97.

Vakatoroicaketaki ni Vuli ni Tamata Yadua

Vakaraica na ivakatakilakila. Na ivolanikalou e dau vakayagataka na iyaya, vei ka e yaco, se cakacaka me vakatakarakarataka na dina vakayalo. Na ivakatakilakila oqo e rawa ni vakavutuniyautaka na nomu kila vinaka na ivakavuvuli e vakatavulici tiko. Me vaka, na iVakabula e vakatauvatana na saumaki ki na sucu tale.

O Jisu kei na yalewa ni Samaria ena tobu ni wai

Na Wai ni Bula, mai vei Simon Dewey.