“23–29 Jenuware. Matiu 3; Mak 1; Luk 3: ‘Yufala I Mekem Rere Rod blong Hae God we I Masta blong Yumi.’” Kam Folem Mi—Blong Wanwan Man, Woman mo Famli: Niu Testeman 2023 (2022)
“23–29 Jenuware. Matiu 3; Mak 1; Luk 3,” Kam Folem Mi—Blong Wanwan Man, Woman mo Famli: 2023
Kala glas windo insaed long Nauvu Ilinoa Tempol, i kam long Tom Holdman
23–29 Jenuware
Matiu 3; Mak 1; Luk 3
“Yufala I Mekem Rere Rod blong Hae God we I Masta blong Yumi.”
Blong stat, ridim Matiu 3; Mak 1; mo Luk 3. Taem yu stap prea blong Tabu Spirit i helpem yu andastanem ol japta ia, bambae Hem i givim yu ol niu tingting we oli blong yu nomo. Raetemdaon ol tingting mo ol filing ia, mo mekem wan plan blong tekem aksen folem.
Raetemdaon Ol Filing mo Tingting blong Yu
Jisas Kraes mo gospel blong Hem, oli save jenisim yu. Luk i kwotem wan profesi blong bifo, we i kam long Aesea, we i tokbaot se taem Sevya bae i kam, bae hemia i mekem wanem long yumi: “Yufala i mas berem ol krik, mo ol bigbigfala hil wetem ol smosmol hil, yufala i mas flatemdaon olgeta evriwan. Olgeta rod we oli kruked, yufala i mas stretem olgeta, mo ol smosmol rod we oli no level gud, yufala i mas levelemgud olgeta” (Luk 3:5; luk tu long Aesea 40:4). Hemia i wan mesej blong yumi evriwan, wetem tu olgeta we oli ting se oli no save jenisim laef. Sapos wan samting we i stap oltaem olsem wan maonten, bae oli save flatemdaon, nao i tru nomo se Lod i save helpem yumi blong stretem ol kruked rod blong yumi (luk long Luk 3:4–5). Taem we yumi stap akseptem invitesen blong Jon Baptaes blong sakem sin mo jenisim laef, yumi stap mekem maen mo hat blong yumi i rere blong akseptem Jisas Kraes blong mekem se, yumi tu, yumi save “luk rod we God i mekem blong sevem man” (Luk 3:6).
Sam Aedia blong Skripja Stadi blong Yuwan
?Huia i Mak?
Long medel blong olgeta we oli bin raetem ol Buk blong Gospel ia, yumi no save tumas abaot Mak. Yumi save se hem i bin wan misinari fren blong Pol, blong Pita, mo blong ol nara misinari. Plante we oli skul mo stadi long Baebol, oli biliv se Pita i talem long Mak blong raetemdaon ol samting we oli bin hapen long laef blong Sevya. Gospel blong Mak, i luk olsem se oli bin raetem bifo ol nara trifala gospel.
Luk tu long Gaed long Ol Skripja: “Mak.”
Matiu 3:1–12; Mak 1:1–8; Luk 3:2–18
Fasin blong sakem sin i wan bigfala jenis long maen mo hat.
Misin blong Jon Baptaes i blong mekem rere hat blong ol pipol blong akseptem Sevya mo blong kam moa olsem Hem. ?Hao nao hem i mekem hemia? Hem i taltalemaot: “Yufala i mas tanem tingting blong yufala from ol sin blong yufala” (Matiu 3:2). Mo hem i yusum ol pikja olsem ol frut mo wit blong tij abaot fasin blong sakem sin (luk long Luk 3:9, 17).
?Wanem nara pikja nao yu yu faenem, we i stap long ol histri blong seves blong Jon Baptaes? (luk long Matiu 3:1–12; Mak 1:1–8; Luk 3:2–18). Tingting blong makem olgeta insaed long skripja blong yu, o droem ol pikja blong ol samting ia. ?Wanem nao ol pikja ia oli stap tijim yu abaot doktrin mo nid ia blong mas sakem sin?
Tru fasin blong sakem sin, hem i “wan jenis insaed long maen mo long hat we i mekem se wan i gat niufala fasin long fored blong God, hemwan, mo laef. … [Hem] i minim se wan bae i tanem baksaed blong hem long nogud fasin, mo i tanem hat blong hem mo tingting blong hem i go long God” (Gaed long Ol Skripja, “Sin, Sakem, Fasin blong Sakem Sin”). Long Luk 3:7–14, ?wanem jenis nao Jon bin askem o invaetem ol pipol blong mekem blong oli stap rere blong akseptem Kraes? ?Olsem wanem kaonsel ia i wok insaed long laef blong yu tu? ?Olsem wanem nao yu yu soem se yu bin sakem sin wetem tru tingting? (luk long Luk 3:8).
Luk tu long Russell M. Nelson, “Yumi Save Mekem Gud Moa mo Stap Gud Moa,” Liahona, Mei 2019, 67–69; Dallin H. Oaks, “Fasin blong Sakem Sin I Klinim Mi,” Liahona, Mei 2019, 91–94.
?Huia nao oli Ol Farisi mo Ol Sadusi?
Ol Farisi oli ol memba blong wan pati blong Jiu relijin, we oli praod long olgetawan from oli stap folem loa blong Moses i stret gud, mo oli stap folem ol tabu seremoni blong loa ia. Ol Sadusi, oli ol rijman blong ol Man Jiu we oli gat strong paoa long saed blong relijin mo politik; oli no biliv long doktrin blong laef bakegen long ded. Tufala grup ia, oli bin aot long stamba tingting biaen long ol loa blong God.
Luk tu long Matiu 23:23–28; Gaed long Ol Skripja, “Farisi, Ol,” “Sadusi, Ol.”
Matiu 3:11, 13–17; Mak 1:9–11; Luk 3:15–16, 21–22
Jisas Kraes i bin kasem baptaes blong Hem i “mekem stret mo gud fasin i hapen.”
Taem yu bin baptaes, yu bin folem eksampol blong Sevya. Komperem wetem wanem yu lanem aot long ol stori blong baptaes blong Sevya, mo wanem i bin hapen long taem blong baptaes blong yu.
|
Baptaes blong Sevya |
Baptaes blong Mi |
|---|---|
Baptaes blong Sevya ?Huia i baptaesem Jisas, mo wanem atoriti nao hem i bin holem? | Baptaes blong Mi ?Huia i baptaesem yu, mo wanem atoriti nao hem i bin holem? |
Baptaes blong Sevya ?From wanem Jisas i bin kasem baptaes? | Baptaes blong Mi ?From wanem yu yu bin kasem baptaes? |
Baptaes blong Sevya ?Long wanem wei nao Jisas i bin kasem baptaes? | Baptaes blong Mi ?Long wanem wei nao yu yu bin kasem baptaes? |
Baptaes blong Sevya ?From wanem Jisas i bin kasem baptaes? | Baptaes blong Mi ?From wanem yu yu bin kasem baptaes? |
Baptaes blong Sevya ?Olsem wanem nao Papa long Heven i bin soem se Hem i bin glad long Jisas? | Baptaes blong Mi ?Olsem wanem nao Papa long Heven i soem se Hem i bin glad taem yu bin baptaes? ?Olsem wanem nao Hem i soem se Hem i agri stat long tetaem ia kasem naoia? |
Luk tu long 2 Nifae 31; Mosaea 18:8–11; Doktrin mo Ol Kavenan 20:37, 68–74; “The Baptism of Jesus” (vidio), ChurchofJesusChrist.org.
Matiu 3:16–17; Mak 1:9–11; Luk 3:21–22
Ol memba blong Godhed, oli trifala seperet man.
Baebol i holem plante pruf se ol memba blong Godhed oli trifala seperet man. Ol histri blong baptaes blong Sevya, oli stap olsem wan eksampol. Taem yu stap ridim ol histri ia, tingting hevi long wanem yu bin lanem abaot gohed. ?From wanem ol doktrin ia oli impoten long yu?
Luk tu long Jenesis 1:26; Matiu 17:1–5; John 17:1–3; Ol Wok 7:55–56; Doktrin mo Ol Kavenan 130:22.
Ol Aedia blong Famli Skripja Stadi mo Haos Naet
-
Matiu 3.Jon Baptaes i bin kasem Aronik Prishud. ?Wanem nao yumi save lanem aot long eksampol blong Jon long saed blong stamba tingting blong Aronik Prishud? ?Wanem blesing nao yumi kasem from Aronik Prishud ia? Sapos yu gat wan yang man insaed long famli blong yu, maet bae yu tekem taem blong helpem hem blong hem i andastanem olsem wanem hem i save yusum Aronik Prishud blong blesem ol nara man. (Luk tu long Doktrin mo Ol Kavenan 13:1; 20:46–60.)
Taem yumi kasem baptaes, ol sin blong yumi, oli klinim o wasemaot olgeta.
-
Matiu 3:11–17; Mak 1:9–11; Luk 3:21–22.?I gat sam memba blong famli blong yu we oli bin luk wan i kasem baptaes o i kasem konfemesen blong kam memba blong Jos? ?Wanem nao ol memba blong famli oli bin filim? Maet yu save tijim olgeta long saed blong ol simbol blong baptaes mo blong konfemesen. ?Olsem wanem nao, blong kasem baptaes mo konfemesen, i olsem we yumi bon bakegen? ?From wanem nao yumi mas draon fulwan insaed long wota taem yumi kasem baptaes? ?From wanem yumi stap werem ol waet klos taem yumi kasem baptaes? ?From wanem presen we i Tabu Spirit, oli tokbaot olsem “baptaes blong faea”? (Doktrin mo Ol Kavenan 20:41; luk tu long Gaed long Ol Skripja: “Baptaes,” “Tabu Spirit”).
-
Matiu 3:17; Mak 1:11; Luk 3:22.?Wetaem nao yumi bin filim se God i bin glad long yumi? ?Wanem nao yumi save mekem olsem wan famli blong mekem God i glad?
Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.
Wan singsing: “Baptism,” Children’s Songbook, 100–101.
Stap Kam Antap long Stadi blong Yuwan
Askem Lod blong kasem sam help. Ol skripja, God i givim tru revelesen, mo blong rili andastanem olgeta yu nidim blong kasem revelesen we i blong yuwan. Lod i bin promesem: “Sapos yufala i wantem samting, yufala i mas … askem, mo yufala i mas … lukaot, nao bambae yufala i … faenem, mo yufala i mas … kilkilim doa, nao bambae doa i save open …” (Matiu 7:7).
Jon Baptaes I Stap Baptaesem Jisas, i kam long Greg K. Olsen