e ’utuāfare e paraparau ra nō ni’a i te mau pāpa’ira’a mo’a

Mau mana’o nō te ha’amaita’i i tā te ’utuāfare tuatāpapara’a pāpa’ira’a mo’a

’Ua riro te tuatāpapara’a pāpa’ira’a mo’a tāmau nō te ’utuāfare ’ei rāve’a nō te tauturu i tō ’outou ’utuāfare ’ia ha’api’i i te ’evanelia. E ’ere te rahira’a ’e te roara’a o te tai’ora’a ’utuāfare i te mea faufa’a a’e i te tāmaura’a i teie tauto’ora’a. ’A fa’ariro ai ’outou i te tuatāpapara’a pāpa’ira’a mo’a ’ei tuha’a faufa’a rahi o te orara’a ’utuāfare, ’a tauturu ato’a ai ’outou i te mau melo o te ’utuāfare ’ia ha’afātata a’e ia Iesu Mesia ’e ’ia patu i tō rātou ’itera’a pāpū i ni’a i te niu o tāna parau. Feruri i teie mau uira’a i muri nei :

• Nāhea ’outou e nehenehe ai e fa’aitoito i te mau melo o te ’utuāfare ’ia tuatāpapa i te mau pāpa’ira’a mo’a i tō rātou iho pae ?

• E aha tā ’outou e nehenehe e rave nō te fa’aitoito i te mau melo o te ’utuāfare ’ia fa’a’ite mai i tā rātou i ha’api’i ?

• Nāhea ’outou e nehenehe ai e tūra’i i te mau parau tumu i ’apohia mai i roto i te Faufa’a ’Āpī, i roto i te mau taime ha’api’ira’a o te mahana tāta’itahi ?

’A ha’amana’o ē, ’o te fare te vāhi tano roa a’e nō te ha’api’i i te ’evanelia. E nehenehe tā ’outou e ’apo ’e e ha’api’i i te ’evanelia i te fare mai tei ’ore e ’itehia i roto i te piha ha’api’ira’a. ’A feruri i te mau rāve’a ’āpī ’ia feruri ’outou i te mau rāve’a e tauturu i tō ’outou ’utuāfare ’ia ha’api’i i roto i te mau pāpa’ira’a mo’a. ’A fa’a’ohipa i te tahi o te mau mana’o i muri nei nō te ha’amaita’i i tā te ’utuāfare tuatāpapara’a pāpa’ira’a mo’a :

Fa’a’ite i te mau pāpa’ira’a mo’a faufa’a rahi

’A fa’ata’a nō te mau melo o te ’utuāfare i te taime nō te fa’a’ite i te tahi ’īrava tā rātou i ha’afaufa’a i roto i tā rātou iho tuatāpapara’a.

Fa’a’ohipa i tā ’outou iho mau parau

’A ani i te mau melo o te ’utuāfare ’ia ha’apoto nā roto i tā rātou iho mau parau i tā rātou i ’apo mai i roto i te mau pāpa’ira’a mo’a i tuatāpapahia.

Fa’a’ohipa i te mau pāpa’ira’a mo’a i tō ’outou orara’a

’Ia oti te tai’ora’a o te hō’ē tuha’a ’īrava, ’a ani i te mau melo o te ’utuāfare ’ia fa’a’ite mai i te mau rāve’a e fa’a’ohipa i teie tuha’a ’īrava i roto i tō rātou orara’a.

Ui i te uira’a

E ani i te mau melo o te ’utuāfare ’ia ui i te hō’ē uira’a nō ni’a i te ’evanelia ’ei reira e ’imi atu ai i te tahi mau ’īrava e nehenehe e pāhono i te uira’a.

Pia i te hō’ē ’īrava

E mā’iti i te hō’ē ’īrava faufa’a rahi nō ’outou ’e e pia i te reira i te vāhi e ’ite pinepine te mau melo o te ’utuāfare. E ani i te tahi atu mau melo o te ’utuāfare e fa’a’ohu nō te mā’itira’a i te ’īrava e pia.

Ha’amau i te hō’ē tāpura ’īrava

E mā’iti te ’utuāfare i te tahi mau ’īrava e paraparau i roto i te hepetoma i muri mai.

Tāmau ’ā’au i te mau ’īrava

’A mā’iti i te hō’ē tuha’a ’īrava faufa’a rahi nō te ’utuāfare, ’e ’a ani i te mau melo o te ’utuāfare ’ia tāmau ’ā’au i te reira nā roto i te fa’ahitira’a i te reira i te mau mahana ato’a ’aore rā nā roto i te tahi ha’uti nō te tāmau ’ā’au.

Fa’a’ohipa i te mau ha’api’ira’a tao’a

’A ’imi i te mau tao’a e tū’ati i te mau pene ’e te mau ’īrava tā te ’utuāfare e tai’o ra. E ani i te mau melo o te ’utuāfare ’ia paraparau nō ni’a i te huru te tao’a tāta’itahi e tū’ati i te mau ha’api’ira’a i roto i te mau pāpa’ira’a mo’a.

Mā’iti i te hō’ē tumu parau

E fa’a’ohu te mau melo o te ’utuāfare nō te mā’iti i te hō’ē tumu parau e tuatāpapa ’āmui te ’utuāfare. E fa’a’ohipa i te Arata’i nō te mau pāpa’ira’a mo’a (scriptures.lds.org) nō te ’ite mai i te tahi mau tuha’a ’īrava nō ni’a i te reira tumu parau.

Pāpa’i i te hō’ē hōho’a

E tai’o te ’utuāfare i te tahi mau ’īrava ri’i , ’ei reira e vaiiho i te tahi taime nō te mau melo o te ’utuāfare ’ia pāpa’i i te hō’ē hōho’a e tū’ati i te mea i tai’ohia. E fa’ata’a i te tahi taime nō te paraparau nō ni’a i te hōho’a a te ta’ata tāta’itahi.

Ha’uti ta’ata ora i te hō’ē ’ā’amu

’Ia oti te hō’ē ’ā’amu i te tai’ohia, ’a ani i te mau melo o te ’utuāfare ’ia ha’uti ta’ata ora i te reira. I muri iho, ’a paraparau nō ni’a i te huru teie ’ā’amu e tū’ati ra i te mau ’ohipa e tupu ra nō te ta’ata hō’ē ’e nō te ’utuāfare.

e ta’ata fa’aipoipo ruhiruhia e tai’o ra i te mau pāpa’ira’a mo’a

’Ua ha’api’i Elder David A. Bednar : « Te pure ’utuāfare tāta’itahi, te mau taime tāta’itahi nō te tai’ora’a ’utuāfare i te pāpa’ira’a mo’a, ’e te purera’a pō ’utuāfare tāta’itahi o te hō’ē ïa pēnira’a i ni’a i te paruai o tō tātou mau vārua. E ’ere paha te hō’ē ’ohipa i te mea fa’ahiahia ’aore rā e ha’amana’ohia. Mai te mau pēnira’a re’are’a ’e te ’auro ’e te ravarava ’o te turu te tahi i te tahi ’e ’o te fa’atupu mai i te hō’ē hōho’a pēni fa’ahiahia, e nehenehe ato’a ïa tā tātou ravera’a tāmau i te mau mea ha’iha’i e arata’i atu i te mau hotu vārua faufa’a rahi mau » (« Hau atu i te itoito ’e te ha’apa’o maita’i i roto i te ’utuāfare », Ensign ’aore rā Liahona, Nov. 2009, 19–20).