Ha’api’i i te mau tamari’i ri’i

Mai te peu e tamari’i ri’i tā ’outou i roto i te ’utuāfare, teie te tahi mau ’ohipara’a e nehenehe e tauturu ia rātou ’ia ’apo i te ha’api’ira’a :

• Fa’aro’o ’aore ha’uti ta’ata ora i te hō’ē ’ā’amu. E mea au roa nā te mau tamari’i ri’i te mau ’ā’amu—nō roto ānei i te mau pāpa’ira’a mo’a, te orara’a, te ’ā’amu o te ’Ēkālesia ’aore rā te mau ve’a a te ’Ēkālesia. E ’imi i te mau rāve’a nō te fa’aō ia rātou i roto i te fa’ati’ara’a ’ā’amu. E nehenehe tā rātou e tāpe’a i te mau hōho’a ’aore rā te mau tao’a, e pāpa’i i te hōho’a nō te mau mea tā rātou e fa’aro’o ra, e ha’uti ta’ata ora i te ’ā’amu ’aore rā e tauturu i te fa’ati’a i te ’ā’amu. E tauturu i tā ’outou mau tamari’i ’ia ’ite mai i te mau parau mau o te ’evanelia i roto i te mau ’ā’amu tā ’outou e fa’ati’a ra.

• Tai’o i te hō’ē ’īrava. E’ita paha te mau tamari’i e ’ite i te tai’o, e nehenehe rā e ani ia rātou ’ia ’apo i te ha’api’ira’a i roto i te mau pāpa’ira’a mo’a. Penei a’e e fa’aea noa ’outou i ni’a i te hō’ē noa ’īrava, hō’ē parau rahi ’aore rā hō’ē ta’o. E nehenehe ato’a tā rātou e tāmau ’ā’au i te hō’ē parau poto nō roto mai i te mau pāpa’ira’a mo’a ’ia fa’ahiti rātou i te reira i te tahi taime. ’A fa’aro’o ai rātou i te parau a te Atua, e putapū rātou i te Vārua.

• Hi’o i te hō’ē hōho’a ’aore rā māta’ita’i i te hō’ē video. ’Ia fa’a’ite ’outou i tā ’outou tamari’i i te hō’ē hōho’a ’aore rā te hō’ē video nō ni’a i te hō’ē parau tumu o te ’evanelia ’aore rā te hō’ē ’ā’amu o te pāpa’ira’a mo’a, ’a ui ia rātou i te tahi mau uira’a ’ia ’apo mai rātou i te ha’api’ira’a i roto i te mea tā rātou e hi’o ra. ’Ei hi’ora’a, e nehenehe e ui : « E aha te ’ohipa e tupu ra i ni’a i te hōho’a ’aore rā i roto i te video ? E aha te mana’o e tae mai ? » ’Ua riro te fa’anahora’a Vaira’a buka ’evanelia, te Biblevideos.lds.org, te medialibrary.lds.org ’e te children.lds.org ’ei mau vāhi maita’i nō te ’imi i te mau hōho’a ’e te mau video.

• Hīmene. Tē ha’api’i pūai nei Te mau hīmene ’e te mau hīmene i roto i te Buka hīmene nā te mau tamari’i i te ha’api’ira’a tumu. E tauturu i tā ’outou mau tamari’i ’ia fa’aau i te poro’i i roto i te mau hīmene i tō rātou orara’a. Ei hi’ora’a, e ui atu paha ’outou i te tahi mau uira’a nō ni’a i te mau ta’o ’aore rā te mau parau i roto i te hīmene. Ta’a ’ē noa atu te hīmene, e nehenehe tā ’outou mau tamari’i e rave i te mau ’ohipa e haere i ni’a i te mau hīmene ’aore rā e fa’aro’o i te mau hīmene tei fa’ata’i-marū-noa-hia ’a rave ai rātou i te tahi mau ’ohipara’a.

• Hāmani. E nehenehe te mau tamari’i e patu, e pāpa’i ’aore rā e fa’a’ū i te hō’ē mea e tū’ati i te ’ā’amu ’aore rā i te parau tumu tā rātou e ha’api’i ra.

• ’Āmui i roto i te mau ha’api’ira’a tao’a. E nehenehe te hō’ē ha’api’ira’a tao’a ’ōhie e tauturu i tā ’outou mau tamari’i ’ia māramarama i te hō’ē parau tumu o te ’evanelia e ’ere i te mea ’ōhie ’ia māramarama. ’Ia fa’a’ohipa ’outou i te mau ha’api’ira’a tao’a, e ’imi i te rāve’a ’ia ’āmui ato’a mai tā ’outou mau tamari’i. E ha’api’i rahi atu ā rātou i roto i te ’ohipara’a, rahi atu ā i te hi’o-noa-ra’a i te hō’ē fa’a’itera’a.

• Ha’utira’a ta’ata ora. ’Ia ha’uti ta’ata ora te mau tamari’i i te hō’ē ’ohipa e tupu i roto i tō rātou iho orara’a, e māramarama maita’i a’e rātou i te huru te hō’ē parau tumu o te ’evanelia e tano nō tō rātou orara’a.

• Nā ni’a iho i te mau ’ohipara’a. Penei a’e tītauhia ’ia fa’ahiti e rave rahi taime i te hō’ē ha’api’ira’a i te mau tamari’i ri’i nō te māramarama rātou i te reira. ’Eiaha e taiā ’ia nā ni’a iho fa’ahou ā i te mau ’ā’amu ’aore rā te mau ’ohipara’a. ’Ei hi’ora’a, e fa’ati’a ’outou i te hō’ē ’ā’amu o te pāpa’ira’a mo’a e rave rahi taime ma te huru ta’a ’ē—tai’o i roto i te mau pāpa’ira’a mo’a, ha’apoto nā roto i tā ’outou iho mau parau, fa’a’ite i te hō’ē video, ma te vaiiho i te mau tamari’i ’ia tauturu i tā ’outou fa’ati’ara’a ’ā’amu, ma te ani ia rātou ’ia ha’uti ta’ata ora i te ’ā’amu, ē nā reira noa.

  e mau metua e ha’api’i ra i te tamari’i ri’i