“Noveba 11–17. Iperiu 7–13: ‘E sa Bete Levu ena Ka Vinaka ena Muri Mai’” Lako Mai, Mo Muri Au—Me Baleti Ira na Tamata Yadua kei na Matavuvale: Veiyalayalati Vou 2019 (2019)
“Noveba 11–17. Iperiu 7–13,” Lako Mai, Mo Muri Au—Me Baleti Ira na Tamata Yadua kei na Matavuvale: 2019
Sa Masu Vakalougatataki Eparama o Melikiseteki, mai vei Walter Rane.
11–17 ni Noveba.
Iperiu 7–13
“E sa Bete Levu ena Ka Vinaka ena Muri Mai”
Ni o wilika na Iperiu 7–13, ena rawa ni o ciqoma na veivakauqeti mai na Yalo Tabu. Vakasamataka eso na sala o na rawa ni volai ira; me ivakaraitaki, ena rawa ni o vola na veika oqo ena idusidusi oqo, ena yasana lala ni nomu ivolanikalou, se ena Gospel Library app.
Vola na Veika o Vakauqeti Kina
O ira madaga na Yalododonu yalodina era dau sotava ena so na gauna na “veivakalialiai kei na veivakararawataki” ka dau rawa ni yavalata na nodra nuidei (raica na Iperiu 10:32–38). E kila tu o Paula ni o ira na Jiu era saumaki ki na Lotu Va-Karisito era sotava tiko na veivakacacani levu baleta na nodra vakabauta vou. Me vakauqeti ira me ra dina tiko kina nodra ivakadinadina, e a vakananuma tale kivei ira okoya o ira na dauvakabauta yalodina mai na gauna balavu e liu: mai vei Epeli, Inoki, Noa, Eparama, Serai, Josefa, Mosese—“e vaka na o era vakaraici keda” ni dina sara na yalayala ni Kalou ka sa yaga sara meda waraka (Iperiu 12:1). Na iyau ni vakabauta oqo e wasei mai vei ira kece era rai vei “Jisu [ni] o koya sa vakatekivuna ena sauma talega na noda vakabauta” (Iperiu 12:2). Baleti Koya, ena veigauna ena vinakata na meca meda “suka tani tale,” ena rawa “meda toro voleka yani ena yalodina kei na vakabauta dina sara” (Iperiu 10:22, 38). Vei keda, kei ira tale ga na Yalosavasava ni gauna makawa, o Jisu Karisito sa noda “bete levu ena ka vinaka ena muri mai” (Iperiu 9:11).
Vakasama eso ni Vuli iVolanikalou Yadua
Na Matabete i Melikiseteki sai koya na matabete e cecere.
Ena dua na gauna balavu, era vakayagataka tu na Jiu na Matabete Vaka-Livai, ka kilai talega me Matabete i Eroni. Ia ena taucoko ni kosipeli i Jisu Karisito e yaco mai kina na Matabete cecere i Melekiseteki, ka solia na veivakalougatataki e cecere cake. Na cava o vulica me baleta na Matabete i Melekiseteki mai na Iperiu 7? Oqo eso na ivakaraitaki ni dina o na rawa ni kunea:
-
Ai Vakadewa i Josefa Simici, Iperiu 7:3, 21:O ira era sa vakatikori ena Matabete i Melekiseteki “era sa vaka na Luve ni Kalou” ka ra sa “[bete] me tawamudu.”
-
Iperiu 7:11:Na Matabete vaka Livai e sega ni solia na veika “uasivi” sai koya oya e qai sosomitaki mai na Matabete i Melekiseteki (raica na VV 84:18–22).
-
Iperiu 7:20–21:Na Matabete i Melekiseteki e ciqomi ena veiyalayalati (raica na VV 84:19–44).
Na veivakalougatataki cava o sa ciqoma mai na Matabete i Melekiseteki kei na cakacaka vakalotu e sala vata kaya mai?
Raica talega na Alama 13:1–13; Vunau kei na Veiyalayalati 121:36–46; Gospel Topics, “Melchizedek Priesthood,” topics.lds.org; Guide to the Scriptures, “Melchizedek,” scriptures.lds.org; Henry B. Eyring, “Vakabauta kei na Bubului kei na Veiyalayalati ni Matabete,” Ensign se Liaona, Me 2008, 61–64; Dallin H. Oaks, “Na iDola kei na Lewa ni Matabete,” Ensign se Liahona, Me 2014, 49–52.
Na veicakacaka vakalotu ni veigauna makawa kei na gauna oqo era dusi vei Jisu Karisito.
O ira na kai Iperiu dina era wilika nai vola oqo era na rawa ni kila vinaka na vale tabu ni gauna makawa kei na cakacaka vakalotu e vakamacalataka o Paula. Ia, eso era sega ni kila vakataucoko ni inaki ni veicakacaka vakalotu oqo oya me ra dusia tiko na veisorovaki solibula nei Jisu Karisito.
Ena gauna ni vola tabu, ena dua na siga ni yabaki e vakananumi kina na Siga ni Veisorovaki, e dua na bete levu e curu yani kina vanua tabu duadua (se Vakatabui Vua na Kalou) ena valetabu e Jerusalemi ka cabora e dua na me se lami me sorovaki kina na ivalavala ca i Isireli. E vakamacalataka o Paula ni o Jisu Karisito e bete levu ka cabora e dua walega nai soro—Nona bula—me sorovaki kina nai valavala ca kei vuravura (raica na Iperiu 9:24–10:14).
Vakasamataka mada na veicakacaka vakalotu o vakaitavi kina nikua. E dusimaki iko vakacava na veicakacaka vakalotu oqori vei Jisu Karisito?
Mo vulica eso tale na ka me baleta na veicakacaka vaka Jiu kei na kena ivakatakilakila, raica na vidio na “The Tabernacle” kei na “Sacrifice and Sacrament” (LDS.org).
Na vakabauta sa ikoya na dinati ni yalayala ni Kalou.
Kevaka e dua e tarogi iko mo vakamacalataka na vakabauta, na cava o na kaya? Sister Anne C. Pingree, lewe eliu ni mataveiliutaki Raraba ni Soqosoqo ni Veivukei, e a vakayagataka na vosa eso mai na Ipiriu 11 me solia na ivakamacala oqo: “Na vakabauta, na kaukauwa vakayalo me cikevi kina na iyalayala e rawa ni laurai ‘vakayawa’ ia, ka na sega ni rawati ena bula oqo, e dua na ivakarau dei vei ira era vakabauta dina” (“Seeing the Promises Afar Off,” Ensign se Liaona, Nove. 2003, 14).
Navuca mo tauyavutaka na nomu ivakamacala ni vakabauta ni o vakasamataka vakatitobu na veivakasama eso ena Iperiu 11. Na cava e vakatavulica vei iko na nodra ivakaraitaki o ira era tukuni tiko ena veiwase oqo me baleta na vakabauta? (Raica talega na Ica 12:6–22.)
Raica talega na Alama 32: 21, 26 – 43; Jeffrey R. Holland, “An High Priest of Good Things to Come,” Ensign, Nove. 1999, 36–38; Gospel Topics, “Vakabauti Jisu Karisito,” topics.lds.org.
Eso na Vakasama me baleta na Vuli iVolanikalou Vakavuvale kei na Lotu Vakavuvale ena Moniti
Ni o wilika na ivolanikalou kei na nomu vuvale, ena rawa ni vukei iko na Yalo mo kila na ivakavuvuli cava mo vakabibitaka ka veivosakitaka me rawa ni sotavi kina na gagadre ni nomu vuvale. Oqo eso na vakatutu:
E rawa ni ko sureti ira na lewe ni vuvale me ra wasea na ka era sotava ni ra “vakararamataki” ena dina. Ena rawa vakacava ni vukei keda na veika sotavi oqo meda “kakua ni biuta laivi na [noda] vakadinata” ena gauna ni noda vakatovolei se vakatitiqa?
Ena rawa vakacava ni o vukei ira nomu lewe ni vuvale me ra vuli mai na nodra ivakaraitaki na yalodina e tukuni tiko ena Iperiu 11? Ena rawa ni kani marau me vakatasuasuataki eso vei ira na italanoa ni veivakaraitaki eso oqo. Se ena rawa ni veitalanoataka na nomu vuvale eso na ivakaraitaki ni tamata yalodina tale eso dou kila tu—oka kina na nomudou qase e liu, liuliu ni Lotu, kei ira na lewe ni nomu itikotiko.
Mai na itikina oqo, na cava e lomasoli kina o Jisu me vosota na rarawa kei na mosi ni kauveilatai? Na cava e vakavulica vei keda na ka oqo me baleta na noda rawa ni vosota na veivakatovolei? Peresitedi Russell M. E a solia eso na vakasama titobu o Peresitedi RussellM. Nelson ena tikina oqo ena nona itukutuku na “Reki kei na Bulabula Vakayalo” (Ensign or Liaona, Nove. 2016, 81–84).
Na cava e cudruvi ka vakadodonutaki keda kina na Turaga? Na cava era raica mai na lewe ni vuvale me baleta na sala e raica na Turaga me baleta na cudruvi ni dou vulica vata tiko na veitikina oqo? E veisautaka vakacava na veitikina oqo na nomu rai me baleta na nomu solia se ciqoma na veicudruvi?
Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.
Vakatorocaketaki Noda Veivakavulici
Vakayagataka na sere ivakatagi mo sureta na Yalo ka vulica na ivunau. Na Mataveiliutaki Taumada e kaya, “Na sere ivakatagi e sega ni yalani na kena kaukauwa me toroi [keda] yani ki na bula vakayalo e cecere cake.” (“Na ivakamacala taumada ni Mataveiliutaki Taumada,” Serenilotu, x). E dua beka na sere me baleta na vakabauta, me vaka na “Tudei ena Vakabauta” (Serenilotu, naba. 154), ena rawa ni vakuria na veitalanoa vakavuvale mai na Iperiu 11.
Na ivakatakilakila ni vale tabu ena gauna makawa kei na kena cakacaka vakalotu eso e vakatavulica na itavi i Jisu Karisito.