“Nobyembre 4–10. Mga Hebreohanon 1–6: ‘Jesukristo, ‘ang Tuboran sa Dayong Kaluwasan’’” Dali, Sunod Kanako—Alang sa mga Indibidwal ug mga Pamilya: Bag-ong Tugon 2019 (2019)
“Nobyembre 4–10. Hebreohanon 1–6,” Dali, Sunod Kanako—Alang sa mga Indibidwal ug mga Pamilya: 2019
Balsamo sa Galaad, ni Annie Henrie
Nobyembre 4–10
Mga Hebreohanon 1–6
Jesukristo, “ang Tuburan sa Dayong Kaluwasan”
Ang pagrekord sa espirituhanong mga impresyon makatabang nimo sa pag-ila unsa ang gustong itudlo sa Espiritu Santo kanimo. Ang pagsunod sa imong mga impresyon nagpakita sa imong pagtuo nga kadtong mga pag-aghat tinuod.
Irekord ang Imong mga Impresyon
Kitang tanan duna gyuy isalikway aron sa pagdawat sa ebanghelyo ni Jesukristo—bisan kanang dili maayong mga kinaiya, dili sakto nga mga pagtuo, dili maayo nga mga asosasyon, o uban pa. Alang sa mga Hentil, ang pagkakabig sa kasagaran nagpasabut sa pagbiya sa mini nga dios-dios. Alang sa Mga Hebreohanon (mga Judeo) ang pagkakabig ingon og, kon dili mas lisud, medyo komplikado. Human sa tanan, ang ilang gipakabililhon nga mga tradisyon gibase sa pagsimba sa tinuod nga Dios ug sa mga pagtulun-an sa Iyang mga propeta, nga diha sa liboan ka tuig. Apan ang mga Apostoles mitudlo nga ang balaod ni Moises natuman diha ni Jesukristo ug nga ang mas taas nga balaod karon mao ang sumbanan sa mga tumutuo. Ang pagdawat ba sa Kristiyanismo nagpasabut nga ang mga Hebreohanon kinahanglang mosalikway sa ilang unang mga pagtuo ug kasaysayan? Ang Sulat ngadto sa Mga Hebreohanon nagtinguha sa pagsulbad sa maong mga pangutana pinaagi sa pagtudlo nga ang balaod ni Moises, ang mga propeta ug ang mga ordinansa importante ang tanan, apan si Jesukristo mas importante pa (tan-awa sa Mga Hebreohanon 1:1–4; 3:1–6; 7:23–28). Gani, kining tanan nagtudlo ug nagpamatuod ni Kristo isip ang Anak sa Dios ug ang gisaad nga Mesiyas nga gihulat sa mga Judeo. Ang mensahe alang sa mga Hebreohanon, ug alang kanatong tanan, mao nga usahay kinahanglan natong isalikway ang mga tradisyon aron sa paghimo ni Jesukristo nga sentro sa atong pagsimba ug sa atong kinabuhi—kay pinaagi kini ni Kristo “aron kita makaangkon og kalooy” (Mga Hebreohanon 4:16).
Mga Ideya alang sa Personal nga Pagtuon sa Kasulatan
Kinsa ang nagsulat sa Sulat ngadto sa Mga Hebreohanon?
Ang ubang mga eskolar nakapangutana kon si Pablo ba ang nagsulat sa Sulat ngadto sa Mga Hebreohanon. Ang literary nga estilo sa Mga Hebreohanon medyo lahi gikan sa ubang mga sulat ni Pablo, ug ang labing unang mga bersyon sa teksto wala maghingalan sa tagsulat. Hinoon, tungod sa mga ideya nga gipadayag sa Mga Hebreohanon pareha sa ubang mga pagtulun-an ni Pablo, ang mga Santos sa Ulahing mga Adlaw, sa pagpadayon sa tradisyon sa Kristiyanismo, sa kinatibuk-an midawat nga si Pablo bisag gamay apil sa pagsulat niini nga sulat [epistola].
(Tan-awa sa Giya ngadto sa mga Kasulatan, “Espistola [Sulat] ni Pablo, Mga.”
Si Jesukristo mao ang “tukma nga hulad” sa Langitnong Amahan.
Daghang mga Judeo naglisud sa pagdawat ni Jesukristo isip Anak sa Dios. Ang Sulat [Epistola] ngadto sa Mga Hebreohanon nagtudlo nga ang tanan mahitungod ni Jesus nagpamatuod ug nagsunod sa ehemplo sa Iyang Amahan. Samtang magbasa ka sa unang lima ka kapitulo sa Mga Hebreohanon, mahimong ilista nimo ang mga titulo, mga tahas, mga hiyas ug mga buhat ni Jesukristo nga makita nimo nga gihisgutan. Unsa ang gitudlo niini nga mga butang kanimo mahitungod sa Manluluwas? Unsa ang gitudlo niini kanimo mahitungod sa imong Langitnong Amahan?
Unsa ang ikadugang sa mosunod nga pamahayag gikan ni Elder Jeffrey R. Holland sa imong pagsabut sa mga pagtulun-an niini nga mga kapitulo? “Si Jesus … mianhi aron sa pagpalambo sa panglantaw sa tawo kabahin sa Dios ug sa pagpangamuyo uban kanila sa paghigugma sa ilang Langitnong Amahan sama nga Siya sa kanunay naghigugma kanila ug mohigugma kanila. … Busa ang pagpakaon sa gigutom, pag-ayo sa masakiton, pagpanton sa pagkahipokrito, pagpangamuyo alang sa hugot nga pagtuo—kini mao ang Kristo nga nagpakita kanato sa agianan ngadto sa Amahan” (“Ang Kahalangdon sa Dios,” Liahona, Nob. 2003, 72).
Mga Hebreohanon 2:9–18; 4:12–16; 5:7–8
Si Jesukristo nag-antus og tintasyon ug mga sakit aron nga Siya makasabut ug makatabang kanako.
Gibati ba nimo nga “manuol kita sa trono sa grasya, aron makadawat kitag kalooy? (Mga Hebreohanon 4:16). Usa sa mensahe sa Epistola [Sulat] ngadto sa Mga Hebreohanon mao nga bisan pa sa atong mga sala ug mga kahuyang, ang Dios maduolan ug ang Iyang grasya makab-ot ra. Unsay imong nakita sa Mga Hebreohanon 2:9–18; 4:12–16; 5:7–8 nga nakapalig-on sa imong pagsalig nga si Jesukristo makatabang nimo sa imong mortal nga mga hagit? Ikonsiderar ang pagrekord diha sa journal sa imong mga hunahuna ug mga pagbati mahitungod unsay nahimo sa Manluluwas alang kanimo.
Tan-awa usab sa Mosiah 3:7–11; Alma 7:11–13; 34.
Aron sa pagdawat sa mga panalangin sa Dios, kinahanglan ko “nga dili mopagahi” sa akong kasingkasing.
Bisan og nakabig na sila ngadto sa Kristiyanismo, ang pipila sa mga Santos nga Judeo naglisud sa pagdawat sa hingpit sa ebanghelyo ni Jesukristo ug sa mga panalangin niini. Pinaagi sa pag-istorya pag-usab sa karaang mga Israelite, naglaum si Pablo sa pagdani sa mga Judeo sa paglikay sa sayop nga nahimo sa ilang katigulangan—nagsalikway sa mga panalangin sa Dios tungod sa ilang pagkawalay pagtuo. (Mabasa nimo ang istorya nga gipasabut ni Pablo sa Numeros 14:1–12, 26–35.)
Ikonsiderar sa unsa nga paagi nga ang Mga Hebreohanon 3:7–4:11 mahimong imong magamit. Sa paghimo niini, mahimo nimong pamalandongan ang mga pangutana nga sama niini:
-
Sa unsa nga paagi nga gipasuko sa mga Israelite ang Ginoo? (tan-awa sa Mga Hebreohanon 3:8–11). Unsa ang mga sangputanan sa pagbaton og gahi nga kasingkasing?
-
Kanus-a nako gitugutan ang akong kasingkasing nga mogahi? Aduna bay mga panalangin nga gusto sa Dios nga ihatag nako nga wala nako madawat tungod sa kakulang sa pagtuo?
-
Unsay akong mahimo sa pagpalambo og humok ug mahinulsulon nga kasingkasing? (tan-awa sa Ether 4:15; Mga Proverbio 3:5–6; Alma 5:14–15).
Tan-awa usab sa 1 Nephi 2:16; 15:6–11; Jacob 1:7–8; Alma 12:33–36.
Mga Ideya alang sa Pamilya nga Pagtuon sa Kasulatan ug Family Home Evening
Samtang magbasa ka sa mga kasulatan uban sa imong pamilya, ang Espiritu makatabang kanimo nga makahibalo unsa nga mga baruganan ang hatagan og gibug-aton ug hisgutan aron matubag ang mga panginahanglan sa imong pamilya. Ania ang pipila ka mga sugyot:
Sa unsa nga paagi nga gipakita ni Jesus nga Siya nahigugma sa pagkamatarung ug nasilag sa kadautan? Kon kita adunay dili matarung nga mga tinguha, unsay atong mabuhat sa pag-usab niini?
Makahunahuna ba ikaw og usa ka yanong butang nga gamiton aron matabangan ang imong pamilya nga makasabut unsay gipasabut sa mainitong pagtagad sa mga kamatuoran sa ebanghelyo “nga atong nadungog”? Mahimo nimong ihulagway kini gamit ang usa ka butang nga lisud gunitan. Sa unsa nga paagi nga ang atong mga paningkamot sa pagpadayon sa atong pagpamatuod sama sa pagdakop ug paggunit niini nga butang? Sa unsa nga paagi nga kita makasiguro “sa mga butang nga atong nadungog” nga dili “mawala” gikan kanato? (bersikulo 1).
Sa pagsuhid sa mga pulong “mag-uugda sa ilang kaluwasan,” mahimo nimong sugdan pinaagi sa paghisgot unsa ang mag-uugda (kapitan). Unsay buhaton sa usa ka kapitan? Sa unsa nga paagi nga si Jesukristo sama sa usa ka kapitan alang nato ug sa atong kaluwasan?
Kini nga mga bersikulo makatabang ninyo nga adunay panaghisgutan mahitungod sa unsay gipasabut nga tawagon sa Dios aron sa paghupot sa priesthood o sa pagtuman sa ubang mga calling sa Simbahan pinaagi sa usa ka tawo nga adunay awtoridad. Unsay atong makat-unan gikan sa ehemplo ni Jesukristo mahitungod sa pagdawat ug pagtuman sa mga calling?
Alang sa dugang nga mga ideya sa pagtudlo sa mga bata, tan-awa sa outline karong semanaha diha sa Dali, Sunod Kanako—Alang sa Primary.
Pagpalambo sa Personal nga Pagtuon
Sulayi ang nagkalain-laing mga paagi. Imbis magtuon sa mga kasulatan sa samang paagi, ikonsiderar ang lain-laing mga ideya sa pagtuon. Alang sa pipila ka mga ideya, tan-awa ang “Mga Ideya sa Pagpalambo sa Imong Personal nga Pagtuon sa Kasulatan” sa sinugdanan niini nga kapanguhaan.
Kristo Nagbisita sa Bag-ong Kalibutan, ni Walter Rane