Me 6–12 Luke 12–17; Joni 11: ‘Tou Mai Reki Vata; Ni’u Sa Kunea Na Noqu Sipi ka Yali ” Lako Mai, Mo Muri Au—Me Baleti Ira na Tamata Yadua kei na Matavuvale: Veiyalayalati Vou 2019 (2019)
Me 6–12 Luke 12 - 12 -17; Joni 11,” Lako Mai, Mo Muri Au—Me Baleti Ira na Tamata Yadua kei na Matavuvale: 2019
Na Gone Cidroi, mai vei Liz Lemon Swindle
6–12 ni Me.
Luke 12–17; Joni 11
“Tou Mai Reki Vata; Ni’u Sa Kunea Na Noqu Sipi ka Yali ”
Ni o wilika na Luke 12–17 kei na Joni 11, vakasaqara ena masu na cava e vinakata o Tamada Vakalomalagi mo kila ka cakava. Na nomu vulica na veiwase oqo e rawa ni dolava na lomamu ki na itukutuku eso ka baleti iko sara ga.
Vola na Nomu Veivakasama
Voleka ni ituvaki kece, e 99 mai na 100 e rawa ni nanumi ni uasivi–ia ka sega ga ke naba qori e baleti ira na gone lomani ni Kalou (raica na VV 18:10). Ni yaco oya, e dua mada ga na yalo e kacivi kina na vakasaqaqara vakamatailalai, yalogu “me kunea mada” (Luke 15:4), me vaka ka a vakatavulica na iVakabula ena vosavakaibalebale ni sipi ka yali. Sa na qai rawa ni tekivu na veirekitaki, baleta ni “sa levu vakakina na reki mai lomalagi ena vuku ni tamata ivalavala ca e le duabau sa qai veivutuni, ia ka lailai ga ena vukudra na tamata yalododonu e le ciwasagavulu kaciwa, sa sega ni yaga vei ira na veivutuni” (Luke 15:4–7 Kevaka e sega ni veidonui, e rawa ni veivuke me nanumi ni, e dina ga, ni sega sara e dua me “sega ni gadreva na veivutuni.” Eda gadreva kece na vueti. Ka da rawa ni vakaitavi kece ena veivueti, ka veirekitaki vata ena veiyalo yadudua e vakabulai (raica VV 18:15–16).
Vakasama eso ni Vuli iVolanikalou Yadua
E dodonu me’u vakadabera na lomaqu ena veika bibi tawamudu mai na ka ni vuravura oqo.
Na cava me kaya kina na Kalou “Ko iko na lialia” ki na tamata gugumatua, rawati koya ka tara na lololo lelevu ka vakatawa ena vua ni nona cakacaka? (raica na Luke 12:16–21). Ena veiwase oqo mai na Luke, e a vakatavulica na iVakabula eso na vosavakaibalebale ka rawa ni vukei keda meda laveta noda rai mai na ka ni vuravura ki na ka tawamudu. Eso vei ira na vosavakaibalebale oqo era tuvai eke. E rawa vakacava mo vakalekalekataka na itukutuku mai vei ira yadudua? Na cava o vakasamataka ni tukuna tiko vei iko na Turaga?
-
Na tamata vutuniyau lialia (Luke 12:13–21)
-
Na magiti levu (Luke 14:12–24)
-
Na gone cidroi (Luke 15:11–32)
-
Na dauniyau tawadodonu (Luke 16:1–12)
-
Na tamata vutuniyau kei Lasarusa(Luke 16:19 - 31)
Raica talega Maciu 6:19–34; 2 Nifai 9:30; Vunau kei na Veiyalayalati 25:10.
E reki ko Tamada Vakalomalagi ni ra sa kune ko ira ka yali tu.
Ko bau vakananuma li na cava e vakila o Tamada Vakalomalagi baleti ira ka ivalavala ca se me ra “yali”? Ko ira na Farisi kei na vunivola era vakalewai Jisu ni veimaliwai tiko mada ga kei ira vakaoqori. Ni sauma ko Jisu, e talanoataka e tolu na vosavakatautauvata, ka kunei ena Luke 15—na vosavakaibalebale ni sipi lako sese, na peni ka yali, kei na gone cidroi.
Ni ko wiliki ira na vosavakatautauvata oqo, navuca mo cakava e dua na ituvatuva ni kedra tautauvata kei na kedra duidui. Me ivakaraitaki, ko rawa ni vakaraica na ka e yali ka baleta na cava, e a kune vakacava, e vakacava nodra ivukivuki na tamata ni sa kune. Na cava so na itukutuku e tu vei Jisu me baleti ira era “sese” tu—wili kina o ira ka ra sega ni nanuma ni ra sese? Na cava Nona itukutuku vei ira era vakasaqarai ira era sa yali tu?
E dina ga, e vinaka cake sara ke me a kua ni la’ki yali tu. Me baleta na Luke 15:7, e vola o Elder James E. Talmage , “E sega ni dua na veivakadonui me na nanumi vei koya na veivutuni ni na vinaka cake vei koya na yalo savasava e sa vorata na ivalavala ca” (Jesus the Christ [1916], 461). Ia, o keda kece eda ivalavala ca ka gadreva na veivueti, ia na itukutuku veivakacegui ni iVakabula ena vosavakaibalebale oya ni o ikeda yadua e rawa ni da veivutuni ka lesu ki na ivalavala dodonu, ni sa vinakata na Kalou me kakua ni dua e rusa.
Raica talega na Vunau kei na Veiyalayalati 18:10 – 16; Jeffrey R. Holland, “Na gone cidroi,” Ensign, Me 2002, 62 – 64.
Na Tiki ni Siliva ka a Yali, mai vei James Tissot
Na cava e a vakatavulica tiko na Karisito ena vosavakatautauvata ni dauniyau tawadodonu?
E a vakamacalataka o Elder James E. Talmage e dua na lesoni e rawa ni vulica mai na vosavakaibalebale: “Mo gumatua tiko, ni na siga ko rawa ni vakayagataka kina nomu iyau vakavuravura ena yali kusarawa. Vuli mai vua mada na tawadodonu kei na tamata ca; kevaka era sa yalomatua ni vakavakarau me baleta na mataka duadua ga ka ra kila, sa dodonu cake kina o iko, ni ko vakabauta na icavacava tawamudu. mo vakavakarau kina! Kevaka ko se bera ni vulica na vuku kei na yalomatua ena vakayagataki ni ‘iyau sa sega ni dodonu’ ko na vakanuinuitaki vakacava ena iyau ka tu dede?” (Jesus the Christ, 464).
Na yalovakavinavinaka baleta noqu veivakalougatataki e kauti au voleka Vua na Kalou.
Kevaka o iko e dua vei iratou na tini na vukavuka, ko nanuma beka ni ko na rawa ni lesu mo la’ki vakavinavinakataka na iVakabula? Na ikuri ni veivakalougatataki cava e ciqoma na vukavuka yalovakavinavinaka baleta ni soli vakavinavinaka? E tarai iko vakayalo vakacava na nomu vakaraitaka na yalovakavinavinaka? E rawa ni yaga vei kemuni mo ni tekivu qo mo vola na veika o dau vakavinavinakataka ena dua na ivolaniveisiga, me vaka ni o Peresitedi Henry B. Eyring e vakamacalataki tiko ena nona vosa “O Remember, Remember” (Ensign se Liaona, Nove. 2007, 66 – 69).
Ko Jisu Karisito na Tucaketale kei na Bula.
Na cakacakamana ni nona vakaturi mai na mate ko Lasarusa e kaukauwa ka ivakadinadina sega ni rawa ni vakalasui ni ko Jisu e Luve ni Kalou vakaidina ka sa ikoya na Mesaia yalataki. Na vosa, matavosa, vakamatailalai cava ena Joni 11: 1–46 e vaqaqacotaka na nomu vakabauta ni ko Jisu Karisito e “tucaketale kei na bula”? E cakacakayaco vakacava na kila ka oqo ki na nomu bula kei na nomu digidigi?
Eso na Vakasama me baleta na Vuli iVolanikalou Vakavuvale kei na Lotu Vakavuvale ena Moniti
Ni o wilika na ivolanikalou kei na nomu vuvale, ena rawa ni vukei iko na Yalo mo kila na ivakavuvuli cava mo vakabibitaka ka veivosakitaka me rawa ni sotavi kina na gagadre ni nomu vuvale. Oqo eso na vakatutu:
Era sa kila beka lewe ni nomu vuvale na vakila ni vakayalia e dua na ka- se me sese? Ni ra tukuna na ka era sotava e rawa ni itekivu ni dua na veitalanoa me baleta na sipi lakosese kei na peni sa yali. Se ena rawa ni dou qitotaka e dua na qito me vuni e dua ka ra vaqarai koya na vo ni vuvale. E vukei kemudou vakacava na itaviqaravi qo mo dou kila vinaka na vei vosavakaibalebale oqo?
E rawa ni da vakai koya vakacava na tama ena italanoa oqo ni tiko o ira ka da lomana era sese tu? Na cava eda rawa ni vulica mai na ka e a sotava na luvena tagane qase ka na rawa ni vukei keda meda va-Karisito? Ena sala cava soti e sa vaka kina na tama ena vosavakatautauvata na Tamada Vakalomalagi?
Me vukei ira na lewe ni vuvale me ra vakayacora na itukutuku ni tini na vukavuka, e rawa ni o sureti ira mera na ivolaleleka ni yalovakavinavinaka ka biuta yavoki e vale. E rawa ni dou lagata vata na “Wilika Nomu Kalougata,” Serenilotu na. 144, ka veitalanoataka na veivakalougatataki e sa ciqoma nomu matavuvale.
Na lewe ni vuvale e rawa ni sarava na vidio “Sa Tucake Mai na Mate o Lasarusa” (LDS.org) ka wasea nodra ivakadinadina baleti Jisu Karisito.
Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.
Vakatorocaketaki ni Noda Veivakavulici
Vakayagataka na iTalanoa kei na iVakaraitaki me Vakavulici Kina na iVakavuvuli ni Kosipeli E dau vakavuvuli vakawasoma na iVakabula ena italanoa kei na vosavakatautauvata. Vakasamataka na ivakaraitaki kei na italanoa mai na nomu bula ka rawa ni cakava me bula mai kina nomu vuvale na ivakavuvuli vakosipeli (raica Vakatavuvuli ena Sala ni iVakabula, 22
Evei Ga Na Ciwa Tale, mai vei Liz Lemon Swindle