family looking at photo album

31 Tīsema–6 Sānuali.

ʻOku Tau Fatongia ʻAki ʻEtau Akó

Ko e taumuʻa ʻo e Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí ke tokoniʻi koe ke ke haʻu kia Kalaisi peá ke ului moʻoni ki Heʻene ongoongoleleí. ʻE ala tokoni ʻa e naunau ko ʻení ke mahino kiate koe ʻa e ngaahi folofolá mo maʻu ʻa e ivi fakalaumālie ʻokú ke fie maʻu mo ho fāmilí. Te ke mateuteu leva ʻi hoʻo ngaahi kalasi faka-Siasí ke ke vahevahe hoʻo ngaahi fakakaukaú mo fakalotolahiʻi e Kāingalotú ʻi heʻenau feinga ke muimui ʻia Kalaisí.

Lekooti e Ngaahi Ongo ʻOkú ke Maʻú

“Ko e hā ʻokú mo kumí?” Ko e fehuʻi ia ʻa Sīsū ki Heʻene ongo ākongá (Sione 1:38). Mahalo te ke ʻeke kiate koe ʻa e fehuʻi tatau—he ʻe fakatefito e meʻa te ke maʻu ʻi he Fuakava Foʻoú ʻi he taʻu ní ʻi he meʻa ʻokú ke fekumi ki aí. Ko e talaʻofa ʻa e Fakamoʻuí ke “kumi, pea te mou ʻilo” (Mātiu 7:7). Ko ia ʻeke e ngaahi fehuʻi ʻoku haʻu ki hoʻo fakakaukaú lolotonga hoʻo akó, peá ke fekumi faivelenga leva ki he ngaahi talí. Te ke lau ʻi he Fuakava Foʻoú kau ki ha ngaahi aʻusia fakalaumālie mālohi ʻa e kau ākonga ʻa Sīsū Kalaisí. ʻI hoʻo hoko ko e ākonga faivelenga ʻa e Fakamoʻuí, te ke lava ʻo maʻu ha aʻusia fakalaumālie mālohi ʻiate koe pē ʻi hoʻo tali e fakaafe ʻa e Fakamoʻuí, ʻa ia ʻoku hā ʻi he voliume toputapu ko ʻení, ke “Haʻu, ʻo muimui ʻiate au” (Luke 18:22).

personal study icon

Ngaahi fakakaukau ki hono Ako Fakataautaha ʻo e Folofolá

Kuo pau ke u tali e fakaafe ʻa e Fakamoʻuí ke “Haʻu, ʻo muimui ʻiate aú” kae lava ke u ako moʻoni meiate Ia.

Ko e fakaafe ʻa e Fakamoʻuí ke “Haʻu, ʻo muimui ʻiate aú,” ʻoku maʻá e tokotaha kotoa pē ia—ʻo tatau ai pē pe ko ʻetau toki foua ʻeni ʻa e hala ʻo e tuʻunga fakaākongá pe kuo tau ʻaʻeva maʻu pē ai ʻi he kotoa ʻo ʻetau moʻuí. Ko ʻEne fakaafe ʻeni ki ha tangata koloaʻia naʻá ne faifeinga ke tauhi e ngaahi fekaú (vakai, Mātiu 19:16–22). Ko e meʻa ne ako ʻe he tangata ko iá—mo e meʻa kuo pau ke tau ako kotoá—ʻoku ʻuhinga ʻa e hoko ko ha ākongá ke tau foaki kotoa hotau laumālié ki he Tamai Hēvaní mo Sīsū Kalaisi. ʻOku tau tupulaki ʻi hotau tuʻunga fakaākongá ʻi heʻetau ʻiloʻi ʻa e meʻa ʻoku tau masiva aí, pea liliu mo feinga ke muimui kakato ange kiate Kinaua.

ʻOku kamata ʻa e ako mei he Fakamoʻuí ʻi he taimi ʻoku tau feinga ai ke mahino kiate kitautolu ʻa e meʻa naʻá Ne akoʻí. Hangē ko ʻení, ko e hā ha founga ʻoku fakaloloto ai hoʻo mahino ki he fakamolemolé, ʻi hoʻo vakai ki he ngaahi meʻa ko ʻení?

Ko e ngaahi akonaki ʻa e Fakamoʻuí (vakai, Mātiu 6:14–15; 18:21–35)

Ko ha sīpinga mei Heʻene moʻuí (vakai, Luke 23:33–34)

Ka neongo iá, he ʻikai kakato ʻetau akó kae ʻoua leva kuo tau muimui ki he Fakamoʻuí ʻaki hono moʻui ʻaki ʻa e meʻa naʻá Ne akoʻí. ʻE lava fēfē ke ke faʻa fakamolemole ange?

Kapau ʻokú ke fie ako lahi ange, ʻahiʻahiʻi ʻa e ʻekitivitī ko ʻení mo ha tefitoʻi moʻoni ʻe taha ʻo e ongoongoleleí, hangē ko e ʻofá pe loto-fakatōkilaló.

ʻOku ou fatongia ʻaki ʻeku akó.

Naʻe akoʻi ʻe ʻEletā David A. Bednar ʻo pehē: “ʻI heʻetau hoko ko e kau akó, kuo pau ke [tau] ngāue mo moʻui ʻaki ʻa e folofolá kae ʻoua ʻe hoko ko ha kau fanongo ʻataʻatā pē ʻo toki fekauʻi. ʻOkú ta hoko nai ko e ongo fakafofonga ʻoku ngāue mo fekumi ki he ʻiló ʻi he tui, pe ʻokú ta tatali pē ke toki akoʻi mo fakakounaʻi kitaua? … Ko e tokotaha ako ʻokú ne fakaʻaongaʻi ʻa e tauʻatāina ke filí ke ngāue ai ʻo fakatatau mo e ngaahi tefitoʻi moʻoní, ʻokú ne fakaava hono lotó ki he Laumālie Māʻoniʻoní mo fakaafeʻi ʻEne ngaahi akonakí, ʻa hono mālohi fakamoʻoní, pea mo ʻene fakapapauʻi ʻo e fakamoʻoní. ʻOku fie maʻu ki he ako ʻi he tuí, ha ivi lahi fakalaumālie, fakaʻatamai, mo fakatuʻasino ka ʻoku ʻikai ko e tali fakafiefiemālie pē.” (“Seek Learning by Faith,” Ensign, Sept. 2007, 64).

ʻOku ʻuhinga ki he hā ke ke fatongia ʻaki hoʻo akó? Fekumi ki ha ngaahi tali ʻi he lea ʻa ʻEletā Petinaá mo e ngaahi potufolofola ko ʻení: Sione 7:17; 1 Tesalonika 5:21; Sēmisi 1:5–6, 22; 2:17; 1 Nīfai 10:17–19; 2 Nīfai 4:15; ʻAlamā 32:27; mo e Tokāteline mo e Ngaahi Fuakava 18:18; 58:26–28; 88:118. Ko e hā ʻoku ueʻi koe ke fai ke longomoʻui ange ai hoʻo ako e ongoongoleleí?

ʻOku fie maʻu ke u ʻiloʻi ʻa e moʻoní ʻiate au pē.

Mahalo ʻokú ke ʻiloʻi ha niʻihi ʻoku hangē ʻoku ʻikai teitei molé ʻenau tuí, ʻo tatau ai pē pe ko e hā e meʻa ʻe hoko ʻi heʻenau moʻuí. Mahalo te nau fakamanatu atu kiate koe ʻa e kau tāupoʻou poto ʻe toko nima ʻi he talanoa fakatātā ʻa e Fakamoʻuí (vakai, Mātiu 25:1–13). Ko e meʻa ʻoku ʻikai te ke fakatokangaʻí ko ʻenau feinga faivelenga ke fakamālohia ʻenau fakamoʻoni ki he moʻoní. Kuo pau ke tau feinga faivelenga kotoa pē ke fakamālohia ʻetau fakamoʻoní koeʻuhí he ʻikai lava ke tau kole e fakauluí mei ha taha kehe, ʻo hangē ko ia ne ako ʻe he kau tāupoʻou valé.

Te tau maʻu mo tanumaki fēfē ʻetau fakamoʻoní? Hiki hoʻo ngaahi fakakaukaú ʻi hoʻo fakalaulauloto ki he ngaahi potufolofola ko ʻení: Luke 11:9–13; Sione 5:39; Sione 7:14–17; Ngāue 17:10–12; 1 Kolinitō 2:9–11; mo e ʻAlamā 5:45–46. (Vakai foki, “Testimony,” Gospel Topics, topics.lds.org.)

young woman by a path

Kuo pau ke tau takitaha maʻu ha fakamoʻoni maʻatautolu pē.

Ko e hā e meʻa ʻoku totonu ke u fai ʻi he taimi ʻoku ʻi ai haʻaku ngaahi fehuʻí?

Kuo pau ke ke fakakaukau ki ha ngaahi fehuʻi ʻi he taimi te ke fekumi ai ki ha ʻilo fakalaumālié. ʻE ala tokoni ʻa e ngaahi tefitoʻi moʻoni ko ʻení ke ke tali ʻaki e ngaahi fehuʻí ʻi ha founga ʻe langaki ai e tuí mo e fakamoʻoní:

1. Fekumi ki ha mahino ʻo fakafou ʻi he ngaahi maʻuʻanga tokoni kuo fokotuʻu fakalangí. Ko e ʻOtuá ʻa e tupuʻanga ʻo e moʻoni kotoa pē, pea ʻokú Ne fakahā ʻa e moʻoní ʻo fakafou ʻi he Laumālie Māʻoniʻoní, ngaahi folofolá, mo ʻEne kau palōfitá mo e kau ʻaposetoló.

2. Ngāue ʻi he tuí. Kapau ʻoku ʻikai maʻu e talí he taimi pē ko iá, falala ki he ʻEikí ke Ne fakahā e ngaahi talí ʻi he taimi totonu. Ka ʻi he taimi tatau, hokohoko atu pē hoʻo moʻui ʻaki ʻa e moʻoni ʻokú ke ʻosi ʻiloʻí.

3. Tauhi ha tūkufua ʻoku taʻengatá Feinga ke ke fakakaukau ʻo hangē ko e ʻafio ʻa e ʻEikí, kae ʻikai hangē ko e fakakaukau ʻa e māmaní. Fakakaukau ki hoʻo ngaahi fehuʻí ʻi he puipuituʻa ʻo e palani ʻa e Tamai Hēvaní ki he fakamoʻuí.

family study icon

Ngaahi Fakakaukau ki he Ako Fakafāmili e Folofolá mo e Efiafi Fakafāmili ʻi ʻApí

ʻI hoʻo lau mo ho fāmilí e folofolá, ʻe lava ke tokoniʻi koe ʻe he Laumālié ke ke ʻiloʻi ʻa e ngaahi tefitoʻi moʻoni ke fakamamafaʻi mo aleaʻí, kae lava ke feau e ngaahi fie maʻu ho fāmilí. Ko ha ngaahi fokotuʻu fakakaukau ʻeni:

Mātiu 13:1–23

Ko ha founga ʻe taha ke tokoni ai ki ho fāmilí ke nau mateuteu ke ako mei he Fuakava Foʻoú he taʻu ní, ko hano toe vakaiʻi ʻa e talanoa fakatātā ki he tangata tūtuuʻí. Mahalo naʻa fiefia ho fāmilí ke vakai ki ha ngaahi kelekele kehekehe ʻi homou ʻapí ke nau fakakaukauloto ai ki he kalasi kelekele kehekehe ʻoku fakamatalaʻi ʻi he talanoa fakatātaá. Ko e hā te tau lava ʻo fai ke tanumaki ha “kelekele lelei” ʻi hotau ʻapí? (Mātiu 13:8).

Kalētia 5:22–23; Filipai 4:8

“ʻOku mau faleʻi ʻa e mātuʻá mo e fānaú ke nau fakamuʻomuʻa taha ʻa e lotu fakafāmilí, efiafi fakafāmili ʻi ʻapí, ako mo e fakahinohinoʻi ʻo e ongoongoleleí, pea mo e ngaahi ʻekitivitī langaki moʻuí. Neongo pe ko e hā hono lelei mo taau ʻo e ngaahi fie maʻu pe ʻekitivitī kehé, ka kuo pau ke ʻoua naʻa tuku ke nau fetongi ʻa e ngaahi fatongia kuo fokotuʻu fakalangi ko e mātuʻá pē mo e fāmilí te nau lava ke fakahoko totonú” (“Letter from the First Presidency,” Liahona, Dec. 1999, 1).

Ko e kamataʻanga ʻo e taʻu foʻoú ko ha taimi lelei ia ke fai ai ha fakataha alēlea fakafāmili fekauʻaki mo hono fokotuʻu ha taumuʻa ke fakatefito ai homou ʻapí ʻi he ongoongoleleí. Ko e hā hoʻo fakakaukau ʻi hoʻo lau ʻa e ngaahi tāpuaki mo e faleʻi ʻoku hā ʻi he Kalētia 5:22–23 mo e Filipai 4:8? Mahalo te ke lava ʻo faʻu ha ngaahi pousitā ke fakapipiki ʻi he loto falé ke fakamanatu kiate koe hoʻo ngaahi taumuʻá.

Ki ha ngaahi fakakaukau lahi ange ki hono ako’i ‘o e fānaú, vakai ki he lesoni ʻo e uike ko ‘eni ʻi he Haʻu, ‘o Muimui ʻIate Au— Ki he Palaimeli.

Fakatupulaki e Ako Fakatāutahá

Kumi ki ha tokāteline. Ko e tokāteliné ko ha foʻi moʻoni taʻengata mo taʻefeliliuaki ia. Naʻe fakahā ʻe Palesiteni Boyd K. Packer ko e “taimi ʻoku mahino ai ʻa e tokāteline moʻoní, ʻokú ne liliu ʻe ia ʻa e tōʻonga moʻuí mo e ʻulungāngá” (“Little Children,” Ensign, Nov. 1986, 17). ʻI hoʻo ako mo ho fāmilí ʻa e folofolá, fekumi ki he ngaahi moʻoni ʻe tokoniʻi koe ke ke moʻui ʻo hangē ko e Fakamoʻuí.

Jesus Christ

Maama ʻo e Māmaní, tā ʻe Brent Borup

Christ leaving the tomb

Kuó Ne Toe Tuʻu, tā ʻe Del Parson