jemān im ajri ro rej naajdik ļaam̧ eo

Oktak Ej Mejān kajjik eo Ad

Jibadbad in unin aolep ekkatak im katakin ko an gospel eo ej n̄an kōkajoorļo̧k oktak eo ad im jipan̄ kōj erom āinwōt Jisōs Kraist. Kōn un in, n̄e jej ekkatak gospel eo, jejjab kappukōt wōt meļeļe ko rekāāl, jej kōņaan erom juon “men in kōm̧anm̧an ekāāl” (2 Korint 5:17). Meļeļein menin ej pedped ioon Jemedwōj Ilan̄ im Jisōs Krasit n̄an jipan̄ kōj ukōt būruwōd, ad kalimjōkļo̧k, jerbal ko ad, im lukkuun in piktok ko ad.

Bōtaab kain ekkatak gospel eo me ej kōkajoorļo̧k tōmak eo ad im tōlļo̧k n̄an kabwilōn̄lōn̄ eo an oktak ejjab kajju waļo̧k. Ej ererakļo̧k eļapļo̧k jān juon kūlaaj ruum̧ n̄an būruwōn kajjojo armej im im̧ōko. Ej aikuji jab m̧ūjkōk, kijejeto ko aolep raan n̄an meļeļe im mour kōn gospel eo. Oktak eo em̧ool ej aikuji kareel eo an Jetōb Kwojarjar.

Jetōb Kwojarjar eo ej tōl kōj n̄an m̧ool eo im ej kwaļo̧k kam̧ool kōn m̧ool jab in (lale Jon 16:13). Ej kōmeramļo̧k kōļmenļo̧kjeņ ko ad, kemouri meļeļe ko ad, im un̄ur būruwōd kōn revelesōn jān Anij, unin aolep m̧ool. Jetōb Kwojarjar eo ej karreoik būruwōd. Ej im̧we ilo kōj juon ikdeelel n̄an mour kōn m̧ool eo, im Ej unoojdikdik n̄an kōj wāween ko n̄an kōm̧m̧ane menin. Ilo m̧ool, “Jetōb Kwōjarjar eo … enaaj katakin [kōj] men otemjej” (Jon 14:26).

Kōn un kein, ilo kijejeto ko ad n̄an mour, ekkatak, im katakin gospel eo, jej aikuj m̧oktata im aorōk tata pukōt jemjerā eo an Jetōb. Mejān kajjik in ej aikuj kakien kāālet ko ad im tōl ļōmņak ko im jerbal ko ad. Jej aikuj pukōt jabdewōt men ej kūr kareel eo an Jetōb im joļo̧k jabdewōt men ej kadiwōjļo̧k kareel jab in—bwe jejeļā bwe eļan̄n̄e jemaron̄ in erreo n̄an pād im̧aan mejān Jetōb Kwojarjar eo, jemaron̄ barāinwōt erreo n̄an mour ilo im̧aan mejān Jemedwōj Ilan̄ im Nejin, Jisōs Kraist.