« ឧបសម្ព័ន្ធ គ ៖ សាក្សីបីនាក់ » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ព្រះគម្ពីរមរមន ឆ្នាំ ២០២០ ( ឆ្នាំ ២០២០ )
« ឧបសម្ព័ន្ធ គ » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ឆ្នាំ ២០២០
ឧបសម្ព័ន្ធ គ
សាក្សីបីនាក់
អស់រយៈពេលជាងប្រាំឆ្នាំ—ចាប់ពីពេលដែលទេវតាមរ៉ូណៃមកជួបនឹងយ៉ូសែប ស្ម៊ីធជាលើកដំបូង រហូតមកដល់ឆ្នាំ ១៨២៩—យ៉ូសែបគឺជាមនុស្សតែម្នាក់គត់ដែលអនុញ្ញាតឲ្យមើលឃើញផ្ទាំងចំណារមាស ។ រឿងនេះនាំឲ្យមានការរិះគន់ និងការបៀតបៀនយ៉ាងខ្លាំងមកពីអ្នកទាំងឡាយដែលជឿថាគាត់កំពុងបោកបញ្ឆោតប្រជាជន ។ ដូច្នេះសូមនឹកគិតអំពីអំណរដែលយ៉ូសែបមាន នៅពេលគាត់បកប្រែព្រះគម្ពីរមរមន គាត់បានរៀនដឹងថា ព្រះអម្ចាស់នឹងអនុញ្ញាតឲ្យអ្នកដទៃមើលឃើញផ្ទាំងចំណារ ហើយថាពួកគេនឹង « ធ្វើទីបន្ទាល់អំពីសេចក្ដីពិតនៃគម្ពីរនោះ និងការណ៍ទាំងឡាយដែលនៅក្នុងនោះ » ( នីហ្វៃទី២ ២៧:១២–១៤, សូមមើលផងដែរ នីហ្វៃទី ២ ១១:៣; អេធើរ ៥:២–៤ ) ។
នៅក្នុងខែ មិថុនា ឆ្នាំ ១៨២៩ អូលីវើរ ខៅឌើរី ដាវីឌ វិតមើរ និង ម៉ាទិន ហារីស បានសុំការអនុញ្ញាតឲ្យធ្វើជាសាក្សីបីនាក់ដែលព្រះគម្ពីរមរមនបានព្យាករ ។ ព្រះអម្ចាស់បានប្រទានតាមបំណងប្រាថ្នារបស់ពួកគេ ( សូមមើល គ. និង ស. ១៧ ) ហើយបានបញ្ជូនទេវតាមួយអង្គមកបង្ហាញផ្ទាំងចំណារដល់ពួកគេ ។ បុរសទាំងនេះត្រូវបានគេស្គាល់ថាជាសាក្សីបីនាក់ ហើយទីបន្ទាល់របស់ពួកគេត្រូវបានដាក់បញ្ចូលនៅក្នុងព្រះគម្ពីរមរមនគ្រប់ច្បាប់ ។១
ប្រធាន ដាល្លិន អេក អូក បានពន្យល់អំពីមូលហេតុដែលទីបន្ទាល់នៃសាក្សីបីនាក់មានការបញ្ចុះបញ្ចូលខ្លាំង ៖ « ទីបន្ទាល់នៃសាក្សីបីនាក់អំពីព្រះគម្ពីរមរមនឈរយ៉ាងរឹងមាំ ។ ពួកសាក្សីបីនាក់ម្នាក់ៗមានហេតុផល និងឱកាសជាច្រើនដើម្បីបដិសេធទីបន្ទាល់របស់គាត់ ប្រសិនបើវាជារឿងខុសឆ្គង ឬដើម្បីនិយាយមិនច្បាស់លាស់ដោយចេតនាស្ដីពីព័ត៌មានលម្អិត ប្រសិនបើមានរឿងមិនត្រឹមត្រូវណាមួយនោះ ។ ដូចដែលបានដឹង ដោយសារតែការមិនចុះសម្រុងគ្នា ឬការច្រណែនទាក់ទងនឹងថ្នាក់ដឹកនាំផ្សេងទៀតនៃសាសនាចក្រ នោះពួកសាក្សីម្នាក់ៗនៃសាក្សីទាំងបីនាក់ត្រូវបានកាត់កាលចេញពីសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ប្រហែលជាប្រាំឆ្នាំបន្ទាប់ពីការបោះពុម្ពផ្សាយនៃទីបន្ទាល់របស់ពួកគេ ។ អ្នកទាំងបីបានបំបែកផ្លូវគ្នា ដោយគ្មានចំណាប់អារម្មណ៍រួមដើម្បីគាំទ្រដល់ការប្រឹងប្រែងឃុបឃិតមួយឡើយ ។ ប៉ុន្តែរហូតដល់ចុងបញ្ចប់នៃជីវិតរបស់ពួកគេ—រយៈពេលពី ១២ ដល់ ៥០ឆ្នាំបន្ទាប់ពីការកាត់កាលចេញរបស់ពួកគាត់—គ្មាននរណាម្នាក់ក្នុងចំណោមពួកសាក្សីទាំងបីនេះបានងាកចេញពីទីបន្ទាល់របស់ខ្លួនដែលបានបោះពុម្ព ឬ និយាយអ្វីដែលបង្កើតភាពសង្ស័យណាមួយដល់សេចក្ដីពិតដ៏ពេញលេញរបស់វាឡើយ » ។ ២
រហូតមកដល់ចុងបញ្ចប់នៃជីវិតរបស់ពួកគេ សាក្សីបីនាក់ពុំរារែកនៅក្នុងសេចក្ដីស្មោះត្រង់របស់ពួកគេចំពោះទីបន្ទាល់ពួកគេអំពីព្រះគម្ពីរមរមនទេ ។
អូលីវើរ ខៅឌើរី
បន្ទាប់ពីទទួលបុណ្យជ្រមុជទឹកឡើងវិញមកក្នុងសាសនាចក្រ ហើយមិនយូរប៉ុន្មានពីមុនគាត់ទទួលមរណភាព អូលីវើរ បានជួបនឹងអ្នកផ្សព្វផ្សាយសាសនាម្នាក់ឈ្មោះ អែលឌើរ យ៉ាកុប ហ្គេត ដែលធ្វើដំណើរឆ្លងកាត់ រីចម៉ន្ដ រដ្ឋមីសសួរី នៅតាមផ្លូវទៅបម្រើបេសកកម្មនៅប្រទេសអង់គ្លេស ។ អែលឌើរ ហ្គេត បានសួរអូលីវើរអំពីទីបន្ទាល់របស់គាត់អំពីព្រះគម្ពីរមរមន ។ កូនប្រុសអែលឌើរ ហ្គេតបានប្រាប់អំពីប្រតិកម្មរបស់អូលីវើរ ថា ៖
« ការសួរគាត់ហាក់ដូចជាមានឥទ្ធិពលយ៉ាងខ្លាំងបំផុតទៅលើអូលីវើរ ។ គាត់ពុំឆ្លើយមួយម៉ាត់សោះ ប៉ុន្តែបានក្រោកឡើងពីកៅអីរបស់គាត់ភ្លាម រួចទៅយកប្រអប់សៀវភៅ យកព្រះគម្ពីរមរមនច្បាប់បោះពុម្ពដំបូងគេចេញមក បើកទៅត្រង់កន្លែងទីបន្ទាល់នៃសាក្សីបីនាក់ ហើយបានអានយ៉ាងឧឡារិកបំផុត ដែលគាត់បានដាក់ឈ្មោះគាត់ ជិតម្ភៃឆ្នាំមុន ។ គាត់មើលមកចំឪពុកខ្ញុំ រួចបាននិយាយថា ៖ ‹ យ៉ាកុប ខ្ញុំចង់ឲ្យអ្នកចងចាំអ្វីដែលខ្ញុំនិយាយទៅអ្នក ។ ខ្ញុំជិតស្លាប់ហើយ ហើយតើវាមានប្រយោជន៍អ្វីសម្រាប់ខ្ញុំដើម្បីកុហកអ្នកនោះ ? គាត់បាននិយាយថា ខ្ញុំដឹងថា ព្រះគម្ពីរមរមនត្រូវបានបកប្រែដោយអំណោយទាន និងព្រះចេស្តានៃព្រះ ។ ភ្នែករបស់ខ្ញុំបានមើលឃើញ ត្រចៀកខ្ញុំបានស្ដាប់ឮ ហើយការយល់ដឹងរបស់ខ្ញុំបានដឹងច្បាស់ ហើយខ្ញុំដឹងថាអ្វីដែលខ្ញុំបានថ្លែងទីបន្ទាល់គឺពិត ។ វាពុំមែនជាសុបិន្ដ ឬជាការស្រមើរស្រមៃឥតប្រយោជន៍នោះទេ — វាគឺជាការពិត ›» ។៣
ដាវិឌ វិតមើរ
នៅក្នុងឆ្នាំចុងក្រោយរបស់គាត់ ដាវីឌ វិតមើរ បានដឹងអំពីពាក្យចចាមអារ៉ាម ដែលថាគាត់បានបដិសេធទីបន្ទាល់របស់គាត់អំពីព្រះគម្ពីរមរមន ។ នៅក្នុងការឆ្លើយតបចំពោះការចោទប្រកាន់ទាំងនោះ ដាវីឌបានបញ្ជាក់អះអាងអំពីទីបន្ទាល់របស់គាត់ជាថ្មីនៅក្នុងសំបុត្រមួយដែលត្រូវបានបោះពុម្ពនៅក្នុងកាសែតក្នុងស្រុក ឈ្មោះ Richmond Conservator ៖
« ឥឡូវនេះ ខ្ញុំប្រាថ្នាចង់ឲ្យពិភពលោកអាចបានស្គាល់សេចក្ដីពិត ខ្ញុំរក្សាគោលជំហរខ្ញុំដដែលក្នុងប៉ុន្មានឆ្នាំចុងក្រោយនៃជីវិតខ្ញុំនេះ ហើយដោយការកោតខ្លាចព្រះ ដើម្បីចេញសេចក្ដីថ្លែងការណ៍ជាសាធារណៈនេះថា ៖
« ខ្ញុំពុំធ្លាប់បានបដិសេធទីបន្ទាល់ ឬមួយផ្នែកណានោះម្ដងណាឡើយ ដែលវាមានរយៈពេលយូរមកហើយចាប់តាំងពីត្រូវបានបោះពុម្ពនៅលើគម្ពីរនោះ ក្នុងនាមជាសាក្សីម្នាក់នៃសាក្សីបីនាក់ ។ អស់អ្នកដែលស្គាល់ខ្ញុំច្បាស់ បានដឹងច្បាស់ថាខ្ញុំតែងតែនៅប្រកាន់ខ្ជាប់ចំពោះទីបន្ទាល់នោះ ។ ហើយថាគ្មានមនុស្សណាម្នាក់អាចត្រូវបានដឹកនាំខុស ឬសង្ស័យចំពោះគំនិតយោបល់បច្ចុប្បន្នរបស់ខ្ញុំអំពីរឿងនេះឡើយ ខ្ញុំសូមបញ្ជាក់សារជាថ្មីអំពីសេចក្ដីពិតនៃគ្រប់សេចក្ដីថ្លែងការណ៍របស់ខ្ញុំ ដូចដែលបានថ្លែង និងបានចុះផ្សាយនោះ ។
« ‹ អស់អ្នកដែលមានត្រចៀក ចូរស្ដាប់ចុះ › វាពុំមែនជាជំនឿខុសឆ្គងឡើយ ! អ្វីដែលបានសរសេរត្រូវបានកត់ត្រាទុក— ហើយអ្នកដែលអាន សូមឲ្យគាត់បានយល់ » ។ ៤
ម៉ាទិន ហារីស
ដូចជា អូលីវើរ ខៅឌើរី ម៉ាទិន ហារីសបានចាកចេញពីសាសនាចក្រមួយរយៈ ប៉ុន្តែនៅទីបំផុតបានទទួលបុណ្យជ្រមុជទឹកឡើងវិញ ។ នៅក្នុងឆ្នាំចុងក្រោយរបស់គាត់ គាត់ត្រូវបានគេដឹងថាគាត់បានកាន់ព្រះគម្ពីរមរមនមួយច្បាប់នៅក្នុងដៃរបស់គាត់ ហើយថ្លែងទីបន្ទាល់អំពីសេចក្ដីពិតពេញលេញនៃព្រះគម្ពីរនេះទៅកាន់មនុស្សទាំងអស់ដែលនឹងស្ដាប់ ៖ « ខ្ញុំដឹងថា ព្រះគម្ពីរមរមនគឺពិតណាស់ ។ ហើយទោះជាមនុស្សទាំងអស់បដិសេធសេចក្ដីពិតនៃគម្ពីរនេះក្ដី ក៏ខ្ញុំពុំហ៊ានបដិសេធវាដែរ ។ ដួងចិត្តរបស់ខ្ញុំតាំងស្រេចហើយ ។ ឱព្រះ ដួងចិត្តរបស់ខ្ញុំតាំងស្រេចហើយ ! ខ្ញុំដឹងពិត ហើយយ៉ាងប្រាកដច្បាស់ » ។៥
ចច ហ្គតហ្វ្រី ជាអ្នកស្គាល់ម៉ាទីន បានសរសេរថា ៖ « ប៉ុន្មានម៉ោងមុនម៉ាទីនស្លាប់ … ខ្ញុំបានសួរ [ ម៉ាទីន ] បើសិនជាគាត់មានអារម្មណ៍ថា មានចំណែកតូចណាមួយ មិនទៀងត្រង់ ហើយបោកបញ្ឆោតនៅក្នុងអ្វីដែលត្រូវបានសរសេរ ហើយបានប្រាប់អំពី ការចេញមកនៃព្រះគម្ពីរមរមន ហើយគាត់បានតបដូចដែលគាត់តែងតែធ្វើ…រួចនិយាយថា ៖ ‹ ព្រះគម្ពីរមរមនពុំក្លែងក្លាយទេ ។ ខ្ញុំស្គាល់អ្វីដែលខ្ញុំដឹង ។ ខ្ញុំបានឃើញអ្វីដែលខ្ញុំបានឃើញ ហើយខ្ញុំបានឮអ្វីដែលខ្ញុំបានឮ ។ ខ្ញុំបានឃើញផ្ទាំងចំណារមាស ដែលព្រះគម្ពីរមរមនត្រូវបានឆ្លាក់ត្រា ។ ទេវតាមួយអង្គបានលេចមកជួបនឹងខ្ញុំ និងអ្នកដទៃទៀត ហើយថ្លែងទីបន្ទាល់អំពីសេចក្ដីពិតពេញលេញនៃកំណត់ត្រានេះ ហើយបើខ្ញុំបានថ្លែងកុហក ឬស្បថដោយខុសឆ្គងចំពោះទីបន្ទាល់ដែលខ្ញុំថ្លែងឥឡូវនេះ នោះខ្ញុំអាចក្លាយជាអ្នកមានម្នាក់ ប៉ុន្តែខ្ញុំមិនអាចថ្លែងទីបន្ទាល់ខុសពីអ្វីដែលខ្ញុំបានថ្លែងនោះទេ ហើយឥឡូវខ្ញុំកំពុងថ្លែងថារឿងទាំងនេះគឺជាការពិត » ។៦
« ដោយមាត់នៃពួកសាក្សីទាំងប៉ុន្មានដែលទ្រង់យល់ថាល្អគ្រប់គ្រាន់សម្រាប់ទ្រង់ »
ទីបន្ទាល់ទាំងឡាយរបស់ពួកសាក្សីបីនាក់ គឺមានចំណាប់អារម្មណ៍ជាពិសេសដើម្បីគិតអំពីបទពិសោធន៍របស់ពួកគាត់ទាំងនៅក្នុង និងនៅក្រៅសាសនាចក្រ ។ ៧ ទោះជាយ៉ាងណាក្ដី អូលីវើរ ដាវីឌ និង ម៉ាទីន ពុំដែលឈប់ថ្លែងទីបន្ទាល់អំពីអ្វីដែលពួកគេមានបទពិសោធន៍ ហើយថ្លែងជាសាក្សីថា ព្រះគម្ពីរមរមនត្រូវបានបកប្រែដោយអំណោយទាន និងព្រះចេស្ដានៃព្រះទេ ។ ពួកគេពុំមែនជាមនុស្សតែម្នាក់ប៉ុណ្ណោះទេ ។
កាលពីបុរាណ នីហ្វៃបានប្រកាសថា « ព្រះអម្ចាស់ដ៏ជាព្រះ ទ្រង់នឹងចាប់ផ្ដើមនាំពាក្យទាំងឡាយក្នុងគម្ពីរនោះចេញមក ហើយទ្រង់នឹងតាំងព្រះបន្ទូលនៃទ្រង់ ដោយមាត់នៃពួកសាក្សីទាំងប៉ុន្មាន ដែលទ្រង់យល់ថាល្អគ្រប់គ្រាន់សម្រាប់ទ្រង់ហើយ » ( នីហ្វៃទី ២ ២៧:១៤ ) ។ បន្ថែមទៅលើព្យាការី យ៉ូសែប ស៊្មីធ និងសាក្សីបីនាក់ ព្រះអម្ចាស់បានជ្រើសរើសសាក្សីប្រាំបីនាក់ទៀតដើម្បីមើលឃើញផ្ទាំងចំណារផងដែរ ។ ទីបន្ទាល់របស់ពួកគាត់ក៏មានដាក់បញ្ចូលនៅគ្រប់ច្បាប់ព្រះគម្ពីរមរមនផងដែរ ។ ដូចជា អូលីវើរ ដាវីឌ និងម៉ាទីន សាក្សីប្រាំបីនាក់បន្ដនៅស្មោះត្រង់ចំពោះទីបន្ទាល់របស់ពួកគាត់អំពីព្រះគម្ពីរមរមន និងសាក្សីរបស់ពួកគាត់អំពីផ្ទាំងចំណារមាស ។
វិលលាម អ៊ី ម៉័កខ្លេលិន គឺជាអ្នកផ្លាស់ប្រែចិត្តជឿដំបូងមកលើសាសនាចក្រ ដែលបានស្គាល់សាក្សីជាច្រើនអំពីព្រះគម្ពីរមរមនដោយផ្ទាល់ ។ វិលលាម នៅទីបំផុតបានចាកចេញពីសាសនាចក្រ ប៉ុន្តែគាត់បានបន្ដទទួលឥទ្ធិពលដ៏ខ្លាំងមកពីទីបន្ទាល់ដ៏បញ្ចុះបញ្ចូលខ្លាំង ដែលគាត់បានស្ដាប់ឮមកពីពួកសាក្សី ។
ម៉័កខ្លេលិន បានសរសេរនៅចុងបញ្ចប់នៃជីវិតរបស់គាត់ថា « ឥឡូវខ្ញុំនឹងសួរថា តើខ្ញុំនឹងធ្វើដូចម្តេចនឹងមន្ទិលសង្ស័យអំពីសាក្សីដ៏ស្មោះត្រង់ ដែលថ្លែងទីបន្ទាល់ដ៏ឧឡារិក និងសមហេតុផលដូច្នេះយ៉ាងណាបាន ? បុរសទាំងនេះកាលនៅក្នុងជីវិតដ៏ល្អ បានឃើញការនិមិត្តរបស់ទេវតា ហើយបានថ្លែងទីបន្ទាល់របស់ពួកគេទៅកាន់មនុស្សគ្រប់រូប ។ ហើយបុរសប្រាំបីនាក់បានមើលឃើញផ្ទាំងចំណារ ហើយបានកាន់ផ្ទាំងទាំងនោះ ។ ម្ល៉ោះហើយបុរសទាំងនេះគ្រប់រូបបានដឹងថាអ្វីៗដែលពួកគេបានប្រកាសថាជាការពិតដ៏ពិត ។ ហើយពួកគាត់បានប្រកាសដូច្នោះកាលនៅក្មេង ហើយឥឡូវនៅពេលពួកគាត់ចាស់ទៅ ក៏បានប្រកាសរឿងនោះដដែល » ។៨
ទោះជាយើងពុំបានឃើញផ្ទាំងចំណារមាសដូចជាពួកសាក្សីបីនាក់បានឃើញ ក៏យើងអាចទទួលបានកម្លាំងមកពីទីបន្ទាល់របស់ពួកគាត់ផងដែរ ។ ទោះជានៅពេលកេរ្តិ៍ឈ្មោះរបស់ពួកគាត់មានបញ្ហា ហើយសុវត្ថិភាព និងជីវិតរបស់ពួកគាត់ស្ថិតនៅក្នុងការគម្រាមគំហែងដោយសារតែទីបន្ទាល់របស់ពួកគាត់ក្ដី ក៏បុរសទាំងនេះបន្ដនៅស្មោះត្រង់ចំពោះទីបន្ទាល់របស់ពួកគាត់រហូតដល់ទីបញ្ចប់ ដោយក្លាហានសុចរិតផងដែរ ។